TIʼ U YÁAX TÁAN JUʼUNIL | ¿BIX U YILIK DIOS LE BAʼATELTÁAMBALOʼ?
Bix tu yilil Dios le baʼateltáambal tu kʼiinil le israelitaʼoboʼ
Junpʼéel kaaj jach yaʼab u pechʼ óoltaʼal kaʼachi. Yaʼab u téenel tu kʼáatoʼob áantaj tiʼ Dios, pero maʼ séeb áantaʼaboʼobiʼ. Le kaaj k-aʼalikaʼ Israel, le kaaj yéeyaʼab tumen Dios úuchjeakiloʼ. Máax pechʼ óoltikoʼob kaʼacheʼ letiʼe egipcioʼoboʼ (Éxodo 1:13, 14). Le israelitaʼoboʼ máan yaʼab jaʼaboʼob táan u páaʼtkoʼob u yáantaʼaloʼob tumen Dios utiaʼal ka xuʼuluk u muʼyajoʼob tu kʼab le egipcioʼoboʼ, hasta ka kʼuch u kʼiinil u yáantaʼaloʼob (Éxodo 3:7-10). Le Bibliaoʼ ku yaʼalikeʼ Dios baʼatelnaj tu contra Egipto. Tu beetaj u yúuchul 10 yaayaj baʼaloʼob tu luʼumil Egipto, ka tu xuʼulsaj faraón paʼteʼ yéetel u soldadoʼob teʼ Chak Kʼáaʼnáaboʼ (Salmo 136:15). Jéeobaeʼ tu yeʼesaj «juntúul nojoch j-baʼateʼel» úuchik u yáantik u kaajal (Éxodo 15:3, 4).
Le baʼateʼel tu beetaj Dios tu contra le egipcioʼoboʼ tu yeʼesaj maʼ tuláakal le baʼateloʼob kʼaas u yilkoʼ. Yaan kʼiineʼ tu chaʼaj u baʼateʼel le israelitaʼob tu contra uláakʼ kaajoʼoboʼ. Tu yaʼalajtiʼob ka baʼatelnakoʼob tu contra le cananeoʼoboʼ tumen jach píitmáanjaʼan u kʼasaʼaniloʼob (Deuteronomio 9:5; 20:17, 18). Tu túuxtaj xan rey David baʼateʼel tu contra le kʼasaʼan filisteoʼoboʼ; hasta tu yaʼalajtiʼ baʼax unaj u beetik utiaʼal u ganar (2 Samuel 5:17-25).
Le Bibliaoʼ ku yeʼesikeʼ ken u yil Dios táan u pechʼ óoltaʼal le israelitaʼoboʼ ku tsʼáaik permiso utiaʼal u baʼateloʼob, beyoʼ ku kanáantkoʼob yéetel ku kanáantik maʼ u xuʼulsaʼal le jaajil adoracionoʼ. Baʼaleʼ yaan óoxpʼéel baʼal unaj k-chʼaʼik en cuenta yoʼolal le baʼateltáambaloʼobaʼ. Koʼox ilik.
-
CHÉEN DIOS AʼALIK MÁAX KU BIN BAʼATEʼEL. Juntéenjeakeʼ Dioseʼ tu yaʼalaj tiʼ le israelitaʼoboʼ: «Maʼ teʼex bíin baʼateltik le baʼatelaʼ». ¿Baʼaxten? Tumen letiʼ kun baʼateʼel kaʼach tu yoʼolaloʼob (2 Crónicas 20:17; 32:7, 8). Yaʼab u téenel bey tu beetiloʼ, jeʼex le ka baʼatelnaj tu contra le egipcioʼoboʼ. Anchaj kʼiinoʼobeʼ Dioseʼ tu chaʼaj u baʼateʼel u kaajal utiaʼal u chʼaʼik le luʼum tu yaʼalaj u tsʼáaiktiʼoboʼ, bey xan utiaʼal maʼ u toʼokoltiʼob (Deuteronomio 7:1, 2; Josué 10:40).
-
CHÉEN DIOS AʼALIK BAʼAX KʼIIN U KÁAJSAʼAL LE BAʼATELOʼ. U kaajal Dioseʼ unaj u chúukpajal u yóol u páaʼt le kʼiin ken u yaʼal Dios jeʼel u páajtal u baʼateʼel tu contra le kʼasaʼan máakoʼob kajaʼanoʼob tu baʼpachoʼ. Wa maʼ tu yaʼalaʼaltiʼobeʼ le israelitaʼoboʼ maʼ tu páajtal u binoʼob baʼateʼel. Wa ku binoʼobeʼ ku xúumpʼattaʼaloʼob tumen Dios. Le Bibliaoʼ ku yaʼalikeʼ ken xiʼikoʼob baʼateʼel chéen tu cuentaʼobeʼ jach kʼaas u bintiʼob. *
-
Kex baʼatelnaj Dios tu contra Canaaneʼ, tu chaʼaj u kuxtal jujuntúuloʼobiʼ, jeʼex Rahab yéetel u láakʼtsiloʼobeʼ
DIOSEʼ MAʼ U KʼÁAT KA KÍIMIK MIX MÁAKIʼ, MIX LE KʼASAʼANOʼOBOʼ. Jéeoba Dioseʼ «u sayabil le kuxtaloʼ»; letiʼ beet wíinik way Luʼumeʼ (Salmo 36:9). U yaabiltmaj le kuxtaloʼ yéetel maʼ u kʼáat ka kíimik mix máakiʼ. Baʼaleʼ yaan máakoʼobeʼ hasta ku tuklikoʼob bix jeʼel u pechʼ óoltikoʼob máakeʼ wa bix jeʼel u kíimskoʼobeʼ (Salmo 37:12, 14). Yaan kʼiineʼ Dioseʼ ku chaʼik u yúuchul baʼateʼel tu contra le kʼasaʼan máakoʼoboʼ. Baʼaleʼ tuláakal le tiempo tu chaʼaj u baʼateʼel le israelitaʼoboʼ, tu chʼaʼaj óotsilil tiʼ u enemigoʼob yéetel tu yeʼesaj paciencia tiʼob (Salmo 86:15). Por ejemploeʼ tu yaʼaleʼ antes u bin baʼateʼel le israelitaʼob tu contra junpʼéel kaajeʼ unaj u yaʼalikoʼob tiʼ u kajnáaliloʼob «ka u kʼububaʼob yéetel jéetsʼel óolal» utiaʼal u yeʼeskoʼob u kʼáat u kʼex u kuxtaloʼob; beyoʼ maʼ tun antal baʼatelil (Deuteronomio 20:10-13). Jeʼex k-ilkoʼ Dioseʼ «maʼ [u] kʼáat ka kíimik le j-loolob wíinikoʼ, baʼaleʼ [u] kʼáat ka u kʼex u kuxtal tu yoʼolal u jechik le kíimiloʼ» (Ezequiel 33:11, 14-16). *
K-kanik túuneʼ tiʼ Dioseʼ meyajnaj le baʼateltáambal utiaʼal u xuʼulsik le kʼasaʼanil yéetel le pechʼ óolal úuchjeakiloʼ. Baʼaleʼ letiʼ aʼal baʼax kʼiin kun káajal le baʼateloʼ yéetel máaxoʼob kun táakpajloʼobiʼ, maʼ wíinikiʼ. Tsʼoʼoleʼ Dioseʼ maʼ chéen tu seten kíimsaj máakoʼob teʼ baʼateltáambaloʼob chéen tumen jatsʼuts tu yililiʼ. Tumen jeʼex u yaʼalik le Bibliaoʼ letiʼeʼ u pʼekmaj le máaxoʼob beetik looboʼ (Salmo 11:5). ¿Kʼexpaj wa bix u yilik Dios le baʼateltáambal teʼ yáax siglo le ka taal Jesucristo, u Hijo, way Luʼumoʼ?
^ xóot’ol 7 Juntéeneʼ le israelitaʼoboʼ perdernajoʼob tumen kex aʼalaʼabtiʼob maʼ u binoʼob baʼateʼel tu contra le amalequitaʼob yéetel le cananeoʼoboʼ, binoʼob (Números 14:41-45). Ka máan yaʼab jaʼaboʼobeʼ rey Josíaseʼ tu pechuba xan bin baʼateʼel x-maʼ permisoileʼ ka kíimsaʼabi (2 Crónicas 35:20-24).
^ xóot’ol 8 Tiʼ le cananeoʼoboʼ maʼ yáax aʼalaʼabtiʼob ka u kʼububaʼob yéetel jeetsʼel óolaliʼ. ¿Baʼaxten? Tumen tsʼokaʼaniliʼ u tsʼaʼabal 400 años utiaʼal ka u kʼex u kuxtaloʼob. Ka kʼuch u kʼiinil u bin le israelitaʼob baʼateʼel tu contra le cananeoʼoboʼ tsʼokaʼaniliʼ u yilaʼal maʼ ten u kʼex u kuxtaloʼobeʼ (Génesis 15:13-16). Le oʼolal xuʼulsaʼaboʼob. Baʼaleʼ yaneʼ maʼ xuʼulsaʼabiʼ tumen tu kʼexaj u kuxtal (Josué 6:25; 9:3-27).
Maʼ xaaneʼ jeʼel u yutstal xan ta wicheʼ
LE BIBLIAOʼ TIʼ BAʼAX KU TʼAAN
Bix chʼaʼabik u luʼumil Canaán
¿Baʼaxten salvartaʼab Rahab yéetel u familia tumen Dios le ka ook le israelitaʼob tu luʼumil Canaanoʼ?
LE MÁAX KU KANANOʼ
«Aʼalaʼab toj u kuxtal tu yoʼolal utsil meyajoʼob»
LE MÁAX KU KANANOʼ
