1. Etẹwẹ yin jẹhẹnu tintan Jiwheyẹwhe tọn, podọ to whenue a yọ́n ehe, numọtolanmẹ tẹwẹ a tindo gando ewọ go?

BIBLU, Ohó gbọdo Jehovah tọn dọna mí dọ “Jiwheyẹwhe wẹ owanyi.” E ma dọ poun dọ owanyi yin dopo to jẹhẹnu dagbe Jiwheyẹwhe tọn lẹ mẹ gba, amọ́ e dọ dọ “Jiwheyẹwhe wẹ owanyi.” (1 Joh. 4:8) Jẹhẹnu tintan etọn niyẹn, yèdọ dehe yin titengbe hugan lọ. E ma yindọ Jehovah tindo owanyi poun wẹ gba, ṣigba ewọ wẹ apajlẹ pipé owanyi tọn. Lehe e yin ayajẹnu do sọ nado yọnẹn dọ Jiwheyẹwhe owanyinọ de wẹ yin Didatọ wẹkẹ po nutogbẹ̀ lẹpo po tọn! Jẹhẹnu ehe nọ sọawuhia to nuyiwa etọn lẹpo mẹ.

2. Nujikudo tẹwẹ owanyi Jiwheyẹwhe tọn hẹn mí tindo? (Pọ́n yẹdide he tin to bẹjẹeji hosọ ehe tọn.)

² Owanyi sisosiso he Jiwheyẹwhe tindo na nudida etọn lẹ hẹn mí kudeji dọ lẹndai etọn na gbẹtọvi lẹ na mọ hẹndi to aliho dagbe hugan mẹ, bo na hẹn dona susu wá na mẹhe na nọ gandudu etọn glọ lẹpo. Di apajlẹ, Jehovah ko gbọn owanyi dali “de azán  de he gbè e lẹn nado dawhẹna mẹhe nọ nọ̀ aigba ji lẹ to dodo mẹ gbọn dawe de he e ko de dali,” yèdọ Jesu Klisti. (Owalọ 17:31) Mí sọgan deji dọ ehe na jọ nugbo. Gbẹtọ he yin ahunjijlọnọ bo nọ setonu lẹ na mọ whẹdida dagbe po dona susu po yí to sọgodo, ehe yé na to vivi etọn dù kakadoi.

3. Nawẹ a lẹndọ ogbẹ̀ na te eyin Jiwheyẹwhe ma yiwanna gbẹtọvi lẹ?

³ Nawẹ mì lẹndọ ogbẹ̀ na te eyin Jiwheyẹwhe ma tindo owanyi na gbẹtọvi lẹ? Gblọndo lọ nọ họnwun eyin mí lẹnnupọndo whenuho ylankan aihọn ehe tọn po gandudu gbẹtọvi tọn etọn lẹ po he to anademẹ Satani Lẹgba tọn glọ ji, yèdọ yẹwhe aihọn lọ tọn he yin kanylantọ bo ma tindo owanyi. (2 Kọl. 4:4; 1 Joh. 5:19; hia Osọhia 12:9, 12.) Ehe dohia dọ sọgodo mítọn na blawu taun eyin Jiwheyẹwhe ma yiwanna mí.

4. Naegbọn Jehovah do na dotẹnmẹ atẹṣiṣi sọta gandudu dodo tọn etọn?

⁴ To whenue Lẹgba ṣiatẹ sọta gandudu Jehovah tọn, e sisẹ́ asu po asi po tintan lọ nado wà nudopolọ. E diọnukunsọ jlọjẹ Jiwheyẹwhe tọn nado dugán, gọna nupojipetọ-yinyin dodo tọn etọn. To aliho de mẹ, Satani sọalọakọ́n dọ gandudu emitọn na yọ́n hugan Mẹdatọ lọ tọn. (Gẹn. 3:1-5) Dile etlẹ yindọ Jehovah na dotẹnmẹ Satani nado do nugbo-yinyin nuhe e dọ tọn hia, dotẹnmẹ enẹ ma na yin kakadoi. Gbọn nuyọnẹn daho etọn dali, Jehovah dike ojlẹ susu ni juwayi nado dohia gblegede dọ gandudu devo depope ma sọgan tindo kọdetọn dagbe sọ emitọn. Whenuho gbẹtọvi lẹ tọn he gọ́ na awubla dohia dọ gbẹtọ kavi Satani ma sọgan dugán to aliho dagbe mẹ bo hẹn pekọ wá na nuhudo mítọn lẹ.

5. Etẹwẹ whenuho gbẹtọvi tọn dohia hezeheze?

⁵ To owhe 100 he wayi lẹ poun gblamẹ, gbẹtọ livi 100 linlán wẹ yin hùhù to awhàn he akọta lẹ fùn whenu. To egbehe, ninọmẹ aihọn tọn to yinylan dogọ. Ehe sọgbe pẹpẹ hẹ nuhe Ohó Jiwheyẹwhe tọn dọ dọdai etọn dọ e na jọ to “azán godo tọn” titonu ehe tọn lẹ mẹ to whenue “omẹ ylankan lẹ po mẹblutọ lẹ po na to yinylan deji dogọ.” (2 Tim. 3:1, 13) Nujijọ whenuho tọn lẹ dohia hezeheze dọ nuhe Biblu dọ yin nugbo dọmọ: “OKLUNỌ E, yẹn yọnẹn dọ aliho gbẹtọ tọn ma tin to ewọ lọsu mẹ gba: e ma tin to omẹ he to zọnlinzin mẹ nado do afọdide etọn lẹ gba.” (Jel. 10:23) Jehovah ma dá gbẹtọvi lẹ po nugopipe lọ po nado didẹ whẹho yetọn lẹ na yede kavi na yé jlọjẹ nado wàmọ gba.

6. Lẹndai tẹ wutu wẹ Jiwheyẹwhe jotẹnna kanyinylan na ojlẹ de?

⁶ Jiwheyẹwhe jotẹnna kanyinylan nado do lehe gandudu gbẹtọvi tọn yin ovọ́ do hia, podọ nado jẹ lẹndai sọgodo tọn devo kọ̀n. E do kunnudenu tẹgbẹ tọn de hia dọ gandudu Jiwheyẹwhe tọn kẹdẹ wẹ sọgan tindo kọdetọn dagbe. To whenue Jehovah na ko de kanyinylan po mẹhe nọ hẹn ẹn wá lẹ po sẹ̀ godo, eyin mẹdepope sọ tẹnpọn nado diọnukunsọ aliho owanyi tọn he mẹ Jehovah nọ dugán te, e ma nasọ biọ dọ Jiwheyẹwhe ni jotẹnna avùnnukundiọsọmẹ enẹ nado gbọṣi aimẹ. E sọgan yí nuhe ko jọ to whenuho gbẹtọvi tọn mẹ zan taidi whẹjijọ nado yawu de atẹṣiṣi mọnkọtọn lẹ sẹ̀, bo ma nasọ dike na kanyinylan ni doadọ̀do whladopo dogọ ba.

7, 8. Etẹwẹ yin delẹ to aliho he mẹ Jehovah ko do owanyi daho etọn hia te lẹ mẹ?

⁷ Owanyi daho Jehovah tọn ko yin didohia to aliho susu mẹ. Di apajlẹ, doayi lehe wẹkẹ lọ jiawu do go. Bẹplidopọ sunwhlẹvu lẹ tọn liva susu wẹ tin, bọ dopodopo yetọn sọ bẹ sunwhlẹvu po planẹti liva susu po hẹn. Owhè yin dopo to sunwhlẹvu he tin to  bẹplidopọ sunwhlẹvu lẹ tọn Voie lactée mẹ, bọ eyin e ma ko tin wẹ, nutogbẹ̀ voovo he to aigba ji lẹ ma sọgan nọgbẹ̀. Nudida ehe lẹpo yin kunnudenu dọ Jehovah wẹ Mẹdatọ mítọn bo tindo jẹhẹnu lẹ taidi huhlọn, nuyọnẹn po owanyi po. Na nugbo tọn, “jẹhẹnu mayinukundomọ etọn lẹ to yinyin mimọ hezeheze sọn didá aihọn tọn gbọ́n, na yé yin ayidego gbọn nuhe yin bibasi lẹ dali, yèdọ huhlọn madopodo po Jiwheyẹwhe-yinyin etọn po.”—Lom. 1:20.

⁸ Jehovah dá nuhe to aigba ji lẹpo na dagbe nudida etọn he to aigba ji lẹ tọn. E wleawuna paladisi whanpẹnọ de na gbẹtọvi lẹ bosọ na yé ayiha po agbasa pipé de po he na hẹn ẹn yọnbasi na yé nado nọgbẹ̀ kakadoi. (Hia Osọhia 4:11.) Humọ, “ewọ na núdùdù hlan agbasalan lẹpo: na dagbewanyi etọn to ote kakadoi.”—Ps. 136:25.

9. Dile etlẹ yindọ Jehovah nọ do owanyi hia, etẹwẹ e gbẹwanna?

⁹ Dile etlẹ yindọ Jehovah do ede hia taidi Jiwheyẹwhe owanyinọ de, e sọ gbẹwanna nuhe ylan. Di apajlẹ, Psalm 5:4-6 dọ gando Jehovah go dọmọ: “Hiẹ ma yin Jiwheyẹwhe he do homẹhunhun do ylanwiwa go . . . Hiẹ gbẹwanna ylanzọnwatọ lẹpo.” E sọ yidogọ dọmọ: “OKLUNỌ gbẹwanna mẹhùnnutọ po mẹklọtọ lẹ po.”

10, 11. (a) Nawẹ Jehovah na yinuwa hẹ mẹylankan lẹ gbọn? (b) Nawẹ Jehovah na suahọ ahunjijlọnọ lẹ gbọn?

¹⁰ Na Jehovah yin Jiwheyẹwhe owanyinọ bo gbẹwanna kanyinylan wutu, lẹndai etọn wẹ nado de nuylankan sẹ̀ sọn aigba po adà wẹkẹ lọ tọn he pò lẹ po ji, to whenue e na ko didẹ whẹho he gando gandudu go lọ dile e jẹ do godo. Ohó Jiwheyẹwhe dopagbe dọmọ: “Yè na sán ylanwatọ lẹ sẹ̀: ṣigba yé he nọtepọn OKLUNỌ lẹ wẹ na dugu aigba tọn. Na whenu pẹẹde, mẹylankan lẹ ma na tin ba . . . Kẹntọ OKLUNỌ tọn lẹ na di whanpẹ ogbé mú tọn: yé na fiọ; azọ̀ mẹ yé na fiọ do.”—Ps. 37:9, 10, 20.

¹¹ To alọ devo mẹ, Ohó Jiwheyẹwhe tọn sọ dopagbe dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.” (Ps. 37:29) Tenọglinọ mọnkọtọn lẹ “na hẹn homẹhun yede to jijọho susu mẹ.” (Ps. 37:11) Onú enẹlẹ na mọ hẹndi na Jiwheyẹwhe owanyinọ mítọn nọ wà nuhe na hẹn ale wá na devizọnwatọ nugbonọ etọn lẹ to whepoponu. Biblu dọna mí dọmọ: “Ewọ [na] súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.” (Osọ. 21:4) Sọgodo jiawu nankọ die to tepọn dopodopo mítọn he yọ́n pinpẹn owanyi Jehovah tọn nugbonugbo, bosọ nọ setonuna ẹn taidi Gandutọ mítọn!

12. Mẹnu wẹ sọgan yin pinpọn di “mẹpipe”?

¹² Ohó Jehovah tọn dọna mí dọmọ: “Doayi mẹpipe go, bosọ payi tenọglinọ go: ale de tin hlan dawe jijọho tọn. Ṣigba tasinyẹntọ lẹ wẹ yè na sudo: yè nasọ sán ale mẹylankan lẹ tọn sẹ̀.” (Ps. 37:37, 38) “Mẹpipe” wẹ mẹhe wá yọ́n Jehovah po Visunnu etọn po bo gbọn tonusise dali wà ojlo Jiwheyẹwhe tọn. (Hia Johanu 17:3.) Omẹ mọnkọtọn nọ ylọ nuhe  1 Johanu 2:17 dọ lẹ dọ nujọnu: “Aihọn to jujuyi po ojlo etọn po ga, ṣigba ewọ he wà ojlo Jiwheyẹwhe tọn na gbọṣi aimẹ kakadoi.” Dile opodo aihọn lọ tọn to sisẹpọ, onú niyaniya tọn wẹ e yin nado nọ ‘nọtepọn OKLUNỌ bosọ to aliho etọn hodo.’—Ps. 37:34.

13. Afọdide owanyi tọn he klohugan tẹwẹ Jehovah ze do ota ylandonọ lẹ tọn mẹ?

¹³ Dile mí tlẹ yin mapenọ, mí sọgan ‘hodo aliho Jehovah tọn.’ Mí sọgan sọ tindo haṣinṣan mẹdetiti tọn de hẹ Jehovah, na nuyiwa  owanyi tọn etọn he klohugan lọ wutu. E wleawuna avọ́sinsan ofligọ Jesu Klisti tọn lọ, he hùn dotẹnmẹ dote na gbẹtọvi tonusetọ lẹ nado vò sọn ylando po okú he yé dugu etọn sọn Adam de po si. (Hia Lomunu lẹ 5:12; 6:23.) Jehovah deji mlẹnmlẹn do Visunnu detọ́n dopo akàn etọn go, mẹhe ko yin nugbonọ na ẹn to olọn mẹ na owhe madosọha lẹ. Taidi Otọ́ owanyinọ de, ayihaawe ma tin dọ Jiwheyẹwhe sè vivẹ́ to whenue yè to nuyiwa hẹ Jesu to aliho agọ̀ mẹ to aigba ji. Ṣigba, Jesu gbọn nugbonọ-yinyin dali ze nupojipetọ-yinyin Jiwheyẹwhe tọn daga, bosọ dohia dọ gbẹtọvi pipé de sọgan hẹn tenọgli etọn go to Jehovah nukọn etlẹ yin to ninọmẹ he sinyẹn hugan lẹ mẹ.

14, 15. Etẹwẹ okú Jesu tọn hẹn yọnbasi?

¹⁴ Jesu hẹn tenọgli go bo ze nupojipetọ-yinyin Jehovah tọn daga to whlepọn he sinyẹn taun lẹ glọ, bosọ yin nugbonọ na Otọ́ etọn kakajẹ okú. Lehe mí sọ dona dopẹ́ do sọ dọ gbọn okú etọn gblamẹ, Jesu suahọ ofligọ he sin nuhudo gbẹtọvi lẹ tindo nado yin tuntundote tọn, bosọ hẹn ẹn yọnbasi na yé nado mọ ogbẹ̀ madopodo to aihọn yọyọ he Jiwheyẹwhe dopagbe etọn lọ mẹ! Apọsteli Paulu do lehe nuyiwa owanyi tọn Jehovah po Jesu po tọn ehe jẹna ayidego do hia to whenue e dọmọ: “Na nugbo tọn, dile mí gbẹ́ yin madogánnọ, Klisti kú na mẹhe tindo jijọ-madi-Jiwheyẹwhe tọn lẹ to ojlẹ dide lọ mẹ. E ma yá bọ mẹde na kú  do dodonọ tamẹ; na nugbo tọn, vlavo wẹ mẹde na tlẹ gboadọ nado kú do omẹ dagbe de tamẹ. Ṣigba, Jiwheyẹwhe do owanyi ede tọn hia mí to enẹ mẹ dọ, dile mí gbẹ́ to ylandonọ yin, Klisti kú na mí.” (Lom. 5:6-8) Apọsteli Johanu wlan dọmọ: “Gbọn ehe dali wẹ owanyi Jiwheyẹwhe tọn ko yin didohia to whẹho mítọn mẹ, na Jiwheyẹwhe do Visunnu detọ́n dopo akàn etọn hlan aihọn mẹ na mí nido sọgan mọ ogbẹ̀ gbọn ewọ gblamẹ. Ehe mẹ wẹ owanyi lọ te, e ma yindọ míwlẹ wẹ ko yiwanna Jiwheyẹwhe gba, ṣigba dọ ewọ wẹ yiwanna mí bo do Visunnu etọn hlan taidi avọ́sinsan oyẹsu tọn de na ylando mítọn lẹ.”—1 Joh. 4:9, 10.

¹⁵ Gando owanyi Jiwheyẹwhe tọn na gbẹtọvi lẹ go, Jesu dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Joh. 3:16) Owanyi Jiwheyẹwhe tọn na gbẹtọvi lẹ klo sọmọ bọ ewọ ma nọ whleawu nado wà dagbe na yé, mahopọnna nudepope he e sọgan biọ to e si. Owanyi etọn na gbọṣi aimẹ kakadoi. Mí sọgan nọ ganjẹ owanyi ehe go to whelẹponu. Paulu wlan dọmọ: “Yẹn tindo nujikudo dọ okú kavi ogbẹ̀ kavi angẹli lẹ kavi gandudu lẹ kavi nuhe tin tofi todin lẹ kavi nuhe ja lẹ kavi huhlọn lẹ kavi aga kavi odò kavi nudida devo depope ma na penugo nado klan mí sọn owanyi Jiwheyẹwhe tọn he tin to Klisti Jesu Oklunọ mítọn mẹ lọ go.”—Lom. 8:38, 39.

16. Etẹwẹ Ahọluduta lọ yin, podọ mẹnu wẹ Jehovah ze gandudu enẹ do alọmẹ na?

¹⁶ Tito he Jiwheyẹwhe basi nado ze Ahọluduta Mẹsia tọn lọ dai do owanyi etọn na gbẹtọvi lẹ hia hezeheze. Jehovah ko ze gandudu ehe do alọmẹ na Visunnu etọn, mẹhe yiwanna gbẹtọvi lẹ bosọ pegan taun nado dugán. (Howh. 8:31) To whenue gudutọgbẹ́ Jesu tọn 144 000 lẹ yin finfọn do olọn mẹ, yé gbẹ́ nọ flin numimọ he yé tindo wayi taidi gbẹtọvi lẹ. (Osọ. 14:1) Ahọluduta lọ ji wẹ nuplọnmẹ Jesu tọn lẹ sinai do, podọ e plọn devi etọn lẹ nado nọ hodẹ̀ dọmọ: “Otọ́ mítọn he tin to olọn mẹ, na oyín towe ni yin kinklandowiwe. Na ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.” (Mat. 6:9, 10) Lehe hẹndi obiọ ehelẹ tọn na hẹn dona lẹ wá na gbẹtọvi tonusetọ lẹ do sọ!

17. Vogbingbọn tẹwẹ tin to gandudu Jesu tọn po gbẹtọvi mapenọ lẹ tọn po ṣẹnṣẹn?

¹⁷ Lehe gandudu owanyinọ Jesu tọn to olọn mẹ gbọnvo taun na gandudu gbẹtọvi lẹ tọn he ko hẹn okú wá na gbẹtọ livi susu lẹ to awhàn whenu do sọ! Na nugbo tọn, Jesu nọ hò mẹjidugando etọn lẹ tọn pọ́n bo nọ do jẹhẹnu jiawu Jiwheyẹwhe tọn lẹ nkọ hia, titengbe owanyi. (Osọ. 7:10, 16, 17) Jesu dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na alindọn mìtọn lẹ. Na zẹgẹ ṣie bọawu bọ agbàn ṣie sọ fua.” (Mat. 11:28-30) Jidenamẹ he gọ́ na owanyi nankọ die!

18. (a) Etẹwẹ Ahọluduta Jiwheyẹwhe tọn to wiwà sọn whenue e ko yin didoai? (b) Etẹwẹ mí na gbadopọnna to hosọ he bọdego mẹ?

¹⁸ Dọdai Biblu tọn lẹ dohia dọ Ahọluduta olọn mẹ tọn Jiwheyẹwhe tọn yin didoai to whenue tintin tofi Klisti tọn bẹjẹeji to 1914. Sọn whenẹnu, pipotọ mẹhe na duahọlu hẹ Jesu to olọn mẹ lẹ tọn po “gbẹtọ susugege” he na lùn vivọnu titonu ehe tọn tọ́n bo na yin pinplan biọ aihọn yọyọ lọ mẹ lẹ po to yinyin bibẹpli. (Osọ. 7:9, 13, 14) Nawẹ gbẹtọ susugege lọ ko sù sọ to egbehe? Etẹwẹ yin bibiọ to mẹhe na tin to pipli ehe mẹ lẹ si? Mí na gbadopọnna kanbiọ enẹlẹ to hosọ he bọdego mẹ.