1. a) ¿Mbaʼépa pe kualida iñimportantevéva Jehová orekóva? b) ¿Mbaʼéichapa ñañeñandu jaikuaágui Jehová haʼeha mborayhu?

LA Biblia heʼi ‘Ñandejára haʼeha mborayhu’ (1 Juan 4:8). Upéva heʼise pe mborayhu haʼeha pe kualida iñimportantevéva orekóva Jehová. Haʼe ningo ndahaʼéi oporohayhúnteva, síno haʼe voi mborayhu. Entéro mbaʼénte ojapo oporohayhu rupi. ¡Ajépa javyʼaite pe mborayhu omomýi haguére chupe okrea hag̃ua ko univérso ha entéro oikovévape!

2. ¿Mbaʼépa Jehová ojapóta ñanderayhu rupi? (Ehecha pe taʼanga oĩva iñepyrũme.)

² Jehová ningo ohayhu opa mbaʼe ojapo vaʼekue, upévare jaikuaa porã haʼe katuete okumplitaha entéro mbaʼe oprometéva ñandéve. Por ehémplo, haʼe ñanderayhu rupi omoĩ “peteĩ ára ohusga hag̃ua tekojojápe entéro yvypórape”, ha ojapóta upéva Itaʼýra Jesucristo rupive (Hech. 17:31). Ñande ñaime segúro Jesús ñandehusgataha tekojojápe. Upe rire entéro yvypóra iñeʼẽrendúva Ñandejárape oikóta vyʼápe opa árare.

3. Jehová nañanderayhúirire, ¿mbaʼépa oiko vaʼerãmoʼã ñandehegui?

³ ¿Mbaʼépa oiko vaʼerãmoʼã ñandehegui Jehová nañanderayhúirire? Yvyporakuéra osegíta ogoverna Satanás poguýpe, pe dios iñañaitéva odomináva ko múndo (2 Cor. 4:4; 1 Juan 5:19; elee Apocalipsis 12:9, 12). ¡Ajépa ivaiete vaʼerãmoʼã ñane situasión!

4. ¿Mbaʼérepa Jehová nohundíri kuri Satanáspe?

⁴ Satanás opuʼã vaʼekue Jehováre ha omboliga avei Adán ha Évape ojapo hag̃ua upéva. Haʼe okuestiona pe derécho Jehová orekóva ogoverna hag̃ua ko univérso. Hiʼarive oinsinua haʼe ogoverna porãvetaha (Gén. 3:1-5). Péro Jehová iñarandueterei, ha upévare oheja ohasa tiémpo ojehecha hag̃ua siértopa la heʼi vaʼekue Satanás. Ha amo ipahápe, ojekuaa porãiterei Satanás ni yvyporakuéra nogovernaporãiha.

5. ¿Mbaʼépa ohechauka umi mbaʼe oikóva ko múndope?

⁵ Ko múndo ningo ivai vaive ohóvo. Por ehémplo, umi 100 áño ohasa vaʼekuépe mas de 100 millón de persóna omano umi gérra káusare. La Biblia heʼi voi “umi ára pahápe” “umi kuimbaʼe aña ha hovamokõiva oho vai vaive” vaʼerãha (2 Tim. 3:1, 13). Avei heʼi “yvypóra ndaikatuiha ijehegui reínte oiporavo haperã” (Jer. 10:23, NM). Ha upévango siertoite hína. Koʼag̃aite peve jahechakuaa Jehová nomeʼẽi hague yvyporakuérape kapasida ni derécho oiko hag̃ua heseʼỹ.

6. ¿Mbaʼérepa Jehová opermiti oikove umi hénte aña?

⁶ Ñandejára oheja oikove umi hénte aña, pórke upéicha ojehechauka haʼe añoite ogoverna porãha. Koʼẽrõite Jehová ohundíta entéro iñañávape. Upe rire oĩ jeýramo okuestionáva pe derécho haʼe orekóva ogoverna hag̃ua, pyaʼe voi ohundíta umívape. Jehová orekótama pruéva ohechauka hag̃ua umi persóna naiñeʼẽrendúiva pyaʼe oñehundi vaʼerãha, ha natekotevẽmoʼãvéima opermiti oiko umi mbaʼe vai.

7, 8. ¿Mbaʼéichapa Jehová ohechauka ñanderayhuha?

⁷ Jehová ohechauka heta hendáicha ñanderayhuha. Epensamína mbaʼeichaitépa tuicha ha iporã ko univérso. Pype ningo oĩ hetaiterei galáxia, ha káda galáxiape oĩ jey millones de planéta ha estrélla. Por ehémplo, pe kuarahy haʼe hína peteĩ estrélla, ha pe kuarahy reheʼỹ ndaiporimoʼãi kuri vída ko yvy ape ári. Entéro koʼã mbaʼe ohechauka Jehová ipoderosoha, iñarandu ha ñanderayhuha. La Biblia heʼi voi: “Hembiapokuére umi hénte ikatu ohecha mbaʼeichaguápa haʼe, ohecha ipodér opaʼỹva ha haʼeha Ñandejára” (Rom. 1:20).

⁸ Jehová ojapo ko yvy ikatu hag̃uáicha umi plánta, animál ha umáno oiko pype. Hiʼarive omoĩ yvyporakuérape peteĩ hardín iporãitereívape, ha omeʼẽ chupekuéra peteĩ ménte ha kuérpo perfékto, oĩva preparádo oikove hag̃ua pára siémpre (elee Apocalipsis 4:11). Avei “Ñandejára omeʼẽ hembiʼurã entéro héntepe ha animalkuérape” (Sal. 136:25, NM).

9. ¿Mbaʼépa ndogustaiete Jehovápe?

⁹ Jehová oporohayhuetereíramo jepe, haʼe ndaijaʼéi umi mbaʼe vaíre. Peteĩ salmísta heʼi vaʼekue Ñandejárape: “Che  aikuaa porã ndéve nandegustaiha umi mbaʼe vai ojejapóva. [...] Nde nderehayhúi umi persóna ojapóva mbaʼe vai. [...] Nde nderechaʼéi umi iviolénto ha oporombotavývare” (Sal. 5:4-6, NM).

10, 11. a) ¿Mbaʼépa oikóta koʼẽrõite umi hénte añágui? b) ¿Mbaʼéichapa Jehová ovendesíta umi iñeʼẽrendúvape?

¹⁰ Jahechaháicha, Jehová oporohayhueterei, péro haʼe ndaijaʼéi umi mbaʼe vaíre. Upévare itiempoitépe, oipeʼaitéta entéro mbaʼe vai. La Biblia heʼi: “Umi iñañáva oñehundíta, péro Jehová omeʼẽta ko yvy umi ojeroviávape hese. Koʼẽrõitéma opáta umi hénte iñañáva”. “Umi oñemoĩva Jehová kóntrape pyaʼe oñehundipáta. Haʼekuéra tatatĩcha opa reíta” (Sal. 37:9, 10, 20, NM).

¹¹ Péro la Biblia opromete avei: “Umi hembiapo porãvape oñemeʼẽta ko yvy, ha oikóta pype opa ára g̃uarã” (Sal. 37:29, NM). “Umi hénte ivuénova opytáta ko yvy ape ári, haʼekuéra oikóta pyʼaguapýpe ha upévare ovyʼaitereíta.” (Sal. 37:11, NM.) Ñandejára ningo siémpre ojapo iporãva isiervokuéra rehehápe, ha upévare ovendesíta umi iñeʼẽrendúvape. La Biblia heʼi avei: “Omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma” (Apoc. 21:4). ¡Ajépa hetaite mbaʼe porã ohaʼarõ umi iñeʼẽrendúvape!

12. ¿Mbaʼépa jajapo vaʼerã jaipotáramo Jehová ñandeguerohory?

¹² Ñandejára Ñeʼẽ heʼi ñandéve: “Emaña pe kuimbaʼe ivuénovare ha ejesareko pe hembiapo porãvare, ha rehecháta haʼe oikotaha pyʼaguapýpe. Péro entéro umi hembiapo vaíva oñehundíta; umi hénte aña ndohopukumoʼãi” (Sal. 37:37, 38, NM). Jaipotáramo Jehová ñandeguerohory, tekotevẽ jaikuaa porã chupe ha Itaʼýrape, ha jajapo vaʼerã haʼe ojeruréva ñandeve (elee Juan 17:3). Ñanemanduʼa vaʼerã avei ‘ko múndo ha umi mbaʼe oipotáva, ohasaha ohóvo; péro pe ojapóva Ñandejára rembipota katu opyta opa ára g̃uarã’ (1 Juan 2:17). Pe fin ningo hiʼag̃uimbaitéma, upévare iñimportanteterei jasegi ko konsého: “Ejerovia Jehováre ha esegi ejapo haʼe heʼíva” (Sal. 37:34, NM).

13. ¿Mbaʼépa hína pe pruéva tuichavéva ohechaukáva Ñandejára ñanderayhuha?

¹³ Ñaneimperféktoramo jepe, ikatu hína ñaneñeʼẽrendu Jehovápe ha jaiko iñamígoramo. ¿Mbaʼéicha rupípa upéva? Pórke Jesús ou omeʼẽ hekove ñanderehehápe, ha upe sakrifísio haʼe hína pe pruéva tuichavéva ohechaukáva Ñandejára ñanderayhuha. Jehová oheja Itaʼýra omano ikatu hag̃uáicha entéro umi persóna iñeʼẽrendúva ojei pekádo ha ñemano poguýgui (elee Romanos 5:12; 6:23). Jesús ningo oikóma vaʼekue yvágape Itúvandi heta tiémpore ha siémpre iñeʼẽrendu chupe. Upévare Jehová oikuaa haʼe iñeʼẽrendutaha avei ou vove ko yvy ape ári. Jehová ombyasyeterei ohechávo mbaʼeichaitépa umi hénte omaltrata Itaʼýra ohayhuetévape. Péro Jesús ohasa asýramo jepe ko yvy ape ári, siémpre odefende pe derécho Ñandejára orekóva ogoverna hag̃ua. Avei ohechauka peteĩ yvypóra perfékto ikatuha iñeʼẽrendu  Jehovápe ohasárõ jepe umi situasión ijetuʼuetereíva.

14, 15. ¿Mbaʼépa ikatu jahupyty Jesús omano haguére ñanderehehápe?

¹⁴ Jesús osufrietereíramo jepe, iñeʼẽrendu vaʼekue Ñandejárape omano meve. ¿Mbaʼépa ikatu jahupyty haʼe omano haguére ñanderehehápe? Jareko oportunida jaikove hag̃ua opa árare pe paraísope. Apóstol Pablo oikuaa vaʼekue Jehová ha Jesús ñanderayhuetereiha, upévare heʼi: “Cristo omano iñañáva rehehápe. Haʼe ojapo upéva ñande pekadór aja gueteri. Hasy hína oĩ hag̃ua omanóva peteĩ hekojojáva rehehápe, péro añetehápe ikatu oĩ omanoséva peteĩ ivuénova rehehápe. Ñandejára katu ohechauka ñanderayhuha, Cristo omanóvo ñanderehehápe ñande pekadór aja gueteri” (Rom. 5:6-8). Ha apóstol Juan oskrivi: “Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove. Pe mborayhu ndeʼiséi ñande jahayhu hague Ñandejárape, síno haʼe la ñanderayhu vaʼekue ha ombou Itaʼýrape oñemeʼẽ hag̃ua sakrifísioramo, ikatu hag̃uáicha ojeheja rei ñande pekádo ha jaiko porã jey hendive” (1 Juan 4:9, 10).

¹⁵ Jesús avei heʼi vaʼekue: “Ñandejára ohayhuetereígui pe múndo omeʼẽ Itaʼýra  peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16). Jehová osufrietereíramo jepe, oheja Itaʼýra omano ñanderehehápe. Upéva ohechauka ñanderayhuetereiha, ha haʼe núnka nokambiamoʼãi. Upéicha rupi Pablo oskrivi: “Che añetehápe aguerovia ni ñemano, ni jeikove, ni ánhel, ni goviérno, ni umi mbaʼe koʼág̃a oĩva koʼápe, ni umi mbaʼe oútava, ni umi podér, ni umi mbaʼe oĩva yvate ni ipypukuhápe, ni mbaʼeveichagua kreasión, ndaikatumoʼãiha ñandepeʼa Ñandejára mborayhúgui, ojehechaukáva ñande Ruvicha Cristo Jesús rupive” (Rom. 8:38, 39).

16. a) ¿Mbaʼépa hína pe Rréino Mesiániko? b) ¿Mávapepa Ñandejára oiporavo ogoverna hag̃ua ko Rréino?

¹⁶ ¿Mbaʼéichapa Jehová ohechauka avei ñanderayhuha? Pe Rréino Mesiániko rupive. Upéva haʼe hína peteĩ goviérno Ñandejára voi omoĩva, ha oiporavo peteĩ governánte ohayhúva yvyporakuérape, ha ikatupyrýva ogoverna hag̃ua (Prov. 8:31). ¿Mávapa hína upéva? Ko governánte hína Jesucristo, pe Mesías. Avei Ñandejára oiporavo 144.000 kristiáno ogoverna hag̃ua yvágape Crístondi. Koʼã persóna ohasa heta mbaʼe ko yvy ape ári, ha pe experiénsia orekóva oipytyvõta chupekuéra ogoverna porã hag̃ua (Apoc. 14:1). Jesús oĩrõ guare ko yvy ape ári ohechauka vaʼekue Ñandejára Rréino iñimportantetereiha chupe g̃uarã, upévare opárupi oñeʼẽ upe Rréinore. Peteĩ vuéltape omboʼe voi idisipulokuérape oñemboʼe hag̃ua kóicha: “Ore Ru reiméva yvágape, toñemomarangatu nde réra. Tou ne Rréino, tojejapo ne rembipota yvy ape ári yvagapeguáicha” (Mat. 6:9, 10). ¡Hiʼãitéma ningo oñekumpli ko ñemboʼe ha pe Rréino rupive toñevendesi entéro yvypóra!

17. ¿Mbaʼépepa idiferénte ojuehegui Jesús goviérno ha yvypóra goviérno?

¹⁷ Tuichaiterei ningo idiferénte ojuehegui Jesús goviérno ha yvypóra goviérno. Yvyporakuéra ningo oñepyrũ guive ogoverna, gérra ha ñemanómante ogueru. Péro Jesús katu ñanderayhu, ha Itúvaicha oreko heta kualida iporãitereíva (Apoc. 7:10, 16, 17). Haʼe heʼi vaʼekue: “Peju che rendápe enterove peẽ pembaʼapo jejopy ha pendekárga pohýiva, ha che pombopiroʼýta. Pehupi pende ári che júgo ha peaprende chehegui. Che ningo ndachepochyreíri ha añemomirĩ che pyʼaite guive, upévare katuete pombopiroʼýta. Che júgo napendeforsamoʼãi ha che kárga ivevýi” (Mat. 11:28-30). ¡Ajépa ñanderayhuete Jesús!

18. a) ¿Mbaʼépa oiko 1914 guive? b) ¿Mbaʼépa jahecháta pe artíkulo oúvape?

¹⁸ La Biblia ohechauka Ñandejára Rréino oñepyrũ hague ogoverna yvágape áño 1914-pe, ha upérõ oñepyrũ avei Cristo presénsia. Ha Cristo presénsia aja oñembyaty hína umi unhído ofaltáva oñekompleta hag̃ua umi 144.000 ogovernátava Jesúsndi yvágape. Avei oñembyaty “peteĩ aty guasu” ojesalvátava oñehundi vove ko múndo aña. Umi persóna oĩva ko ‘aty guasúpe’ ikatúta oiko pe paraísope (Apoc. 7:9, 13, 14). ¿Mboy persónapa oĩma ko aty guasúpe? ¿Mbaʼépa ojapo vaʼerã ojesalva hag̃ua hikuái? Pe artíkulo oúvape oñekontestáta koʼã porandu.