Pwehki pein Koht eh ketin mahweniong mehn Isip kan, met kasalehda me e sohte ketin sapwungki mahwen koaros. Ni ahnsou teikan, e ketikihong sapwellime aramas akan, Israel, manaman en mahwen. Karasepe, e ketin kehkehlikihong irail en mahweniong mehn Kenan kan, me sohte kin uhdihsang ar wiewia suwed kan. (Deuderonomi 9:5; 20:17, 18) E ketin kaweid Nanmwarki Depit en mahweniong mehn Pilisdia ko me kin lemei ong irail. Koht pil ketin padahkihong Depit dahme e pahn wia nan mahweno pwe en kak kana.​—2 Samuel 5:17-25.

Koasoipen Paipel pwukat kasalehda me ni soangen me suwed pwukat oh lokolok ar kin wie keper ong mehn Israel kan, Koht kin ketin kamanahla mahwen en wiawi pwehn doare sapwellime aramas akan oh pere kaudok mehlel. Ahpw tehk ire kesempwal siluh me pid mahwen kan me Koht ketin kamanahla.

1. KOHT KELEHPW ME PAHN KOASOANEHDI IHS ME PAHN IANG MAHWEN. Ehu pak, Koht ketin padahkihong mehn Israel ko: “Kumwail sohte pahn pei nan mahwen wet.” Ia kahrepe? Pein Koht pahn ketin mahwenki irail. (2 Kronikel 20:17; 32:7, 8) E ketin wiahier met pak tohto, nin duwen me kileldier mwoweo nan oaralap wet. Ahnsou teikan, Koht ketin kehkehlikihong sapwellime aramas akan nan Israel en iang mahwen kan me e ketin kupwurki, keieu me kin pid en pere oh uhki arail Sapwen Inowo.—Deuderonomi 7:1, 2; Sosua 10:40.

2. KOHT KELEHPW ME PAHN KOASOANEHDI IAHD SOANGEN MAHWEN WET PAHN WIAWI. Sapwellimen Koht ladu kan mahso anahne kanengamah awih iahd sapwellimen Koht ahnsou ong mahweniong irail kan me kin kahrehdo lokolok oh soahng suwed kan me kapilirailpene. Lao lel ahnsowo, re sohte pahn pein medewehda iang mahwen. Ni arail kin pein medewehda wia met, Koht sohla kin ketin kupwurki irail. Ni mehlel, Paipel kasalehda me ni ahnsou me mehn Israel kan kin pein wiahda pwe ren iang mahwen me Koht sohte ketin kamanahla, imwilahn met kin kalapw suwed. *

3. KOHT SOHTE KETIN KUPWURPERENKI ARAMAS EN MEHLA, IANGAHKI ME SUWED KAN. Siohwa Koht iei Utupen mour oh ih me Sounkapikadahn aramas. (Melkahka 36:9) Ihme kahrehda, e sohte ketin kupwurki kilang aramas en mehla. Ahpw, e kansensuwed me mie aramas me kin widing oh kin men kaloke oh pil kemehla meteikan. (Melkahka 37:12, 14) Pwehn katokehdi soahng suwed pwukat, kin mie pak me Koht kin ketin kamanahla mahwen en wiawiong me suwed kan. Ahpw erein sounpar ko koaros me e ketin mweidohng mehn Israel ko en iang mahwen, e kin ketin kadek kalahngan oh “kanengamah” ong ahn mehn Israel kan imwintihti ko. (Melkahka 86:15) Karasepe, e ketin kehkehlikihong mehn Israel kan me mwohn ar pahn kohla mahweniong ehu kahnimw, re pahn “kihong mahs towe kan ar ahnsoun pekimahk,” pwehn kihong tohnsahpwo ahnsoun wekidala arail wiewia kan oh soikala mahwen. (Deuderonomi 20:10-13) Ni ahl wet, Koht kasalehda me e “sohte kin kupwurperenki mehlahn aramas dipan. Ahpw en wiliakapwasang eh suwed pwe en mour.”​—Esekiel 33:11, 14-16. *

Sang dahme kitail koasoiapenehr, kitail kilang me mahsie, Koht kin kilangwohng mahwen nin duwen ahl ehu pwehn ketikihsang soangsoangen lokolok kan oh me suwed kan. Ahpw Koht, a kaidehn aramas, me ahneki pwuhng en koasoanehdi iahd soangen mahwen wet en wiawi oh ihs me pahn iang pidada loale. Ia duwe, Koht kin ketin ngoangki wiahda mahwen ni ahl lemei pwehn ihte kemehla aramas? Uhdahn soh. E kin ketin kalahdeki tiahk lemei. (Lepin Padahk 6:16-19) Ia duwe, sapwellimen Koht madamadau ong mahwen wekila ni ahnsou me sapwellime Ohl, Sises Krais, tepida doadoahk en kalohk ni mwehin tepin Kristian ko?