1. Ano ang panguna nga kinaiya sang Dios, kag ano ang ginabatyag mo sa iya bangod nahibaluan mo ini?

ANG Biblia, nga Pulong ni Jehova, nagasugid sa aton nga “ang Dios gugma.” Wala ini nagasiling nga ang gugma isa sa dalayawon niya nga mga kinaiya kundi nga “ang Dios gugma.” (1 Juan 4:8) Amo ini ang iya panguna nga kinaiya, ang pinakaimportante sa tanan. Indi lamang mahigugmaon si Jehova, kundi sia ang perpekto nga halimbawa sini. Makalilipay gid mahibaluan nga ang Manunuga sang uniberso kag sang tanan nga buhi nga butang amo ang Dios sang gugma! Ang tanan niya nga ginahimo nabase sa sina nga kinaiya.

2. Ano ang ginapasalig sa aton sang gugma sang Dios? (Tan-awa ang piktyur sa umpisa sini nga artikulo.)

² Ang kaayo kag pagpalangga sang Dios sa tanan niya nga tinuga nagapasalig sa aton nga matuman ang tanan niya nga katuyuan sa katawhan sa pinakamaayo nga paagi kag magabenepisyo gid ang tanan nga nagapasakop sa iya paggahom. Halimbawa, bangod sa gugma ni Jehova, “nagtalana sia sing isa ka adlaw agod hukman niya ang kalibutan sing matarong paagi sa isa ka tawo nga gintangdo niya,” si Jesucristo. (Binu. 17:31) Makasalig kita nga mahanabo  ini. Ang paghukom sa mga matarong kag matinumanon magaresulta sa wala sing katapusan nga pagpakamaayo sa ila sa palaabuton.

3. Ano ayhan ang matabo kon wala ginahigugma sang Dios ang katawhan?

³ Ano ayhan ang matabo kon wala ginahigugma sang Dios ang katawhan? Padayon nga mangin malain ang kahimtangan sang kalibutan nga ginagamhan sang mga tawo nga naimpluwensiahan sang maakigon kag indi mahigugmaon nga dios sini, si Satanas nga Yawa. (2 Cor. 4:4; 1 Juan 5:19; basaha ang Bugna 12:9, 12.) Ginapakita sini nga mangin malain gid ang palaabuton kon manghikot ang uniberso nga wala ang gugma sang Dios.

4. Ngaa gintugutan ni Jehova ang pagrebelde batok sa iya matarong nga paggahom?

⁴ Sang nagrebelde ang Yawa sa paggahom ni Jehova, gin-impluwensiahan niya ang una nga mag-asawa nga magsunod sa iya. Ginkuwestyon niya ang kinamatarong sang Dios nga mangin Soberano sang Uniberso. Daw pareho lang nga nangangkon si Satanas nga mangin mas maayo ang iya paggahom sangsa Manunuga. (Gen. 3:1-5) Bisan pa gintugutan ni Jehova si Satanas nga pamatud-an ang iya pangangkon, temporaryo lang ini. Bangod sa daku nga kaalam ni Jehova, gintugutan niya nga magligad ang bastante nga tion para maathag gid nga mapamatud-an nga wala na sing makasarang sa paggahom luwas sa iya. Ang malain nga natabo sa katawhan nagapamatuod nga indi gid maayo ang paggahom sang mga tawo ukon ni Satanas.

5. Ano ang napamatud-an sang kasaysayan sang katawhan?

⁵ Sa nagligad lang nga 100 ka tuig, sobra na sa 100 ka milyon ka tawo ang napatay sa mga inaway sang mga pungsod. Subong, nagalala na gid ang kahimtangan sang kalibutan. Amo ini ang gintagna sang Pulong sang Dios nga mahanabo “sa katapusan nga mga adlaw” sining sistema sang mga butang diin “ang malaut nga mga tawo kag mga impostor magalain pa gid.” (2 Tim. 3:1, 13) Napamatud-an sang kasaysayan nga matuod gid ang ginasiling sang Biblia: “O Jehova, nahibaluan ko gid nga wala sing ikasarang ang tawo sa pagtuytoy sang iya dalanon. Wala sing ikasarang ang tawo sa pagtuytoy sang iya tikang.” (Jer. 10:23) Huo, sang gintuga ni Jehova ang mga tawo, wala niya sila ginhatagan sing ikasarang ukon kinamatarong sa paggahom nga wala ang iya panuytoy.

6. Ano ang katuyuan sang temporaryo nga pagtugot sang Dios sa kalautan?

⁶ Magluwas nga napamatud-an sang temporaryo nga pagtugot sang Dios sa kalautan nga napaslawan ang paggahom sang tawo, may ara pa gid ini sing katuyuan. Permanente ini nga nagapamatuod nga ang paggahom lamang sang Dios ang magamadinalag-on. Kon malaglag na ni Jehova ang kalautan kag ang mga malaut, kag may magkuwestyon liwat sa iya mahigugmaon nga paggahom, indi na niya ini pagtugutan. Magamit niya ang natabo sa kasaysayan sang katawhan bilang basihan sa paglaglag dayon sa mga rebelde, nga wala na nagatugot sa ila nga maghimo liwat sing kalautan.

7, 8. Ano ang pila sa madamo nga paagi nga ginpakita ni Jehova ang iya daku nga gugma?

⁷ Ginpakita ni Jehova ang iya daku nga gugma sa madamo nga paagi. Halimbawa, talupangda ang makahalawhaw nga uniberso. May binilyon ka galaksiya, nga ang kada isa nagaunod man sing binilyon ka bituon kag planeta. Ang isa sa mga bituon sa aton galaksiya nga Milky Way amo ang aton adlaw. Kon wala ini, wala sing mabuhi sa duta. Ang tanan nga tinuga nagapamatuod nga Dios si Jehova kag makita sa sini ang iya mga kinaiya pareho sang gahom, kaalam, kag gugma. Huo,  “ang iya indi makita nga mga kinaiya, ang iya wala katapusan nga gahom kag pagka-Dios, maathag nga makita halin pa sang pagtuga sa kalibutan, bangod makita ini sa mga butang nga gintuga.”—Roma 1:20.

⁸ Gindesinyo ni Jehova ang duta para makasuportar sa kabuhi sang mga tinuga niya sa duta. Naghimo sia sing matahom nga paraiso para sa mga tawo, kag ginhatagan sila sing perpekto nga hunahuna kag lawas nga gindesinyo para mabuhi sing dayon. (Basaha ang Bugna 4:11.) Dugang pa, “ginahatagan niya sing pagkaon ang tanan niya nga tinuga, kay ang iya mainunungon nga gugma wala sing katapusan.”—Sal. 136:25.

9. Magluwas sa gugma, ano kon kaisa ang ginabatyag ni Jehova, kag ngaa?

⁹ Ginpakita ni Jehova nga sia ang Dios sang gugma, pero ginadumtan man niya ang malain. Halimbawa, ang Salmo 5:4-6 nagsiling parte kay Jehova: “Ikaw Dios nga wala mahamuot sa kalautan . . . Ginadumtan mo ang tanan nga nagahimo sing kalautan.” Nagdugang ini: “Ginakangil-aran ni Jehova ang mga mapintas kag nagapangdaya.”

10, 11. (a) Ano ang himuon ni Jehova sa mga malauton? (b) Paano padyaan ni Jehova ang mga matarong?

¹⁰ Bangod si Jehova Dios sang gugma kag ginadumtan niya ang kalautan, katuyuan niya nga dulaon ang malaut sa duta—kag subong man sa bilog nga uniberso—kon mahusay na ang isyu tuhoy sa paggahom. Ang Pulong sang Dios nagpromisa: “Ang mga malauton laglagon, apang ang mga nagalaum kay Jehova magapanubli sang duta. Sa indi na lang madugay, madula na ang mga malauton . . . Ang mga kaaway ni Jehova madula kaangay sang katahom sang halalban; maalimunaw sila nga daw aso.”—Sal. 37:9, 10, 20.

¹¹ Sa pihak nga bahin, ang Pulong sang Dios nagpromisa man: “Ang mga matarong magapanubli sang duta, kag magapuyo sila sa sini sa wala sing katubtuban.” (Sal. 37:29) “Mangin malipayon gid sila sa bugana nga paghidait.” (Sal. 37:11) Mahanabo gid ini bangod pirme ginahimo sang aton mahigugmaon nga Dios kon ano ang pinakamaayo para sa matutom niya nga mga alagad. Ang Biblia nagasugid sa aton: “Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” (Bug. 21:4) Matahom gid ang palaabuton sang tanan nga nagaapresyar sa gugma ni Jehova kag nagatuman sa iya bilang aton Manuggahom!

12. Sin-o ang makabig nga “wala sing kasawayan”?

¹² Ang Pulong ni Jehova nagasugid sa aton: “Tan-awa ang wala sing kasawayan, kag panilagi ang matarong, kay ang palaabuton sina nga tawo mangin mahidaiton. Apang laglagon ang tanan nga malinapason; wala sing palaabuton ang mga malauton.” (Sal. 37:37, 38) “Ang wala sing kasawayan” nagakilala kay Jehova kag sa iya Anak kag matinumanon nga nagahimo sang kabubut-on sang Dios. (Basaha ang Juan 17:3.) Nagapati gid sia sa ginasiling sang 1 Juan 2:17: “Ang kalibutan nagataliwan kag amo man ang kailigbon sini, apang ang isa nga nagahimo sang kabubut-on sang Dios nagapabilin sing dayon.” Samtang nagahilapit ang katapusan sang kalibutan, dapat gid kita ‘magsalig kay Jehova kag sundon naton ang iya dalanon.’—Sal. 37:34.

13. Ano ang daku nga gugma nga ginpakita ni Jehova para sa mga makasasala?

¹³ Bisan indi kita perpekto, ‘masunod naton ang dalanon ni Jehova.’ Mahimo man kita mangin suod kay Jehova bangod sang daku nga gugma nga iya ginpakita. Gin-aman niya ang halad gawad ni Jesucristo, para mahilway  ang matinumanon nga katawhan sa sala kag kamatayon nga napanubli kay Adan. (Basaha ang Roma 5:12; 6:23.) May bug-os gid nga pagsalig si Jehova sa iya bugtong nga Anak, nga nangin matutom sa iya sa langit sa malawig nga tion. Bilang mahigugmaon nga Amay, pat-od gid nga nasakitan ang Dios nga makita ang indi makatarunganon nga pagtratar kay Jesus diri sa duta. Pero, matutom nga ginbayaw ni Jesus ang pagkasoberano sang Dios kag ginpakita niya nga mahimo mahuptan sang perpekto nga tawo ang iya integridad kay Jehova bisan pa sa pinakamabudlay nga kahimtangan.

14, 15. Ano ang resulta sang kamatayon ni Jesus?

¹⁴ Nahuptan ni Jesus ang iya integridad kag ginsakdag ang pagkasoberano ni Jehova sa pinakamabudlay nga kahimtangan, sang napatay sia bilang matutom nga alagad sang iya Amay. Nagapasalamat gid kita nga paagi sa kamatayon ni Jesus, gingawad man niya ang katawhan kag ginhatagan sing paglaum nga mabuhi sing wala sing katapusan sa ginpromisa sang Dios nga bag-ong kalibutan! Nagsiling si apostol Pablo parte sa daku nga gugma nga ginpakita ni Jehova kag ni Jesus: “Sa pagkamatuod, samtang maluya pa kita, napatay ang Cristo para sa indi diosnon nga mga tawo sa gintalana nga tion sang Dios. Kay halos wala sing bisan sin-o nga manginmatay para sa isa ka matarong nga tawo; apang para sa maayo nga tawo, ayhan may handa nga manginmatay. Apang ginpakita sang Dios ang iya gugma sa aton paagi sa pagtugot nga mapatay ang Cristo para sa aton  samtang makasasala pa kita.” (Roma 5:6-8) Si apostol Juan nagsulat: “Paagi sini ang gugma sang Dios ginpadayag sa aton kahimtangan, nga ginpadala niya ang iya bugtong nga Anak sa kalibutan agod maagom naton ang kabuhi paagi sa iya. Ginpadala sang Dios ang iya Anak subong nagapasag-uli nga halad para sa aton mga sala. Ginhimo niya ini bangod ginahigugma niya kita, indi bangod nga ginahigugma naton sia.”—1 Juan 4:9, 10.

¹⁵ Parte sa gugma sang Dios sa katawhan, si Jesus nagsiling: “Ginhigugma gid sang Dios ang kalibutan [mga tawo nga puede tubson] amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” (Juan 3:16) Ginahigugma gid sang Dios ang mga tawo nga bisan daku ang iya ginsakripisyo, gin-aman niya ang maayo para sa ila. Wala sing katapusan ang iya gugma. Makasalig gid kita sa sini. “Kumbinsido ako,” sulat ni Pablo, “nga bisan ang kamatayon ukon ang kabuhi ukon ang mga anghel ukon ang mga panguluhan ukon ang mga butang karon ukon ang mga butang nga maabot ukon ang mga kagamhanan ukon ang kataason ukon ang kadalumon ukon ang iban pa nga tinuga indi makapugong nga mabaton naton ang gugma sang Dios nga ginapakita man ni Cristo Jesus nga aton Ginuo.”—Roma 8:38, 39.

16. Ano ang Mesianikong Ginharian, kag kay sin-o gintugyan ni Jehova ang paggahom sang Ginharian?

¹⁶ Ang Mesianikong Ginharian nagapakita man sang gugma sang Dios sa katawhan. Ini nga gobierno gintugyan na ni Jehova sa iya Anak, nga nagahigugma sa katawhan kag kalipikado gid sa paggahom. (Hulu. 8:31) Kon banhawon na ang 144,000 ka langitnon nga masigkamanunubli ni Jesus, ara gihapon sa ila ang ila eksperiensia bilang tawo. (Bug. 14:1) Ang Ginharian ang panguna nga tema sang panudlo ni Jesus, kag gintudluan niya ang iya mga disipulo nga mangamuyo: “Amay namon nga yara sa langit, pakabalaanon ang imo ngalan. Magkari ang imo Ginharian. Matuman ang imo kabubut-on sa duta subong sang sa langit.” (Mat. 6:9, 10) Daku gid nga mga pagpakamaayo para sa matinumanon nga katawhan kon matuman na ini nga mga pangamuyo!

17. Ipaanggid ang paggahom ni Jesus sa paggahom sang makasasala nga mga tawo.

¹⁷ Daku gid ang kinatuhayan sang mahigugmaon nga paghari ni Jesus sa langit kon ipaanggid sa paggahom sang mga tawo nga nagresulta sa kamatayon sang minilyon sa mga inaway! Nagaulikid gid si Jesus sa iya mga sakop kag ginpakita niya ang dalayawon nga mga kinaiya sang Dios, ilabi na ang gugma. (Bug. 7:10, 16, 17) “Kari sa akon, kamo tanan nga ginabudlayan kag ginabug-atan, kag papahuwayon ko kamo,” siling ni Jesus. “Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kapahuwayan para sa inyo kaugalingon. Kay ang akon gota mahapos pas-anon kag ang akon lulan mamag-an.” (Mat. 11:28-30) Mahigugmaon gid ini nga pasalig sa aton!

18. (a) Ano ang ginahimo sang Ginharian sang Dios sugod sang natukod ini? (b) Ano ang binagbinagon naton sa masunod nga artikulo?

¹⁸ Ginapakita sang tagna sa Biblia nga natukod ang langitnon nga Ginharian sang Dios sang nagsugod ang presensia sang Cristo sang 1914. Pagkatapos sadto, ginatipon na ang nabilin nga mga kaupod ni Jesus sa paggahom sa langit kag “ang daku nga kadam-an” sang katawhan nga makalampuwas sa katapusan sini nga sistema kag makasulod sa bag-ong kalibutan. (Bug. 7:9, 13, 14) Daw ano kadamo ining daku nga kadam-an subong? Ano ang ginapatuman sa sini nga grupo? Binagbinagon sang masunod nga artikulo ini nga mga pamangkot.