Amu Zambi mwene ashile jita ni A-Engitu, chino chinasolola ngwo, iye keshi kwivwila kole jita jeswe. Ha mashimbu amwe, Zambi katayijile hanga atu jenyi A-Izalele aye ni kwasa jita. Chakutalilaho, iye kaatumine hanga ase jita ni vungu lia A-Kanana, waze te akwete yitanga yipi chinji. (Shimbi Yamuchiali 9:5; 20:17, 18) Iye kakwashile Mwanangana Ndawichi hanga ase jita ni A-Filistea. Zambi kakwashile Ndawichi kukumba jita yacho.—2 Samuele 5:17-25.

Sango jino ja mu Mbimbiliya jinasolola ngwo, muze te A-Izalele apwile ni kwamwesa lamba ni yihungumiona, Zambi kapwile ni kutayiza jita hanga apulwile atu jenyi ni kufunga uwayilo wa mwenemwene. Alioze tushimutwinenu yuma yilemu yitatu yize Zambi apwile ni kutayijila jita:

1. ZAMBI WIKA MWE WAPWILE NI KUSAKULA WAZE MAYA NI KWASA JITA. Limwe shimbu Zambi kalwezele A-Izalele ngwenyi: “Kuchanutambile, kwasa jita yino.” Mumu liaka? Mumu Zambi mwene te masa jita mu chihela cho. (2 Sango ja Mianangana 20:17; 32:7, 8) Aye kanji-kanji te che akulinga, ngwe chize twatongola ku uputukilo wa longeso lino. Ha mashimbu amwe, Zambi yahana shimbi kuli atu jenyi A-Izalele hanga ase jita yize iye atayijile, yasakula waze te maya ni kwasa jita yacho hanga apulwile Chifuchi cho cha Chilakenyo.—Shimbi Yamuchiali 7:1, 2; Yoshua 10:40.

2. ZAMBI WIKA MWE WAPWILE NI KUSAKULA TANGWA LIZE JITA YACHO MUYILINGIWA. Atu ja Zambi te kakushimbwila ni uhumikizo weswe tangwa lize Zambi masakula hanga aye ni kwasa jita ni akwa-kole jo waze te atwama hamwe no. Ha chino o te keshi kulitesa ene hanga aye ni kwasa jita. Mumu nyi te machilinga, o te kechi kupwa ni ukwaso wa Zambi. Kwamba umwenemwene, Mbimbiliya yinasolola ngwo muze A-Izalele te akuya ni kwasa jita yize Zambi katayijile, ayo te kakwakumba kuli akwa-kole jo. *

3. ZAMBI KESHI KUWAHILILA NI KUFWA CHA ATU, CHIPWE CHA YINGULUNGULU. Yehova Zambi kali Fuji lia mwono mumu iye mwe watangile atu. (Samu 36:9) Ha chino, aye keshi kuwahilila muze akumona atu mafwa. Alioze kuli atu waze akwete yitanga ya kumwesa akwo lamba ni kwaashiha. (Samu 37:12, 14) Mba ahwise upi wacho, Zambi, ha mashimbu amwe te kakutayiza hanga atu jenyi ase jita ni atu api. Nawa hakupalika cha miaka muze iye te akutuma A-Izalele hanga aye ni kwasa jita jacho, nihindu iye te kakwivwa “keke” nawa te “keshi kutenuka ni kawashi” hakutwala kuli akwa-kole ja A-Izalele. (Samu 86:15) Chakutalilaho, aye kambile ngwenyi, muze A-Izalele kanda achitambula yimwe mbonge, o te katamba kutwa mutambi wa “sambukila,” hanga ahane uhashi kuli atu waze atungamo hanga alumune yitanga yo ni kuchina kwasa no jita. (Shimbi Yamuchiali 20:10-13) Ha chino, Zambi te kakusolola ngwo aye te keshi ‘kwivwa kuwaha ha kufwa cha chingulungulu, alioze kakuzanga hanga chingulungulu ahichike ndako jenyi atwame ni mwono.’—Ezekiele 33:11, 14-16. *

Ngwe chize twamona, ku mashimbu akunyima, Zambi kapwile ni kumona jita ngwe yimwe jila yalita, hanga ahwishilemo yuma yeswe yipi. Alioze, Zambi wika mwe wapwile ni kusakula mashimbu waze jita muyilingiwa ni atu waze te maya ni kwasa jita. Shina Zambi kapwile ni kutayiza jita hanga ashihe atu chamushihila nyi? Ka, hi chocho ko. Zambi kakuvwila kole upupilo. (Samu 11:5) Shina nyonga lia Zambi hakutwala ku jita lialumukine muze Mwanenyi, Yesu Kristu, aputukile mulimo wa kwambujola sango lipema ku sekulu yitangu nyi?