CALLARI TEMA | ¿TAITA DIOSCA GUERRACUNATA ALICACHINLLU?
Punda tiempopica ¿imashinata Taita Diosca guerracunataca ricurca?
Israel llactaca Taita Diospa agllashca llactami carca. Shinapash, Egipto llactaca paicunataca ninanda llaquichishpami charirca. Chaimandami, israelitacunaca Taita Diosta tauca viaje ayudahuai nishpa mañarca. Shinapash, paicunapa mañaicunaca na uyashca shinami ricurirca (Éxodo 1:13, 14). Israelitacunaca ashtaca huatacunatami llaquicunata Taita Dios tucuchichun shuyanajurca. Shinapash shuj punllaca, Egipto llactamandami Taita Diosca israelitacunataca salvarca (Éxodo 3:7-10). Bibliapica ninmi, Taita Diosllata Egipto llactahuan macanajushpami chai llactataca 10 plagacunahuan llaquichirca. Shinallata faraonda, paipa soldadocunatapashmi mar Rojopi tucuchirca nishpa (Salmo 136:15). Shinami, Jehová Diosca ‘macanajunata ali yachaj runashna’ paipa llactata cuidashcata ricuchirca (Éxodo 15:3, 4).
Taita Diosllata Egipto llactahuan macanajushcata ricushpaca, huaquin guerracunataca Taita Dios apoyashcatami cuenta japinchi. Huaquinbica, israelitacuna shuj llactacunahuan macanajuchun saquircami. Shuj ejemplota ricushun. Taita Diosca Israel llactataca millai millai cananeocunahuan macanajuchunmi cacharca (Deuteronomio 9:5; 20:17, 18). Rey Davidtapash nali filisteocunahuan macanajuchunmi mandarca. Filisteocunata mishangapaj imata rurana cashcatapashmi Taita Diosca villarca (2 Samuel 5:17-25).
Chaicunata Bibliapi liishpaca israelitacunata llaquichijpi, maltratajpi, paita adorashpa catina peligropi cajpica, Taita Diosca guerracuna tiachun saquishcatami intindinchi. Shinapash, imamanda guerracuna tiachun saquishcata intindingapaca quimsa yuyaicunata ricupashun.
-
TAITA DIOSLLAMI GUERRACUNAMAN PICUNA RINATA NIN CARCA. Shuj viajeca, Taita Diosca israelitacunataca nircami: “Canguna macanajunaca na canllu” nishpa. Paillata paicunapa randi macanajuna caimandami shina nirca (2 Crónicas 20:17; 32:7, 8). Imashinami Egipto llactahuan paillata macanajurca, shinallatami Taita Diosca ashtaca llactacunahuan macanajurca. Shuj viajeca, israelitacunataca pai carasha nishca alpata japingapaj macanajuchun, chai alpata cuidachunmi mandarca (Deuteronomio 7:1, 2; Josué 10:40).
-
TAITA DIOSLLAMI GUERRA IMA HORA CALLARINATA NIN CARCA. Taita Diosta sirvijcuna guerraman ringapaca, pai ima hora richun mandangacamanmi shuyana carca. Na cazushpa guerraman rijpica, paica na ayudanllu carca. Bibliapica ninmi, paicunapa munai shuj guerraman rishpaca jatun llaquipimi urman carca nishpa. *
-
Canaán llactahuan Taita Dios macanajushpapash Rahabta, paipa familiatapash salvarcami
TAITA DIOSCA PIPASH NA HUAÑUCHUN MUNANLLU. Jehová Diosca Tucuita Ruraj, ‘causaita cuj’ Diosmi can (Salmo 36:9). Paica causaita juyaimandami pipash na huañuchun munan. Shinapash, huaquin gentecunaca shujcunata llaquichingapaj, huañuchingapami imacunatapash pensarinajun (Salmo 37:12, 14). Huaquinbica, Taita Diosca nali ruraicunata tucuchingapami guerracuna tiachun saquishca. Israelitacunata macanajuchun cachashpapash, Taita Diosca nara guerrata callarichishpallatami contracunata llaquishpa paicuna cambiachun ashata shuyan carca (Salmo 86:15). Chaimandami, israelitacunataca mandarca, shuj llactahuan nara macanajushpallatami chai llactamanda gentecuna cambiana oportunidadta charichun, ‘casilla ali causai tiachun parlana’ canguichi nishpa. Cambiajpica guerraca na tianllu carca (Deuteronomio 20:10-13). Taita Diosca nircami: ‘Ñucata na manllaj runa huañuchunga, na munanichu. Ashtahuangarin pai imashna causajushcata saquishpa, causaita charichunmi munani’ nishpa (Ezequiel 33:11, 14-16). *
Imashinami ricushcanchi, Taita Diosca punda tiempopica nali ruraicunata, llaquichijcunata tucuchingapami guerracuna tiachun saquirca. Jehová Diosllami ima hora guerra tianata, picunalla macanajunatapash mandana derechota charirca. Ashtahuanbash, Jehová Diosca manllanaita nalicunata rurashpaca na macanajunllu carca. Paica nalita rurajcunataca na ricunayachinllu (Salmo 11:5). Shinapash, paipa Churi Jesús cai Alpapi villachi callarijpica, Jehová Diosca ¿imashinata guerracunataca ricurca?
^ par. 7 Shuj punllaca, israelitacunaca Taita Dios ama macanajungapaj ringuichichu nishca jahuami amalequitacunahuan, cananeocunahuan macanajungapaj rirca. Na cazuimandami israelitacunaca mishai tucurca (Números 14:41-45). Ashtaca huatacuna jipaca, rey Josiaspash Taita Diosta na cazushpami shuj guerraman rirca. Na cazuimandami Josiasca huañuita tarirca (2 Crónicas 35:20-24).
^ par. 8 Cananeocunahuan nara macanajushpallatami israelitacunaca casilla ali causai tiachun paicunahuan parlagrirca. Cananeocunaca 400 huatacunatami cambiangapaca charirca. Paicunahuan guerrata callarishpa macanajuna horasca, ima hora paicunaca na cambiana cashcatami ricurca (Génesis 15:13-16). Chaimandami paicunaca tucuchitapacha tucuchi tucuna carca. Shinapash, huaquin cananeocunaca paicunapa nali causaita cambiashpami salvarirca (Josué 6:25; 9:3-27).
