Tlen kiijtojkej Samuel, Teresa uan Magdalene kinextia kema maseualmej momaijtouaj tlajtlanij tlen ueli tlamantli. Sekij momaijtouaj ika nochi ininyolo uan sekinok amo. Miakej kiyolmatij moneki momaijtosej, maske san tlajtlanij kuali ma kisa kema kichiuaj se examen, ma tlatlanikaj mauiltianij katli kinpaktia o kuali ma itstokaj ininchampoyouaj. Kema se keskij kintlajtlanijkej tlaj momaijtouaj, kiijtojkej kena maske amo itstokej ipan se religión.

¿Uan ta timomaijtoua? Tlaj kena, ¿tlake titlajtlani? Uelis nojkia timotlajtlania: ¿Nelia nechpaleuis? ¿Nechtlakakilis se akajya? Se tlajkuilojketl kiijtok kema timomaijtouaj san kichiua “kuali ma tijyolmatikaj [...,] kej kema se akajya kipia se michij uan kinojnotsa”. Sekij tepajtianij nojkia kiijtouaj nopa. ¿Uan ta timoiljuia maseualmej momaijtouaj san pampa momajtokej kichiuaj o pampa kinekij kuali kiyolmatisej?

Biblia kiijtoua kema timomaijtouaj amo kichiua san kuali ma tijyolmatikaj. Kiijtoua se akajya techtlakakilia kema timomaijtouaj uan titlajtlanij tlen kinamiki. Ma tikitakaj tlake kinextia nopa.