LO KOUVERTIR | ESKI I VREMAN VO LAPENN PRIYE?

Akoz dimoun i priye?

“Mon ti kontan zwe larzan en kantite. Mon ti priye pour vin ris, me sa pa’n zanmen arive.”​—Samuel, * Kenya.

“Kot lekol nou ti zis bezwen resit e aprann parker bann lapriyer ki nou ti ganny ansennyen.”​—Teresa, Filipin.

“Mon ti priye ler mon ti dan problenm. Mon ti priye pour mon pese ganny pardonnen e pour vin en pli bon Kretyen.”​—Magdalene, Gana.

Sa ki Samuel, Teresa ek Magdalene in dir i montre ki i annan en kantite rezon akoz dimoun i priye, par kont i annan serten lapriyer ki pli diny ki lezot. I annan dimoun ki fer lapriyer senserman, me pour serten zot lapriyer pa sorti dan fon zot leker. Toudmenm, ki swa zot priye pour pas zot legzanmen kot lekol, pour zot tim prefere gannyen, pour ganny gidans Bondye dan zot lavi fanmir oubyen pour lezot rezon ankor, plizyer santenn milyon dimoun i santi sa nesesite pour priye. Annefe, i annan bann serve ki montre ki menm dimoun ki napa en larelizyon i priye regilyerman.

Eski ou priye? Si wi, lo kwa ou priye? Ki swa ou annan labitid priye oubyen non, petet ou kapab demann ou lekor: ‘Eski i vreman vo lapenn priye? Eski i annan enn ki pe ekoute?’ En ekriven ti dir ki lapriyer i zis “en kalite terapi . . . parey ler ou pe koz avek ou pti pwason dan akwaryonm.” Serten lotorite medikal i annan menm pwennvi, zot dir ki lapriyer i en “lot kalite terapi natirel.” Eski lapriyer bann dimoun i zis dan vid oubyen eski zot ganny en serten byenfe ler zot priye?

De lot kote, Labib i fer resorti ki lapriyer i plis ki en form terapi. I dir nou ki i annan enn ki pe vreman ekout bann lapriyer ki ganny fer dan sa bon fason e pour sa bon rezon. Eski sa i vre? Annou vwar laprev.

[Not anba lo paz]