TOPIK RANDAU | NAMA PENEMU PETARA PASAL PERANG?
Penemu Petara Pasal Perang Maya Kelia Menya
Sida balat diperinsa. Sida suah besampi ngagai Petara minta dilepaska ari pemerinsa, tang utai tu enda nyadi—enti nyadi pan ukai tekala nya. Sida tu orang Israel, nembiak Petara kelia menya. Sida diperinsaka orang Ejip ke kering. (Pemansut 1:13, 14) Betaun orang Israel nganti Petara ngujungka pemerinsa ke datai ari orang Ejip ke balat nekan. Nyau kelama, maya Petara nulung sida pan datai. (Pemansut 3:7-10) Bup Kudus madahka, Petara Empu ke beperang ngelaban orang Ejip. Iya ngenataika penusah enggau beturut-turut ba menua Ejip, lalu udah nya Iya ngemunaska raja Ejip enggau bala soldadu iya ba Tasik Mirah. (Masmur 136:15) Petara Jehovah nya kering sereta bekuasa. Iya beperang ngarika nembiak Iya.—Pemansut 15:3, 4.
Ari perang Petara ke ngelaban orang Ejip nunjukka Iya enda nagang semua perang. Ba maya ti bukai, Iya ngemendarka nembiak Iya orang Israel beperang. Chunto, Iya ngasuh sida beperang ngelaban orang Kanaan, ke balat jai. (Ulang Adat 9:5; 20:17, 18) Iya ngasuh Raja David, ke nyadi raja orang Israel, beperang ngelaban orang Pilistin ke udu nekan. Indah Petara madah ngagai David chara nyerang sida ngambika ulih menang.—2 Samuel 5:17-25.
Cherita Bup Kudus tu nunjukka, lebuh penyai enggau pengawa nekan ngenusahka orang Israel, Petara ngemendarka perang kena nyaga nembiak Iya sereta ngetanka sembah ti bendar. Tang, peratika tiga iti pekara pasal perang ke udah ditetapka Petara.
-
PETARA EMPU NETAPKA SAPA KE PATUT ENGGAU BEPERANG. Bisi sekali, Petara madah ngagai orang Israel: “Perang tu ukai perang kita.” Nama kebuah? Petara Empu deka beperang ngarika sida. (2 Bansa Israel 20:17; 32:7, 8) Iya suah beperang ngarika orang Israel, baka ke udah dipadah ba pun artikel tu tadi. Ba maya bukai, Petara ngasuh nembiak Iya kelia menya beperang ba perang ti dikemendarka Iya. Chunto, maya ngulihka sereta ngetanka Menua ti Udah Disemaya.—Ulang Adat 7:1, 2; Josua 10:40.
-
PETARA EMPU NETAPKA KEMAYA PERANG NYA DEKA NYADI. Nembiak Petara patut sabar nganti maya Petara netapka perang ngelaban penyai enggau pengawa nekan ke ditapi sida. Sebedau jam nya datai, sida enda tau mansang beperang kediri empu. Enti sida beperang, sida lenyau sukung ari Petara. Indah Bup Kudus nunjukka, lebuh orang Israel enggau perang ke enda dikemendarka Petara, sida deka balat alah. *
-
PETARA ENGGAI MEDA MENSIA MATI, NYENGKAUM ORANG KE JAI. Petara Jehovah nya Pun pengidup sereta Penempa mensia. (Masmur 36:9) Nya alai, Iya enggai meda mensia mati. Taja pia, bisi orang ke jai deka merinsaka sereta munuh orang bukai. (Masmur 37:12, 14) Kena ngetuka penyai tu, kekadang Petara ngemendarka perang ngelaban orang ke jai. Taja pan Iya betaun ngemendarka orang Israel enggau perang ke baka nya, Iya agi “kasih” sereta “liat ati” ngagai orang ke nekan orang Israel. (Masmur 86:15) Chunto, sebedau orang Israel nyerang siti-siti nengeri, Iya deka sida “meri peluang ngasuh orang dia nunduk” ngambika orang ba nengeri nya berubah, lalu nyeliahka perang. (Ulang Adat 20:10-13) Enggau tu, Petara nunjukka Iya “enda rindu meda orang ke bedosa mati.” Tang, Iya “rindu agi meda sida badu agi bedosa, lalu idup.”—Esekiel 33:11, 14-16. *
Ari utai ke dipadah tadi, kitai nemu kelia menya, Petara ngemendarka perang kena ngujungka mayuh macham penyai enggau pengawa nekan. Tang Petara, ukai mensia, ke netapka kemaya perang deka nyadi sereta sapa ke patut enggau beperang. Kati perang Petara nunjukka Iya rindu meda orang mati? Enda. Iya ke amat, Petara begedika orang ke mangah. (Masmur 11:5) Kati penemu Petara pasal perang berubah lebuh Anak Iya, Jesus Kristus, berengkah nginjil ba kurun keterubah?
^ per. 7 Chunto, bisi sekali orang Israel balat alah lebuh sida beperang ngelaban orang Amalek enggau orang Kanaan ketegal sida enda ningaka tagang ari Petara. (Penyampau 14:41-45) Betaun udah nya, Raja Josiah ke tetap ati enggau perang ke enda dikemendarka Petara, lalu perang nya nabanka nyawa iya.—2 Bansa Israel 35:20-24.
^ per. 8 Orang Israel enda meri peluang ngasuh orang Kanaan nunduk sebedau nyerang sida. Nama kebuah? Laban orang Kanaan udah diberi timpuh 400 taun kena ngemetulka ulah sida ke jai. Lebuh orang Israel datai nyerang sida, penyai ke digaga semua orang Kanaan enda ulih diaduka agi. (Pemungkal 15:13-16) Nya alai, semua sida patut dipunaska. Taja pia, orang Kanaan ke udah berubah mengkang idup.—Josua 6:25; 9:3-27.
