ICIPANDE ICIKALAMBA BUSHE LESA AMONA SHANI UKULWA INKONDO?
Ifyo Lesa Alemona Ukulwa Inkondo mu Nshita sha Bena Israele
Abena Israele balebacusha sana. Balepepa imiku iingi kuli Lesa ukuti abaafwe, lelo taabafwile pali ilya ine inshita. Abalebacusha bena Egupti abali sana na maka. (Ukufuma 1:13, 14) Balilolelele pa myaka iingi ukuti Lesa abapokolole ku bena Egupti, kabili mu kuya kwa nshita, Lesa alibapokolwele. (Ukufuma 3:7-10) Baibolo itila Lesa umwine e walwile na bena Egupti. Aliletele ifinkunka ifingi pa bena Egupti kabili alipeye imfumu yabo na bashilika ba nkondo muli Bemba Wakashika. (Amalumbo 136:15) Yehova Lesa alilangile ukuti “ni mpalume ku bulwi” ilyo alwilileko abantu bakwe.—Ukufuma 15:3, 4.
Apo Lesa alilwile na bena Egupti, cilanga fye ukuti te nkondo shonse isho Lesa amona ukuti shalibipa. Pa nshita shimo, Lesa alesuminisha abena Israele ukulwa inkondo. Ku ca kumwenako, alibebele ukulwa na bena Kanaani, abali ababifi icine cine. (Amalango 9:5; 20:17, 18) Alyebele na Davidi, imfumu ya bena Israele, ukulwa na baPelishiti. Na kuba, Lesa alimwebele ne fya kucita pa kuti engacimfya.—2 Samwele 5:17-25.
Baibolo ilanda ukuti nga ca kuti abantu batendeka ukucusha abena Israele, Lesa alebasuminisha ukulwa pa kuti engabacingilila no kucingilila ukupepa kwa cine. Nomba natulande pa fintu fitatu ifyo tufwile ukwishiba pa nkondo isho Lesa alesuminisha.
-
LESA E WALESALA ABAKULWA INKONDO. Pa nshita imo, Lesa aebele abena Israele ati: “Tamwakalweko muli ubu bulwi.” Cinshi abakaanishe? Lesa umwine abebele ukuti alabalwilako. (2 Imilandu 20:17; 32:7, 8) Pa miku iingi, Lesa alebalwilako nga fintu abalwilileko ku bena Egupti pali Bemba Wakashika. Pa nshita shimbi, Lesa alyebele abena Israele ukulwa inkondo pa kuti bapoke no kucingilila icalo ico abalaile.—Amalango 7:1, 2; Yoshua 10:40.
-
LESA UMWINE E WALELANDA ILYO KWALINGILE UKUBA INKONDO. Ababomfi ba kwa Lesa balelolela ukufikila inshita iyo Lesa umwine alefwaya ukuti akande abalwani babo abalebacusha. Kanshi balingile ukulolela mpaka Lesa abasuminisha ukulwa. Baibolo ilanda ukuti abena Israele nga balwa inkondo ukwabula ukuti Lesa abasuminishe, balebacimfya. *
-
Nangu ca kuti Lesa alyonawile abena Kanaani, alipuswishe abantu bamo pamo nga Rahabu na balupwa lwakwe
LESA TAFWAYA UKUTI ABANTU BALEFWA, UKUBIKAKO FYE NA BABIFI. Yehova Lesa e Ntulo ya mweo kabili e wabumbile abantu bonse. (Amalumbo 36:9) E ico tafwaya ukuti abantu balefwa. Ku ca bulanda, abantu bamo balacusha no kwipaya abantu bambi. (Amalumbo 37:12, 14) Pa kuti Lesa afumyepo ububifi, inshita shimo alasuminisha ukuti kube inkondo. Nangu ca kuti pa myaka iingi alesuminisha abena Israele ukulwa na balwani babo, aali ne “nkumbu” kuli aba balwani kabili ‘alekokola ukukalipa.’ (Amalumbo 86:15) Ku ca kumwenako, aebele abena Israele ukuti ilyo bashilasansa umusumba, balingile ‘ukutuma amashiwi ku bena musumba ukuti balefwaya umutende,’ pa kuti bengalula imibele yabo na pa kuti belwa inkondo. (Amalango 20:10-13) Ifi Lesa alecita filanga fye ukuti ‘tasekela mu mfwa ya mubifi, lelo afwaya ukuti umubifi aleke imibele yakwe no kwikalilila uwa mweo.’—Esekiele 33:11, 14-16. *
Kanshi twamona ukuti kale, Lesa alemona inkondo ukuti e nshila ya kupwishishamo umutitikisha nelyo ububifi. Nomba Lesa e walelanda ilyo kwalingile ukuba inkondo kabili e walesala na bakulwa inkondo. Bushe Lesa aleleta inkondo pa mulandu fye wa kuti aalefwaya abantu balefwa? Awe, pantu Lesa alipata ubunkalwe. (Amalumbo 11:5) Bushe ifyo Lesa amona inkondo fyalyalwike ilyo Umwana wakwe Yesu Kristu aishile pano calo?
^ par. 7 Ku ca kumwenako, abena Israele balibacimfishe ilyo balwile na bena Amaleke na bena Kanaani ukwabula ukuti Lesa abasuminishe. (Impendwa 14:41-45) Ilyo papitile imyaka iingi, Imfumu Yoshia, baliyipeye ilyo yaile ku nkondo ukwabula ukuti Lesa aisuminishe.—2 Imilandu 35:20-24.
^ par. 8 Abena Israele tabaebele abena Kanaani ukuti bapange umutende ilyo bashilalwa nabo inkondo. Cinshi bashabebeele? Ni co Lesa alibapeele imyaka 400 iyo balingile ukwalukamo. Ilyo abena Israele basanshile abena Kanaani, ninshi abena Kanaani bonse balicilamo ukucita ifyabipa. (Ukutendeka 15:13-16) E ico balingile ukubonaula bonse fye. Na lyo line, abena Kanaani abalekele ukucita ifyabipa bena balipuswike.—Yoshua 6:25; 9:3-27.
