1. Lubanga tye ki kite mene ma pire tek loyo, dok ngec man weko itamo i kome nining?

 BAIBUL ma Jehovah ocoyo pi teko pa cwiny maleng-ngi wacciwa ni: “Lubanga aye mar.” Pe waco mere keken ni mar obedo kite acel ma pire tek ki kin kite mapol ento ni meno ‘Lubanga aye mar.’ (1 Jon 4:8) Mar obedo kite acel madit dok ma pire tek loyo. Jehovah pe tye ki mar keken ento en tye lanen maber me mar. Pud dong watye ki pwoc madit ya me ngeyone ni Ngat ma Ocweyo polo ki lobo kacel ki jami ducu makwo-ni obedo Lubanga ma lamar! Mar aye weko en timo jami ducu.

2. Mar pa Lubanga miniwa gen ango? (Nen cal ma tye i pot karatac man.)

² Jehovah tye ki cwiny me kica ki mar i kom cwecce. Mar ma en tye kwede piwa miniwa gen ni yubbe pi dano wang ma ocobbe i yo ma pud dong ber loyo. Adwogine bikelo yomcwiny madit bot jo ducu ma gitye i te locce. Me labolle, pi mar ma Jehovah tye kwede, en “otyeko moko nino ma en bingolo iye kop i kom dano ducu ma i lobo i kit ma atir, kun dong oyero dano  ma myero ongol kop ma ka-kare,” Yecu Kricito. (Tic 17:31) Watye ki gen ni ngolo kop man wang ma otimme. Ngolo kop man bikelo anyim mamwonya mari nakanaka pi jo ma gimito timo jami matir dok bene gitye luwiny.

3. Ka Lubanga onongo pe maro dano, itamo ni kwo onongo bibedo nining?

³ Go kong kit ma kwo onongo bibedo kwede ka Lubanga pe maro dano. Dano onongo gibimedde ki loyo luwotgi pienni nongo Catan Larac-ci, lubanga ma pe lamar dok ma cwinye col-li aye doro jami ducu ma gitimo. (2 Kor. 4:4; 1 Jon 5:19; kwan Niyabo 12:9, 12.) Man nyuto ni anyim pa dano onongo bibedo marac dok malik adada labongo mar pa Lubanga.

4. Pingo Jehovah oye ni kijem i kom locce matir?

⁴ I kare Larac-ci tye ka jemo i kom twero me loc pa Jehovah, en obwolo lunyodowa mukwongo me jemo bene. Man te lokke ni Catan onongo tye ka wacci locce bibedo ber loyo pa Jehovah, Lacwecwa. (Acak. 3:1-5) Kadi bed ni Jehovah oweko Catan ni kong olo lobo me moko ka lokke-ni tye ada, ento en oweko pi tutunu. Pi ryekone madit, Jehovah omiyo kare muromo me nyutone atir ka maleng ni loc mo keken pe twero kelo adwogi maber kono ka locce keken. Deno can malit ma dano guwok ki iye nicakke wacon moko ni dano nyo Catan pe gitwero loyo loc i yo maber kit ma mitte kikome.

5. Jami ma obedo ka timme ite kwaro pa dano moko gin ango?

⁵ Pi mwaki 100 mukato angec, dano makato milion 100 kulu guto i lweny mapol ma lobbe mapat pat gulwenyo. I kareni, lobo tye ka balle medde ameda. Man aye gin ma Lok pa Lubanga owaco wacon ni bitimme “i kare me agikki” me lobo man pien “jo maraco ki jo ma lugoba gibimedde ki bedo marac makato kare.” (2 Tem. 3:1, 13) Jami ma gubedo ka timme i tekwaro pa dano gimoko labongo akalakala lok ma kicoyo i Baibul, ma waco ni: “Ai Rwot [Jehovah], angeyo ni dano pe loyo kwone kene nio i agikkine; pe tye ngat mo ma tye ki twero me loyo kwone.” (Jer. 10:23) Jehovah pe ocweyo dano ki kero nyo twero me bedo ka lone kengi labongo en.

6. Pingo Lubanga oye ni jami maraco myero omedde?

⁶ Medo i kom meno bene, me nyutone ni loc pa dano konye pe, Lubanga oweko ni jami maraco myero kong omedde pi kare mo me moko ni en keken aye etwero loc pi naka. Man tye caden ma moko labongo gung cwiny ni loc pa Lubanga keken aye keliwa adwogi maber. I kare me anyim, Lubanga bijwayo tim maraco ducu medo ki jo ma gikelo. I nge meno, ngatti mo keken ma ocako pyem pi dit wiye i kom loc me mar ma Lubanga loyo kwede ki dano, ci en bicamo anywarne pien Jehovah pe dong biye kodi pyem ma kit meno. En bijwero lujemo ma kit meno oyotoyot adada dok en bitic ki jami ma obedo ka timme i tekwaro pa dano macalo caden, kun pe dong biye ni lujemo magi dok gucak timo jami maraco.

7, 8. I yo macalo mene ma Jehovah onyuto kwede ki marre madit?

⁷ Jehovah onyuto marre madit-ti i yo mapol mapat pat. Me labolle, nen kong kit ma en ocweyo kwede polo ki lobo i yo me aura. Tye yogo nyo yago bilion ki bilion mapol ata, ma yogo acel acel tye ki lakalatwe kacel ki jami ma gitye i dan polo bilion mapol adada. I Yogo me Lakalatwe, tye iye ceng, dok labongo ceng pe  tye gin mo keken ma twero kwo i lobo kany. Jami magi weng ginyuto ni Lacwec tye dok en tye ki kite mapol mapat pat calo teko, ryeko, ki dong mar. Ada, “Cakke i kare ma giketo lobo, kit pa Lubanga ma onongo pe nen dong onen, kun gingeye i jami ducu ma en otiyo, en aye tekone ma pe gik, ki dit ma en Lubanga tye kwede.”​—Rom. 1:20.

⁸ I lobo kany, Jehovah ocweyo jami ducu ma mitte wek cwecce gukwo. Pi dano, en ocweyo paradic mamwonya dok ocweyo adamgi kacel ki komgi labongo roc wek gukwo pi naka. (Kwan Niyabo 4:11.) Medo i kom meno, “en miyo cam bot gin makwo ducu, pien mar mere ma pe lokke bedo nakanaka.”​—Jab. 136:25.

9. Mapat ki mar, Jehovah i kine mukene winyo nining ki dok pingo?

⁹ Kadi bed Jehovah onyuto ni etye Lubanga ma lamar, ento en bene onyuto ni edag gin marac. Me labolle, Jabuli 5:4-6 oloko i kom Jehovah ni: “In pe Lubanga ma cwinye bedo yom pi tim maraco . . . idag lutim maraco ducu.” Dok bene omedo ni: “Rwot [Jehovah] icayo jo ma gin lutim bwami ma gineko dano kun gin lubwola kwede.”

10, 11. (a) Gin ango ma Jehovah bitimone i kom jo maraco? (b) Mot ango ma Jehovah bimiyone bot jo ma gin lugen?

¹⁰ Pien en Lubanga ma lamar dok dag tim maraco, Jehovah oketo yub me jwayo jami maraco ki i lobo kacel ki polo ka nongo pyem ma kikelo i kom twero me locce-ni kicobo kit ma en mito kwede. Lubanga ocikke ni: “Lutim maraco gibityekogi woko; ento jo ma gigeno Rwot [Jehovah] gibicamo lobo. Odong kare manok, ci dano marac dong bibedo pe matwal; . . . lukwor pa Rwot [Jehovah], gibito gitum woko macalo lum i olet dyang, gibiduny woko calo yito ma duny.”​—Jab. 37:9, 10, 20.

¹¹ Ki tungcel bene, Lok pa Lubanga ocikke ni: “Jo ma kitgi atir gibicamo lobo, dok gibibedo iye matwal.” (Jab. 37:29) Jo magi ma kitgi atir-ri ‘gibibedo ki yomcwiny pi kuc madwong ma gibilimo.’ (Jab. 37:11) Gin man wang ma otimme pien Lubangawa ma lamar-ri pol kare timo jami me cobo miti pa luticce ma lugen bote. Baibul wacciwa ni: “En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.” (Yabo 21:4) Anyim mamwonya pud dong tye ka kuro jo ma gitye ki pwoc pi mar pa Jehovah dok giye ni en Lalocgi!

12. Anga ma kiromo wacone ni obedo “dano ma pe ki bal mo”?

¹² Lok pa Jehovah waco ni: ‘Nen dano ma pe ki bal mo, dok inen dano ma cwinye atir; en bibedo ki kuc i anyim. Ento jo ma lubalo gibityekogi woko liweng; ki jo maraco bene gibijwerogi woko.’ (Jab. 37:37, 38) “Dano ma pe ki bal mo” bedo ki ngec i kom Jehovah gin ki Wode dok timo miti pa Lubanga labongo dic. (Kwan Jon 17:3.) Ngat ma kit meno tero lok ma i 1 Jon 2:17 calo gin ma pire tek, ma wacci: “Lobo tum woko ki mitine ducu; ento ngat ma tiyo gin ma Lubanga mito ri nakanaka.” Ka agikki me lobo man woto ki nyiko cok, Lokke cuko cwinywa ni “kur [gen] Rwot [Jehovah], dok ilub cikke.”​—Jab. 37:34.

13. Jehovah onyuto mar madit nining pi dano ma gin lubalo?

¹³ Kadi bed ni watye ki roc, wan pud waromo ‘lubo cik pa Jehovah.’ Watwero  bene bedo ki wat macok ki Jehovah pien en tye ki mar madit i komwa. En omiyo Yecu Kricito me to macalo ginkok wek oyab yo bot jo ducu ma gin luwiny me bedo agonya ki i bal kacel ki to ma gulako ki bot Adam. (Kwan Jo Roma 5:12; 6:23.) Jehovah oketo genne ducu i kom Wode acel keken ma ocweyo en kikome, ma obedo lagen bote ki i polo pi mwaki mapol ata-ni. Macalo Wego ma lamar, Lubanga iye owang adada ma lubbe ki kit ma kitero kwede ki Yecu i yo marac i kare ma en tye i lobo kany. Ento, Yecu obedo lagen kun ilo malo twero me loc pa Lubanga dok onyuto ni dano ma pe ki roc romo gwoko gennene bot Jehovah kadi bed ni tye i kwo matek.

14, 15. Gin ango ma to pa Yecu otimo pi dano?

¹⁴ Yecu ogwoko gennene dok oilo malo twero me loc pa Jehovah i kare ma tye i atematema magwar dok obedo lawiny bot Wonne nio wa i to. Omyero wabed ki pwoc madit pien pi tone, Yecu bene oculo wel ginkok ma mitte me koko dano ki i bal kacel ki to dok man oyabo yo botwa wek wanong kwo ma pe tum i lobo manyen ma Lubanga ocikke me kelone. Lakwena Paulo oloko i kom mar ma Jehovah gin ki Yecu gunyuto ma lubbe ki ginkok-ki kun waco ni: “I kare ma yam pud wagoro, ma kare dong oromo, Kricito oto pi dano ma pe gilworo Lubanga. Kadi pi ngat ma kite atir, bedo tek  twatwal bot dano mo me to pire. Gwok nyo ka obed dano ma kite ber, ngat mo twero diyo cwinye me to pire. Ento Kricito yam oto piwa i kare ma pud wan lubalo; meno nyuto kit mar ma Lubanga marowa kwede.” (Rom. 5:6-8) Lakwena Jon ocoyo ni: “Gin ma yam onyuto marre botwa en ene, Lubanga ocwalo Wode acel keken i lobo wek omi wabed kwo pire. Man en aye mar, pe ni wan wamaro Lubanga, ento en aye omarowa, ci ocwalo Wode me bedo gin me kwanyo bal woko ki i komwa.”​—1 Jon 4:9, 10.

¹⁵ Ma lubbe ki mar Lubanga tye kwede pi dano, Yecu owaco ni: “Lubanga con omaro lobo [dano ma myero kikokgi] kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” (Jon 3:16) Mar ma Lubanga tye kwede pi dano dit mada, ma man pe ogenge i kom timo jami mabeco bot dano kadi bed ni onongo kelo bote arem cwiny. Marre ri nakanaka. Wabijenge i kom marre kare ducu. Paulo ocoyo ni: “Angeyo ada ni, kadi to, kadi kwo, kadi lumalaika, kadi luloc, kadi gin ma tye i kare man, kadi gin ma mito bino, kadi teko, kadi gin ma tye malo, kadi gin ma tye piny, kadi ki gin mo keken i kom ginaketa ducu, pe bibedo ki twero mo me pokowa woko ki i kom mar pa Lubanga ma tye i Kricito Yecu Rwotwa.”​—Rom. 8:38, 39.

16. Ker pa Meciya obedo gin ango, dok Jehovah omiyo twero me loyo Ker meno bot anga?

¹⁶ Ker pa Meciya, ma obedo gamente pa Lubanga-ni tye gin mukene ma moko ni Jehovah maro dano. Jehovah dong oweko ni Wode aye olo gamente man, pien Yecu Kricito maro dano dok opore me bedo laloc. (Car. 8:31) Ka kicerogi, jo 144,000 ma gibiloc kacel ki Yecu-ni gibicito ka loc i polo ma nongo gitye ki ngec muromo pienni kong gukwo macalo dano i lobo kany. (Yabo 14:1) Kerri obedo wi lok madit ma Yecu obedo ka pwonyone dok en opwonyo lupwonnyene me lega ni: “Wonwa ma tye i polo, giwor nyingi maleng. Ker meri obin; giti gin ma imito i lobo kit ma gitiyo i polo.” (Mat. 6:9, 10) Watye ka kuro cobbe pa lega meno, ma man bibedo i kare ma nongo Ker pa Lubanga bikelo mot mapol bot jo ma gin luwiny!

17. Apokapoka ango ma tye i kin loc pa Yecu ki loc pa dano ma lubalo-ni?

¹⁷ Apokapoka madit adada tye i kin loc pa Yecu ka iporo ki loc pa dano, loc pa dano oweko lwak dano milion mapol ata guto i lweny mapat pat. Yecu tamo pi jo ma en loyogi dok nyuto kit mamwonya pa Lubanga, tutwalle mar. (Yabo 7:10, 16, 17) Yecu owaco ni: “Wubin bota, jo ducu muol ki ma yec onurowu, ci abimiyo wuywe. Wuting yatta, ci wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu. Pien yatta yot, ki yecca bene pe pek.” (Mat. 11:28-30) Man pud dong miniwa gen madit ya!

18. (a) Ngo ma Ker pa Lubanga obedo ka timone nicakke i kare ma kiket kwede? (b) Gin ango ma wabinyamo i pwony ma lubo man?

¹⁸ Baibul nyuto ni Ker pa Lubanga ma tye i polo-ni kiketo i kare ma Yecu ocako loc i 1914. Nicakke i kare meno, kibedo ka coko kacel jo ma gibiloc kacel ki Yecu i polo kacel ki “lwak dano mapol ata” ma gibiwot ki i agikki me lobo man ci gidonyo i lobo manyen ma Jehovah ociko pire. (Yabo 7:9, 13, 14) I kareni, lwak dano mapol ata-ni welgi rom mene? Gin ango ma Lubanga mito ni gutim? Pwony ma lubo man bigamo lapeny magi.