Án Kot pwisin maunei ekkewe chón Isip a pwáraatá pwe i a pwal tipeeú ngeni ekkóch maun. Mi wor ekkewe atun Kot a allúkú ngeni néún kewe aramas, ekkewe chón Israel, ar repwe maun. Áwewe chék, a allúk ngeniir ar repwe maunei ekkewe chón Kanaan mi ssenúk ngawer. (Tuteronomi 9:5; 20:17, 18) A allúkú ngeni Tafit, ewe Kingen Israel, an epwe maun ngeni ekkewe chón Filistia mi eriáfféúr. Kot a pwal mwo nge ereni Tafit epwe ifa napanapen an mauner pwe epwe win.​—2 Samuel 5:17-25.

Ekkena pwóróus lón Paipel ra pwáraatá pwe lupwen ekkóch sókkun riáfféú are mettóch mi ngaw a tori ekkewe chón Israel, Kot a allúk ngeniir ar repwe maun fán iten túmúnún néún kewe aramas me ewe fel mi enlet. Nge nengeni ekkeei úlúngát mettóch mi lamot usun ekkena sókkun maun Kot a tipeeú ngeni.

1. KOT CHÉK A APWÚNGALÓ IKA IÉ EPWE FITI MAUN. Lón eú atun, Kot a ereni chón Israel: “Ämi ousap fiu lon ei maun.” Pwata? Pún Kot pwisin epwe maun fán ásengesiir. (2 Kronika 20:17; 32:7, 8) A féri ena fán chómmóng, usun met sia fen fós usun me mwan. Lón ekkóch atun, Kot a allúk ngeni néún kewe aramas lón Israel lóóm ar repwe fiu lón ekkewe maun I a tipeeú ngeni, ikkena ekkewe sókkun maun fán iten ar repwe fénúeni ewe Fénúen Pwon me pwal túmúnú seni chón oputer kewe.​—Tuteronomi 7:1, 2; Josua 10:40.

2. KOT CHÉK EPWE APWÚNGALÓ INEET EPWE FIS EKKENA SÓKKUN MAUN. Néún Kot aramas repwe witiwit fán mosonottam ngeni ewe fansoun Kot epwe filatá ar repwe maunei chókkewe mi féfféringaw ngeniir me eriáfféúr. Itá resap pwisin filatá le maun ika esaamwo tori ewe fansoun Kot a filatá. Nge ika rese witiwit me ra ló maun, a péút seniir án Jiowa túmún. Ewe Paipel a affata pwe lupwen ekkewe chón Israel ra fiti eú maun Kot ese tipeeú ngeni, iwe fán chómmóng ra fókkun feiengaw. *

3. KOT ESE PWAPWAITI MÁLÓÓN ARAMAS, KAPACHELONG EKKEWE MI NGAW. Jiowa Kot i Populapen manaw me Chón Fératá aramas. (Kölfel 36:9) Ina minne, ese mochen kúna án aramas máló. Nge a elichippúng, pún mi wor ekkewe aramas mi ngaw ra rawangawei me eriáfféwú ekkóch aramas pwal mwo nge nireló. (Kölfel 37:12, 14) Ren án Kot epwe aúkatiw ena esin féfféringaw, fán ekkóch a allúk an epwe wor maun ngeni ekkena aramas mi ngaw. Nge lón ekkena fansoun, inaamwo ika Kot a fen allúk ngeni chón Israel ar repwe maun, nge a chúen “ümöümöch” me “songomang” ngeni ekkewe chón eriáfféwú Israel. (Kölfel 86:15) Áwewe chék, a allúk ngeni ekkewe chón Israel pwe me mwen ar repwe maunei eú telinimw, repwe akkomw “eäni eu pwonen kinamwe ngeni,” pwe epwe suuk ngeni chón ena telinimw ar repwe féri ekkesiwil lón féfférúr, me esap chúen fis maun lefiler. (Tuteronomi 20:10-13) Ren ei mettóch, Kot a pwáraatá pwe ‘ese pwapwaiti mälan eman chon föföringau, nge a mochen pwe ewe chon föföringau epwe kul seni an tipis o manau.’​—Isikiel 33:11, 14-16. *

   Inaamwo ika Kot a maun ngeni ekkewe chón Kanaan, nge a pwal amanawa ekkóch leir, áwewe chék ren Rahap me an we famili

Seni met sia fen pwóróus usun, sia kúna pwe lón fansoun lóóm a pwúng me ren Kot an epwe áeá maun pwe epwe aúkatiw sókkópaten féfféringaw me féfférún eriáfféwú aramas. Nge esap aramas, pwe Kot chék a wor an pwúúng le apwúngaló ineet ena esin maun epwe fis me ié epwe fiti. Iwe, itá Kot a pwapwaiti maun me a maun fán ewe napanap mi kkóló akkachofesáán? Aapw, ese fókkun ina usun. Kot a wesewesen oputa féfférún akkachofesá. (Kölfel 11:5) Itá án Kot ekiek usun maun a siwil lupwen Néún we, Jesus Kraist, a poputááni an angangen afalafal wóón fénúfan?