Bondie Limem inn lager kont bann Ezipsien. Alor sa montre ki Li pa kondann tou bann lager. Parfwa Li ti permet nasion Izrael pou al lager. Par exanp, Li ti demann zot pou al lager kont bann Kananeen ki ti extra move. (Deteronom 9:5; 20:17, 18) Li ti demann David, Lerwa Izrael, pou al lager kont bann Filistin ki ti pe fer dominer ar zot. Bondie ti mem donn David bann linstriksion pou li kapav gagn laviktwar.​—2 Samiel 5:17-25.

Ki sa bann lexanp-la montre nou? Kan lezot nasion ti fer dominer ar bann Izraelit, Bondie ti aksepte ki bann Izraelit lager kont sa bann nasion-la. Sa ti protez so pep ek vre ladorasion. Me anou get trwa pwin inportan konsernan bann lager ki Bondie ti demann bann Izraelit fer.

1. SE BONDIE KI TI DESIDE KISANNLA POU PARTISIP DAN ENN LAGER. Enn zour Bondie ti dir bann Izraelit: “Zot pa pou bizin partisip dan sa lager-la.” Kifer? Bondie Limem ti pou lager pou zot. (2 Kronik 20:17; 32:7, 8) Ek Li ti fer sa plizir fwa kouma nou’nn trouve dan koumansman sa lartik-la. Me ena fwa, Bondie ti demann so pep dan ansien Izrael pou pran par dan bann lager ki Li ti aksepte. Zot ti lager sirtou kan ti bizin protez ek defann Later Promiz, pei ki Bondie ti promet zot.​—Deteronom 7:1, 2; Zozie 10:40.

2.   SE BONDIE KI TI DESIDE KAN POU ENA SA BANN LAGER-LA. Bann serviter Bondie ti bizin ena pasians ek atann ler kot Bondie ti’nn fixe pou zot al lager. Zot pa ti bizin al lager par zotmem. Si zot ti dezobeir zot pa ti pou gagn benediksion Bondie. Kan bann Izraelit ti al lager san lotorizasion Bondie, Labib montre ki souvan sa ti ena bann move konsekans. a

3. BONDIE PA KONTAN KAN BANN DIMOUNN MOR MEM SI ZOT MOVE. Se Zeova ki Lasours lavi ek ki’nn kree bann dimounn. (Psom 36:9) Alor Li pa’le ki bann dimounn mor. Me malerezman, ena sertin dimounn ki move ek anvi fer dominer ar lezot ek mem tir lavi lezot. (Psom 37:12, 14) Pou aret sa, parfwa Bondie inn permet so pep al lager kont bann move. Me pourtan, pandan tou sa bann lane-la, Bondie ti ena pitie ek Li ti “ena enn gran pasians” anver bann ki ti pe fer dominer ar bann Izraelit. (Psom 86:15) Par exanp, avan ki bann Izraelit atak enn lavil, Li ti demann zot pou fer sa lavil-la “konn bann kondision lape.” Sa ti donn lokazion bann dimounn dan sa lavil-la pou sanze pou ki bann Izraelit pa lager kont zot. (Deteronom 20:10-13) Koumsa Bondie ti montre “seki fer [Li] plezir, se pa ki enn move dimounn mor, me ki li kit so move semin ek ki li res an-vi.”​—Ezekiel 33:11, 14-16. b

Depi koumansman sa lartik-la, nou’nn trouve ki dan lepase Bondie ti servi lager pou touy bann ki ti pe fer dominer ar lezot. Me se Bondie, pa bann dimounn, ki ti ena drwa deside kan pou ena sa bann lager-la ek kisannla pou partisip ladan. Me eski Bondie ti kontan ki ena bann lager kot vers boukou disan? Non. Okontrer, Li deteste laviolans. (Psom 11:5) Eski dan premie siek, fason panse Bondie lor lager ti sanze kan so Garson, Zezi Kris, ti koumans so minister lor later?