Хԝәде кӧ хԝәха мьԛабьли Мьсьрийа шәрʹ кьр, әԝ йәк дьдә кʹьфше кӧ Хԝәде мьԛабьли һʹәму шәрʹа нинә. Щара жи Хԝәде изьн дьда щьмәʹта хԝә Исраел кӧ шәрʹ бькьн. Мәсәлә, әԝи тʹәми да ԝан кӧ тʹәви Кәнанийа шәрʹ бькьн, кʹижан кӧ гәләк хьраб бун (Ԛануна Дӧщари 9:5; 20:17, 18). Щарәке жи Хԝәде готә Пʹадше Исраеле Даԝьд, кӧ әԝ мьԛабьли Фьлистийана шәрʹ бькә. Хԝәде ԝирʹа һәла һе һур бь һур жи гот кӧ әԝ шәрʹ ча дәрбаз кә ԝәки сәркʹәвә (2 Самуйел 5:17-25).

Әԝ информасийа жь Кʹьтеба Пироз әʹйан дькә, кӧ Хԝәде дьһишт шәрʹ бьбә, ԝәки щьмәʹта хԝә Исраел жь зерандьне хьлаз кә у сәва кӧ һʹәбандьна рʹаст тʹәмьз бьминә. Ԝәрә әм дина хԝә бьдьн сәр ԝан се тьштед кӧ дьдьнә кʹьфше, кӧ Хԝәде хԝәха рʹебәрийа шәрʹа дькьр.

1. ХԜӘДЕ ХԜӘХА САФИ ДЬКЬР КӦ КʹЕ ГӘРӘКЕ ШӘРʹ БЬКӘ. Щарәке Хԝәде готә Исраелийа: «Йе кӧ дь ве шәрʹеда щәнге бькә нә һун ьн». Ле мәʹни чь бу кӧ Хԝәде ӧса гот? Чьмки Хԝәде хԝәха гәрәке шәрʹ кьра бона ԝан (2 Дирок 20:17; 32:7, 8). Чаԝа дь ве тʹемайеда жоре һатә готьне, Хԝәде гәләк щар дәԝса щьмәʹта хԝә шәрʹ дькьр. Щарәке жи Хԝәде тʹәми да щьмәʹта хԝә Исраел, кӧ әԝана шәрʹ кьн, сәва кӧ хԝә у Әʹрде хԝәйи Создайи хԝәйи кьн (Ԛануна Дӧщари 7:1, 2; Йешу 10:40).

2. ХԜӘДЕ ХԜӘХА САФИ ДЬКЬР КӦ КʹӘНГЕ ГӘРӘКЕ ШӘРʹ БЬБӘ. Щьмәʹта Хԝәде бь сәбьр һивийа ԝи ԝәʹдәйи дьман, кʹижан кӧ Хԝәде кʹьфш дькьр сәва шәрʹ дәстпекьн мьԛабьли ԝан мәрьвед зӧлм, йед кӧ Исраели дьчәрчьрандьн. Ле һʹәта ԝи чахи, ԝана жь алийе хԝәда гәрәке тʹӧ тьшт нәкьрана. Ле чахе ԝана хԝәха сафи дькьрьн кӧ тьштәки бькьн, һьнге ԝана ԛәбулкьрьна Хԝәде ӧнда дькьрьн. Бь рʹастийе, Кʹьтеба Пироз дьдә кʹьфше кӧ чахе Исраелийа хԝәха сафи дькьрьн һәрʹьнә шәрʹ, гәләк щар ахьри зәʹф хьраб дьбу. a

3. ХԜӘДЕ ТʹӦ КʹӘСИРА МЬРЬНЕ НАХԜАЗӘ, НӘ ЖИ ЙЕД ХЬРАБРʹА. Йаһоԝа Хԝәде Канийа жийине йә у Әʹфьрандаре инсанәте йә (Зәбур 36:9). Ләма жи әԝ мәрьварʹа мьрьне нахԝазә. Ле йазьх, һәнә мәрьв кӧ мәрьвед дьн дьчәрчьриньн у һәла һе дькӧжьн жи (Зәбур 37:12, 14). Ләма жи Хԝәде дьһишт кӧ шәрʹ һәбьн мьԛабьли мәрьвед хьраб, сәва зӧлмийе бьдә сәкьнандьне. Рʹаст ә Хԝәде изьн дьда Исраелийа кӧ мьԛабьли йед зӧлм шәрʹ бькьн, ле йәкә әԝ һьндава дьжмьне Исраелийа рʹәʹм у сәбьр бу (Зәбур 86:15). Мәсәлә, чахе Исраелийа дьхԝәстьн мьԛабьли шәһәрәки шәрʹ кьн, Хԝәде тʹәми да ԝан кӧ пешийе бона әʹдьлайе әʹлами ԝан кьн, сәва кӧ мәщала дьжмьна һәбә хԝә бьгӧһезьн у жь шәрʹ хьлаз бьн (Ԛануна Дӧщари 20:10-13). Ӧса Хԝәде дьда кʹьфше кӧ әԝ мьрьна хьраба жи нахԝазә, ле дәԝсе дьхԝазә ԝәки әԝ хԝә бьгӧһезьн у бьжин (Һәзәԛел 33:11, 14-16). b

Жь ԝан мәсәла әм дьвиньн, кӧ бәре Хԝәде дьһишт шәрʹ һәбьн, сәва кӧ зӧлмийе у хьрабийе бьдә сәкьнандьне. Ле Хԝәде сафи дькьр нә кӧ мәрьва, ԝәки әв шәрʹ кʹәнге гәрәке бьбуна у кʹе гәрәке шәрʹ бькьра. Ле гәло шәрʹкьрьнеда хԝәстьна Хԝәде әԝ бу кӧ хун бьрʹьжә? Һьлбәт на! Хԝәде зорбәтийе нәфрʹәт дькә (Зәбур 11:5). Ле гәло чахе ԛьрʹна йәкеда Кӧрʹе Хԝәде Иса Мәсиһ һатә ль сәр әʹрде, ньһерʹандьна Хԝәде ль сәр шәрʹ һатә гӧһастьне?