¿Jamüshi nnojoika nütkaain Maleiwa napüleerua na judíokana maʼaka naainjain shia sümaiwa? ¿Jamüshii nnojoliika nuuʼulaain naya natkaain namaa na naʼünüükana? ¿Aʼwanajaasüche tü jülüjapuʼukat naaʼin Maleiwa süchiki tü atkawaakat? Nnojottaa. Shia amojujaaka nakuwaʼipa na judíokana, nnojoishii naya anajiraain nümaa Maleiwa süka nayouktüin Jesucristo, chi Mesíaskai (Aluwataaushikana 2:36, TNM). Müshiijeseʼe niyouktüin naya Maleiwa suulia nupueulosein naya (Mateo 23:37, 38).

Nnojoliinnapa naaʼinmajüin Maleiwa na judíokana jee müsia tü mma naapakat namüin. «Eeshi Maleiwa wamaa», nnojoishii süpüla namüinjanain na judíokana noʼunüle sünain wanee atkawaa. Nnojoliinnapa anain naya noʼuluʼu Maleiwa naashin Jesuu jee nnojoliinnapa naya nükaaliinjain Maleiwa. Nayainjana joo naaʼinmajaka Maleiwa wanee pueulo jeketü, «na anoujashii aluwataainjanakana iipünaa» münüshii naya (Galacia 6:16, TNM; Mateo 21:43). Nüneekajala naya Jeʼwaa, müshiijeseʼe namünüin: «Aluʼusaʼa jooluʼu nupueulose jia Maleiwa» (1 Pedro 2:9; 2:10, TNM).

Sükajee nüneeküin Maleiwa naya anoujashiikana süpüla nupueulosein naya, ¿atkaashiche nia napüleerua süpüla nükaaliinjain naya noulia na roomajeʼewaliikana? ¿Nüjütüinche naya süpüla nashutüinjanain naaʼu na roomajeʼewaliikana? Nnojottaa. Sünain tü wanee pütchi wekirajaaitpakalü anain, aküjünüsü wamüin niain Maleiwa aneekaka joujainjanain noʼunüin na nümaajanakana sünain wanee atkawaa. Nnojoishi atkaain Maleiwa napüleerua na anoujashii eejanakana soʼu yaajachin Jesuu yaa mmapaʼa jee nnojoishi nuluwataain naya sünain atkawaa. Wayaawata aaʼu suluʼujee tia, choʼujaayülin sükalia süpüla najaʼlajeʼerüin Maleiwa tü mojulawaakat.

Naʼatapajüinjatü naya anoujashiikana nükaaliinjain naya Maleiwa noulia na naʼünüükana maʼaka saaʼin natuma na aʼyataapuʼukana nümüin Maleiwa namaiwa. Nnojoishii süpüla nashutüinjanain saaʼu naʼünüü. Jaʼitakajeʼe Jesuu, nnojoishii nootuin naya sünain atkawaa namaa na naʼünüükana. Anuu nünüiki Jesuu namüin: «Anashii aire jüpüla na jüʼünüükana. Je anashii juchuntüle nümüin Maleiwa naaʼu na eʼrüliikana wayumüin jümüin» (Mateo 5:44). Wanaa sümaa nüküjüin Jesuu sushutünüinjatüin saaʼu Jerusalén natuma na roomajeʼewaliikana, nüküjüin namüin na anoujashiikana nnojoliinjanain natkaain namaa, shia nüküjaka naʼluwataainjanain wattamüin noulia na naʼünüükana. Naainjakalaka tia (Lucas 21:20, 21).

Müsü tü nüshajakat Pablo: «Nnojo keeʼireein jaaʼin pasalawaa [...]. Anuu tü nümakat chi Maleiwakai: ‹Süsalainjatü wayuu tatüma tayakai süka tayain pasalaainjachin atüma wayuu›» (Roma  12:19). Shia niweetiraka Pablo tü nümakat Maleiwa suluʼu Levítico 19:18 otta Deuteronomio 32:35. Wekirajaaitpa anain, nütkaapuʼuin Maleiwa süpüleerua tü nupueulosekat. Süka niain Maleiwa pasalaain atuma wayuu naashin Pablo, wayaawata aaʼu nnojotyüliain nuʼwanajaain tü jülüjakat naaʼin süchiki tü atkawaakat. ¿Suluʼu jamüin? Nnojotsü mojuin nümüin Maleiwa nuluwataain na aʼyataashiikana nümüin sünain atkawaa süpüla naaʼinmajüin naya jee süpüla najaʼlajeʼerüin tü mojulawaakat. Maʼaka sümaiwa paala, nia Maleiwa aneekaka joujainjatüin eein wanee atkawaa jee jaraliinjanain oʼunüin sünain.

Watüjaaitpa aaʼu nnojoliin nuluwataain Maleiwa na anoujashii eejanakana nükalioʼu Jesuu sünain atkawaa. ¿Jama maaʼulu? ¿Eeshiiche wayuu nuluwataaka Maleiwa sünain wanee atkawaa? ¿Antüiche sükalia süpüla nütkaainjachin Maleiwa napüleerua na aʼyataashiikana nümüin? ¿Aʼwanajaaiche tü jülüjakat naaʼin Maleiwa maaʼulu süchiki tü atkawaakat? Wekirajaajeerü anain tia pütchikalüirua sünain tü wanee ekirajaayakat.