A TOLI DI SIKIIFI A FESISE | FA GADU E SI FETI?
Fa Gadu be e si feti aini a ten di pasa?
Aini a ten di pasa, wan foluku be e pina wan taa foluku. A omen leisi a foluku ya begi Gadu fu a yeepi den, ma a á yeepi den wanten. A foluku ya a den Islayelisama. Gadu be teke den enke en foluku. Den sama di be e pina den, a den Egeptesama (Ekisodesi 1:13, 14). A omen yali den Islayelisama wakiti Gadu fu a puu den a katibo a Egepte. Te fu kaba a ten be doo fu Gadu yeepi den (Ekisodesi 3:7-10). Beibel e soi taki a Gadu seefi be feti anga den Egeptesama. Baka di a meke omen ogii miti den, neen a kii a kownu fu Egepte anga den suudati fi en na a Lebi Se (Psalm 136:15). Den sani ya e soi taki Yehofa Gadu a wan „taanga fetiman” di be e feti gi en foluku.—Ekisodesi 15:3, 4.
A ná ala feti Gadu e buuse, bika enseefi be feti anga den Egeptesama. A be sende a foluku fi en wantu leisi fu go feti anga taa foluku. Wan leisi a be sende den fu go feti anga den ogii-ati Kana-ansama (Deitolonomi 9:5; 20:17, 18). A be sende Kownu David fu go feti anga den Filisteyasama di be e pina den. Wan leisi a be soi David finifini fa a mu feti, fu wini den feyanti fi en.—2 Samuweli 5:17-25.
Den toli ya e soi taki a fu di den taa foluku be wani du ogii anga den Islayelisama, anga fu di den be wani poli a biibi fu den, meke Gadu be e sende den Islayelisama fu feti anga den. Ma luku dii pelensipali sani di o yeepi u fu fusutan a toli ya moo bun.
-
A GADU BE E TAKI SAMA BE MU GO FETI. Wan leisi Gadu be taigi den Islayelisama taki: „A ná wi o feti a feti ya.” Saide a be taki a sani ya? Fu di neen seefi be o feti gi den (2 Koloniki 20:17; 32:7, 8). A omen leisi Gadu feti gi den, enke fa u taki a fesi. Son leisi a be e meke den Islayelisama seefi feti te den taa foluku be wani puu den aini a kondee di Yehofa be gi den.—Deitolonomi 7:1, 2; Yowsuwa 10:40.
-
A GADU BE E TAKI ON TEN DEN BE MU FETI. A foluku fu Gadu be mu wakiti fu Gadu soi den on ten den be mu go feti anga den foluku di be wani du ogii anga den. Ma denseefi á be mu go feti te den be wani, bika Gadu á be o yeepi den. Beibel e soi taki te den be e go feti sondee Gadu be sende den, da den be e lasi a feti de. *
-
WINSI FA WAN SAMA OGII, GADU NAI PIISII TE A DEDE. A Yehofa meke libisama anga ala den taa sani di de a libi (Psalm 36:9). Neen meke a á wani sama dede. Ma a tyali taki son sama e pina taawan efuso e kii taawan (Psalm 37:12, 14). Neen meke Gadu be e sende a foluku fi en son leisi fu go feti anga den sowtu sama ya. Ma anga ala fa a be e sende den Islayelisama fu feti den sowtu feti ya, tokuso tyali be e kisi en gi den feyanti fu den Islayelisama. En „ati nai boon gaw” (Psalm 86:15). A be taigi den Islayelisama taki fosi den be go feti anga wan taa foluku, den be mu „akisi den fosi efu den wani saka denseefi” a den ondoo. A so den be o fende a okasi fu kengi den libi. Efu den be kengi den libi, den Islayelisama á be o feti anga den moo (Deitolonomi 20:10-13). Na a fasi ya Gadu be e soi taki a „nai piisii te wan ogii sama dede”, ma ai „piisii te wan ogii sama daai en libi, da a tan a libi”.—Eseikiyeli 33:11, 14-16. *
Den toli ya e soi taki Gadu be e meke sama go a feti fu tyai wan kaba kon na a pina di sama be e pina taawan aini a ten di pasa. A Gadu be e taki sama mu go feti anga on ten den be mu go feti. Libisama á be abi a leti de. A lobi Gadu be lobi kii sama meke a be e sende en foluku go feti? Beibel e soi taki ai buuse ogii (Psalm 11:5). Ma i si enke Gadu be kengi a fasi fa ai si feti di Yesesi kon a goontapu?
Winsi fa Gadu be feti anga den Kana-ansama, tokuso a meke wantu fu den tan a libi. Wantu fu den sama ya, a Rakab anga en famii
^ paragraaf 7 Wan leisi Gadu taigi den Islayelisama taki den á mu go feti anga den Amaleksama anga den Kana-ansama, neen tokuso den go. Den Islayelisama be lasi a feti de (Numeri 14:41-45). Baka omen yali, neen Kownu Yosiya di be e dini Gadu anga en hii ati go feti anga wan foluku sondee Gadu be sende en. A sani de tyai dede gi en.—2 Koloniki 35:20-24.
^ paragraaf 8 Den Islayelisama ná akisi den Kana-ansama efu den wani saka denseefi a den ondoo fosi den go feti anga den. Saide? A 400 yali Gadu gi den Kana-ansama a okasi fu daai den libi. Ma a ten di den Islayelisama go feti anga den, den be ogii te den á be poi kengi moo (Genesesi 15:13-16). Neen meke Gadu kii ala den. Ma son wan fu den Kana-ansama di be daai den libi be tan a libi.—Yowsuwa 6:25; 9:3-27.
