1. Dirava ena kara badana be dahaka, bona unai oi diba dainai emu hemami be edena bamona?

BAIBEL ia gwau, “Dirava be lalokau.” (1 Ioa. 4:8) Unai ena anina be dahaka? Lalokau be Dirava ena kara namona ta sibona lasi, to ia be iena kara badana. Ia ese lalokau ia hahedinaraia sibona lasi, to ia be lalokau. Ita moale badina iunives bona mauri gaudia ibounai ia Havaraia Tauna be lalokau Diravana! Lalokau dainai ia ese unai gaudia ibounai ia havaraia.

2. Dirava ese ita ia lalokau henia dainai, dahaka do ia karaia? (Laulau ginigunana herevalaia.)

² Iehova be ia havaraia gaudia ia hebogahisi henia. Ia ese ita ia lalokau henia dainai, ita diba iena ura vaira negana totona be do ia vara momokani. Bona ia idia tomadiho henia taudia be moale korikorina do idia davaria. Hegeregere, Iehova ese ita ia lalokau henia dainai, “ia ese dina ta ia makaia vadaeni, ia abia hidi tauna [Iesu Keriso] ese mai maoromaoro ida tanobada ibounai do ia hahemaoro henia.” (Kara 17:31) Ita diba unai hahemaoro karana be do ia vara. Ia idia tomadiho henia taudia ese vaira nega namona do idia moalelaia ela bona hanaihanai.

3. Bema Dirava ese taunimanima ia lalokau henia lasi, iseda mauri be do edena bamona?

³ Bema Dirava ese taunimanima ia lalokau henia lasi, oi laloa iseda mauri be do edena bamona? Oibe, Satani Diabolo, lalokau lasi bona badu diravana unai, ena siahu henunai taunimanima ese ta ta do idia lohiaia noho. (2 Kor. 4:4; 1 Ioa. 5:19; Apokalupo 12:9, 12 duahia.) Bona iseda vaira negana be do ia dika momokani, bema Dirava ese ita ia lalokau henia lasi.

4. Dahaka dainai Iehova ese ia vara gwau-edeede karana ia koua lasi?

⁴ Satani ese Iehova ena lohia siahuna ia gwau-edeede henia neganai, ia ese tau bona hahine ginigunadia ia veria danu unai bamona idia karaia totona. Ia gwau Dirava be maoro lasi guba bona tanobada ia lohiaia totona, to ia ese taunimanima ia lohiaia be namo. (Gen. 3:1-5) Unai dainai Iehova ese Satani dekenai nega ia henia ia gwauraia herevana ia hamomokania totona. To idia vara gaudia ese idia hahedinaraia, taunimanima eiava Satani be lohia taudia namodia lasi.

5. Histori ese dahaka ia hamomokania?

⁵ Lagani 100 lalodiai, tanobada besedia edia tuari momo lalonai taunimanima 100 milioni mai kahana idia mase. Hari tanobada kahana ta ta ai idia vara hekwakwanai be idia bada idia lao. Baibel ia gwau “dina gabediai,” inai tanobada dikana dekenai “kara dika taudia bona koikoi taudia ese edia kara dika do idia habadaia momokani.” (2 Tim. 3:1, 13) Ma ia gwau: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ier. 10:23) Oibe, histori ese unai hereva ia hamomokania. Iehova ese taunimanima ia havaraia negana amo idia be hegeregere lasi sibodia idia lohiaia totona.

6. Dahaka dainai Iehova ese kara dika ia koua haraga lasi?

⁶ Iehova ese kara dika ia koua haraga lasi, badina ia ura hamomokania iena lohia dalana sibona amo taunimanima be namo do idia davaria. Oibe, vaira nega ai ia ese kara dika taudia ibounai do ia haorea. Unai murinai, bema ta ese Iehova ena lohia dalana ia hepapahuahulaia lou, ia be karaharaga kara ta do ia karaia. Ia ese taunimanima edia histori lalonai idia vara gaudia amo do ia hamomokania, unai gwau-edeede taudia ia kokia haraga be namo bona tanobada ai kara dika do ia noho lasi.

7, 8. Edena dala ma haida ai Iehova ese lalokau ia hahedinaraia?

⁷ Iehova ese ena lalokau badana be dala idauidau ai ia hahedinaraia. Hegeregere, iseda iunives ena bada bona ena hairai mani oi laloa. Ia lalonai galaksi bilioni momo idia noho, bona unai galaksi ta ta be mai edia hisiu bona planeti bilioni momo. Iseda Milky Way galaksi lalonai, unai hisiu ta be dina. Bema dina be lasi, tanobada ai mauri gauna ta do ia noho lasi. Unai havaraia gaudia ibounai ese iena kara badadia, hegeregere iena siahu bada, aonega, bona lalokau idia hahedinaraia, bona idia hamomokania Iehova be iseda Havaraia Tauna. Oibe, Dirava ese “gau ibounai ia havaraia negana amo ema bona hari, taunimanima ese iena siahu bona iena kara idauidau idia lalopararalaia diba. Bona ia karaia gaudia amo unai idia lalopararalaia, danu idia diba iena siahu be ia doko diba lasi bona momokani ia be Dirava.”—Roma 1:20.

⁸ Oibe, Iehova be ena havaraia gaudia edia namo ia laloa bada dainai, tanobada ai gau idauidau ia havaraia. Ia ese taunimanima totona uma hairaina ia karaia, bona  idia dekenai lalona bona tauanina goevana ia henia, unai amo do idia noho hanaihanai. (Apokalupo 4:11 duahia.) Danu, “ia ese mauri gaudia ibounai dekenai aniani ia henia noho. Iena lalokau bona bogahisihisi do idia noho hanaihanai.”—Sal. 136:25.

9. Iehova ese edena kara ma ta ia hahedinaraia, bona dahaka dainai?

⁹ Iehova be lalokau Diravana, to ia ese kara dika ia inai henia. Hegeregere, Salamo 5:4-6 ese Iehova be inai bamona ia herevalaia: “Badina oi be kara dika oi moalelaia lasi, . . . Hekokoroku taudia, be oiemu vairana dekenai idia gini diba lasi. Kara dika taudia ibounai, be oi ese oi badu henidia noho.” Ma ia gwau: “Lohiabada ese alaia taudia bona koikoi taudia, ia dagedage henidia [“inai henidia,” NW] noho.”

10, 11. (a) Iehova be kara dika taudia dekenai dahaka do ia karaia? (b) Kudou-maoro taudia be dahaka hahenamo do idia abia?

¹⁰ Iehova be lalokau Diravana bona kara dika ia inai henia, unai dainai iunives ibounai amo dika idauidau ibounai do ia kokia. Baibel ia gwau: “Kara dika taudia be, dika momokani do idia davaria, to Lohiabada idia abidadama henia taudia ese, edia tano dekenai do idia noho, mai namo danu. Nega daudau lasi lalonai kara dika taudia do idia ore. . . . Lohiabada dekenai idia dagedage henia taudia, be do idia kwalimu lasi. Idia be rei gabudia dekenai idia noho herahera bamona. Do idia boio haraga, kwalahu ia boio haraga bamona.”—Sal. 37:9, 10, 20.

¹¹ Baibel ma ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Sal. 37:29) Oibe, kara maoromaoro taudia be “do idia helai namonamo, mai moale bona mai maino danu.” (Sal. 37:11) Unai be do ia vara momokani, badina iseda lalokau Diravana be hanaihanai iena abidadama hesiai taudia edia namo ia laloa. Baibel ia gwau: “Ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.” (Apok. 21:4) Iehova ena lalokau karana idia laloa bada taudia ibounai edia vaira negana be do namo herea!

12. “Kerere lasi tauna” be daika?

¹² Baibel ia gwau: “Mai ena kerere lasi tauna do oi laloa. Kara maoromaoro tauna do oi itaia noho. Unai bamona tauna be mai maino danu do ia noho. . . . To kara dika tauna, be Lohiabada ese do ia hadikaia ore. Kara dika taudia edia natudia bona tubudia, ese dika do idia davaria.” (Sal. 37:37, 38) “Kerere lasi tauna” ese Iehova bona ena Natuna dekenai diba ia abia bona mai kamonai ida Dirava ena ura ia karaia. (Ioane 17:3 duahia.) Bona ia ese 1 Ioane 2:17 ena hereva ia laloa bada: “Tanobada bona ena ura be do ia ore, to Dirava ena ura ia karaia tauna be do ia noho hanaihanai.” Tanobada ena dokona ia kahirakahira noho lalonai, gau badana be “Lohiabada dekenai do oi naria, iena dala dekenai do oi raka.”—Salamo 37:34.

¹³ Ena be ita be goevadae lasi, to ita be Iehova ena dala dekenai ita raka diba. Bona iena lalokau kara badana dainai, ia ita tura henia diba danu. Iehova ese Iesu Keriso ena mauri davalaia boubouna ia henia, unai amo kamonai taudia be kara dika bona mase amo ia ruhaia. (Roma 5:12; 6:23 duahia.) Guba ai Iesu ese nega daudau lalonai Iehova ia abidadama henia, unai dainai Iehova ia diba tanobada ai iena Natuna ese ia do ia abidadama henia noho. Dirava be tama lalokauna ta bamona, unai dainai  ia itaia tanobada ai iena Natuna be hisihisi bada ia mamia neganai, ia lalohisihisi bada. To, Iesu be mai abidadama ida Dirava ena lohia siahuna ia abia isi, unai amo ia hahedinaraia goevadae tauna ese Iehova ia badinaia noho diba, ena be hahetoho aukadia ia davaria.

14, 15. Iesu ena mase ese dahaka namo ia havaraia?

¹⁴ Ena be Iesu be hahetoho aukadia ia davaria, to Iehova ia badinaia bona ena lohia siahuna ia abia isi ela noho bona ia mase. Ita moale badina Iesu ena mase ese taunimanima be kara dika bona mase amo ia ruhaia, bona dala ia kehoa Dirava ese ia gwauhamatalaia tanobada matamata ai idia noho hanaihanai totona! Iehova bona Iesu ese idia hahedinaraia lalokauna be aposetolo Paulo ese inai bamona ia herevalaia, ia gwau: “Momokani, ita be do manoka neganai, Keriso be ita kara dika taudia totona ia mase, unai be Dirava ese ia abia hidi negana ai. Ta be kara maoromaoro tauna totona ia mase be auka. To momokani, reana tau namona totona ta be do ia ura ia mase. To Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:6-8) Aposetolo Ioane ia gwau: “Dirava ena lalokau ita dekenai be inai dala ai ia hahedinaraia, Dirava ese ena Natuna korikorina be tanobada dekenai ia siaia mai, ia amo mauri do ita abia totona. Lalokau ena anina be inai, ita ese Dirava ita  lalokau henia dainai lasi, to ia ese ita ia lalokau henia bona ena Natuna ia siaia iseda kara dika ia koua boubouna ia henia totona, unai amo ita bona Dirava huanai maino ia karaia.”—1 Ioa. 4:9, 10.

¹⁵ Iesu ia gwau: “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Ena be Iehova ena lalona ia hisihisi bada, to ia ese ena Natuna be mauri davalaia boubouna bamona ia henia. Unai amo ia hahedinaraia ia ese taunimanima ia lalokau henia bada. Bona ena lalokau be do ia noho hanaihanai. Paulo ia gwau: “Lau diba momokani, mase eiava mauri, eiava aneru, eiava gavamani taudia, eiava hari idia noho gaudia, eiava gabeai do idia mai gaudia, eiava siahu gaudia, eiava ataiai gaudia, eiava dobu gaudia, eiava Dirava ese ia havaraia gaudia ma haida, unai gaudia ibounai ese ita be Dirava ena lalokau, Keriso Iesu iseda Lohiabada lalonai ia noho gauna amo, ita ia hapararaia diba lasi.”—Roma 8:38, 39.

16. Mesia Basileiana be dahaka, bona Iehova ese daika ia abia hidi ia lohia totona?

¹⁶ Mesia Basileiana amo Iehova ese taunimanima dekenai ena lalokau ia hahedinaraia. Iehova ese inai gavamani be ena Natuna ena imana dekenai ia atoa vadaeni, ia be taunimanima ia lalokau henia bona ia hegeregere momokani ia lohia totona. (Aon. 8:31) Danu, Dirava ese 144,000 taudia ia abia hidi Iesu ida guba ai do idia lohia. Idia toreisi lou neganai, idia be taunimanima edia mauri daladia do idia lalopararalaia danu. (Apok. 14:1) Tanobada ai, Iesu be Basileia ia herevalaia momo, bona ena hahediba taudia dekenai guriguri dalana ia hadibaia: “Aiemai Tamana guba dekenai oi noho, namona be ibounai ese oiemu ladana do idia hahelagaia. Oiemu Basileia do ia mai. Oiemu ura gauna tanobada dekenai do ia vara, guba dekenai ia vara bamona.” (Mat. 6:9, 10) Mai moale ida unai guriguri do ia guguru negana do ita naria noho, unai nega ai Dirava ena Basileia ese hahenamo momo do ia mailaia!

17. Iesu ena lohia dalana bona taunimanima edia lohia dalana ena idau herevalaia.

¹⁷ Iesu ena lohia dalana bona taunimanima edia lohia dalana be idau momokani. Taunimanima edia lohia henunai, taunimanima milioni momo be tuari amo idia mase. To, iseda Lohia, Iesu, be ita ia lalokau henia bona Dirava ena kara namodia ia tohotohoa, hegeregere lalokau. (Apok. 7:10, 16, 17) Iesu ia gwau: “Umui hekwarahi bona metau bada umui huaia taudia ibounai e, lau dekenai umui mai bona umui dekenai goada matamata do lau henia. Lauegu huaia auna do umui huaia bona lau dekenai diba umui tahua, badina lau be manau bona lalomanada tauna bona goada matamata do umui davaria. Lauegu huaia auna be ia namo, bona umui lau noia do umui huaia gauna be ia metau lasi.” (Mat. 11:28-30) Unai be gwauhamata namo hereana, ani?

18. (a) Lagani 1914 murinai dahaka gaudia idia vara? (b) Stadi gabena ai dahaka do ita herevalaia?

¹⁸ Baibel ese ia hahedinaraia, lagani 1914 ai Dirava ena Basileia be guba ai ia lohia matamaia. Unai nega amo, Dirava ese Iesu ida guba ai do idia lohia taudia oredia ia haboua. Danu, ia ese “hutuma bada” taudia ia haboudia, idia be inai nega dokona ai do idia roho mauri bona tanobada matamata ai do idia noho. (Apok. 7:9, 13, 14) Hari hutuma bada taudia edia namba be hida? Idia be dahaka idia karaia be namo? Stadi gabena ese unai henanadai do ia haerelaia.