Afugo Samuel, Teresa na Magdalene nayugo gupai nga dungu nduapai aboro naakpara tipaha, na bete gu nduapai re gu duadu ni wenehe ti akuraha. Kura aboro nape kina boro gupai naye kpotoyo yo; gu kurayo nakpara zanga i berẽkuriihe. Wa vura duhe wo, ka si vura du nga i nakpara tipa kadu na diabese sukuru yo, watadu kpara tipa gayo abata kandi du na diabese, tipa Mbori ngbembatayo fu gayo aborokporo, watadu tipa kura dungu nduapai, kama amirioni aboro nabihe nga si naida i kpari akpara fu Mbori. Nirengo, wisigopai nayugoho nga zavura agu aboro adunga na pambori beyo ya, i nakpara akpara dedede.

Ya mo mo nakpara fu Mbori? Kangia wo duhe, gini apai mo naakpara tipaha? Singia si ni sinoroni ka kpara fu Mbori watadu sinoroni ngaha te, oni ima rengba ka bakabangironi nga: ‘Ya mo wenepai ho rengbe ani ka gbiaha ti kparakpee? Ya mo boro ho nadegatuni furani?’ Kura bakeapai ape gu bipai du ko na ni tipa kparakpee ki ya ‘si wakina ziga, wakina wai boro naafura na gani zogozogo nya.’ Gu kura amunganga na kina gu bangisa bipai re, i nayamba kparakpee ya si nga “gu kura ngbatunga dawa du tipa husa.” Ya mo agu aboro nakpara fu Mbori nadogoda kina bangisa kungbopai dedede watadu i nagbia ziga be gi mangapai re?

Gu kparakparapai duho nga, Ziazia Kekeapai nafura tipa kparakpee nga si ima susa ngbatunga aziga dunduko. Si nayugo gupai furani nga boro kinaho nzunzu nadegatuni furani kuti agu akparakpee ani apehe ngba ruru gene na tipa rurupai. Ya mo rengo du? Ani bingo kpiapai.