TSHIENA-BUALU TSHINENE | KUSAMBILA KUDIKU NE MUSHINGA ANYI?
Bua tshinyi bantu batu basambila
Samuel * wa mu Kenya udi wamba ne: “Mvua munayi munene wa manaya a makuta. Mvua nsambila bua kupeta makuta a bungi, kadi tshitu anu muanji kuapeta to.”
Teresa wa mu Philipines udi wamba ne: “Mu kalasa, mudimu wetu uvua anu wa kuambulula masambila makuata ku muoyo avuabu batulongesha.”
Magdalene wa mu Ghana udi wamba ne: “Ntu nsambila pandi mu ntatu. Ntu nsambila bua Nzambi amfuile luse bua mpekatu yanyi ne bua ngikale muena Kristo muimpe.”
Malu adi Samuel, Teresa ne Magdalene bambe aa adi aleja ne: bantu batu basambila bua malu a bungi, amue mikale ne mushinga kupita makuabu. Bamue bantu batu basambila ne muoyo mujima, kadi bakuabu anu pa mutu pa mutu. Nansha mudibu mua kusambila bua kukuata mateta mu kalasa anyi basambila bua tshisumbu tshiabu tshia manaya tshitshimune, bua kupeta bulombodi bua Nzambi mu dîku anyi bua malu makuabu a bungi, bantu ba bungi batu anu basue kusambila. Makebulula adi aleja ne: nansha bamue bantu bobu kabayi baya mu tshitendelelu kampanda, batu anu ne tshibidilu tshia kusambila.
Utuku pebe usambila anyi? Biobi nanku, utu usambila bua malu kayi? Nansha wewe ne tshibidilu tshia kusambila anyi kuyi natshi, udi mua kudiebeja ne: ‘Kusambila kudiku ne mushinga anyi? Kudiku muntu utu uteleja masambila anyi?’ Mufundi kampanda wakamba ne: disambila didi anu “mushindu kampanda wa kupeta disulakana, bienze bu patu muntu wakula ne tshimuna tshiende.” Bamue balombodi ba malu a luondapu badi ne mmuenenu wa muomumue, badi bamba mudi kusambila kuikale “umue mushindu wa luondapu.” Bantu batuku bamona disambila anu bu bualu bua pa tshibidilu patupu anyi? Peshi batu bapeta disulakana kampanda padibu basambila?
Kadi Bible yeye udi uleja mudi disambila dipite luondapu kampanda kule ne kule. Udi utuambila ne: kudi muntu utu uteleja masambila adi bantu benza mu mushindu muimpe ne bua malu adi makane. Mbulelela anyi? Tukonkononayi tshidi tshitujadikila nanku.
^ tshik. 3 Tudi bashintulule amue mêna.
