SIHLOKO LESINGUMGOGODLA | TIMPHI TIYAMJABULISA YINI NKULUNKULU?
Betimjabulisa Yini Nkulunkulu Timphi Lebetiliwa Kadzeni?
Ema-Israyeli bekacindzetelekile futsi bekathantaza athantazile kuNkulunkulu, acela kutsi awakhulule kodvwa kwaba shengatsi akaweva. Ema-Israyeli bekusive lebesikhetfwe nguNkulunkulu futsi bekahlushwa ngemaGibhithe, lobekusive lebesinemandla kakhulu. (Eksodusi 1:13, 14) Kwaphela iminyaka solo ema-Israyeli amele kukhululwa nguNkulunkulu kulesive lebesiwagcilata. Sefika sikhatsi sekutsi Nkulunkulu awakhulule. (Eksodusi 3:7-10) LiBhayibheli lisitjela kutsi Nkulunkulu watilwela yena matfupha nemaGibhithe. Washaya emaGibhithe ngetishayo letilishumi ngemuva kwaloko wabhubhisa Faro nelibutfo lakhe eLwandle Lolubovu. (Tihlabelelo 136:15) Jehova wakhombisa kutsi unguNkulunkulu lonemandla ngesikhatsi alwela bantfu bakhe.—Eksodusi 15:3, 4.
Kulwa kwaNkulunkulu nemaGibhithe kusikhombisa kutsi akusito tonkhe timphi latenyanyako. Bekahle awatjela ema-Israyeli kutsi ayokulwa. Ngalelinye lilanga wawatfuma kutsi ayokulwa nemaKhenani lebekenta imikhuba lenyanyekako. (Dutheronomi 9:5; 20:17, 18) Waphindze watjela iNkhosi Davide kutsi iyokulwa nemaFilisti lebekahlupha sive sakhe. Nkulunkulu waze wanika Davide lisu lebelitomsita ancobe.—2 Samuweli 5:17-25.
LiBhayibheli lisikhombisa kutsi Nkulunkulu bekatjela ema-Israyeli kutsi ayokulwa nangabe kukhona lobekawahlupha nobe nakativikela etitseni tawo, futsi abewavumela kutsi alwe kute alondvolote kukhonta lokumjabulisako. Naka nati tintfo letintsatfu lebetenteka etimphini lebetivunyelwa nguNkulunkulu.
-
NGUNKULUNKULU LOBEKAKHETSA KUTSI NGUBANI LOBEKATAWULWA. Ngalelinye lilanga Nkulunkulu watjela ema-Israyeli watsi: “Singeke sibe khona sidzingo sekuyilwa lemphi.” Yini leyamenta washo njalo? Kutsi bekatabalwela. (2 Tikhronike 20:17; 32:7, 8) Bekangacali Jehova kuwalwela ema-Israyeli, njengobe sifundzile kutsi wawalwela eGibhithe. Kodvwa ngalesinye sikhatsi Nkulunkulu bekawavumela ema-Israyeli kutsi alwe avikele live lawo lebekawaphe lona kutsi lingatsatfwa titsa tawo.—Dutheronomi 7:1, 2; Joshuwa 10:40.
-
NGUNKULUNKULU LOBEKANCUMA KUTSI KUTAWULIWA NINI. Bantfu baNkulunkulu bekudzingeka babeketele, bamele sikhatsi Nkulunkulu labekatabakhulula a
ngaso etitseni tabo. Bebangeke nje basuke bayokulwa netitsa tabo Nkulunkulu angakasho. Nakwentekile benta njalo Jehova bekangabasekeli. LiBhayibheli litsi nangabe kwentekile ema-Israyeli aya emphini Jehova angakasho bekehlulwa. -
Nome Jehova awabhubhisa emaKhenani kodvwa wamsindzisa Rahabi kanye nemndeni wakubo
NKULUNKULU AKAJABULI NAKABONA BANTFU BAFA NGISHO NALABABI IMBALA. NguJehova lowadala bantfu, liBhayibheli litsi ungumtfombo wekuphila. (Tihlabelelo 36:9) Ngako akajabuli nakabona bantfu bafa. Kodvwa kuyadzabukisa kutsi kunebantfu labacindzetela labanye baze bababulale. (Tihlabelelo 37:12, 14) Ngalesinye sikhatsi Nkulunkulu bekayivumela imphi kuze akhulule bantfu bakhe. Ngisho noma Nkulunkulu bekahle awavumela ema-Israyeli kutsi alwe netitsa tawo kodvwa loko bekungasho kutsi sewunguNkulunkulu lote umusa nalosheshe atfukutsele. (Tihlabelelo 86:15) Asewucabange nje nganasi sibonelo, Jehova watjela ema-Israyeli kutsi ngaphambi kwekutsi ayokulwa bekufanele acale acele lalayokulwa nabo kutsi ‘babeke phansi tikhali,’ loko bekuniketa lesive lebesiyohlaselwa litfuba lekutsi siyekele kwenta tintfo letimbi kuze singavelelwa ngulokubi. (Dutheronomi 20:10-13) Loku kwakhombisa kutsi Jehova ucinisile nakatsi: “Angikujabuleli kufa kwalomubi, kodvwa ngitsandza kutsi agucuke etindleleni takhe letimbi aphile.”—Hezekeli 33:11, 14-16. b
Kuloku lesesikufundzile, sesibonile kutsi kadzeni Nkulunkulu bekasebentisa imphi kuze acedze bubi noma akhulule bantfu bakhe. Kodvwa bekunguNkulunkulu lebekakhetsa kutsi ngubani lotakulwa futsi nini hhayi bantfu . Nkulunkulu bekangalwi nje ngobe afuna kubona bantfu bafa. Nkulunkulu uyabutondza budlova. (Tihlabelelo 11:5) Betimjabulisa yini Jehova timphi ngesikhatsi Jesu alapha emhlabeni?
a Kwake kwenteka ngalelinye lilanga ema-Israyeli ahamba ayokulwa nesive sema-Amaleki kanye nemaKhenani kantsi Jehova abetsite angayi, umphumela waba buhlungu kakhulu ngobe ancotjwa. (Numeri 14:41-45) NeNkhosi Josaya nayo yaya emphini Jehova angakasho, kwaba buhlungu kakhulu kwayo ngobe yafa kulemphi.—2 Tikhronike 35:20-24.
b Ema-Israyeli akazange ente sivumelwane sekuthula ngaphambi kwekutsi alwe nemaKhenani. Leni? Ngobe Jehova bekawanikete iminyaka lengu-400 kutsi ashintje. Kodvwa kuyamangalisa kutsi nakufika sikhatsi sekutsi ema-Israyeli alwe nawo besekenta tintfo letimbi kakhulu. (Genesisi 15:13-16) Ngako bekufanele vele abhujiswe. Kepha akhona emaKhenani laphendvuka futsi Jehova wawasindzisa.—Joshuwa 6:25; 9:3-27.