Gũkorũo atĩ Ngai we mwene nĩ aahũũrire Amisiri nĩ kuonanagia atĩ nĩ akoragwo etĩkĩrĩtie mbaara imwe. Mahinda-inĩ mangĩ, nĩ aathaga andũ ake Isiraeli marũe mbaara. Kwa ngerekano, nĩ aamerire mahũũre Akanaani, arĩa maarĩ aganu mũno. (Gũcokerithia Maathani 9:5; 20:17, 18) Nĩ aathire Mũthamaki Daudi wa Isiraeli ahũũre Afilisiti arĩa maamahinyagĩrĩria. Ningĩ Ngai nĩ aaheire Daudi motaaro ma kũrũa nĩguo ahootane.—2 Samueli 5:17-25.

Maũndũ macio marĩ thĩinĩ wa Bibilia monanagia atĩ hĩndĩ ĩrĩa Aisiraeli meekagwo maũndũ moru kana makahinyĩrĩrio, Ngai nĩ aathanaga andũ marũe mbaara nĩguo agitĩre andũ ake o hamwe na ũthathaiya wa ma. No ta rora maũndũ maya matatũ ma bata megiĩ mbaara ta icio Ngai aakoragwo etĩkĩrĩtie.

1. NO NGAI WIKI WOIGAGA NŨ ŨGŨTHIĨ MBAARA-INĨ. Hĩndĩ ĩmwe Ngai eerire Aisiraeli ũũ: “Mũtikagĩa na bata wa kũrũa mbaara ĩo.” Nĩkĩ hihi? Ngai we mwene nĩwe ũngĩamarũĩrĩire. (2 Maũndũ ma Matukũ ma Tene 20:17; 32:7, 8) Nĩ eekire ũguo maita maingĩ ta hĩndĩ ĩyo ĩgwetetwo gĩcunjĩ-inĩ gĩkĩ gĩkĩambĩrĩria. Mahinda-inĩ mangĩ, Ngai nĩ aathaga andũ ake a Isiraeli ya tene marũe mbaara iria we etĩkĩrĩtie, iria ciamateithirie kwĩgwatĩra na kũgitĩra Bũrũri wa Kĩĩranĩro.—Gũcokerithia Maathani 7:1, 2; Joshua 10:40.

2. NO NGAI WIKI WOIGAGA RĨRĨA MBAARA ICIO CIAGĨRĨIRE KŨRŨO. Ndungata cia Ngai ciaagĩrĩire gweterera irĩ na ũkirĩrĩria ihinda rĩrĩa Ngai aatuĩte rĩa kũrũa nĩ ũndũ wa kũhinyĩrĩrio na maũndũ mangĩ moru marĩa maamathiũrũrũkĩirie. Matiagĩrĩirũo  kwĩĩra marũe mbaara ihinda rĩu rĩtakinyĩte. Mangĩekire ũguo, Ngai nĩ aamatiganagĩria. Bibilia yonanagia atĩ hĩndĩ ĩrĩa Isiraeli meĩraga marũe mbaara Ngai ataathanĩte, moimĩrĩro maakoragwo marĩ moru mũno. *

3. NGAI NDAKENAGIO NĨ GĨKUŨ KĨA ANDŨ, NGINYA ARĨA AGANU. Jehova Ngai nĩwe Kĩhumo kĩa muoyo na nĩwe wombire andũ. (Thaburi 36:9) Kwoguo, ndakenaga kuona andũ magĩkua. No ũndũ wa kĩeha nĩ atĩ, kũrĩ andũ aganu mabangaga kũhinyĩrĩria o na kũũraga andũ arĩa angĩ. (Thaburi 37:12, 14) Nĩguo aniine waganu ũcio, Ngai rĩmwe na rĩmwe nĩ aathanaga andũ acio aganu maniinwo kũgerera mbaara. O na kũrĩ ũguo, mĩaka-inĩ ĩyo yothe aathaga Aisiraeli marũe mbaara ta icio, no aakoragwo na “matha maingĩ” na ‘ndaahiũhaga kũrakarĩra’ andũ acio maahinyagĩrĩria Aisiraeli. (Thaburi 86:15) Kwa ngerekano, nĩ aarutĩte watho atĩ mbere ya Aisiraeli kũhũũra itũũra, maagĩrĩirũo ‘kwaria na andũ a rĩo nĩ getha mare ũhoro nao kũgĩe thayũ,’ nĩguo mahe aikari a itũũra rĩu mweke wa kũgarũrĩra nĩguo metheme mbaara. (Gũcokerithia Maathani 20:10-13) Na njĩra ĩyo, Ngai nĩ onanirie atĩ ndakenagio nĩ “gĩkuũ kĩa mũndũ mwaganu; no rĩrĩ, nĩ kaba mũndũ ũcio mwaganu agarũrũke atigane na mĩthiĩre ĩo yake nĩguo atũũre muoyo.”—Ezekieli 33:11, 14-16. *

Kuumana na maũndũ macio nĩ tuona atĩ mahinda-inĩ ma tene, Ngai onaga mbaara ĩrĩ njĩra ĩtĩkĩrĩkĩte ya kũniina maũndũ ma kũhinyanĩrĩria o na waganu. No nĩ Ngai wiki warĩ na kĩhooto gĩa kuuga rĩrĩa mbaara ta icio ikũrũo na nũ ũkũrũa. No hihi Ngai nĩ eeriragĩria kũrũa mbaara, nĩguo aite thakame? Aca. We nĩ athũire ũtoi kana ũhinya. (Thaburi 11:5) Hihi Ngai nĩ aacenjirie mawoni make megiĩ mbaara rĩrĩa Mũrũ wake, Jesu Kristo, aambĩrĩirie ũtungata wake hĩndĩ ya karine ya mbere?