KONA-BA INFORMASAUN IHA OIN | MAROMAK SENTE OINSÁ SE EMA HALO FUNU?
Iha Jesus no apóstolu nia tempu
Hanesan ho ema judeu nia beiʼala ema Izraél, ema judeu neʼebé moris iha Jesus nia tempu mós hasoru terus oioin tanba Governu Roma mak ukun sira. Sira mós harohan beibeik ba Maromak atu salva sira. Sira rona kona-ba Jesus no hakarak hatene: ‘Jesus mak Mesias neʼebé promete ona atu toʼo mai ka lae?’ Ema barak hanoin katak Jesus mak “ida neʼebé Maromak hili atu salva Izraél” husi Roma nia ukun. (Lucas 24:21) Maibé ema judeu nia moris terus nafatin. Aat liután mak, iha tinan 70, ema Roma nia tropa sira mai ataka Jeruzalein, sira sobu sidade neʼe no templu.
Tanbasá mak Maromak husik ema Roma ataka Jeruzalein? Tanbasá mak Maromak rasik la halo funu atu salva ema judeu sira, hanesan nia halo ona ba sira-nia beiʼala? Tanbasá mak Maromak la haruka ema judeu sira halo funu atu sira bele livre husi terus laran? Neʼe tanba Maromak troka ona ninia hanoin ka lae? Lae. Maromak la salva sira tanba sira la simu Ninia Oan-Mane Jesus no la fiar katak Jesus mak Mesias. (Apóstolu 2:36) Tan neʼe, nasaun Izraél laʼós tan povu neʼebé Maromak hili.—Mateus 23:37, 38.
Maromak la proteje tan nasaun Izraél no sira-nia rai. Nia mós la haruka tan ema judeu sira atu halo funu. Hanesan Jesus hatete nanis ona, Maromak la simu sira no la haraik bensaun tan ba sira, maibé Maromak hili fali nasaun seluk atu sai ninia povu, neʼe mak nasaun foun ida, neʼebé Bíblia hanaran “Izraél Maromak nian”. (Galásia 6:16; Mateus 21:43) “Izraél Maromak nian” mak ema kristaun sira neʼebé Maromak hili liuhusi ninia espíritu santu. Apóstolu Pedro dehan ba sira: “Agora imi mak Maromak nia povu.”—1 Pedro 2:9, 10.
Se ema kristaun sira iha tempu neʼebá mak “Maromak nia povu”, Maromak mós sei halo funu hasoru ema Roma atu salva sira ka lae? Maromak haruka sira halo funu atu sira bele livre husi Roma nia ukun ka lae? Lae. Hanesan temi tiha ona, Maromak deʼit mak bele deside bainhira mak bele halo funu. Iha apóstolu nia tempu, Maromak la halo funu tan atu salva ema kristaun sira no Nia mós la haruka tan sira atu halo funu. Neʼe hatudu katak, tempu neʼebá laʼós tempu neʼebé Maromak deside atu halo funu hasoru ema aat no salva ema neʼebé iha terus laran.
Tan neʼe, hanesan ho Maromak nia atan sira iha tempu antigu, ema kristaun sira iha apóstolu nia tempu mós tenke hein toʼo tempu neʼebé Maromak mak deside atu hasai sira husi terus laran no halakon ema aat. Sira labele deside atu halo funu ho sira-nia kbiit rasik. Jesus mós hanorin nuneʼe ba ninia eskolante sira. Porezemplu, nia dehan: “Hadomi nafatin imi-nia inimigu no harohan ba sira neʼebé haterus imi.” (Mateus 5:44) Jesus mós fó-hatene nanis ba eskolante sira katak ema Roma sei mai atu ataka Jeruzalein. Tempu neʼebá, nia la haruka eskolante sira atu halo funu hasoru ema Roma, maibé nia haruka deʼit sira atu halai sai.—Lucas 21:20, 21.
Liután neʼe, Maromak haruka apóstolu Paulo hakerek: “Keta selu aat ba ema, . . . basá hakerek nanis ona: ‘Jeová dehan, haʼu mak iha direitu atu selu aat.’” (Roma 12:19) Apóstolu Paulo foti liafuan neʼe husi Levítico (Imamat) 19:18 no Deuteronômio (Ulangan) 32:35 neʼebé hakerek tiha iha tinan atus ba atus liubá. Hanesan temi tiha ona, iha tempu antigu Maromak mak selu fali buat neʼebé ema aat sira halo hodi haruka ninia povu halo funu atu halakon sira. Nuneʼe apóstolu Paulo nia liafuan neʼe hatudu katak iha ninia tempu mós Maromak nia hanoin hanesan nafatin. Ba Maromak, halo funu atu salva ema husi terus laran no halakon ema aat mak buat neʼebé loos. Maibé Maromak mesak deʼit mak iha direitu atu deside sé mak bele halo funu no bainhira mak bele halo funu.
Iha apóstolu nia tempu, Maromak la haruka ema kristaun sira atu halo funu. Oinsá ho ohin loron? Maromak fó lisensa ba ema ruma ka grupu ruma atu halo funu ka lae? Maromak sente oinsá se ema halo funu? Lakleur tan, Maromak sei halo funu atu salva ninia povu ka lae? Agora mai ita haree toʼok resposta ba pergunta hirak-neʼe.
