SIULASON NI MAJALAH ON | ADONG DO LABANA MARTANGIANG?
Boasa Hita Martangiang?
”Ahu sahalak parjuji. Martangiang do ahu asa boi monang. Alai ndang hea ditangihon.”
—Samuel, * Kenya.
”Di singkola, sude do hami disuru asa mangapil tangiang.”
—Teresa, Filipina.
”Martangiang do ahu tingki adong hasusaan. Hupangido ma asa disesa dosangku jala gabe halak Kristen na denggan ahu.”
—Magdalena, Ghana.
Hata ni si Samuel, si Teresa, dohot si Magdalena, patuduhon boasa nasida martangiang, i ma naeng dumenggan sian na asing. Adong halak martangiang sian ias ni rohana, alai na deba ndang songon i. Nang pe songon i, martangiang do nasida asa lulus marsingkola, asa monang tim olahraga hasurungan ni nasida, asa ditogutogu Debata keluargana, jala godang dope na asing. Marjuta halak mangkilala porlu do martangiang. Sasintongna, halak na so maragama pe martangiang do.
Jotjot do hamu martangiang? Boasa? Jotjot manang ndang hamu martangiang, ra sungkunsungkun do hamu, ”Adong do labana martangiang? Adong do na manangihon?” Sahalak baoa manurat, molo tangiang i ”holan terapi . . . songon na mangkatai tu dengke na di kolam.” Ahli kesehatan pe mandok molo tangiang i songon ”ubat alternatif.” Holan hasomalan do tangiang manang adong do labana lobi sian ubat terapi?
Dipatorang do di Bibel molo tangiang lobi sian ubat terapi. Bibel paboahon adong do na manangihon tangiang ni halak na tigor. Tutu do i? Taida ma di artikel na mangihut.
^ par. 3 Pigapiga goar nunga diganti.
