1. Ano an nangingibabaw na kuwalidad nin Diyos, asin ano an namamatian mo sa saiya huli kaiyan?

‘AN Diyos pagkamuot,’ an sabi sa sato kan ipinasabong na Tataramon ni Jehova, an Bibliya. (1 Juan 4:8) Dai sana ini nangangahulugan na may pagkamuot an Diyos o na saro ini sa saiyang magagayon na kuwalidad, kundi siya mismo an personipikasyon nin pagkamuot. Ini an nangingibabaw niyang kuwalidad, an pinakamahalaga. Nagpapasalamat nanggad kita na an Kaglalang kan uniberso asin kan gabos na nabubuhay sarong Diyos nin pagkamuot! Ginigiyahan kan kuwalidad na iyan an gabos niyang ginigibo.

2. Huling namumutan kita nin Diyos, sa ano kita makakasigurado? (Hilingon an ritrato sa itaas.)

² Mabuot asin namumutan nin Diyos an saiyang mga linalang. Kaya, makakasigurado kita na mauutob sa pinakamarahay na paagi an gabos niyang katuyuhan para sa mga tawo asin magigin tunay na maugma an gabos na magpapasakop sa saiyang pamamahala. Halimbawa, huli sa pagkamuot, si Jehova ‘nagtalaan nin sarong aldaw na huhukuman niya an kinaban sa katanusan sa paagi nin sarong tawo na saiyang pinili,’ o ninombrahan, si Jesu-Cristo. (Gibo 17:31, BPV *) Makakapagtiwala kita na  mangyayari an paghukom na ini. Para sa matanos asin makinuyog na mga tawo, mangangahulugan ini nin sarong tunay na maugmang puturo na magdadanay sagkod lamang.

3. Ano sa paghuna mo an magigin buhay ta sa maabot na panahon kun dai namumutan nin Diyos an mga tawo?

³ Isip-isipon kun ano an magigin buhay ta sa maabot na panahon kun mayong pagkamuot an Diyos para sa katawuhan. Kaipuhan ta sanang hilingon an nagin marauton na kasaysayan kan kinaban na ini sa irarom kan pamamahala nin tawo na impluwensiyado kan bakong mamumuton na diyos kaini na may grabeng kaanggutan, si Satanas na Diyablo. (2 Cor. 4:4; 1 Juan 5:19; basahon an Kapahayagan 12:9, 12.) Talagang mahihiling ta sa kasaysayan kun gurano kagrabe an magigin puturo ta kun mayong pagkamuot an Diyos para sa katawuhan!

4. Taano ta itinugot ni Jehova an pagrebelde sa saiyang matanos na pamamahala?

⁴ Kan magrebelde an Diyablo sa pamamahala ni Jehova, inimpluwensiyahan niya an inot na mag-agom na magrebelde man. Kinuwestiyon niya an deretso asin pagigin matanos ni Jehova bilang an Soberano kan Uniberso. Garo man sana sinabi ni Satanas na magigin mas marahay an saiyang pamamahala kisa kan sa Kaglalang. (Gen. 3:1-5) Tinugutan ni Jehova si Satanas na patunayan an paghihingako kaini, pero temporaryo sana iyan. Huli sa dakulang kadunungan ni Jehova, pinalihis Niya an igong panahon para mabuyagyag an kawaran nin kakayahan kan ano man na pamamahala apuwera kan sa Saiya. Ipinapahiling kan kahirak-hirak na kasaysayan kan katawuhan na dai kaya nin mga tawo, dawa ni Satanas, na magin marahay na tagapamahala.

5. Ano an malinaw na pinapatunayan kan kasaysayan nin tawo?

⁵ Labing 100 milyon katawo an nagadan sa mga giyera sa nakaagi pa sanang 100 na taon. Sa ngunyan, mas naggagrabe pa an kamugtakan kan kinaban. Ini mismo an ihinula kan Tataramon nin Diyos na mangyayari sa “huring mga aldaw” kan presenteng sistema nin mga bagay na diyan “an mga tawong maraot asin parasagin-sagin, padagos na magigin maraot.” (2 Tim. 3:1, 13, BPV) Malinaw na pinatunayan kan kasaysayan na totoong marhay an sinasabi kan Bibliya: “Aram kong marhay, O Jehova, na bakong kapot kan tawo an saiyang dalan. Bakong kapot nin tawong naglalakaw dawa an paggiya sa saiyang lakad.” (Jer. 10:23, NW) Dai linalang ni Jehova an mga tawo na may kakayahan o deretso na giyahan an saindang buhay na mayo an saiyang tabang.

6. Ano an saro pang katuyuhan kan temporaryong pagtugot nin Diyos sa karatan?

⁶ May saro pang katuyuhan an temporaryong pagtugot nin Diyos sa karatan. Magseserbing permanenteng patotoo iyan na an pamamahala sana nin Diyos an magigin mapanggana. Pag-abot nin panahon, pag linaglag na ni Jehova an gabos na maraot, dai na niya kaipuhan na tugutan pang magdanay an siisay man na makuwestiyon giraray sa saiyang mamumuton na paagi nin pamamahala. Magagamit niya an kasaysayan kan katawuhan bilang makatanusan na rason para halion tulos an siring na mga rebelde asin dai pagtugutan na magkaigwa giraray nin karatan.

7, 8. Ano an nagkapirang paagi na ipinahiling ni Jehova an saiyang dakulang pagkamuot?

⁷ Ipinahiling ni Jehova sa dakul na paagi an saiyang dakulang pagkamuot. Halimbawa, isip-isipa an satong makangangalas na uniberso. Igwa diyan nin binilyon na galaksiya, na an kada saro kaiyan may bilyon-bilyon na bituon asin planeta. An saro sa mga bituon na iyan iyo an saldang na nasa satong galaksiyang Milky Way. Kun mayo iyan, mayo nin mabubuhay sa daga. An gabos na linalang na ini ebidensiya kan pagka-Diyos ni Jehova asin mahihiling sa mga ini an saiyang mga kuwalidad, arog kan kapangyarihan, kadunungan, asin  pagkamuot. Iyo, an “saiyang dai nahihiling na mga kuwalidad malinaw na nahihiling puon pa sa paglalang kan kinaban padagos, huli ta an mga iyan namamansayan paagi sa mga bagay na ginibo, pati an saiyang daing sagkod na kapangyarihan asin pagka-Diyos.”—Roma 1:20, NW.

⁸ Itinao ni Jehova an gabos na bagay na kaipuhan kan saiyang mga linalang na dinisenyo niyang mabuhay sa daga. Naggibo siya para sa mga tawo nin sarong magayon na paraisong hardin asin tinawan niya sinda nin perpektong isip saka hawak na may kakayahan na mabuhay sagkod lamang. (Basahon an Kapahayagan 4:11.) Apuwera diyan, ‘siya nagtatao nin kakanon sa gabos na nabubuhay; an saiyang [maimbod na] pagkamuot mayo nin katapusan.’—Sal. 136:25, BPV.

9. Dawa sarong Diyos nin pagkamuot si Jehova, ano an ikinakaungis niya?

⁹ Dawa ipinapahiling ni Jehova na saro siyang Diyos nin pagkamuot, ipinapahiling man niya na saro siyang Diyos na ikinakaungis an maraot. Halimbawa, an Salmo 5:4-6 nagsasabi dapit sa saiya: ‘Bako kang sarong Diyos na nauugma sa karatan. Nauungis ka sa mga paragibo nin karatan.’ Sinabi pa kaiyan: ‘An tawong [madahas] asin madaya saimong isinisikwal.’ (BPV)

10, 11. (a) Ano an gigibuhon ni Jehova sa mga maraot? (b) Paano tatawan ni Jehova nin balos an mga matanos?

¹⁰ Huling si Jehova sarong Diyos nin pagkamuot asin ikinakaungis niya an karatan, hahalion niya an mga maraot sa bilog na uniberso pag sa hiling niya nasimbag na an isyu mapadapit sa pamamahala. Nanunuga an Tataramon nin Diyos: ‘An daga masasadiri kan mga nagsasarig [ki Jehova], alagad an mga maraot papahalion diyan. Dai mahahaloy mapapara an mga maraot. Mapapara arog sa mga burak sa kaawagan an mga kaiwal [ni Jehova], siring sa aso, mawawara sinda.’—Sal. 37:9, 10, 20, BPV.

¹¹ Nanunuga man an Tataramon nin Diyos: “Magigin sadiri kan mga matanos an daga, asin maistar sinda diyan sagkod lamang.” (Sal. 37:29, NW) Sinda ‘magkakararanga nin labi-labi sa katuninungan.’ (Sal. 37:11) Siyertong mangyayari ini huling pirming ginigibo kan satong mamumuton na Diyos an pinakaikakarahay kan saiyang maimbod na mga lingkod. Sinasabi sa sato kan Bibliya: “Papahidon niya an gabos na luha sa saindang mga mata, asin mawawara na an kagadanan, pati pagmundo, pagtangis, asin kulog. An dating mga bagay nakalihis na.” (Kap. 21:4, NW) Makangangalas na puturo nanggad an nakatagama para sa sato gabos na tunay na nagpapahalaga sa pagkamuot ni Jehova asin nagpapasakop sa saiya bilang satong Tagapamahala!

12. Siisay an masasabing “daing katuyawan”?

¹² Sinasabi sa sato kan Bibliya: “Obserbaran mo an daing katuyawan asin hilingon mo an matanos, huli ta an puturo kan tawong iyan magigin matuninong. Alagad an gabos na paralapas gagadanon; mayo na nin puturo an maraot na mga tawo.” (Sal. 37:37, 38, NW) An saro na “daing katuyawan” namimidbid si Jehova saka an saiyang Aki asin ginigibo an kabutan nin Diyos. (Basahon an Juan 17:3.) Sineseryoso niya an mga tataramon sa 1 Juan 2:17: ‘An kinaban maagi sana asin an saiyang mga hurot, alagad an naggigibo kan kabutan nin Diyos magdadanay sagkod lamang.’ Huling paparani na an katapusan kan kinaban, importante nanggad na ‘[maglaom] kita ki Jehova, asin utubon an saiyang dalan.’—Sal. 37:34.

13. Anong dakulang kapahayagan nin pagkamuot an ginibo ni Jehova para sa mga makasalan?

¹³ Dawa bako kitang perpekto, kaya tang ‘utubon an dalan ni Jehova.’ Puwede man kitang magkaigwa nin haraning relasyon sa saiya huli sa dakulang kapahayagan niya nin pagkamuot. Itinao niya an atang na pantubos ni Jesu-Cristo para magkaoportunidad an makinuyog na mga  tawo na makabutas sa kasalan asin kagadanan na namana ki Adan. (Basahon an Roma 5:12; 6:23.) Lubos an tiwala ni Jehova sa saiyang bugtong na Aki, na nagin maimbod sa saiya sa langit sa laog nin halawigon na panahon. Bilang mamumuton na Ama, siguradong nakulgan an Diyos sa bakong makatanusan na pagtratar ki Jesus sa daga. Pero, maimbod na sinuportaran ni Jesus an soberaniya nin Diyos asin ipinahiling na kaya nin sarong perpektong tawo na magdanay na maimbod ki Jehova dawa nasa pinakamasakit na mga sitwasyon.

14, 15. Ano an nagibo para sa katawuhan kan kagadanan ni Jesus?

¹⁴ Napagdanay ni Jesus an saiyang kaimbudan asin sinuportaran an soberaniya ni Jehova dawa nasa pinakagrabeng mga pagbalo, asin nagadan siyang maimbod na lingkod kan saiyang Ama. Nagpapasalamat nanggad kita na huli sa saiyang kagadanan, binayadan man ni Jesus an halagang pantubos para sa katawuhan na nagtao sa sainda nin oportunidad na mabuhay nin daing sagkod sa bagong kinaban na ipinanuga nin Diyos! Ilinadawan ni apostol Pablo kun gurano kadakula kan pagkamuot na iyan na ipinahiling ni Jehova asin ni Jesus: “An totoo, mantang kita mga maluya pa, si Cristo nagadan sa itinalaan na panahon para sa mga parakasala. Huli ta haros mayo nin siisay man an magigin andam na magadan para sa sarong matanos na tawo; tibaad pa gayod sa sarong marahay na tawo igwa nin magigin andam na magadan. Alagad dinadagka kita nin Diyos na akuon an saiyang pagkamuot na ipinahiling niya sa arog kaining paagi: si Cristo nagadan para sa sato kan  kita mga parakasala pa.” (Roma 5:6-8, NW) Si apostol Juan nagsurat: ‘Digdi kaini an pagkamuot nin Diyos nahayag sa sato, na an Diyos nagsugo sa kinaban kan saiyang Aking bugtong tanganing kita mabuhay huli saiya. An pagkamuot [sa bagay na ini], bakong huli ta kita namuot sa Diyos, kundi na siya namuot sa sato, asin nagsugo kan saiyang Aki na magin kabayadan kan satong mga kasalan.’—1 Juan 4:9, 10.

¹⁵ Mapadapit sa pagkamuot nin Diyos sa katawuhan, si Jesus nagsabi: ‘An Diyos namuot na gayo sa kinaban [nin matutubos na katawuhan], na itinao niya an saiyang Aking bugtong, tanganing an siisay man na minatubod sa saiya dai mapahamak, kundi magkaigwa nin buhay na daing katapusan.’ (Juan 3:16) Dakulaon nanggad an pagkamuot nin Diyos sa mga tawo kaya itinao niya an saiyang Aki bilang pantubos, dawa ngani makulugon iyan para sa saiya. Asin daing katapusan an pagkamuot niya sa katawuhan. Talagang malalauman niyato ini. Si Pablo nagsurat: ‘Minatubod ako na maski an kagadanan, an buhay, an mga anghel, an mga [gobyerno], an mga uya na, an mga maabot pa, an mga kapangyarihan, an kahalangkawan, an kahararuman, o an ano man na linalang dai puwedeng makapasuway sa sato sa pagkamuot nin Diyos na yaon ki Cristo Jesus na satong Kagurangnan.’—Roma 8:38, 39, BPV.

16. Ano an Mesiyanikong Kahadian, asin kiisay ipinagkatiwala ni Jehova an pamamahala kaiyan?

¹⁶ An saro pang ebidensiya kan pagkamuot nin Diyos para sa katawuhan iyo an Mesiyanikong Kahadian—an gobyerno nin Diyos. An pamamahala sa gobyernong ini ipinagkatiwala na ni Jehova sa saiyang Aki, na namumutan an mga tawo asin iyo an pinakakuwalipikadong mamahala. (Tal. 8:31) Nagpili an Diyos nin 144,000 na tawo para mamahala kaiba ni Jesus sa langit. Sa pagbuhay liwat sa sainda, dara ninda an saindang eksperyensiya kun paano magin tawo. (Kap. 14:1) An Kahadian an nagin panginot na tema kan pagtutukdo ni Jesus, asin tinukduan niya an saiyang mga disipulo na mamibi: “Ama niyamo na nasa langit, pakangbanalon an ngaran mo. Dumatong lugod an Kahadian mo. Mangyari lugod an buot mo, kun paano sa langit, siring man sa daga.” (Mat. 6:9, 10, NW) Kun mautob na an pamibing iyan, dakul nanggad na bendisyon an aakuon kan makinuyog na katawuhan!

17. Ikumparar an pamamahala ni Jesus sa pamamahala kan mga tawo.

¹⁷ Dakula nanggad an pagkakaiba kan pamamahala ni Jesus kumpara sa pamamahala kan mga tawo. An pamamahala nin tawo nagresulta sa mga giyera na guminadan nin milyon-milyon! Pero an satong Tagapamahala, si Jesus, talagang nagmamakulog sa saiyang mga sakop asin inaarog an marahayon na mga kuwalidad nin Diyos, lalo na an pagkamuot. (Kap. 7:10, 16, 17) Si Jesus nagsabi: “Madya kamo sa sako, kamo gabos na nagpapagal saka nagagabatan, asin papaginhawahon ko kamo. Pasanon nindo an sakuyang sakal asin makanuod kamo sa sako, huli ta ako may mahuyong buot saka may mapakumbabang puso, asin magiginhawahan kamo. Huli ta an sakuyang sakal komportable, asin an sakuyang pasan magian.” (Mat. 11:28-30, NW) Mamumuton nanggad na panuga iyan!

18. (a) Ano an ginigibo kan Kahadian nin Diyos puon kan maestablisar iyan? (b) Ano an pag-uulayan niyato sa masunod na artikulo?

¹⁸ Ipinapahiling kan hula sa Bibliya na naestablisar sa langit an Kahadian nin Diyos kan magpuon an presensiya ni Cristo kan 1914. Dangan, nagkaigwa nin pagtipon sa mga natatada kan mga mamamahalang kaiba ni Jesus sa langit asin sa “sarong dakulang kadaklan” nin mga tawo na makakaligtas sa katapusan kan sistemang ini asin palalaugon sa bagong kinaban. (Kap. 7:9, 13, 14) Gurano na ngunyan kadakula an dakulang kadaklan? Ano an hinahagad sa mga kabilang sa grupong ini? Pag-uulayan sa masunod na artikulo an simbag sa mga hapot na ini.