1. 1) ¿Jehová Diosarojj kunjam Diosatsa uñtʼasi? 2) Taqe kun Luriri Diosan munasirïtapatjja, ¿kamsasmasa?

“DIOSAJJ munasiñawa” sasaw Bibliajj qhanañchi. Janiw ‘munasiñaniwa’ sasajj siskiti, jan ukasti munasiñawa sasaw qhanañchi (1 Juan 4:8). Jehová Diosarojja munasirïtapatwa jukʼamp uñtʼasi. Kunanakatï alajjpachansa aka Oraqensa utjki ukanak luriri Diosan munasirïtap yatiñajj wali kusiskañapuniwa. Jehová Diosajj munasiñatwa taqe kunsa luri.

2. Diosan munasirïtap yatisajja, ¿kuna toqetsa jan pächasiñasäki? (Aka janankir dibujo uñjjattʼam.)

² Jehová Diosajj jaqenakar wal munasi, uk yatiñajja kuntï jutïritak arsuwayki uk phoqapuniniwa sasin confiyañatakiw yanaptʼistu. Diosajj ‘mä uru wakichi, uküruw cheqa kankañampi akapacharojj Jesucristo toqe taripani’. Ukajj phoqasipuniniwa (Hech. 17:31). Taqe khitinakatï Jehová Diosarojj apnaqeriparjam jichhürunakan uñjapkani ukhamarak Jupamp askit katoqatäpkani ukanakajja, wali sumaw jutïrin wiñayatak kusisit jakasipjjani.

3. Diosatï jiwasar jan munaskistaspa ukhajja, ¿jutïrin jakasiñajj kunjamäspasa?

³ Jehová Diosatï jiwasar jan munaskistaspa ukhajja, ¿jutïrin jakasiñajj kunjamäspasa uk amuysnati? Uk amuytʼañajj janiw chʼamäkiti. Jaqenakana ukhamarak Supayana apnaqat aka ñanqha pachanjja, kunayman jan walinaka, tʼaqhesiñanakakiw utjaski (2 Cor. 4:4; 1 Juan 5:19; Apocalipsis 12:9, 12 liytʼañataki). Cheqansa, Jehová Diosatï jan munaskistaspa ukhajja, jutïrin jakasiñajj sinti jan walipunïspawa.

4. ¿Kunatsa Jehová Diosajj Supayarusa, nayrïr awk taykasarusa Jupa contra saytʼasipjjatapat ukhamak uñjawayi?

⁴ Supayajj Dios contraw saytʼawayi. Adán chacharusa Eva warmirusa, jupjam Dios contra saytʼapjjañapatakiw chʼamañchawayaraki. Supayajja, Diosajj janis pachpa luratanakapjjar apnaqerjamäkaspa, Diosat sipan jupan apnaqatas jaqenakajj sum jakasipkaspa ukhamwa säna (Gén. 3:1-5). Ukatwa ukajj cheqapuniti janicha uk yatiñatakejj Jehová Diosajj mä jukʼa tiempo Supayar churawayi. Ukhamatwa Jehová Diosan gobiernopat sipansa yaqha suma gobiernojj jan utjatap yattanjja.

5. ¿Kunsa jaqen apnaqäwipajj uñachtʼayawayi?

⁵ Aka qhepa patak maranakanjja, guerranak utjatapatjja patak millón jaqenakaw jiwarawayapjje. Jichhürunakanjja, jan walinakajj jukʼampiw jiljjattaskaki. Taqe ukanakatjja Biblian akham qellqatäjjänwa: ‘Qhepa urunakanjja, jan wali lurir jaqenakasa ukhamarak sallqjerinakasa jan walit jukʼamp jan waliruw sarapjjani’ sasa (2 Tim. 3:1, 13). Uka arunakajj cheqapunïskiwa. Bibliajj akham siwa: “Jaqejj janiw alaskiti pachpa jakañapjja, janirakiw tukuyäwipsa munañapar apnaqkaspati” sasa (Jer. 10:23). Jehová Diosajja, janiw jaqenakarojj jupanak pachpa apnaqasipjjañapatak lurawaykiti.

6. Jehová Diosajj Supayar mä jukʼa tiempo apnaqañapatak jaytatapatjja, ¿kunas uñachtʼayasiwayi?

⁶ Jehová Diosajj Supayaru akapacha apnaqañapatak jaytasajja, Diosan gobiernopat sipan yaqha suma gobiernojj jan utjatapwa uñachtʼayawayi. Jehová Diosajj taqe jan walinakwa jutïrin tukjani. Uka qhepattï apnaqäwip contra saytʼasir jaqejj utjani ukhajja, janiw ukhamak jaytkaniti, jan ukasti jankʼakiw tʼunjani. ¿Jehová Diosan ukham lurañapajj walïspati? Jïsa, jaqenak pura apnaqasisajj kunayman tʼaqhesiñanakakiw utjawayi. Diosajj janiw mayampi ukham jan walinak utjañap munkaniti.

7, 8. ¿Kunjamanakatsa Diosajj jaqenakar munasitap uñachtʼayawayi?

⁷ Jehová Diosajj kunja munasirisa ukjja, kunayman toqetwa uñjtanjja. Amuytʼañataki, alajjpachajj wali suma lurtʼatawa, ukhamarus wali jachʼarakiwa. Ukanjja walja millón millón galaxianakaw utji, sapa galaxianjja millón millón warawaranaka ukhamarak planetanakaw utji. Jiwasajj jakktan uka galaxiajja, Vía Láctea satawa, ukan mä jachʼa warawaraw utji, ukasti Inti satawa. Janitï Intejj utjkaspa ukhajja, aka Oraqen janiw jakañajj utjkaspati. ¿Kunsa taqe ukanakajj uñachtʼayi? Jehová Dios sapaki wali chʼamanïtapa, yatiñanïtapa ukhamarak munasirïtapwa uñachtʼayi. Cheqasa, “Diosan jan uñjkay yänakapajj jupan luratanakap toqew uñachtʼayasi. Qhanpachwa uñachtʼayasi kunapachatejj aka oraqejj luratäkäns ukürutpacha jupajj Diosätapa, chʼamapajj jan tukuskirirakïtapa” (Rom. 1:20).

 ⁸ Chʼojjña alinaka utjañapatakisa, animalanaka, ukhamaraki jaqenaka jakañapatakisa Jehová Diosajj wali sumwa aka Oraq lurtʼawayi. Nayrïr awk taykasarojja, mä suma jardinwa jakapjjañapatak churäna. Jupanakajja, jan juchanïpjjatap laykojj suma amuyuni, jan usuntiri ukhamäpjjänwa, wiñayatakiw jakapjjarakispäna (Apocalipsis 4:11 liytʼañataki). Bibliajj Jehová Diosat akham siwa: “Jaqenakarusa, uywanakarus manqʼañ churiri[wa]: khuyapayasiñapajj wiñayawa” sasa (Sal. 136:25).

9. ¿Kunsa Jehová Diosajj uñisi?

⁹ Jehová Diosajja wali munasiri Diosawa, ukampis jan walinakarojj uñisirakiwa. Bibliajj siwa: “Jumajj janiw ñanqhamp kusisir Diosäktati [...]. Jumajj ñanqha lurir jaqenakarojj uñistawa, [...] chʼojjña chuyman jaqenakampiru, jaqe jiwayirinakampirojj uñisnuktawa” sasa (Sal. 5:4-6).

10, 11. 1) ¿Kunjamansa jan wali jaqenakajj uñjasini? 2) ¿Kunsa Jehová Diosajj aski jaqenakar jutïrin churani?

¹⁰ Kunjamtï uñjaniwayktanjja, Jehová Diosajj munasir Diosawa, jan walinakarus uñisirakiwa. Ukatwa jan walinak jan mayampitak chhaqtayjjani. Bibliajj akham siwa: “Ñanqha luririnakajj oraqet jaqonukutäpjjaniwa, [Jehová] Tatitur suytʼirinakasti oraqen jakasipjjani. Akat mä jukʼa urunakarojj ñanqha lurir jaqenakajj chhaqtjjaniwa; [...] Tatitur uñisirinakajj alinakar uñtataw wañsupjjani, jiwqʼer uñtataw chhaqtapjjarakini” sasa (Sal. 37:9, 10, 20).

¹¹ Maysa toqetjja, Bibliajj sarakiwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Sal. 37:29). Ukatsti saskakiwa: “Jilarkir sumankañampiw kusisipjjarakini” sasa (Sal. 37:11). Jehová Diosajja, servirinakapar wal munasitapata, sum jakasipjjañap munatapatjja uka arunakap phoqapuniniwa. Apocalipsis 21:4 qellqatajj siwa: “Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” sasa. Ukhamajja, Diosaru apnaqeriparjam uñjirinakasa, Jupar istʼirinakasa, ¡jutïrin wali sumaw jakasipjjani!

12. ¿‘Aski jan kamskaya jaqejj’ kunjamasa?

¹² Diosan Arupajj akham siwa: “Uñtam aski jan kamskaya jaqeru, jupan jutir urunakapanjja samarañaw utjani. Ukampis Dios contra jaqenakajj tukjatäpjjaniwa; jutir urunakapanjja ñanqha jaqenakajj tukjatäpjjaniwa” sasa (Sal. 37:37, 38, Aymar Biblia). ‘Aski jan kamskaya jaqejja’, Jehová Diosarusa, Jesusarusa uñtʼiwa, Biblian utjki uka kamachinaksa istʼarakiwa (Juan 17:3 liytʼañataki). 1 Juan 2:17 qellqatan jikjjataski uka arunakan cheqätapsa amuyarakiwa, ukansti siwa: “Akapachajj tukusirikiwa jan wali luräwinakapamppacha, ukampis kawkïritejj Diosan munañap lurki ukajj wiñayatakiw jaki” sasa. Niyakejjay akapachan tukusiñapajj wali jakʼankchejja, Jehová Diosaruw confiyañasa, Jupatakjamaw sarnaqañasaraki (Sal. 37:34).

13. ¿Kunjamsa Jehová Diosajj wali munasirïtap uñachtʼayistu?

¹³ Pantjasirïkstansa, Jehová Diosatakjamaw sarnaqsna. Jupan amigoparakïsnawa. ¿Kunjamsa? Yoqapan loqtasitap toqe. Nayrïr awk taykasajj juchampiru jiwañampir aptʼawaykistu ukat qhespiyañatakejja Diosajj Yoqaparuw khitaniwayi (Romanos 5:12; 6:23 liytʼañataki). Jesusajja, alajjpachan walja maranakaw Awkipamp jakäna, taqe kunanwa istʼarakïna.  Aka Oraqenkäna ukhajja Jesusajj Awkipar istʼaskakïnwa, ukhamäñapjja Jehová Diosajj janïr Jesusajj aka Oraqer jutkäna ukhaw yatjjäna. Diosajj Yoqapar wal munasïna, ukatwa jaqenakamp tʼaqhesiyat uñjasajj wal chuym usuyasïna. Jesusajj aka Oraqenkkäna ukhajja, Diosajj Taqe Kunjjar Munañanïtapa ukhamarak jan pantjasir jaqejj jan walin uñjaskasas Diosat jan jitheqtirjamätapwa uñachtʼayäna.

14, 15. Jesusan jiwatapampejj ¿kunas jikjjatasiwayi?

¹⁴ Jesusajj jiwañkamaw Jehová Dios Awkipat jan jitheqtas serviwayi. Ukhamatwa Diosajj Taqe Kunjjaru Munañanïtap uñachtʼayawayi, ukatsti kuntï Diosajj jutïritak arsuwayki uka wiñay jakañ katoqañatakis juchampit jiwañampitwa qhespiyawayistu, ¡walpun ukat yuspärtanjja! Jehová Diosasa ukhamarak Jesusasa, qawqsa munasistu ukjja apóstol Pablojj sum amuyäna. Ukatwa akham sasin säna: “Kunapachatejj jiwasanakajj jan chʼamanïkäyätan jiwaspacha qhespiyasiñatakejja, ukapachaw Cristo Tatitusajj horasapar jiwawayi jiwasan juchanakas layku. Janiw khitis jasakejj mä jaqe layku jiwkaspati, ni mä aski jaqe laykusa; inas maynejj jiwarakchispa mä suma aski jaqe layku. Ukampis Diosajj munasiñapwa uñachtʼayistu, kunapachatejj jiwasanakajj juchanïskäyätan ukapachaw Cristojj jiwasanak layku jiwawayi” sasa (Rom. 5:6-8). Apóstol Juanajj akham sarakïnwa: “Diosajj khitaniw mä sapa Wawapa aka oraqeru, wiñay  jakañanïñasataki, ukhamanwa Diosajj munasiñap uñachtʼayistu jupa toqe. Akhamankiw munasiñajja: janiw jiwasanakati Diosar munapkäyätanjja, jan ukasti jupaw munistu Wawap khitanisina juchanakasat qhespiyañataki” sasa (1 Juan 4:9, 10).

¹⁵ Jesusajj akham sänwa: “Diosajj akapachar wal munatap laykuw mä sapa Yoqapar khitani, taqe khitinakatejj jupar iyawsapki ukanakajj jan chhaqañapataki, jan ukasti wiñay jakañanïñapataki” sasa (Juan 3:16). Cheqas Jehová Diosajj wal munasistu, ukatwa juchampit jiwañampit jiwasar qhespiyañatakejj Yoqapar khitaniwayi, ukaw jiwasar wal munasitap uñachtʼayistu. Uka munasiñapajj janipuniw tukuskaniti. Pablojj akham sänwa: “Jichhajj yattwa, janiwa kunas Diosan munasiñapatjja apaqkistaspati, janiw jiwañasa, ni jakañasa, ni angelanakasa, ni alajjpach chʼamanakasa, ni jichhasa, ni jutkani ukasa, ni patankki ukasa, ni manqhankki ukasa, ni kuna yaqha yänakasa Diosan munañapatjja apaqkistaspati, uka munasiñsti Cristo Jesús Tatitus toqwa uñachtʼayistu” sasa (Rom. 8:38, 39).

16. ¿Kunas Diosan Reinopajja, ukat khitirus Diosajj Reinopan apnaqañapatakejj uttʼayawayi?

¹⁶ Jehová Diosan Reinopajja, alajjpachan uttʼayat mä gobiernowa. Ukan apnaqañapatakejja, Diosajj Jesusaruw uttʼayawayi, jupajj jaqenakar wal munasi, Diosan Reinopan apnaqañapatakis wakichtʼatarakiwa (Pro. 8:31, NM). Jesusamp chikasti 144.000 ajllit cristianonakaw alajjpachat apnaqanipjjani, jupanakarojj aka Oraqetwa ajllisiwayi. Uka ajllitanakajja kunjamsa jaqenakajj jikjjatasipjje uk yatipjjewa, ukhamajj wali munasiñampipuniw apnaqanipjjestani (Apo. 14:1). Jesusajj Diosan Reinopat parlapunirïnwa. Uka toqet parlañaw jupatakejj wali wakiskirïnjja, ukatwa arkirinakaparojj akham sasin mayisiñ yatichäna: “Alajjpachankir nanakan Awkejja, sutimajj jachʼañchatäpan. Munañamampisti [jan ukajj ‘Reinomampisti’, NM] apnaqapjjeta. Munañamasti luratäpan akapachanjja, kunjämatï alajjpachana luratäki ukhama” sasa (Mat. 6:9, 10). Uka mayisïwejj phoqaskani ukhajja, Diosan servirinakapajj wali kusisitaw jakasipjjani.

17. ¿Kunansa Jesusan apnaqäwipajj jaqenakan apnaqäwipampejj jan pachpäki?

¹⁷ Jaqenakan apnaqäwipanjja, millón millón jaqenakaw jiwarawayapjje, ukampis Jesusan apnaqäwipan janiw ukhamäkaniti. Jupajj jaqenakat wal llakisi, ukhamarus Awkipjam chuymanirakiwa, munasiñaw jupan jilanki (Apo. 7:10, 16, 17). Jesusajj akham sänwa: “Nayar jutapjjam taqe qarjatanaka jatjatanaka, nayaw samarayapjjäma. Nayan yugojja apapjjam, ukatsti nayat yateqasipjjarakita. Nayasti llampʼu chuymani, altʼat chuymanirakïtwa, ukatwa almaman samarañapjja jikjjatapjjäta. Nayan yugojjasti jasa apañakiwa, khumojjasti sinti phisnakirakiwa” sasa (Mat. 11:28-30). ¡Uka arunakajj wali suma arunakapuniwa!

18. 1) Diosan Reinopajj 1914 maran uttʼayaskäna ukhat aksarojja, ¿kunanakas pasawayi? 2) ¿Kuna jisktʼanakarus jutïr yatichäwin qhanañchasiskani?

¹⁸ Biblian jikjjataski uka profecianakarjamajja, Jehová Diosan Reinopajj 1914 maranwa alajjpachan uttʼayasiwayi. Ukhat aksarojja, Cristomp chika alajjpachat apnaqanipkani ukanakarojj ajllisiskakiwa, ukhamat 144.000 ajllitanakar phoqachasiñapataki. Ukatsti akapachat qhespisin wiñay jakañ aka Oraqen katoqapkani ukanakarusa tantachthapisiskarakiwa (Apo. 7:9, 13, 14). Aka Oraqen wiñay jakaña katoqapkani ukanakajja, ¿qawqhanëjjapjjesa? ¿Kunsa qhespiñatakejj lurapjjañapa? Uka jisktʼanakarojj jutïr yatichäwinwa qhanañchasiskani.