KUKWE TÄRÄ KWATABÄTÄ: ¿NGÖBÖ TÖITA ÑO RÜ YEBÄTÄ?
Ngöbö aune rü kirabe
Juta ye nämene ja tare nike. Ngöbökwe niaratre dimikadre ye ribebare bä kabre kwetre ie; akwa ñaka kukwe nuani bengwairebe. Juta ye abokän Israel, Ngöbökwe juta ye dianinkä kirabe. Aune Egipto juta bäri dite ye nämene ngwen ja tare nike (Éxodo 1:13, 14). Kä kwati krubäte te nitre Egipto nämene nitre Israel ngwen ja tare nike ye Ngöbökwe mikadre krüte nämenentre ngübare. Mrä mada, kä nükani ye ngwane Ngöbökwe kukwe ye ükaninte (Éxodo 3:7-10). Ngöbökwe akwle rübare Egipto rüere nieta Bibliakwe. Kukwe tare 10 yebiti nitre Egipto mikani ja tare nike kwe aune faraón bätä nitre rükä kwe ye ganinte kwe mar Rojo yete (Salmo 136:15). Jehová “rükä die kri krubäte” ye bämikani kwe juta kwe ye mikakäre kwäre (Éxodo 15:3, 4).
Ngöbökwe rübare Egipto rüere ye tä mike gare rü jökrä ye ñaka tuin blo ie. Arato ruäre ngwane juta Israel tuanimetre kwe rüre juta mada yebe. Ñodre, juani rüre kwe nitre Canaán ye rüere, nitre ye abokän käme krubäte (Deuteronomio 9:5; 20:17, 18). Rei David juani kwe rüre nitre filisteo käme krubäte ye rüere aune niaratre käkwe dre dre nuaindre rüe ye ganainkäre ye mikani gare kwe ietre (2 Samuel 5:17-25).
Kukwe nieta Bibliabätä ne tä mike gare nitre Israel ngwan nämene ja tare nike ye ngwane, Ngöbö nämene rü ye nuainmana juta kwe kriemikakäre aune kukwe metre kwe ye ngübakäre. Akwa kukwe ketamä metrerebätä Ngöbö nämene rü nuainmana ye nikwe ngwandre törö jai. ¿Kukwe meden?
-
NIRE RIKADRE RÜBÄTÄ YE NGÖBÖ AIBE NÄMENE NIERE. Bati, Ngöbökwe niebare nitre Israel ie: “Munkwe ñaka ja metai rü yete”. Ñobätä ñan aune niara ara käkwe rüdi nitre Israel ye dokwäre (2 Crónicas 20:17; 32:7, 8). Bä kabre ye nuainbare kwe, rübare kwe nitre Egipto rüere ye erere. Akwa mada ngwane, Ngöbökwe juta kwe juani rüre juta mada yebe Kä Käbämikani ye diankäre jai aune kriemikakäre (Deuteronomio 7:1, 2; Josué 10:40).
-
ÑONGWANE RÜ KÖMIKADRE YE NGÖBÖ AIBE NÄMENE NIERE. Nitre Ngöbö mikaka täte rabadre köbö ngübare bätärekä aune ñongwane Ngöbökwe juandre rüre juta käme krubäte nämene niaratre bäre yebe ye niaratre käkwe ngübadre. Ngöbökwe ñaka juandre angwane, ñaka rabadre niken rüre. Nuaindre kwetre angwane, Ngöbökwe ñaka kriemikadre. Ne madakäre, niaratre nämene niken ja töi jeñebiti rüre ye ngwane, kukwe tare krubäte nämene nemen niaratre kisete nieta Bibliakwe. *
-
Ngöbökwe rübare juta keta kabre Canaán ye rüere, akwa ñaka nitre ruäre ye murie ketani kwe, ñodre, Rahab aune mräkätre kwe
NGÖBÖ ÑAKA TÖ NI TUAI KRÜTE JIRE. Ngöbö Jehová ye abokän “ja nire bianka” aune niara ni jökrä Sribekä (Salmo 36:9). Ni nire ye tare kwe aune ñaka tö ni tuai ngatain. Akwa, nitre ruäre tä ja töi mike nitre mada mike ja tare nike o nitre mada murie kete (Salmo 37:12, 14). Ruäre ngwane, Ngöböta rü ye tuenmetre nakainkä kukwe käme nuainta ye ketabätäkäre. Akwa, niarakwe nitre Israel juani rüre ye jökrä ngwane, nämene nitre Israel rüe ye mike tuin bobre jai aune nämene ngübare bätärekä (Salmo 86:15). Ñodre, nitre Israel jämi rü köböi kite juta mada yebe ye känenkri, rabadre, “kukwe ük[e]te bentre ja mäkäkäre jäme” ne kwe nitre nünanka juta yete ye käkwe ja töi kwitadre aune ñaka rüdre (Deuteronomio 20:10-13). Niarakwe kukwe niebare nebiti mikata gare: “Nitre kukwe käme nuainkä tä krüte ye käi ñaka nemen juto tibätä, ñakare aune ni kukwe käme nuainkä ye ja töi kwitadreta aune rabadre nüne jankunu” (Ezequiel 33:11, 14-16). *
Kukwe nebiti mikata gare nie, kirabe sete, kukwe käme nuain nämene aune nitre ngwan nämene ja tare nike ye Ngöbö nämene mike krüte rü yebiti. Akwa ñongwane rüdre aune nire näin rüre ye Ngöbö Jehová ye aibe nämene niere, nitre kä tibienbätä ye ñan ai nämene niere. Ne madakäre, ñaka nitre nuainbare tare kwe rü yete aune ñaka nitre därie dianinte krubäte kwe, ñobätä ñan aune niara brukwä nitre töi ni mada nuainbätä tare ye kräke (Salmo 11:5). Akwa ¿Monso kwe, Jesukristo, käkwe kukwe drie ye kömikani siklo kena yete ye ngwane ja töi kwitani kwe?
^ párr. 7 Ñodre, bati, nitre Israel ñaka rikadre rüre nitre Amaleq aune nitre Canaán yebe Ngöbökwe niebare ietre, akwa niaratre ñaka mikani täte ye köböite rüe käkwe ganainbare (Números 14:41-45). Kä nikani kabre ta ye bitikäre, Ngöbö ñaka rei Josías juen rüre akwa nikani ja töi jeñebiti rüre ye ngwane murie ketani (2 Crónicas 35:20-24).
^ párr. 8 Nitre Israel ñaka nämene kukwe ükete käne ja mäkäkäre jäme juta Canaán yebe jämi niken rüre bentre ye ngwane. Kä nikanina 400 ta nitre Canaán yebiti ja töi kwitakäre. Köbö nükani rükäre niaratre ben ye ngwane, niaratre töi nämene käme krubäte aune ñaka ja töi kwitani jire kwetre (Génesis 15:13-16). Ye medenbätä jökrä gadrete täte. Akwa, nitre Canaán ruäre käkwe ja töi kwitani aune ñaka murie ketani (Josué 6:25; 9:3-27).
Ne rabai tuen kwin mäi arato
BIBLIA ¿TÄ DRE MIKE GARE?
Nitre Israel kä Canaán diani jai
Nitre Israel kä Canaán diani jai ye ngwane, ¿ñobätä Ngöbökwe ñaka Rahab aune mräkätre ye ganinte?
NI MIKAKA MOKRE
“Jändrän kuin nuenbare [kwe] [...] abtä ngite ñakare [...] niebare”
¿Kukwe namani bare Rahab yebätä ye tä mike gare ño nie ni ütiäte Jehová kräke? ¿Tödekabare kwe ye tä dre driere nie?
NI MIKAKA MOKRE
Ngöbökwe nitre mikani ja ngie nuin: ¿ye kukwe käme krubäte nuainbare?
Kukwe ngwantarita ne mikakäre gare jai, Ngöbökwe nitre mikani ja ngie nuin kädrieta ketebu Bibliabätä ye ani ja tötikebätä: Ñü Kri näkäni tibien Noé näire aune nitre Canaán ganinte täte.
