Ma saide Gadu á be feti gi den Dyu enke fa a be e feti gi den Islayelisama fu fositen? Saide a á meke den feti anga den Romesama di be e pina den? A si Gadu be e si feti wan taa fasi? Nono. Ma wan sani be kengi. Den Dyu á be wani si Yesesi enke a Mesiyas (Toli 2:36). Neen meke Gadu á be e si den enke en foluku moo.​—Mateyesi 23:37, 38.

Gadu á be e kibii den Dyu moo fu ogii á miti den. A á be e kibii a kondee fu den moo tu. Te den be go a feti, den á be poi taki a Gadu sende den. Yesesi be taki a fesi taki Gadu á be o yeepi den Dyu moo, ma a be o yeepi wan taa foluku. A so a pasa tu. Gadu belesi wan foluku di Beibel e kai „a Islayeli fu Gadu” (Galasiyasama 6:16; Mateyesi 21:43). A foluku di Beibel e kai a Islayeli fu Gadu a den Kelesten di salufu anga santa yeye. Neen meke Gadu be teke den enke en foluku aini a ten fu den apostel. Beibel taki: „Now u toon Gadu foluku.”​—1 Peitilisi 2:9, 10.

Ma winsi fa den Kelesten fu a ten fu den apostel be toon „Gadu foluku”, tokuso Gadu á feti anga den Romesama fu fii den Kelesten. A á meke den Kelesten go feti anga den Romesama tu. Saide a á du den sani ya? Enke fa u luku a fesi, da a Gadu be e taki on ten a foluku fi en be mu go feti. A sani ya e soi taki a yuu fu Gadu á be doo ete fu puu ogii anga pina.

Leti enke den sama di be e dini Gadu fositen, a so den Kelesten aini a ten fu den apostel be e wakiti fu Gadu yeepi den. Den á be e go feti anga den sama di be e pina den, bika Gadu á be sende den. Di Yesesi be e leli sama, a be meke den fusutan a toli ya. A á be sende den bakaman fi en go feti, ma a taigi den taki: „U mu lobi u feyanti, u mu begi gi den sama di e tesi u tu.” (Mateyesi 5:44). Di Yesesi be taigi den bakaman fi en on ten den suudati fu Rome be o kon feti anga Yelusalem, a á taigi den fu tan a Yelusalem fu feti anga den suudati. Ma a taigi den taki den mu lowe. Den aliki Yesesi, neen den lowe.​—Lukasi 21:20, 21.

A apostel Pawlesi be sikiifi taki: „Wi á mu pai ogii fu ogii . . . bika Gadu buku taki: ’A mi o puu boon ati a den. A mi o pai den fu den ogii di den du,’ a so Yehofa taki” (Romesama 12:19). A sani di Pawlesi taki be sikiifi langa  ten kaba aini Lefitikesi 19:18 anga Deitolonomi 32:35. Enke fa u si aini a artikel a fesi, da Gadu be e yeepi a foluku fi en te den be e go feti anga den feyanti fu den. A sani ya e soi taki a fasi fa Gadu e si feti á kengi. Aini a ten fu den apostel, a be e si feti enke wan fasi fu yeepi den sama di e dini en, efuso fu puu pina anga ogii. Ma, a Gadu be e taki sama be mu go feti anga on ten den be mu feti, leti enke fa a be e du fosi.

Wi e si kiin taki Gadu á be meke den Kelesten fu a ten fu den apostel go a feti. Ma fa a de aini a ten ya? I si enke Gadu e sende sama go a feti? I si enke a yuu fu Gadu doo fu feti gi den sama di e dini en? Fa Gadu e si feti aini a ten ya? A taa artikel o piki den akisi ya.