MUTWE WA PA NKUPIKO | LESA UMONA BYEPI NKONDO?
Lesa byo Amonanga Nkondo mu Myaka Kitota Kitanshi
Bantu bebamanyikilenga bingi. Byonkatu byajinga bashakulu babo, Bayudea ba mu myaka kitota kitanshi balombanga bukwasho kwi Lesa kimye kyonse, kuba’mba bebapokolole ku Bufumu bwa Bena Loma bwibamanyikanga. Kepo baumvwine pe Yesu. Ne kwamba’mba nanchi awe ye ukekala Mesiasa walayiwe nyi? Bavula ye ‘baketekejile kuba’mba uno muntu ye ukapokolola bena Isalela’ byo bebamanyikilenga ku balwanyi babo bena Loma. (Luka 24:21) Bino kechi bebapokolwele ne. Mu 70 C.E., nzhita ya bena Loma yaishile ne konauna Yelusalema ne nzubo ya Lesa yajingamo.
Ki ka kyamwekele? Mambo ka Lesa o abujile kupokolola Bayudea byonka byo aubanga kala? Nangwa mambo ka o abujile kwibaswisha kulwako nkondo pa kuba’mba bepokolole ku bebamanyikilenga? Nanchi Lesa wapimpwile mo amwenanga nkondo nyi? Ine. Pano bino, kuji kintu kyaubile Bayudea. Bakaine Yesu Mwana Lesa amba kechi Mesiasa ne. (Byubilo 2:36) Onkao mambo, kisaka kyonse kyaonawine bulunda bwakyo bwawama ne Lesa.—Mateo 23:37, 38.
Lesa walekele kuzhikijila kisaka kya Bayudea ne Ntanda ya Mulaye, kabiji nkondo yonse Bayudea yo balwanga, Lesa kechi wibakwashanga ne. Byonkatu Yesu byo aambijile jimo, mapesho ne bibusa bya Lesa byafumine pa bena Isalela ne kwibipana ku kisaka kya katataka, ko kuba’mba kisaka kya ku mupashi kyo batongola mu Baibolo amba “bena Isalela ba Lesa.” (Ngalatiya 6:16; Mateo 21:43) Kipwilo kya bena Kilishitu bashingwa kyo kyaikele ke bena Isalela ba Lesa. Mu myaka kitota kitanshi, bebambijile’mba: “Pano luno mwi bantu ba Lesa.”—1 Petelo 2:9, 10.
Bena Kilishitu ba mu myaka kitota kitanshi byo bajinga “bantu ba Lesa,” nanchi Lesa wibalwijileko, kuba’mba ebapokolole ku bena Loma bebamanyikilenga nyi? Inyi wibaswishishe kuba’mba balwe na bebamanyikilenga nyi? Ine. Mambo ka? Pa kulwa nkondo Lesa yo aswisha, Lesa mwine ye wafuukulanga kimye kya kulwilapo byonkatu byo twakwisambapo mu mutwe wafumako. Lesa kechi walwijileko bena Kilishitu ba mu myaka kitota kitanshi ne, kabiji kechi wibaswishishe kulwa nkondo ne. Onkao mambo, myaka kitota kitanshi, kechi kyajinga kimye Lesa kyo ebaswishishe kulwa na bebamanyikanga ne.
Byonkatu byajinga bakalume ba Lesa kala kene, bena Kilishitu ba mu myaka kitota kitanshi bapembejile kimye Lesa kyo akafumyapo bintu byatama ne boba bebamanyikilenga. Pa kyokya kimye, Lesa kechi wibaswishishe kulwa nkondo na balwanyi babo ne. Yesu Kilishitu walumbulwile bulongo kino kishinka mu byo afunjishenga. Kechi waambijile baana banji ba bwanga amba bafwainwa kulwa nkondo ne, bino aye wibambijile’mba: “Temwainga balwanyi benu ne kulombelako boba bemumanyika.” (Mateo 5:44) Byo aambijile jimo kimye Yelusalema kyo bakamulukuka ku nzhita ya bena Loma, Yesu wakambizhe baana banji ba bwanga amba kechi bafwainwa kwikala ne kulwako nkondo ne, bino bafwainwa kunyema, ne abo byobyo baubile.—Luka 21:20, 21.
Kabiji mutumwa Paulo bamutangijile ku mupashi kunemba’mba: “Kange mushinkanyenga ne, . . . mambo kyanembwa’mba: ‘Kushinkanya ko kwami; amiwa nkashinkanya nabo,’ byo byaamba Yehoba.” (Loma 12:19) Paulo waambilenga pa byaambile Lesa kala kene biji pa Bena Levi 19:18 ne Mpitulukilo ya mu Mizhilo 32:35. Byonkatu byo twakufunda mu kibaaba kyafumako, Lesa washinkenyangako bantu banji mu moba a kala pa kwibaswisha kulwa na balwanyi babo. Onkao mambo, byambo byaambile Paulo byamwesha’mba jishinda Lesa jo amwenangamo nkondo kechi jaaluka ne. Mu myaka kitota kitanshi, Lesa wamonanga kulwa nkondo amba jo jishinda ja kupokolwelamo bakalume banji ne kufumyapo bebamanyikanga ne bubi bonse. Nangwa byonkabyo, byonkatu byo kyajinga kala, Lesa mwine ye wafuukulangapo kimye kya kulwilapo ne wafwainwa kulwako.
Kwambatu kine, Lesa kechi waswishishe bena Kilishitu ba mu myaka kitota kitanshi kulwa nkondo ne. Pano kiji byepi lelo jino? Nanchi Lesa waswishapo jibumba ja bantu bamo lelo jino kulwa nkondo nyi? Nanchi kyafika kimye kya kuba’mba Lesa apokolole bakalume banji nyi? Nanchi Lesa umona byepi nkondo lelo jino? Mutwe wapelako mu ino mitwe yalondankana ye usakukumbula ano mepuzho.
