MI A nace na aña 1927 den e stad chikito di Wakaw, Saskatchewan, Canada. Mi tata cu mi mama tabatin shete yiu; cuater mucha homber y tres mucha muher. Pesey, for di chikito mi a custumbra di tin hende rond di mi.

Nos famia a sinti e efecto di e Gran Depresion, esta, e crisis economico di e decada di 1930. Nos no tabata rico, pero tampoco nos no tabata falta cuminda. Nos tabatin algun galiña y un baca, pesey semper nos tabatin webo, lechi, crema di lechi, keshi y manteca. Manera bo por imagina, nos tur tabatin trabou di haci.

Mi tin hopi recuerdonan bunita di e tempo ey, manera e dushi holo di appel cu tabatin na cas. Mi ta corda cu den tempo di herfst, ora mi tata tabata bay den stad pa bende productonan di nos boerderij, hopi bes e tabata bin bek cu un caha yen di appel fresco. Mi tabata gusta cu tur dia nos por a come un dushi appel.

Mi tabatin seis aña ora cu mi mayornan a scucha di e berdad pa prome biaha. Nan prome yiu homber Johnny a fayece poco despues cu el a nace. Den nan tristeza nan a puntra nan pastoor: “Unda Johnny ta?” E pastoor a bisa nan cu e baby no a batisa, pesey e no a bay cielo. Mas bien, e tabata den limbo. E pastoor a hasta bisa mi mayornan cu si nan pag’e, e lo por resa pa Johnny sali for di limbo y bay cielo. Con abo lo a sinti? Mi tata cu mi mama tabata asina desapunta cu nunca mas nan a papia cu e pastoor. Pero ainda nan tabata puntra nan mes unda Johnny ta.

Un dia mi mama a haya un foyeto chikito titula Where Are the Dead?, publica pa testigonan di Jehova. Di biaha el a les’e. Ora cu mi tata a yega cas, mesora mi mama a bis’e: “Mi sa unda Johnny ta. E ta drumi awor, pero un dia e lo lanta.” E anochi ey mi tata a lesa henter e foyeto ey. Mi mayornan a haya consuelo ora nan a siña cu Bijbel ta bisa cu e mortonan ta drumi y cu lo bay tin un resureccion den futuro.—Ecl. 9:5, 10; Echo. 24:15.

Loke nan a haya sa a cambia nos bida, esey a trece tanto consuelo como felicidad. Nan a cuminsa studia Bijbel cu e Testigonan, y nan a asisti na e reunionnan di e congregacion chikito di Wakaw. Mayoria di e rumannan eynan a bin di Ucrania. No a dura mucho cu mi mayornan a cuminsa predica.

Y poco despues di esey, nos a muda bay British Columbia. Eynan nos congregacion nobo a ricibi nos cu hopi amor. Ta dushi ora mi corda bek con nos famia tabata prepara e les di Toren di Vigilancia pa e reunionnan di diadomingo. Nos tur tabata desaroya un amor profundo pa Jehova y pa e berdadnan biblico. Mi por a mira cu Jehova a bendiciona nos y cu nos tabata mas feliz.

 Como mucha no tabata facil pa nos papia cu otro hende tocante nos creencia. Algo cu a yuda nos hopi tabata cu mayoria di biaha ami y mi ruman Eva tabata prepara e presentacion di luna pa sirbishi, y nos tabata haci e demostracion ey den e Reunion di Sirbishi. Aunke nos tabata timido, esaki tabata un bon manera pa nos siña papia cu otro hende tocante Bijbel. Mi ta hopi agradecido pa e entrenamento cu nos a haya pa predica.

Loke mas mi tabata gusta tempo mi tabata chikito ta ora cu e rumannan den e trabou di tempo completo tabata keda na nos cas. Por ehempel, nos tabata gusta ora cu nos superintendente di circuito Jack Nathan bishita nos congregacion y keda na nos cas. * E tabatin masha hopi experencia pa conta, y nos tabata gusta scucha nan. Ora e tabata elogia nos, nos tabata sinti nos mes anima pa sigui sirbi Jehova fielmente.

Mi tabata pensa: Ora mi bira grandi, mi kier bira mescos cu Ruman Nathan. Ta despues mi a realisa cu su ehempel a prepara mi pa un carera den e trabou di tempo completo. Ora cu mi tabatin 15 aña, mi tabata determina pa sirbi Jehova. Na aña 1942, ami y Eva a batisa.

Durante Segundo Guera Mundial hende a bira hopi patriotico, pesey juffrouw Scott, cu tabata masha fanatico, a schors mi dos ruman muhernan y un di mi ruman hombernan for di scol. Dicon? Pasobra nan a nenga di saluda e bandera. Despues el a yama mi juffrouw y a bis’e pa e schors ami tambe. Pero mi juffrouw a bis’e: “Nos ta biba den un pais unda hende por dicidi pa nan mes kico nan ta kere, y nan tin e derecho di keda sin participa den ceremonianan patriotico.” A pesar di hopi presion di juffrouw Scott, el a bis’e firmemente: “Esaki ta mi decision.”

Juffrouw Scott a bis’e: “No, e no ta bo decision. Si bo no schors Melita, mi lo entrega un keho contra bo.” Mi juffrouw a splica mi mayornan cu si e kier keda cu su trabou, e mester schors mi, maske e sa cu esey no ta e cos corecto pa haci. Asina mes, nos a haya bukinan di scol pa haci les na cas. Poco despues, nos a muda mas o menos 32 kilometer mas leu, unda nos por a bay un otro scol.

Durante e añanan di guera nos publicacionnan tabata prohibi, pero toch nos tabata predica cu nos Bijbel. Como resultado, nos a bira mas habil den uza Bijbel ora di predica. Esey a yuda nos crece spiritualmente, y a laga nos mira con Jehova a sostene nos.

Asina cu ami y Eva a caba scol, nos a cuminsa cu e trabou di pionero. Na principio mi a traha na un tienda. Cu tempo, mi a sigui un curso di pelukeria pa seis luna, y esey tabata algo cu mi tabata gusta haci na cas. Pa mi por a cubri mi gastonan y sigui den e trabou di tempo completo, mi tabata traha dos biaha pa siman na un beauty salon y duna les dos biaha pa luna.

Na aña 1955, mi kier a bay e asamblea “Reino Triunfante” na New York, Merca, y na Nuremberg, Alemania. Prome cu mi a bay New York, mi a conoce Ruman Nathan Knorr. E cu su casa a bay e congreso na Vancouver, Canada. Durante nan  bishita, e esposa di Ruman Knorr a pidi mi pa drecha su cabey. Ruman Knorr a keda contento cu e resultado di mi trabou, y e kier a conoce mi. Ora nos tabata papia, mi a bis’e cu mi tabata plania pa bay New York prome cu mi biaha pa Alemania. El a invita mi pa traha nuebe dia na Betel di Brooklyn.

E biahe ey a cambia mi bida. Na New York mi a conoce un ruman hoben cu yama Theodore (Ted) Jaracz. Poco despues cu mi a cera conoci cu ne, pa mi sorpresa el a puntra mi: “Bo ta un pionero?” Mi a contest’e: “No.” Mi amiga LaVonne, cu a scucha nos combersacion, a draai bis’e: “Claro cu si!” Un poco confundi, Ted a puntra LaVonne: “Wel, ken sa mihor? Abo of e?” Mi a splic’e cu mi tabata pionero y cu mi kier cuminsa atrobe asina cu mi bin bek for di e congresonan.

Ted a nace na aña 1925 na Kentucky, Merca. El a batisa ora e tabatin 15 aña. Aunke niun di su famia no a drenta den e berdad, dos aña despues el a bira un pionero regular. Asina el a cuminsa un carera den e trabou di tempo completo cu a dura casi 67 aña.

Na juli di aña 1946, cu edad di 20 aña, Ted a gradua for di e di shete klas di Scol Biblico di Galaad di Watchtower. Despues di esey, el a sirbi como superintendente biahero na Cleveland, Ohio. Mas o menos cuater aña despues, na 1951, el a haya un asignacion pa sirbi como sirbidor di sucursal na Australia.

Ted tambe a bay e congreso na Nuremberg, Alemania, y eynan nos a pasa poco tempo hunto. Nos a cuminsa enamora. Mi tabata hopi contento cu su meta tabata pa sirbi Jehova cu henter su alma. E tabata un persona serio y responsabel pero a la bes bondadoso y amabel. Semper e tabata pone interes di otronan prome. Despues di e congreso, Ted a bay Australia y ami a bay bek Vancouver, pero nos a keda den contacto cu otro door di skirbi carta.

Despues di mas o menos cinco aña na Australia, Ted a bolbe Merca y despues el a bay sirbi como pionero na Vancouver. Ora mi famia a conoce Ted, nan a gust’e masha hopi. Michael, mi ruman homber mayo, semper kier a proteha mi, y hopi biaha e tabata preocupa ora un ruman homber mustra interes den mi. Sinembargo, Michael a bay bon cu Ted. El a bisa: “Melita, e ta un bon homber. Trat’e bon pa bo no perd’e.”

Ami tambe a cuminsa gusta Ted masha hopi. Nos a casa dia 10 di december 1956. Nos a traha hunto como pionero na Vancouver, despues na California, y despues nos a haya un asignacion pa traha den e trabou di circuito na Missouri y Arkansas. Pa mas o menos 18 aña, tur siman nos tabata keda na diferente cas segun cu nos tabata haci e trabou di superintendente biahero den gran parti di Merca. Nos tabatin hopi experencianan bunita di sirbishi, y tambe dushi asociacion cu nos rumannan. Nos a disfruta di e trabou aki, aunke cu tur siman nos mester a muda di un luga pa otro.

Algo cu mi tabata gusta di Ted ta cu semper el a balora su relacion cu Jehova y su sirbishi sagrado. Nos tabata gusta lesa y studia Bijbel hunto. Prome cu nos bay drumi, nos tabata hinca rudia banda di cama, y e tabata haci oracion pa nos. Despues nos tabata haci nos mes oracion. Semper mi tabata sa ora cu algo serio tabata preocupa Ted. Pasobra e tabata baha for di cama, hinca rudia atrobe y haci oracion pa basta rato den silencio. Mi a admir’e pasobra e ta haci oracion tocante tur asunto, sea grandi of chikito.

 Algun aña despues cu nos a casa, Ted a bisa mi cu e lo bay cuminsa tuma di e emblemanan na Memorial. El a bisa: “Mi a haci oracion intenso tocante esaki pa mi ta sigur cu mi ta haci loke Jehova kier.” No a sorprende mi cu el a ser ungi cu e spirito di Dios pa por sirbi den cielo. Pa mi tabata un privilegio di por a apoya un ruman di Cristo.—Mat. 25:35-40.

Pa nos sorpresa, na 1974, Ted a haya invitacion pa bira miembro di e Cuerpo Gobernante di testigonan di Jehova. Cu tempo, nos a bay sirbi na Betel di Brooklyn. Mientras cu Ted tabata cumpli cu su responsabilidadnan, ami tabata traha como housekeeper of den e beauty salon.

Como parti di su responsabilidadnan, Ted tabata asigna pa bishita varios sucursal. E tabata specialmente interesa den e trabou di predica den paisnan unda cu esaki tabata prohibi. Por ehempel, paisnan manera Oost Europa cu tabata bou di control di Union Sovietico. Na Suecia, durante un vakantie cu nos echt tabatin mester, Ted a bisa: “Melita, e trabou di predica ta prohibi na Polonia. Mi tin hopi gana di bay eynan pa yuda e rumannan.” Pues, nos a haya visa y nos a bay Polonia. Ted a topa cu algun ruman homber cu tabata atende cu e trabou di predica. Nan a cana bay un tiki leu pa niun hende scucha loke nan tabata papia. Pa cuater dia nan a keda reuni pa oranan largo, pero mi tabata contento di mira con satisfecho Ted tabata di por a yuda su famia spiritual.

E siguiente biaha cu nos a bishita Polonia tabata na november 1977. F. W. Franz, Daniel Sydlik y Ted a haci e prome bishita oficial como miembro di e Cuerpo Gobernante. Aunke nos trabou tabata prohibi ainda, nan por a bay varios stad pa papia cu superintendentenan, pioneronan y rumannan cu tabatin hopi aña den berdad.

E siguiente aña, Milton Henschel y Ted a bishita Polonia. Nan a reuni cu algun funcionario di gobierno cu a cuminsa mustra un actitud mas tolerante pa cu nos y nos actividadnan. Na 1982, e gobierno di Polonia a permiti e rumannan tene asambleanan di un dia. Un aña despues a tene congresonan mas grandi di cua mayoria tabata na luganan di huur. Aunke e trabou ainda tabata prohibi na 1985, gobierno a permiti nos tene cuater congreso den stadionnan grandi. Na mei 1985, mientras cu nos tabata haci plannan pa tene congresonan hasta mas grandi, e gobierno di Polonia a duna reconocemento legal na testigonan di Jehova. E noticia ey a haci Ted masha contento mes.

Na aña 2007, nos tabata biahando pa asisti na e dedicacion di e sucursal na Sur Africa. Sinembargo, ora cu nos a yega Inglatera, Ted su presion tabata halto, y dokter a conseh’e pa pospone su biahe. Despues cu Ted a recupera nos a bolbe Merca. Pero un par di siman despues, el a haya un atake celebral cu a laga e banda drechi di su curpa paralisa.

Aunke Ted su recuperacion a bay slow y e no por a bay oficina pa un tempo, toch nos tabata contento cu e por papia normal. A pesar cu e no por a haci mucho, el a purba di sigui cu su rutina. Por ehempel, for di nos camber e por a participa, via telefon, den e reunionnan semanal di Cuerpo Gobernante.

Ted tabata hopi agradecido cu e por a haya un excelente tratamento di fisioterapia na Betel mes. Pocopoco el a cuminsa move atrobe, y asina e por a cumpli cu algun di su asignacionnan. Semper el a mantene su goso.

Tres aña despues, el a haya un otro atake celebral y a fayece riba diaranson 9 di juni 2010. Maske mi tabata sa cu un dia Ted lo mester a muri pa e por bay cielo, no tin palabra pa describi cuanto dolor su morto a causa mi. Mi ta haya hopi falta di dje. Pero mi ta gradici Jehova tur dia pa loke mi por a haci pa apoya Ted. Nos tabatin e privilegio di sirbi 53 aña hunto den e trabou di tempo completo. Mi ta hopi agradecido na Jehova pa e manera cu Ted a yuda mi hala mas cerca di mi Tata celestial. Mi ta sigur cu su asignacion nobo ta dun’e hopi goso y satisfaccion.

Mi a pasa hopi aña dushi cu mi esposo, y semper nos tabatin hopi cos di haci. Pesey no ta facil pa mi adapta na e retonan nobo den mi bida. Nos tabata gusta conoce hendenan nobo cu tabata bishita Betel y nos congregacion. Awor cu mi kerido Ted no t’ey mas y mi no ta mes fuerte cu antes, mi no por asocia mucho mas cu otronan. Asina mes, mi ta disfruta di por ta hunto cu mi rumannan na Betel y na congregacion. E rutina di Betel no ta facil, pero mi ta feliz di por ta aki sirbiendo Jehova. Y ainda mi ta stima e trabou di predica. Aunke mi no por para hopi, mi ta gusta predica riba caya y dirigi estudionan di Bijbel.

Ora mi wak tur e cosnan malo cu ta sosode rond mundo, mi ta contento cu mi por a sirbi Jehova hunto cu mi dushi esposo. E bendicion di Jehova a haci mi realmente feliz.—Prov. 10:22.