ATUN TE MAEKATINE | KONA N REKE TE IBUOBUOKI MAN TE TATARO?
Bukin Tera Bwa A Tataro Aomata?
“I tautoronaki n te kemboro. I tataro bwa e na reke kaniwangau. Ma e tuai riki aei nakoiu.”—Samuel, * Kenya.
“Ti kamatenanoi tataro ake ti reiakin n te reirei.”
—Teresa, Biribin.
“I tataro ngkana I kaaitara ma kangaanga, kabwaraan au bure ao ngkana N na riki bwa te Kristian ae raoiroi.”—Magdalene, Ghana.
E oti n aia taeka Teresa ao Magdalene bwa a kakaokoro bukin te bae a tataroia aomata ao iai naba ake a raraoi nanoia nakoia ake tabeman. Iai aika a tataro ma nanoia ni koaua ao iai naba aika akea nanoia iai. E ngae ngke a tataro bwa a na bwaati n aia ukeuke ke a na tokanikai aia tiim n te takaakaro ke ibukin ana kaetieti te Atua n te maiu n utu ke bukina riki aika bati, e oti iai bwa a boni kainnanoa te tataro aomata aika mirion ma mirion mwaitiia. E kakoauaaki man te kakaae bwa a katoatai naba n tataro aomata ake a aki taua te Aro.
Ko tatataro? Ngkana ngaia, tera ae ko tataroia? Ngkana ko tatataro ke ko aki, ko na bae n iango ni kangai: “E kona n reke te ibuobuoki n te tataro? Iai ae ongoraei tataro?” E taekina ana iango temanna te tia kororongorongo ibukin te tataro bwa bon “te bwainnaoraki . . . ae ai aron ae ko taetaenikawai ma am man te ika.” A iangoia naba mataniwi n te onnaoraki bwa te tataro bon te “aeka ni bwainnaoraki ae kaokoro.” E koaua bwa te tataro bon tii te bae a tataneiai iai aomata, ke tii ibukini marurungia?
Ni kaitaraan anne, e taekinaki n te Baibara bwa e bati riki ae nanonaki n te tataro nakon ae a iangoaia tabeman bwa te bwainnaoraki ae kaokoro. Ti tuangaki bwa iai ae e ongoraei tataro ngkana a karaoaki n angaia aika eti ao ni kaineti ma bukina aika riai. E koaua aei? Ti na noria.
^ bar. 3 A a bitaki aara tabeua.
