Suku poku linga uyaki la va Egito, ci lekisa okuti ka pisa ovoyaki osi. Olonjanja vimue wa ecelela okuti afendeli vaye va Isareli va linga uyaki. Eye wa va handelekele oco va liyake la va Kanana momo va kala vakuevĩho. (Esinumuĩlo 9:5; 20:17, 18) Eye wa tuma Daviti Soma ya va Isareli oku yaka la va Filisiti. Suku wa eca ku Daviti olonumbi oco a yule uyaki.—2 Samuele 5:17-25.

Ovolandu a tukuiwa ndeti Vembimbiliya, a lekisa okuti eci evĩho kuenda ungangala via enda oku kapa kohele omuenyo wa va Isareli, Suku wa enda oku ecelela uyaki oco a teyuile afendeli vaye kuenda efendelo liocili. Pole, kũlĩhĩsa ovina vitatu via velapo viatiamẽla kuyaki Suku a enda oku ecelela.

1. SUKU EYE WA ENDA OKU NÕLA VANA VA PONDUILE OKU PANGA ONEPA KUYAKI. Vepuluvi limue Suku wa sapuila va Isareli hati: “Heneko vu kuete oku yaka.” Momo lie? Suku wa ponduile oku va yakelako. (2 Asapulo 20:17; 32:7, 8) Eye wa ci linga olonjanja vialua, ndomo ca lomboluiwa kefetikilo liocipama cilo. Vapuluvi akuavo, Suku wa handeleka afendeli vaye va Isareli kosimbu oco va linge ovoyaki eye a sanjukila, ndeci ovoyaki ana a kuatisa koku teyuila Ofeka Yohuminyo.—Esinumuĩlo 7:1, 2; Yehosua 10:40.

2. SUKU EYE WA ENDA OKU SOKIYA OTEMBO OVOYAKI ACO A LINGIWA. Afendeli va Suku va sukilile oku kevelela lepandi otembo Suku a sokiya yoku linga uyaki la vakuevĩho kuenda olongangala  via kala oku va talisa ohali. Osimbu otembo yaco ka ya pitĩlile, ovo ka va ponduile oku yaka longusu yavo muẽle. Eci va enda oku seteka oku ci linga, va pumbaile ocali ca Suku. Embimbiliya li lekisa okuti eci va Isareli va lingaile uyaki ka wa tumiwile la Suku, va enda oku pita lovitangi vialua. a

3. SUKU KA SANJUKILA OLOFA VIOMANU, OKU KONGELAMO OLONDIGAĨVI. Yehova Suku eye Ono yomuenyo haeye ululiki womanu. (Osamo 36:9) Omo liaco, eye ka yongola okuti omanu va fa. Ci sumuisa calua omo okuti omanu valua olondigaĩvi va siata oku talisa ohali vakuavo loku va ponda. (Osamo 37:12, 14) Oco Suku a tateke ũvi waco, olonjanja vimue wa enda oku ecelela oku linga uyaki lolongangala. Vokuenda kuanyamo eci a handeleka va Isareli oco va pange onepa kovoyaki, Suku wa amamako oku lekisa ‘ohenda’ loku “livala konyeño” lovanyali vavo. (Osamo 86:15) Eye wa handelekele va Isareli okuti, osimbu ka va tundile oku ka yaka limbo limue, va sukilile tete oku kũlĩhĩsa nda va tava oku “lieca lombembua” oco va ece epuluvi komanu vaco oku pongolola ekala liavo lĩvi kuenda oku yuvula oku liyaka lavo. (Esinumuĩlo 20:10-13) Omo liaco, Suku wa lekisa okuti ka “sanjukila oku fa kuondingãivi. Eci puãi a sanjukila ceci, nda ondingãivi yi tinduka konjila yaye ha yi kala lomuenyo.”—Esekiele 33:11, 14-16. b

Ndomo tua ci kũlĩhisa, kosimbu Suku wa tendele uyaki ndonjila yimue yoku imula ohali kuenda ovina vikuavo vĩvi. Pole, Suku eye lika wa ponduile oku sokiya otembo yuyaki kuenda vana va ponduile oku panga onepa kuyaki waco, okuti omanu havoko. Anga hẽ Suku wa sanjukilile poku linga ovoyaki aco? Sio ka ci sanjukilile. Ondaka yaye Embimbiliya li lekisa okuti eye o nyãle ungangala. (Osamo 11:5) Suku wa pongolola hẽ ovisimĩlo viaye viatiamẽla kuyaki eci Omõlaye Yesu Kristu a fetika upange waye woku kunda kocita catete?