MUTWE WA PA NKUPIKO | LESA UMONA BYEPI NKONDO?
Lesa byo Amonanga Nkondo Kala Kene
Bantu bebamanyikilenga bingi. Balombanga bukwasho kwi Lesa kimye kyonse, bino kechi wibakwashishe ponkapotu ne. Abano bajinga bena Isalela, bantu ba Lesa bajingako kala. Bebamanyikilenga ku mukoka mukatampe wa bena Ijipita. (Kulupuka 1:13, 14) Bena Isalela bapembejile pa myaka yavula kuba’mba Lesa ebapokolole ku bena Ijipita. Kabiji Lesa wibakwashishe pa kimye kyafwainwa. (Kulupuka 3:7-10) Baibolo waamba’mba Lesa mwine walwile na bena Ijipita. Waletele binkunka byavula pa bena Ijipita, kabiji waonawine mfumu wa bena Ijipita ne nzhita yanji pa Kalunga Kachila. (Salamo 136:15) Yehoba Lesa wamwesheshe’mba ye “wa bulume mu nkondo” byo apokolwele bantu banji.—Kulupuka 15:3, 4.
Byo kiji kuba’mba Lesa mwine walwile nkondo na bena Ijipita, kimwesha’mba kechi washikwa nkondo yonse ne. Bimye bimo, waswishanga bantu banji bena Isalela kulwa nkondo. Kimye kimo, waswishishe bena Isalela kulwa nkondo na bena Kenana bakizhizhemo kutama. (Mpitulukilo ya mu Mizhilo 9:5; 20:17, 18) Wakambizhe Davida Mfumu wa bena Isalela kulwa na bena Filishitiya bakanamine. Kabiji Lesa wabuujile Davida jishinda ja kwingijisha pa kulwa jamulengejile kushinda.—2 Samwela 5:17-25.
Ano mashimikila a mu Baibolo amwesha’mba inge bena Isalela ke bebamanyike, Lesa wibaswishanga kulwa nkondo pa kuba’mba azhikijile bantu banji ne bupopweshi bwa kine. Pano monai bishinka bikatampe bisatu bibena kumwesha nkondo yaswishishe Lesa.
-
LESA MWINE YE WASALANGA WAFWAINWA KULWAKO NKONDO. Kimye kimo, Lesa waambijile bena Isalela amba: “Kechi mukalwako mu ino nkondo ne.” Mambo ka? Mambo Lesa mwine ukemulwilako. (2 Byambo bya Moba 20:17; 32:7, 8) Wibakwashanga pa bimye byavula nabiji byo twaambapo kala mu uno mutwe. Bimye bikwabo, Lesa wakambizhe bantu banji bena Isalela ba kala kulwa makondo o aswishishe, nabiji makondo a kuzhikijila Ntanda ya Mulaye.—Mpitulukilo ya mu Mizhilo 7:1, 2; Yoshua 10:40.
-
LESA MWINE YE WAFUUKULANGA KIMYE KYA KULWILAPO NKONDO. Bakalume ba Lesa bapembelanga Lesa kwibabuula kimye kyafwainwa kulwa nkondo na bantu bakanamine bo baikalanga nabo kinkalankulo. Nangwa byonkabyo, kechi befuukwilanga bene kulwa nkondo ne. Inge baya na kulwa kwa kubula kwibaswisha, Lesa kechi wibakwashanga ne. Baibolo waamba’mba, inge bena Isalela baya na kulwa kwa kubula Lesa kwibaswisha, bebashindanga. *
-
Nangwa kya kuba Lesa walwile na bena Kenana, wapulwishepo bamo, nabiji Lehaba ne kisemi kyanji
LESA KECHI USEKELA MU LUFU LWA BANTU NE, NANGWATU BANTU BATAMA. Yehoba Lesa ye Nsulo ya bumi kabiji ye walengele bantu. (Salamo 36:9) Onkao mambo, kechi ukeba bantu kufwa ne. Kyatamakotu ke kya kuba’mba kuji bantu bamo bamanyika bakwabo ne kwibepaya. (Salamo 37:12, 14) Pa kupwisha bubi, bimye bimo Lesa waswishanga kulwa nkondo na bantu batama. Nangwatu myaka yavula Lesa yo aswishishe bena Isalela kulwa nkondo, waubanga “lusa” ne ‘kubanda kuzhingijila’ balwanyi ba bena Isalela. (Salamo 86:15) Lesa wakambizhe’mba saka bakyangye kulukuka muzhi, bafwainwe “kumutayila mbila ya mutende,” pa kuba’mba bantu bekalamo befuukwilepo kupimpula byubilo byabo ne kubula kulwa nkondo. (Mpitulukilo ya mu Mizhilo 20:10-13) Kuba bino kwamwesheshenga’mba Lesa ‘kechi usekela mu lufu lwa muntu mubi ne, bino ukeba’mba muntu mubi aleke kuba bintu byatama, ekale na bumi.’—Ezikyo 33:11, 14-16. *
Kwesakana na byo twisambapo kala, twamona kuba’mba kala kene, Lesa wamonanga nkondo kwikala jishinda ja kupwishishamo kumanyika bantu ne bubi. Pano bino, Lesa ye walengelanga kuba’mba kwikale kulwa nkondo kechi muntu ne, kabiji ye wafuukulanga ne kimye kya kulwilamo nkondo ne kuyuka wafwainwa kulwako. Nanchi Lesa pa kwipaya bantu wibavizhanga nyi? Ine. Aye washikwa bukapondo. (Salamo 11:5) Nanchi Lesa wapimpwile mo amwena nkondo kimye Mwananji, Yesu Kilishitu kyo atendekele mwingilo wanji mu myaka kitota kitanshi nyi?
^ par. 7 Kimye kimo, bena Isalela bebashinjile bingi byo bayile na kulwa na bena Amaleki ne bena Kenana Lesa saka ebakainye kuba bino. (Kubala 14:41-45) Byo papichile myaka yavula, Yosiya Mfumu wa kishinka wayile na kulwa nkondo kwa kubula kumuswisha kwi Lesa, kuba bino kwamwipayishe.—2 Byambo bya Moba 35:20-24.
^ par. 8 Bena Isalela kechi batayanga mbila ya mutende pa kulwa na bena Kenana ne. Mambo ka? Mambo bena Kenana bebapele myaka 400 kuba’mba bapimpule byubilo byabo byatama. Kimye bena Isalela kyo baishile na kulwa nabo, bena Kenana bonse bakankelwe kupimpula byubilo byabo byatama. (Ntendekelo 15:13-16) Kyo kyo bebavizhizhe. Pakuba bena Kenana bapimpwile byubilo byabo, kechi bebepayile ne.—Yoshua 6:25; 9:3-27.
