ӔЗ РАЙГУЫРДТӔН 1927 азы Канадӕйы, провинци Саскачеваны иу гыццыл горӕты, Уоко, зӕгъгӕ. Нӕ фыд ӕмӕ нӕ мадӕн уыдыстӕм авдӕй – цыппар лӕппуйы ӕмӕ ӕртӕ чызджы. Гъемӕ суанг гыццылӕй базыдтон, бирӕйӕ цӕрын куыд у, уый.

1930-ӕм азты ӕнӕхъӕн дунейы дӕр экономикӕ тынг ӕвзӕр уавӕры уыд. Уыцы рӕстӕг схуыдтой Стыр депресси. Ӕмӕ цы зын цард скодта, уый нӕ бинонтыл дӕр фӕзынд. Фӕлӕ кӕд хъӕздыг нӕ уыдыстӕм, уӕддӕр хӕринагцух никуы уыдыстӕм. Дардтам кӕрчытӕ ӕмӕ иу хъуг, гъемӕ нӕм алкӕддӕр уыди ӕйчытӕ, ӕхсыр, ӕхсырысӕртӕ, цыхт ӕмӕ нӕлхӕ. Ӕмӕ йӕ ӕвӕццӕгӕн бамбӕрстат, нӕ бинонтӕй алкӕмӕн дӕр хӕдзары цавӕрдӕр хӕстӕ кӕй уыд.

Мӕ сабибонтӕ тынг ӕхсызгонӕй ӕрымысын. Хъуыды ма кӕнын, нӕ хӕдзар-иу фӕткъуыты адджын тӕфӕй куыд байдзаг. Мӕ фыд-иу фӕззӕджы горӕтмӕ хойрӕгтӕ уӕй кӕнынмӕ куы ацыд, уӕд-иу нын арӕх ногтынд фӕткъуыты асыкк ӕрбахаста. Алы бон дӕр-иу уыцы донджын фӕткъуытӕй нӕхи хорз федтам!

Мӕ ныййарджытӕ рӕстдзинад фыццаг хатт фехъуыстой, ӕхсӕз азы мыл куы цыди, уӕд. Хабар афтӕ уыд, ӕмӕ мӕ ныййарджытӕн сӕ фыццаг лӕппу, Джонни, куы райгуырд, уымӕй бирӕ нӕ рацыд, афтӕ сын амард. Мӕ мад ӕмӕ мӕ фыд тынг маст кодтой, ӕмӕ сауджыны бафарстой, ныр Джонни кӕм ис, зӕгъгӕ. Уый сын афтӕ, зӕгъгӕ, дам, аргъуыд нӕ уыд ӕмӕ ныр уӕлӕрвты нӕй. Сауджын ма сын афтӕ дӕр загъта, зӕгъгӕ мын куы бафидат, уӕд уын уӕ фырты тыххӕй скувдзынӕн, цӕмӕй уӕлӕрвтӕм ацӕуа. Ахӕм ныхӕстӕ куы фехъуыстаиккат, уӕд куыд кодтаиккат? Мӕ ныййарджытӕ афтӕ фӕфыдӕнхъӕл сты, ӕмӕ уыцы сауджынимӕ дзургӕ дӕр нал кодтой. Фӕлӕ сын уӕддӕр уыцы хъуыды ӕнцой нӕ лӕвӕрдта, нӕ хъӕбул кӕм ис, зӕгъгӕ.

Иубон мӕ мадмӕ кӕцӕйдӕр ӕрбафтыд, Йегъовӕйы Ӕвдисӕнтӕ кӕй рауагътой, иу ахӕм буклет, «Чи амард, уыдон кӕм сты?», зӕгъгӕ, ӕмӕ йӕ уайтагъд бакаст. Мӕ фыд хӕдзармӕ куы ’рбацыд, уӕд ын цингӕнгӕйӕ загъта: «Ӕз ӕй зонын, Джонни кӕм ис! Ныр фынӕй кӕны, фӕлӕ иубон райхъал уыдзӕн». Уыцы изӕр мӕ фыд дӕр уыцы буклет ӕнӕхъӕнӕй бакаст. Библи мӕрдты тыххӕй цы дзуры, уый куы базыдтой, зӕгъгӕ, фынӕй сты ӕмӕ фидӕны райгас уыдзысты, уӕд сӕ зӕрдӕтӕ ӕрсабыр сты (Еккл. 9:5, 10; Хъуыд. 24:15).

Мӕ ныййарджытӕ цы базыдтой, уый фӕрцы нӕ бинонты цард хуыздӕрырдӕм фӕивта ӕмӕ нын стыр ныфс ӕмӕ цины хос фӕци. Мӕ мад ӕмӕ мӕ фыд райдыдтой Йегъовӕйы Ӕвдисӕнтимӕ Библи ахуыр кӕнын ӕмӕ, Уокойы цы гыццыл ӕмбырд уыди, уырдӕм фембӕлдтӕм цӕуын. Уыцы ӕмбырдӕн сӕ фылдӕр уыдысты Украинӕйӕ рацӕугӕ. Бирӕ нӕ рацыд, афтӕ мӕ мад ӕмӕ мӕ фыд хъусын кӕнын дӕр райдыдтой.

Фӕстӕдӕр цӕрынмӕ алыгъдыстӕм Бритайнаг Колумбимӕ, ӕмӕ ныл уым бынӕттон ӕмбырды зӕрдиагӕй бацин кодтой. Ӕхсызгонӕй ӕрымысын, нӕ бинонтӕ-иу хуыцаубоны фембӕлдмӕ «Хъахъхъӕнӕн мӕсыг»-ӕй статья куыд цӕттӕ кодтой, уый. Не ’ппӕт дӕр тынг бауарзтам Йегъовӕйы ӕмӕ Библийы фыст рӕстдзинад. Мӕхи цӕстӕй уыдтон, Йегъовӕйы арфӕдзинады фӕрцы нӕ цард куыд хъӕздыгдӕр кодта, уый.

 Махӕн, сывӕллӕттӕн, ӕнцон нӕ уыд, цӕуыл ӕууӕндӕм, уый тыххӕй иннӕтимӕ ныхас кӕнын. Фӕлӕ нын стыр ӕххуыс уыди иу хъуыддаг: мӕ кӕстӕр хо Евӕимӕ-иу нын хъусын кӕныны фембӕлдмӕ арӕх бахӕс кодтой, цӕмӕй-иу бацӕттӕ кодтаиккам, уыцы мӕй уацамынды ныхас райдайӕн куыд ис, уый. Кӕд ӕфсӕрмыгӕнаг уыдыстӕм, уӕддӕр уый фӕрцы адӕмимӕ Библийы тыххӕй ныхас кӕнын сахуыр стӕм. Ӕз тынг бузныг дӕн, хъусын кӕнын куыд хъӕуы, уый нын кӕй амыдтой, уый тыххӕй!

Нӕ сабибонты ӕхсызгондӕр хабӕрттӕй иу уыд, ӕххӕстрӕстӕг лӕггадгӕнджытӕ-иу нӕм кӕй цардысты, уый. Зӕгъӕм, тынг-иу цин кодтам, нӕ районон цӕстдарӕг Джек Нейтан-иу не ’мбырд куы бӕрӕг кодта, уӕд-иу махмӕ куы баззад, уӕд *. Нӕ зӕрдӕмӕ тынг цыди, цы цымыдисаг хабӕрттӕ-иу дзырдта, уыдонмӕ хъусын – нымӕц дӕр сын нӕ уыд! Зӕрдиагӕй-иу нӕ кӕй раппӕлыд, уый фӕрцы-иу мах дӕр бафӕндыд Йегъовӕйӕн иузӕрдионӕй лӕггад кӕнын.

Мӕ зӕрдыл лӕууы, афтӕ кӕй хъуыды кодтон: «Куы сыстыр уон, уӕд ӕз дӕр ӕфсымӕр Нейтаны хуызӕн хъуамӕ уон». Уӕд мӕ хъуыдыйы кӕрон дӕр нӕ уыди, ӕфсымӕр Нейтаны цӕвиттон мын ӕххӕстрӕстӕг лӕггад кӕнын райдайынӕн кӕй баххуыс кӕндзӕн. 15 азы мыл куы цыди, уӕд мӕхицӕн фидарӕй загътон, Йегъовӕйӕн кӕй лӕггад кӕндзынӕн. Ӕмӕ 1942 азы Евӕимӕ донаргъуыд райстам.

Дыккаг дунеон хӕсты рӕстӕг алчи йӕ бӕстӕйыл тынг ӕнувыд уыди. Не скъолайы ахуыргӕнджытӕй иу, мисс Скотт, зӕгъгӕ, ӕндӕр динтӕм тынг ӕвзӕр цӕстӕй касти, ӕмӕ мын мӕ дыууӕ хойы ӕмӕ ме ’фсымӕртӕй иуы скъолайӕ ратардта. Цӕй тыххӕй куы зӕгъат, уӕд – тырысайӕн табу кӕныныл кӕй нӕ разы кодтой, уый тыххӕй. Уый фӕстӕ мын мӕ ахуыргӕнӕгӕн дӕр загъта, цӕмӕй мӕн дӕр скъолайӕ ратӕра. Фӕлӕ йын мӕ ахуыргӕнӕг загъта: «Мах цӕрӕм сӕрибар бӕстӕйы, ӕмӕ алкӕмӕн дӕр ис уый бар, цӕмӕй ахӕм хъуыддӕгты кӕнӕ архайа, кӕнӕ нӕ». Мисс Скотт уӕддӕр йӕхионыл ныллӕууыд, фӕлӕ йын мӕ ахуыргӕнӕг фидарӕй загъта: «Уый мӕхи хъуыддаг у».

Уӕд ын мисс Скотт загъта: «Нӕ, уый дӕхи хъуыддаг нӕу! Мелитӕйы скъолайӕ куы нӕ ратӕрай, уӕд дыл бахъаст кӕндзынӕн». Мӕ ахуыргӕнӕг мӕ ныййарджытӕн бамбарын кодта, зӕгъгӕ мӕм уыцы хъуыддаг раст нӕ кӕсы, фӕлӕ уын хъуамӕ уӕ чызджы скъолайӕ ратӕрон, науӕд мӕхӕдӕг дӕр ӕнӕ куыстӕй баззайдзынӕн. Гъемӕ мах дӕр самал кодтам, скъолайы кӕй ахуыр кодтой, уыцы ӕрмӕг, цӕмӕй йӕ хӕдзары ахуыр кодтаиккам. Бирӕ нӕ рацыд, афтӕ цӕрынмӕ алыгъдыстӕм ӕндӕр ранмӕ, кӕм цардыстӕм, уырдыгӕй иу-30 километры дарддӕр, ӕмӕ нӕ уым скъоламӕ айстой.

Хӕсты рӕстӕг нын хицауад нӕ литературӕ парахат кӕныны бар нӕ лӕвӕрдта, гъемӕ хӕдзарӕй-хӕдзармӕ хъусын кӕнгӕйӕ немӕ хастам ӕрмӕстдӕр нӕ Библитӕ. Фӕлӕ уый фӕрцы сахуыр стӕм Фыстадӕй арӕхстджындӕрӕй пайда кӕнын, стӕй нӕхӕдӕг дӕр фӕлтӕрдджындӕр кодтам ӕмӕ нӕхи цӕстӕй уыдтам, Йегъовӕ нын куыд ӕххуыс кӕны, уый.

Куыддӕр Евӕимӕ скъола фестӕм, афтӕ райдыдтам пионертӕй лӕггад кӕнын. Фыццаг рӕстӕг куыстон иу стыр дуканийы. Фӕлӕ мӕ зӕрдӕмӕ алкӕддӕр цыди сӕр ӕлвынын ӕмӕ прическӕтӕ кӕнын. Гъемӕ бирӕ нӕ рацыд, афтӕ бацыдтӕн сӕрӕлвынджыты курсытӕм, ӕмӕ дзы фӕахуыр кодтон ӕхсӕз мӕйы. Ахуыры фӕстӕ кусынмӕ бацыдтӕн иу салонмӕ ӕмӕ дзы къуыри  дыууӕ боны куыстон, стӕй ма мӕй дыууӕ хатты мӕхӕдӕг дӕр иннӕты ахуыр кодтон сӕр ӕлвынын. Уый фӕрцы мӕ бон уыди мӕхи дарын дӕр ӕмӕ пионерӕй лӕггад кӕнын дӕр.

1955 азы сфӕнд кодтон ацӕуын Иугонд Штаттӕм, горӕт Нью-Йоркмӕ, ӕмӕ Германимӕ, горӕт Нюрнбергмӕ, цӕмӕй уым байхъуыстаин, «Уӕлахиздзау Паддзахад» чи хуынди, уыцы конгресмӕ. Фӕлӕ цалынмӕ Нью-Йоркмӕ нӕ ацыдтӕн, уӕдмӕ фембӕлдтӕн, сӕйраг хайады чи лӕггад кодта, уыцы ӕфсымӕр Нейтан Норрыл. Хабар афтӕ уыд, ӕмӕ йӕ бинойнагимӕ Канадӕмӕ, Ванкуверы цы конгресс уыди, уырдӕм ӕрцыдысты. Ӕмӕ мын загътой, цӕмӕй Норры бинойнагӕн йӕ сӕр бадзӕбӕхтӕ кодтаин. Гъемӕ мӕ куыст ӕфсымӕр Норры зӕрдӕмӕ афтӕ тынг фӕцыд, ӕмӕ йӕ бафӕндыд мемӕ фембӕлын. Куы ныхас кодтам, уӕд ской кодтон, Германимӕ ацӕуыны размӕ ма Нью-Йорчы дӕр кӕй уыдзынӕн, уый тыххӕй. Ӕмӕ мӕ уӕд ӕфсымӕр Норр Бруклины Вефилмӕ фӕхуыдта, цӕмӕй дзы фараст боны бакуыстаин.

Уыцы балц мын мӕ цард фӕивта. Нью-Йорчы базонгӕ дӕн иу ӕрыгон ӕфсымӕримӕ, Теодор (Тед) Ярач, зӕгъгӕ. Куы базонгӕ стӕм, уымӕй гыццыл фӕстӕдӕр мӕ Тед ӕнӕнхъӕлӕджы афарста: «Пионер дӕ?» Ӕз ын загътон, нӕ, зӕгъгӕ. Ме ’мбал, Лавонн, уый куы айхъуыста, уӕд загъта: «О, пионер у». Тед фӕкуыддӕр ӕмӕ йӕ бафарста: «Уӕдӕ уӕ растдӕр чи у – ды ӕви уый?» Ӕз ын бамбарын кодтон, уый размӕ ӕцӕгдӕр пионерӕй кӕй лӕггад кодтон ӕмӕ та конгрессты фӕстӕ ӕххӕстрӕстӕг кӕй лӕггад кӕндзынӕн.

Тед райгуырд 1925 азы Кентуккийы, Америкӕйы Иугонд Штатты, ӕмӕ донаргъуыд та райста, 15 азы йыл куы цыди, уӕд. Кӕд йӕ бинонтӕй рӕстдзинады фӕндагыл ничи лӕууыд, уӕддӕр дыууӕ азы фӕстӕ райдыдта пионерӕй лӕггад кӕнын. Ӕмӕ уӕдӕй фӕстӕмӕ ӕххӕстрӕстӕг фӕлӕггад кодта 67 азы бӕрц.

1946 азы июлы, 20 азы йыл куы цыди, уӕд, каст фӕци Галаады скъолайы 7-ӕм кълас. Уый фӕстӕ Кливленды, штат Огайойы, лӕггад кодта цӕуӕг цӕстдарӕгӕй. 1951 азы та йӕ снысан кодтой Австралийы филиалы цӕстдарӕгӕй.

Тед дӕр уыди Нюрнберджы конгрессы, ӕмӕ уым дӕр иу цасдӕр рӕстӕг иумӕ арвыстам. Афтӕмӕй нӕ зӕрдӕты уарзондзинады зынг ссыгъд. Мӕ зӕрдӕмӕ тынг цыди, Тедӕн йӕ нысӕнттӕ иууылдӕр Йегъовӕйӕн ӕппӕт удӕй лӕггад кӕнынимӕ баст кӕй уыдысты. Тед уыди удуӕлдай адӕймаг, йӕ лӕггад ын тынг ахсджиаг уыд, фӕлӕ уыимӕ уыди фӕлмӕн ӕмӕ хӕларзӕрдӕ дӕр. Ӕз уыдтон, иннӕтыл йӕхицӕй тынгдӕр кӕй тыхсти. Уыцы конгрессы фӕстӕ Тед аздӕхт Австралимӕ, ӕз та – Ванкувермӕ. Фӕлӕ кӕрӕдзимӕ писмотӕ фыстам.

Тед Австралийы фӕлӕггад кодта фондз азы, ӕмӕ стӕй Иугонд Штаттӕм ӕрыздӕхт. Уый фӕстӕ та Ванкувермӕ ’рцыд ӕмӕ уым пионерӕй лӕггад кодта. Тынг ӕхсызгон мын уыди, мӕ бинонты зӕрдӕмӕ кӕй фӕцыд, уый. Мӕ хистӕр ӕфсымӕр Майкл мӕ алцӕмӕй дӕр хъахъхъӕнгӕ кодта, ӕмӕ-иу искӕцы ӕрыгон ӕфсымӕры зӕрдӕмӕ куы фӕцыдтӕн, уӕд-иу мын тынг тарст. Фӕлӕ Тед уайтагъд йӕ зӕрдӕмӕ фӕцыд. Иухатт мын афтӕ: «Мелитӕ, хорз адӕймаг у, ӕмӕ йӕм дӕ хъус фӕдар, ма йӕ ауадз».

Мӕнӕн дӕр Тед мӕ зӕрдӕмӕ тынг цыди. Нӕ цард баиу кодтам 1956 азы 10 декабры. Фыццаг рӕстӕг Тедимӕ пионертӕй лӕггад кодтам Ванкуверы, стӕй та Калифорнийы. Уый фӕстӕ Теды снысан кодтой районон цӕстдарӕгӕй ӕмӕ лӕггад кодтам Миссури ӕмӕ Арканзасы. 18 азмӕ ӕрзылдыстӕм Иугонд Штаттӕн йӕ фылдӕр хайыл ӕмӕ-иу нын алы къуыри дӕр уыди ног хӕдзар. Уацамынды-иу ныл ӕрцыди бирӕ цымыдисаг хабӕрттӕ, стӕй нын хотӕ ӕмӕ ’фсымӕртимӕ лӕггад кӕнын дӕр тынг ӕхсызгон уыди. Ӕмӕ кӕд алы къуыри дӕр иу ранӕй иннӕ ранмӕ цӕуын ӕнцон нӕ уыд, уӕддӕр нын нӕ лӕггад стыр циндзинад хаста.

Тедӕн Йегъовӕимӕ цы хӕлардзинад уыд, уымӕ куыдфӕндыйы цӕстӕй никуы касти, ӕмӕ дзы  уый мӕ зӕрдӕмӕ уӕлдай тынгдӕр цыди. Тед тынг аргъ кодта, йӕ бон кӕй у, Дун-дунейы ӕппӕты кадджындӕр чи у, уымӕн лӕггад кӕнын. Мах тынг уарзтам Библи иумӕ кӕсын ӕмӕ йӕ ахуыр кӕнын. Ӕхсӕв-иу фынӕйы размӕ нӕ хуыссӕны раз нӕ зонгуытыл ӕрлӕууыдыстӕм, ӕмӕ-иу Тед Йегъовӕмӕ скуывта. Уый фӕстӕ та-иу хицӕнтӕй скуывтам. Хатт-иу Тед ӕхсӕв дӕр сыстад, ногӕй та-иу йӕ зонгуытыл ӕрлӕууыд ӕмӕ-иу йӕхинымӕр бирӕ фӕкуывта, ӕмӕ-иу уӕд зыдтон, цыдӕр ахсджиаг хъуыддагыл кӕй тыхсы. Мӕ зӕрдӕмӕ тынг цыди, алцыдӕр-иу ӕй Йегъовӕйӕн радзурын кӕй фӕндыд – гыццыл хъуыддаг уыдаид ӕви стыр.

Нӕ цард куы баиу кодтам, уымӕй цалдӕр азы куы рацыд, уӕд мын Тед загъта, Ӕрымысӕн изӕры нысӕнттӕй аходын кӕй райдайдзӕн. «Бирӕ фӕкуывтон,– загъта Тед,– цӕмӕй ӕппындӕр ма дызӕрдыг кӕнон, уый Йегъовӕйы фӕндон кӕй у». Раст уын куы зӕгъон, уӕд тынг нӕ бадис кодтон, Хуыцау ӕй кӕй равзӕрста, цӕмӕй йын уӕлӕрвты лӕггад кӕна. Ӕмӕ йӕ мӕхицӕн стыр кадыл нымадтон, мӕ бон кӕй уыд Чырыстийы ӕфсымӕртӕй сӕ иуӕн ӕххуыс кӕнын (Матф. 25:35–40).

1974 азы ӕрцыд, ӕнхъӕл дӕр кӕмӕн нӕ уыдыстӕм, ахӕм хабар – Теды снысан кодтой Йегъовӕйы Ӕвдисӕнты Разамонӕг советмӕ. Уымӕй гыццыл фӕстӕдӕр райдыдтам Бруклины Вефилы лӕггад кӕнын. Тед ӕххӕст кодта, Разамонӕг советы йыл цы хӕстӕ уыд, уыдон, ӕз та дзы куыстон куы ӕфснайӕгӕй, куы та – сӕрӕлвынӕгӕй.

Теды хӕстӕм хауди алыхуызон филиалтӕ бӕрӕг кӕнын дӕр. Уӕлдай тынгдӕр ӕй тыхсын кодта, хъусын кӕныны хъуыддаг Скӕсӕн Европӕйы коммунистон бӕстӕты куыд цӕуы, уый. Иухатт нын кӕдӕй-уӕдӕй отпусчы ацӕуын бантыст ӕмӕ Швецимӕ ацыдыстӕм. Ӕмӕ мын иубон Тед афтӕ: «Мелитӕ, Польшӕйы нӕ хотӕ ӕмӕ не ’фсымӕртӕн хъусын кӕныны бар нӕй, ӕмӕ мӕ тынг фӕнды, искуыд сын куы баххуыс кӕнин». Гъемӕ визӕтӕ райстам ӕмӕ Польшӕмӕ ацыдыстӕм. Уым Тед фембӕлд, уыцы бӕстӕйы хъусын кӕныны хъуыддагмӕ йӕ хъус чи дардта, уыцы ӕфсымӕртимӕ. Цӕмӕй сын сӕ ныхас мачи фехъуыстаид, уый тыххӕй тезгъо кӕнынмӕ ацыдысты, ӕмӕ афтӕмӕй ныхас кодтой. Цыппар боны дӕргъы-иу фембӕлдысты ӕмӕ-иу тынг бирӕ фӕныхас кодтой. Ӕз уыдтон, Тедӕн хотӕ ӕмӕ ’фсымӕртӕн баххуыс кӕнын куыд ӕхсызгон уыди, уый, ӕмӕ ӕз дӕр цин кодтон.

Польшӕмӕ дыккаг хатт ӕрцыдыстӕм 1977 азы ноябры. Уӕд Фредерик Френц, Дэниел Сидлик ӕмӕ Тед Польшӕйы фыццаг хатт уыдысты Разамонӕг советы номӕй. Ӕмӕ дзы кӕд уыцы рӕстӕг дӕр хъусын кӕныны бар нӕма уыди, уӕддӕр Разамонӕг советы минӕвӕрттӕн сӕ бон баци, цӕмӕй цалдӕр горӕты фембӕлдаиккой цӕстдарджытимӕ, пионертимӕ ӕмӕ, Йегъовӕйӕн бирӕ азты дӕргъы чи лӕггад кодта, уыцы хотӕ ӕмӕ ӕфсымӕртимӕ.

Иннӕ аз Милтон Хеншель ӕмӕ Тед Польшӕмӕ куы ’рцыдысты, уӕд фембӕлдысты хицауады кусджытимӕ – уӕдмӕ нын нӕ организацимӕ ӕмӕ,  цы куыст кӕнӕм, уымӕ хуыздӕр цӕстӕй кӕсын райдыдтой. 1982 азы Польшӕйы хицауад не ’фсымӕртӕн бар радта, цӕмӕй иубонон конгресстӕ ауагътаиккой. Иннӕ аз та стырдӕр конгресстӕ дӕр ауагътой, сӕ фылдӕр – ӕххуырсгӕ кӕй бакодтой, ахӕм бынӕтты. 1985 азы нын Польшӕйы сӕрибарӕй хъусын кӕныны бар нӕма уыди, фӕлӕ уӕддӕр ӕфсымӕртӕн бар радтой, цӕмӕй стыр стадионты цыппар облӕстон конгрессы ауагътаиккой. Уый фӕстӕ, 1989 азы, ноджы стырдӕр конгресстӕ ауадзын куы пълан кодтой, уӕд, Польшӕйы хицауад Йегъовӕйы Ӕвдисӕнты регистраци скодта. Тед уыцы хабарыл куыд фӕцин кодта, афтӕ, ӕвӕццӕгӕн, ницӕуыл.

2007 азы Хуссар Африкӕйы хъуамӕ филиал снывонд кодтаиккой, ӕмӕ Тедимӕ уырдӕм цыдыстӕм. Фӕлӕ Английы куы уыдыстӕм, уӕд йӕ туджы ӕлхъывдад схызт, ӕмӕ йын дохтыр загъта, хуыздӕр ын кӕй уыдзӕн йӕ балц фӕстӕдӕрмӕ аргъӕвын. Тед куы фӕхуыздӕр, уӕд Иугонд Штаттӕм аздӕхтыстӕм. Фӕлӕ йӕ цалдӕр къуырийы фӕстӕ инсульт ныццавта, ӕмӕ йӕ рахиз фарс нал куыста.

Тед тынг сындӕггай дзӕбӕх кодта. Фыццаг рӕстӕг йӕ бон офисмӕ цӕуын нӕ уыд. Фӕлӕ уӕддӕр хорз, ӕмӕ йӕ бон дзурын уыди. Кӕд ахӕм уавӕры уыди, уӕддӕр архайдта йӕ хӕстӕ ӕххӕст кӕныныл. Суанг ма-иу, Разамонӕг советӕн алы къуыри цы фембӕлд вӕййы, уым дӕр архайдта – кӕм цардыстӕм, уыцы къомнӕтмӕ-иу ӕм телефонӕй бадзырдтой.

Тедмӕ Вефилы нӕ дохтыртӕ тынг дзӕбӕх кастысты, ӕмӕ сӕ уый тыххӕй тынг бузныг уыди. Сабыргай йӕ къахыл слӕууыд, фӕлӕ, кӕй зӕгъын ӕй хъӕуы, раздӕрау цӕрдӕг нал уыд. Йӕ бон уыди йӕ хӕстӕй кӕцыдӕртӕ ӕххӕст кӕнын, стӕй йӕ ныфс сӕттын дӕр никуы бауагъта.

Ӕртӕ азы фӕстӕ йӕ дыккаг хатт инсульт ныццавта, ӕмӕ 2010 азы 9 июны, ӕртыццӕджы, ӕрӕнцад. Ӕз алкӕддӕр ӕмбӕрстон, иу бон Тедӕн йӕ зӕххон цард кӕй фӕуыдзӕн, фӕлӕ мын уӕддӕр ӕнӕ уымӕй афтӕ зын у, афтӕ тынг ӕй мысын, ӕмӕ йын зӕгъӕн дӕр нӕй. Куыдфӕнды ма уа,– Йегъовӕйӕн алы бон дӕр бузныг фӕдзурын, мӕ бон Тедӕн ӕххуыс кӕнын кӕй уыди, уый тыххӕй. Иумӕ ӕххӕстрӕстӕг фӕлӕггад кодтам 53 азӕй фылдӕр. Тед мын тынг баххуыс кодта, цӕмӕй мӕ уӕларвон Фыдмӕ баввахс уыдаин. Ӕз ӕппындӕр нӕ дызӕрдыг кӕнын, ныр Тед йӕ ног бынаты зӕрдӕрухсӕй кӕй лӕггад кӕны.

Мӕ зынаргъ цардӕмбалимӕ иумӕ бирӕ азты дӕргъы ӕвӕллайгӕйӕ лӕггад кодтам ӕмӕ уыдыстӕм амондджын. Ахӕм царды фӕстӕ мын абоны уавӕрты ӕнцон нӕу. Ӕз ӕмӕ Тед тынг уарзтам, Вефилмӕ ӕмӕ-иу ӕмбырдмӕ чи ’рбацыд, уыдоныл бацин кӕнын. Ныр мын Тед нал ис, стӕй мӕхӕдӕг дӕр раздӕры Мелитӕ нал дӕн, ӕмӕ адӕмы ’хсӕн уыйбӕрц нал вӕййын. Фӕлӕ мын уӕддӕр стыр цины хос у, Вефилы ӕмӕ ӕмбырды мӕ зынаргъ хотӕ ӕмӕ ӕфсымӕртимӕ кӕй вӕййын, уый. Вефилы лӕггад кӕнын се ’нцонтӕй нӕу, фӕлӕ ма уымӕй хуыздӕр цы хъуамӕ уа, ӕмӕ Хуыцауӕн, уый куыд фӕнды, афтӕ лӕггад кӕнай! Хъусын кӕнын дӕр раздӕрау тынг уарзын. Кӕд тагъд афӕллайын ӕмӕ къахыл лӕууын дӕр мӕ бон бирӕ нӕу, уӕддӕр мын стыр цины хос у уынджы хъусын кӕнын ӕмӕ адӕмимӕ Библи ахуыр кӕнын.

Дунейы цы ӕвирхъау хабӕрттӕ цӕуы, уымӕ куы фӕкӕсын, уӕд фӕхъуыды кӕнын, зӕгъын, куыд амондджын дӕн, Йегъовӕйӕн ахӕм хорз цардӕмбалимӕ кӕй лӕггад кодтон! Йегъовӕйы арфӕдзинад мын мӕ цард ӕцӕгдӕр схъӕздыг кодта (Ӕмб. 10:22).