TLAMACHTILI TLEN IKA PEUA: ¿KENIJKATSA KIITA TOTEOTSIJ NOPA TLAUILANKAYOTL?

Kej toTeotsij kiitayaya tlauilankayotl kema ayamo ualayaya Jesús

Ma kakisti ipan

Uejkajkia, nopa israeleuanij eliyayaj katli toTeotsij kintlapejpenijtoya uan egiptoeuanij tlauel kintlaijiyouiltiyayaj. Maske miakpa kiiljuijkej toTeotsij ma kinpaleui, amo nima kinpaleuik (Éx. 1:13, 14). Israeleuanij tlauel miak xiuitl kintlaijiyouiltijkej uan kinekiyayaj toTeotsij ma kinmakixti, uan kema asik tonali, toTeotsij kinmakixtik (Éx. 3:7-10). Biblia kiijtoua toTeotsij kinteuik egiptoeuanij ika matlaktli amo kuali tlamantli uan teipa kitsontlamiltik faraón uan itlateuijkauaj ipan ueyi atl Rojo (Sal. 136:15). Jehová kinextik eliyaya se kuali “tlateuijketl” katli kinmanauiyaya itekipanojkauaj (Éx. 15:3, 4).

Ni kinextia Jehová amo kikualankaita nochi tlauilankayotl. Ya kikajki israeleuanij ma kinteuikaj sekinok altepemej, kej kema kinnauatik ma kinteuikaj canaáneuanij katli kichiuayayaj tlen tlauel amo kuali (Deut. 9:5; 20:17, 18). Nojkia kinauatik David ma kinteui filisteaeuanij uan kiiljuik kenijkatsa kinteuiskia uan kiampa kintlaniskia (2 Sam. 5:17-25).

Ni nojkia kinextia toTeotsij kinkauayaya israeleuanij ma kinteuikaj katli kintlaijiyouiltiyayaj uan kinchiuiliyayaj tlen amo kuali, pampa kiampa momanauiskiaj uan nojua kiueyichiuaskiaj toTeotsij kej kinamiki. Ma tikitakaj eyi tlamantli tlen toTeotsij kichiuayaya kema onkayaya se tlauilankayotl.

SAN TOTEOTSIJ KIIJTOUAYAYA AJKIA TLATEUISKIA. Se tonali toTeotsij kiniljuik israeleuanij: “Axmoneki para inmojuantij intlateuisej”. Ni kiniljuik pampa yaya tlateuiskia (2 Crón. 20:17; 32:7, 8). ToTeotsij miakpa kiampa kichijki, kej kema kinteuik egiptoeuanij. Uan nojkia kinnauatik israeleuanij ma tlateuikaj uan kiampa moaxkatiskiaj nopa tlali tlen kiniljuijtoya kinmakas uan nojkia kema kinekiskiaj kinkuilisej (Deut. 7:1, 2; Jos. 10:40).
SAN TOTEOTSIJ KIIJTOUAYAYA KEMA TLATEUISKIAJ. Israeleuanij monekiyaya kichiaskiaj toTeotsij ma kiijto kema kinteuiskiaj ininkualankaitakauaj. Tlaj kinekiyayaj toTeotsij ma kinpaleui, amo kinamikiyaya tlateuisej tlaj amo kinnauatijtoya. Biblia kiijtoua kintlaniyayaj kema tlateuiyayaj maske toTeotsij amo kinnauatijtoya. *
Maske toTeotsij kinteuik canaáneuanij, amo nochi kinmiktik, kej Rahab uan ichampoyouaj

TOTEOTSIJ AMO KINEKI MA MIKIKAJ MASEUALMEJ. Jehová ‘temaka yolistli’ uan yaya kinchijchijki maseualmej (Sal. 36:9). Ya tlauel kipatiita nemilistli uan amo aka kineki ma miki. Uan itstokej maseualmej katli san moiljuijtokej kenijkatsa tetlaijiyouiltisej uan temiktisej (Sal. 37:12, 14). Kemantika toTeotsij kikajki ma onka tlauilankayotl pampa kinekiyaya kitlamiltis tlen amo kuali. Maske kinnauatik israeleuanij ma kinteuikaj ininkualankaitakauaj, toTeotsij kinextik kintlasojtlayaya uan kipiayaya iyolo ika ikualankaitakauaj (Sal. 86:15). Yeka kema israeleuanij nechka kiteuiskiaj se altepetl, toTeotsij kinnauatiyaya ma kiniljuikaj kenijkatsa ‘ueliskia kipiasej tlayolseuilistli ininuaya’, kiampa ueliskia kipatlasej kej monejnemiltiyayaj uan ayokmo kinteuiskiaj (Deut. 20:10-13). Tijmatij amo kinekiyaya ma mikikaj pampa ya kiijtok: “Axnijneki ma miki niyon se tlakatl tlen axkuali. Na nijneki ma kikaua iojui tlen axkuali uan ma [...] kipia yolistli” (Ezeq. 33:11, 14-16). *

Ni kinextia uejkajkia toTeotsij kikauayaya ma onka tlauilankayotl uan kiampa kintsontlamiltiyaya katli tetlaijiyouiltiyayaj uan katli kichiuayayaj tlen amo kuali. San Jehová kiijtouayaya kema tlateuiskiaj uan ajkia tlateuiskia. Uan kema kinteuiyaya amo kintlaijiyouiltiyaya, pampa ya kikualankaita tlasisinijkayotl (Sal. 11:5). ¿Kipatlak toTeotsij kej kiitayaya nopa tlauilankayotl kema Jesús pejki tlajtolmoyaua?

^ párr. 7 Se tonali, kema israeleuanij kinteuitoj canaáneuanij uan amaleqeuanij, kintlankej pampa toTeotsij amo kinnauatijtoya ma kinteuikaj (Núm. 14:41-45). Uan tlanauatijketl Josías kimiktijkej kema tlateuito pampa toTeotsij amo kinauatijtoya (2 Crón. 35:20-24).

^ párr. 8 Kema israeleuanij kinteuijkej canaáneuanij amo kiniljuijkej kenijkatsa ‘ueliskia kipiasej tlayolseuilistli ininuaya’, pampa ipan 400 xiuitl tlen panotoya ueltoskia kipatlatoskiaj kej monejnemiltiyayaj. Inijuantij amo kema moyolpatlaskiaj, yeka kema israeleuanij kinteuijkej ayokmo tleno kiniljuijkej (Gén. 15:13-16). Maske monekiyaya nochi ma kintsontlamiltikaj, se keskij canaáneuanij kipatlakej kej monejnemiltiyayaj, yeka amo kinmiktijkej (Jos. 6:25; 9:3-27).

Tlen nojkia mitspaktis tikitas

BIBLIA, ¿TLAKE TLAMACHTILI KIPIA?

Moaxkatijkej tlali Canaán

Kema nopa israeleuanij moaxkatijkej tlali Canaán, ¿kenke Jehová kinmanauik Rahab uan ichampoyouaj?

TLEN TEMATILTIA