Pathian ngeiin Aigupta mite a dona chuan, indona zawng zawng a dodâl lo tih a târ lang a. A mi Israelte chu indo tûrin phalna pêk châng a nei bawk. Entîr nân, anni chu Kanaan mi suaksual takte do tûrin thu a pe a ni. (Deuteronomy 9:5; 20:17, 18) Israel Lal Davida chu awpbeh chîng Philistia mite do tûrin a hrilh a. Pathian chuan Davida chu indonaa hnehna chantîr ngei thei remhriatna a pe hial a ni.—2 Samuela 5:17-25.

Chûng Bible thuziakte chuan suahsualna leh awpbehnain Israel mite dinhmun hlauhawma a dah hunah, Pathian chuan a mite vênghim tûr leh biakna dik vawng ṭha tûrin indona awm a phal tih a târ lang a ni. Mahse, Pathian ruat indona chungchângah a hnuaia thil pawimawh pathumte hi chhinchhiah ang che.

1. INDONAA TEL TURTE CHU PATHIAN CHAUHVIN A RUAT. Ṭum khat chu, Pathianin Israelte hnênah: “Indona hi in beih a ngai lo vang,” tiin a hrilh a. Eng nge a chhan? Amah ngeiin an tân a beihsak dâwn vâng a ni. (2 Chronicles 20:17; 32:7, 8) He thuziak tîra kan sawi tâk ang khân, chutiang chuan vawi tam tak a ti a. Ṭum dangah pawh, Pathianin hmân laia a mi Israelte chu an hnêna pêk a tiam, Ram Tiam chu la tûr leh vênghim tûrin indonaa an tel a phal a ni.—Deuteronomy 7:1, 2; Josua 10:40.

2. CHUNG INDONA THLEN HUN TUR CHU PATHIAN CHAUHVIN A RUAT. Pathian chhiahhlawhte chuan an chhehvêla inawpbehna leh suahsualnate do tûrin Pathian hun ruat chu dawhthei taka an nghah a ngai a. Chumi hun ruat a thlen hma erawh chuan indonaah an tel tûr a ni lo. Hun ruat hmaa indonaa an tel khân Pathian pawm an hlawh ta lo a ni. Pathian phalna lova Israel mite indonaa an tel khân, chhiatna a thlen ṭhîn tih Bible chuan a târ lang. *

3. MI SUALTE PAWH TIAMIN MIHRINGTE THIHNAAH PATHIAN A LAWM LO. Pathian Jehova chu Nunna hnâr leh mihringte Siamtu a ni a. (Sâm 36:9) Chuvângin, mite an thi hmuh chu a duh lo a ni. Mahse, mite awpbet tûra suaksual taka ruahmantu leh mi dangte nunna la hialtu an awm chu a lungchhiatthlâk hle. (Sâm 37:12, 14) Chûng sualnate chu titâwp tûrin, Pathian chuan suahsualna do tûra phalna pêk châng a nei a. Mahse, chutiang indonaa Israel mite an tel chhûng zawng pawh khân, anmahni hnehchhiahtute chungah pawh ‘lainatna’ leh ‘thinnelna’ a lantîr tho a ni. (Sâm 86:15) Entîr nân, Pathianin Israelte hnênah khawpui an do hmain, chuta awmte chu an kawng thlâk a, indona pumpelh theihna hun remchâng pêk nân ‘remna thu sawi phawt’ tûrin a hrilh a. (Deuteronomy 20:10-13) Chutiang chuan, Pathianin ‘mi suaksual thihnaah lâwmna a nei lo va, mi suaksualin a awm dân a kalsan a, a nun hi a lawmzâwng a ni,’ tih a târ lang a ni.—Ezekiela 33:11, 14-16. *

Hmân laia thilthleng chanchina kan hmuh tâk aṭangin, Pathian chuan indona chu inawpbehna leh suahsualna chi hrang hrang tihtâwpna angin a thlîr tih kan hria a. Mahse, chutiang indona a thlen hun tûr leh a tel tûrte ruattu dik tak chu mihringte ni lovin, Pathian a ni. Ani chuan thisen chhuah châk zâwngin indona a thlentîr em? Thlentîr lo. Ani chuan nunrâwnna chu a haw tak zet a ni. (Sâm 11:5) Kum zabi khatnaa a Fapa, Isua Krista’n rawngbâwlna a ṭan khân Pathianin indona a thlîr dân chu a thlâk danglam em? (wp15-E 11/01)