Fa yu e si a toli ya? I si enke Gadu e si feti enke wan bun sani? Efu Gadu lobi a feti di sama e feti, da sama se a de? Te i sabi a piki fu den akisi ya, da kande yu o si feti a wan taa fasi. Kon u taki tu kondee e feti anga denseefi, neen i yee taki Gadu e holibaka gi a kondee di i lobi, yu o fii bun, ná so noh? I sabi taki a kondee di i lobi o wini bika Gadu e yeepi en. Ma san i be o du efi i yee taki Gadu nai yeepi a kondee di i lobi, ma ai yeepi a taawan? I be o go na a se di Gadu de, ná so noh?

Ma wan taa sani moo pelensipali. Efi i sabi fa Gadu e pakisei fu oloku, da kande yu o pakisei taa fasi fu Gadu. Kande yu a wan fu den miliyunmiliyun sama di sani miti fu di feti be e feti aini a kondee fi i. Efu a so a de, da i mu akisi iseefi taki: ’A Gadu e meke sama feti? Neen meke sama e pina te feti e feti aini wan kondee, enke fa son sama taki? Ai booko en ede anga den sama di e pina te feti e feti?’

Kande i foondoo te i si san Beibel e taki fu a toli ya. Fanafu a ten di pasa te enke now, a fasi fa Gadu e si feti á kengi. Meke u go luku san Beibel e taki fu a fasi fa Gadu be e si feti aini Beibel ten, anga a ten di Yesesi be de a goontapu. A sani ya o yeepi u fu fusutan fa Gadu e si a feti di sama e feti aini a ten ya. A o soi u tu efu na ala ten feti o de a goontapu.