¿Baʼaxten maʼ baʼatelnaj Dios jeʼex tu beetil úuchjeakiloʼ? ¿Baʼaxten maʼ tu chaʼaj u baʼateloʼob utiaʼal u defenderkubaʼobiʼ? ¿Tsʼoʼok wa u kʼexpajal bix u yilik Dios le baʼateltáambaloʼ? Maʼ. Baʼax kʼexpajeʼ letiʼe bix u biskuba Dios yéetel le judíoʼoboʼ, tumen u maas yaʼabileʼ maʼ tu kʼamaj Jesucristo bey le Mesíasoʼ (Baʼaxoʼob [Hechos] 2:36). Le oʼolal ka máan kʼiineʼ Dioseʼ xuʼul u kʼamik le judíoʼob bey u kaajaleʼ (Mateo 23:37, 38).

Dioseʼ xuʼul u kanáantik le judíoʼoboʼ bey xan le luʼum tu tsʼáajtiʼoboʼ. Desde leloʼ maʼ béeychaj u kaʼa baʼateloʼob tu kʼaabaʼ Diosiʼ. Jeʼex tu yaʼalil Jesuseʼ, úuchik u xuʼulul u kʼaʼamloʼob tumen Dioseʼ xuʼul tak u bendecirtaʼaloʼob. Ka túun yéeyaʼab junpʼéel túumben kaaj espiritual u kʼaabaʼeʼ «u Israel Dios» (Galaciailoʼob 6:16; Mateo 21:43). Le múuchʼ cristianoʼob yéeyaʼaboʼob yéetel kiliʼich muukʼoʼ letiʼob u Israel Dios. Le oʼolal teʼ yáax siglooʼ aʼalaʼabtiʼob: «Beoraaʼ u kaajaleʼex Dios» (1 Pedro 2:9, 10).

Wa letiʼe cristianoʼob u kaajal Dios desde teʼ yáax siglooʼ, ¿baʼatelnaj wa Dios tu yoʼolaloʼob maʼ xaaneʼ utiaʼal ka xuʼuluk u pechʼ óoltaʼaloʼob tumen le romanoʼoboʼ? ¿Tu tsʼáaj wa permiso utiaʼal u baʼateloʼob tu contra u enemigoʼob? Maʼ. ¿Baʼaxten túun? Jeʼex t-ilaj teʼ xook manikoʼ chéen Dios aʼalik baʼax kʼiin u káajal junpʼéel baʼateʼel. Teʼ yáax siglooʼ Dioseʼ maʼ baʼatelnaj tu favor u kaajaliʼ, mix tu tsʼáaj permiso tiʼob u baʼateloʼobiʼ. Jeʼex k-ilkoʼ teʼ kʼiinoʼob jeʼeloʼ maʼ kʼuchuk u súutukil u xuʼulsaʼal tumen Dios le kʼasaʼanil yéetel le pechʼ óolaloʼ.

Jeʼex tu beetil le israelitaʼoboʼ, le yáax cristianoʼoboʼ anchaj u páaʼtkoʼob u kʼuchul u kʼiinil u salvartaʼaloʼob tumen Dios. Mientras maʼ kʼuchuk le kʼiin jeʼeloʼ minaʼan permiso tiʼob utiaʼal u káajsikoʼob junpʼéel baʼateʼel tu contra u enemigoʼob. Jach claro baʼax aʼalaʼabtiʼob tumen Jesucristo. Tu lugar u táakpajloʼob tiʼ baʼateltáambaleʼ, aʼalaʼabtiʼob: «Maʼ u xuʼulul a yaabiltikeʼex a enemigoʼex yéetel orarneneʼex tu yoʼolal le máaxoʼob chʼaʼpachtikeʼexoʼ» (Mateo 5:44). Ka tu yaʼalaj Jesús yaan u xuʼulsaʼal Jerusalén tumen u soldadoiloʼob Romaeʼ, tu yaʼalajtiʼob ka púutsʼkoʼob tu lugar u baʼateloʼob. Letiʼobeʼ bey tu beetiloʼoboʼ (Lucas 21:20, 21).

Tsʼoʼoleʼ Pabloeʼ tu tsʼíibtaj: «Maʼ a sutkeʼex u jeel le kʼaas ku beetaʼalteʼexoʼ, [...] tumen tsʼíibtaʼan: ‹Teen ken in sut u jeel le kʼaas ku beetkoʼoboʼ; teen ken in tsʼáa baʼax ku náajmatkoʼob, ku yaʼalik Jéeoba›» (Romailoʼob 12:19). Pabloeʼ chéen tu  kʼaʼajsaj le baʼax u yaʼalmaj Dios úuchjeakil jeʼex tsʼíibtaʼan tiʼ Levítico 19:18 yéetel Deuteronomio 32:35. Jeʼex k-ilkoʼ úuchjeakileʼ Dioseʼ baʼatelnaj tu favor u kaajil Israel. Le baʼax tu yaʼalaj Pablo teʼ yáax siglooʼ tu yeʼeseʼ Dioseʼ maʼ kʼexpajak bix u yilik le baʼateltáambaloʼ; tiʼ Dioseʼ ku meyaj le baʼateltáambal utiaʼal u yáantik le máaxoʼob adorartikoʼ, bey xan utiaʼal u xuʼulsik le kʼasaʼanil yéetel le pechʼ óolaloʼ. Jeʼex tu beetil tu kʼiinil le israelitaʼoboʼ Jéeoba aʼalik baʼax kʼiin kun antal junpʼéel baʼateʼel yéetel máaxoʼob kun biniʼ.

Jeʼex tsʼoʼok k-ilkoʼ teʼ yáax siglooʼ Dioseʼ maʼ tu tsʼáaj permiso tiʼ le cristianoʼob ka baʼatelnakoʼoboʼ. ¿Kux túun bejlaʼeʼ? ¿Yaan wa junmúuchʼ máakoʼob ku yáantaʼaloʼob baʼateʼel tumen Dios? ¿Tsʼoʼok wa u kʼuchul u kʼiinil u baʼateʼel Dios tu favor u kaajal? Teʼ kʼiinoʼobaʼ, ¿bix u yilik le baʼateltáambaloʼ? Yaan k-ilik teʼ tuláakʼ xookoʼ.