MUTWE WA PA NKUPIKO
Lesa Umona Byepi Nkondo?
Mwakonsha kukumbula byepi buno bwipuzho? Bantu bavula balanguluka’mba Lesa waswisha nkondo. Kabiji balanguluka’mba Lesa wakambizhe bapopweshi banji ba kala kulwanga nkondo; mashimikila a mu Baibolo byo byo aamba. Pakuba bantu bakwabo bamba’mba, Yesu Mwana Lesa wafunjishe baana banji ba bwanga kutemwa balwanyi babo. (Mateo 5:43, 44) Nangwa byonkabyo, balanguluka’mba Lesa wapimpwile milanguluko yanji pa byo amonanga nkondo kabiji amba lelo jino kechi waswisha nkondo ne.
Nga anweba mulangulukapo byepi? Nanchi Lesa waswisha kulwa nkondo nyi? Inge ibyo, utundaika bañanyi? Kutaana mikumbu ya ano mepuzho kwakonsha kwimukwasha pa byo mumona nkondo. Inge mwayuka’mba Lesa kechi waswishatu nkondo ne, bino utundaika ne jibumba jo mujimo, mukatemwa bingi ne kuyuka’mba jibumba jenu jisakushinda. Pano mukomvwa byepi inge mwayuka’mba Lesa ubena kutundaika jibumba jo mubena kulwa najo? Mukakeba kupimpula jibumba jo mujimo.
Kuji kintu kyanema kyo mwafwainwa kuyuka. Inge mwayuka Lesa byo amona nkondo, kikemukwasha kuyuka byo mumona Lesa. Umvwe ne anweba muji pa bantu bavula babena kumanama na mambo a nkondo, mwakonsha kutemwa kuyuka mukumbu wa bwipuzho bwaamba’mba, Nanchi Lesa uji byonka bilanguluka bamo amba ye uswisha ne kulengela bantu kumanama na mambo a nkondo, nangwa kubula kuta muchima bantu babena kumanama na nkondo nyi?
Musakukumya kuyuka’mba mukumbu uji mu Baibolo wapusana bingi na bilanguluka bantu. Kufumatu kala kufika ne luno, Lesa kechi waaluka pa byo amona nkondo ne. Twayai twisambe pa Baibolo byo aamba pe Lesa byo amonanga nkondo kala kene ne mu myaka kitota kitanshi, kimye Yesu kyo ajinga pano pa ntanda. Kino kisakwitukwasha kuyuka Lesa byo amona nkondo lelo jino nangwa inge nkondo ikekalako mu bwikalo bwa bantu kulutwe.
