1. Biiblã sẽn yeel tɩ Wẽnnaam yaa nonglmã rat n yeelame tɩ bõe?

BIIBLÃ yeelame tɩ “Wẽnnaam yaa nonglem.” (1 Zã 4:8) Woto rat n yeelame tɩ bõe? Rat n yeelame tɩ Wẽnnaam sẽn maand bũmb ninsã fãa yaa ne nonglem. D sã n tags a Zeova sẽn naan ãndũniyã ne bõn-vɩɩsã fãa ne nonglmã yelle, pa noom-d sɩda?

2. A Zeova sẽn nong tõndã kɩtame tɩ d tõe n kɩs sɩd ne bõe? (Ges-y fotã sẽn be yĩngrã.)

² A Zeova nonga a bõn-naandsã wʋsgo. A sẽn nong tõndã kɩtame tɩ d tõe n kɩs sɩd tɩ raab ning a sẽn sɩng n tar ne ninsaalbã na n pidsame. A raabã sã n wa pidsi, neb nins sẽn sakd-a wã na n paama sũ-noog hakɩɩka. Wala makre, a Zeova sẽn nong tõndã yĩnga, a “yãka raare,” t’a Zeezi Kiris sẽn yaa “rao ning bãmb sẽn yãkã na n kao dũniyã fãa bʋʋd ne tɩrlem.” (Tʋʋ. 17:31) D tõe n kɩsa sɩd tɩ na n yɩɩ woto bal kɛpɩ. Bʋʋdã sã n wa kao, neb nins sẽn sakd Wẽnnaamã na n paam n vɩɩmda ne sũ-noogo, wakat sẽn kõn sa yĩnga.

3. Wẽnnaam sã n da pa nongẽ ninsaalbã, b vɩɩmã ra na n yɩɩ wãn beoog-daare?

³ Wẽnnaam sã n da paẽ nonglem, ninsaalbã vɩɩm ra na n yɩẽ-la wãn beoog-daare? Ninsaalbã ra na n kell n so b mense, t’a Sʋɩtãan sẽn kis-bã tar-b n lengdẽ. (2 Kor. 4:4; 1 Zã 5:19; karm-y Vẽnegr 12:9, 12.) Rẽnd a Zeova sã n da pa nong tõndo, tõnd beoog-daar vɩɩmã ra na n yɩẽ-la toog wʋsgo.

4. Bõe yĩng t’a Zeova bas a Sʋɩtãan t’a kɩɩsd a naamã?

⁴ A Sʋɩtãan sẽn wa n na n kɩɩs Wẽnnaam naamã, a belga d yaab a Ãdem ne a Hawa me tɩ b kɩɩse. A yeelame tɩ Wẽnnaam pa tar sor n na n yɩ yĩngr la tẽng naaba, la tɩ sã n da yaa yẽ n na n dɩ naam, yɩta sõma n yɩɩge. (Sɩng. 3:1-5) A Zeova kõ a Sʋɩtãan weer t’a wilg a sẽn yetã sã n yaa sɩda. La weerã na n talla tɛka. A Zeova sẽn bas tɩ kaoosdẽ wã yaa sẽn na n wilg tɩ yaa yẽ bal n tõe n dɩ naam tɩ zemse. Ninsaalbã yɛl sẽn yaa to-to wã wilgda vẽeneg t’a Sʋɩtãan ne ninsaal baa a ye pa tõe n dɩ naam tɩ zems ye.

5. Hal pĩnd wẽndẽ n tãag rũndã, ninsaalbã yɛl sẽn yaa to-to wã wilgda bõe?

⁵ Rũndã-rũndã, dũniyã yɛlã tara zẽnebo. Yʋʋm koabgã sẽn loogã, neb milyõ koabg la zak n ki zabã pʋsẽ. Biiblã pĩnd n togsame tɩ dũni-kãngã ‘yaoolem wakatã,’ yɛlã na n yɩɩ woto. A yeelame: “Nin-wẽnsã ne bɛlgdbã na n kell n kẽeda wẽngã pʋgẽ n paasdẽ.” (2 Tɩm. 3:1, 13) Biiblã paasame: “Sẽn-Ka-Saab n wilgd ninsaal a sore. Ninsaal na n yɩ a wãn n bãng a sore?” (Yel. 20:24) Hal pĩnd wẽndẽ n tãag rũndã, ninsaalbã yɛl sẽn yaa to-to wã wilgdame tɩ gom-kãensã yaa sɩda. A Zeova pa naan ninsaal t’a tõe n soog a meng ye. Ninsaal pʋd n pa tõe n soog a meng tɩ zems ye.

6. Bõe yĩng tɩ Wẽnnaam bas tɩ wẽnemã beẽ?

⁶ Yaa sɩd tɩ Wẽnnaam sẽn bas tɩ wẽnemã beẽ wã wilgdame tɩ ninsaalbã pa tõe n soog b mens tɩ zems ye. La yaa bũmb sẽn na n naf wẽn-sakdbã wakat fãa yĩng me. Kɩtame tɩ Wẽnnaam paam kaset sẽn wilgd tɩ yaa yẽ bal n tõe n dɩ naam tɩ zemse. A sã n wa sãam sẽn kɩt-b tɩ wẽnemã beẽ wã tɩ vɩɩmã lebg noogo, ned wall malɛk sã n kɩɩs a naamã, a pa na n le bas weer t’a soabã wilg a sẽn yet bũmb ningã sã n yaa sɩd ye. A tõe n tika ninsaalbã kʋdemdã yɛl sẽn yɩ to-to wã, n wilg tɩ kɩɩsdã pa tar bʋʋm, la a sãam-a zĩig pʋgẽ. Rẽnd wẽnemã pa na n le tol n zĩnd ye.

7, 8. Bõe la a Zeova maan tɩ wilgd a nonglmã?

⁷ Bũmb wʋsg la a Zeova maan tɩ wilgd a nonglmã. Tags-y ãndũniyã yalmã la a neermã yelle. Ãd-sulã milyaar-dãmb n be, tɩ ãd-sull fãa tar ãds milyaar-dãmba. A Zeova naana wĩntoogã me. Wĩntoogã sã n da pa beẽ, ninsaalbã wall bõn-vɩɩs a taabã ra pa na n tõog n vɩɩmd dũniyã zug ye. Bõn-kãensã fãa yaa kaset tɩ Naand n be, la t’a yaa nonglem, n tar pãn-kãseng la yam me. Biiblã yeela woto: “Sẽn sɩng ne dũni naanego, nebã nee Wẽnnaam pãng kãsengã sẽn ka sɛtã nin sẽn ka tõe n yã wã, la b Wẽnnaamlemã sõama, b sã n tags n ges bũmb nins bãmb sẽn maanã.”—Rom. 1:20.

⁸ A Zeova sẽn naan tẽngã to-to wã yaa sẽn na yɩl tɩ ninsaalbã la rũmsã tõog n vɩɩmd a zug tɩ yɩ-b noogo.  Sɩngrẽ wã, a naana ninsaalbã tɩ b zems zãnga, n maan zĩ-neer n ning-b be, tɩ b tõe n vɩɩmd wakat sẽn kõn sa. (Karm-y Vẽnegr 4:11.) Sẽn paase, yaa Wẽnnaam “n kõt bõn-vɩɩlɩ wã fãa rɩɩbo, bala, bãmb nonglmã paada wakat fãa!”—Yɩɩn. 136:25.

9. Baa a Zeova sẽn yaa nonglmã, bõe la a kisa?

⁹ A Zeova yaa Wẽnnaam sẽn yaa nonglem, la a kisa wẽnga. Wala makre, Yɩɩn-sõamyã 5:5-7 wã goma a Zeova yelle, n yeel woto: “Yãmb ka Wẽnnaam ning sẽn nong wẽngã ye. . . . Yãmb kisa tʋʋm-wẽns maandbã fãa.” B paasame t’a Zeova “kisa nin-kʋʋdbã ne zãmb dãmbã.”

10, 11. a) Bõe n na n paam nin-wẽnsã? b) Wãn to la a Zeova na n keo wẽn-sakdbã?

¹⁰ A Zeova sẽn yãk wakat ningã sã n ta, a na n kɩtame tɩ wẽnem buudã fãa sa, bala, a yaa nonglem, la a kis wẽnga. Wẽnnaam Gomdã yeela woto: “B na n menesa tʋʋm-wẽns maandbã, la sẽn tẽed-b Sẽn-Ka-Saabã n na n soog tẽngã. Keta bilf bala, tɩ nin-wẽng ka leb n zĩnd ye! . . . Sẽn-Ka-Saab bɛɛbã na n looga wa yam-maasa. Bãmb na n loogame, b na n looga wa bug-zõose.”—Yɩɩn. 37:9, 10, 20.

¹¹ La Wẽnnaam Gomdã paasa woto me: “Nin-tɩrs na n sooga tẽngã, la b na n paa beenẽ wakat sẽn kõn sa.” (Yɩɩn. 37:29) Wẽn-sakdbã “na n paama vɩ-bãane, ne sũ-noog meng-menga.” (Yɩɩn. 37:11) Bõe yĩnga? Bala, wakat fãa, tõnd Wẽnnaamã sẽn yaa nonglmã maanda sẽn nafd sẽn tũud-b yẽ wã. Biiblã paasame: “Wẽnnaam na n yẽesa nintãm fãa sẽn be b ninẽ wã. Kũum kõn le zĩnd ye, la sũ-sãang wall yãbre, wall toog kõn leb n zĩnd ye, bala, dẽenem bũmba fãa loogame.” (Vẽn. 21:4) Vẽenega, vɩɩm sẽn tar bark n gũud neb nins sẽn nong Wẽnnaam la b sakd-a wã.

12. Nin-bʋg buud la Biiblã sẽn boond tɩ “burkina”?

¹² Wẽnnaam Gomdã yeela woto: “Maag f yĩng n ges burkina, la f ges nin-tɩrga. Sẽn baood-a vɩ-bãan tara beoog neere. La b naaga kɩɩsdbã taab n sãame. Nin-wẽnsã ka tar beoog neer ye.” (Yɩɩn. 37:37, 38) Ka wã, “burkina” yaa ned sẽn bao n bãng a Zeova ne a Bi-riblã, la a sakd a Zeova noyã. (Karm-y Zã 17:3.) Ned a woto tẽeda 1 Zã 2:17 sẽn yet bũmb ningã. Be, b yeela woto: “Dũni loogdame la a ratem wẽngã me loogdame. La ned ning sẽn maand Wẽnnaam daab paada wakat sẽn kõn sa.” D sẽn mi tɩ dũniyã saab kolgdame wã, d segd n maneg n tẽ a Zeova, la d kell n ‘pa a sorã zugu.’—Yɩɩn. 37:34.

13. Bõe la a Zeova maan tɩ wilgdẽ t’a nonga tõndo?

¹³ Baa tõnd sẽn pa zems zãngã, d tõe n saka Wẽnnaam. A Zeezi sẽn ki tɩ yɩ maoongã maasem yĩng me, d tõe n lebga a Zeova zo-rãmba. A Zeova sẽn tʋm a Zeezi t’a wa ki tɩ yɩ maoongã yaa bõn-kãseng a sẽn maane, tɩ wilgdẽ t’a nonga tõndo. Maoon-kãng maasem yĩnga, wẽn-sakdbã tõe n wa paama b mens ne yel-wẽndã la ne kũumã. (Karm-y Rom-dãmb 5:12; 6:23.) A Zeezi zĩnda ne Wẽnnaam n kaoos saasẽ, n da sakd-a ne a sũur fãa. Woto kɩtame t’a Zeova ra kɩs sɩd t’a Bi-riblã sã n  wa tẽngã zugu, a na n kell n saka yẽ. A Zeova sẽn nong a Bi-riblã yĩnga, yaa vẽeneg tɩ b sẽn wa n namsd-a wã, ra sãamda yẽ me sũuri. Baa sẽn pa yɩ nana ne a Zeezi wã, a kell n saka Wẽnnaam naamã, n wilg tɩ ninsaal sẽn zems zãng tõe n kell n saka Wẽnnaam baa nams-toaag pʋgẽ.

14, 15. Bõe la ninsaalbã tõe n paam a Zeezi maoongã maasem yĩnga?

¹⁴ Baa b sẽn nams a Zeezi wʋsgã, a kell n saka Wẽnnaam, la a teel a naamã. D sũur segd n yɩɩ noog a Zeezi sẽn ki tɩ yɩ maoongã. Bala, paka sor tɩ ninsaalbã tõe n wa vɩɩmd wakat sẽn kõn sa dũni-paalgã pʋgẽ. Tʋm-tʋmd a Poll wilgame tɩ rẽ yaa kaset t’a Zeova ne a Zeezi fãa nonga tõndo. A yeelame: “Wakat ning tõnd sẽn da ka pãngã, Wẽnnaam wakatã sẽn wa n ta, Kiris kii nin-wẽnsã yĩnga. Yaa toog tɩ ned sak n ki nin-tɩrg yĩnga. Daar ninga, nina na paam raood n ki nin-sõng yĩnga. Wakat ning tõnd sẽn dag n ket n yaa yel-wẽn-maandba, Kiris kii tõnd yĩnga, la ne rẽnda, Wẽnnaam wilga b nonglem tõnd yĩnga.” (Rom. 5:6-8) Tʋm-tʋmd a Zã me yeela woto: “Ad Wẽnnaam sẽn puk b nonglmã to-to tõnd yĩnga: Bãmb tʋma b Bi-ribl yendã dũniyã pʋgẽ tɩ tõnd tõe n paam vɩɩm bãmb maasem yĩnga. Nonglem-kãng ka tõnd sẽn nong  Wẽnnaam yĩng ye, yaa bãmb sẽn nong tõndo, n tʋm b Bi-riblã tɩ b yɩ maoong tõnd yel-wẽnã sugr kũun yĩnga.”—1 Zã 4:9, 10.

¹⁵ A Zeezi yeelame tɩ “Wẽnnaam nonga dũniyã wʋsgo, hal tɩ b kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.” (Zã 3:16) Baa sẽn pa yɩ nana ne a Zeova wã, a basame tɩ b kʋ a Bi-riblã tɩ yɩ maoong tõnd yĩnga. Woto wilgdame t’a sɩd nonga ninsaalbã. Sẽn paase, a nonglmã paada wakat fãa. A Poll yeelame: “Mam sũur keemame tɩ kũum, wall vɩɩm, wall malegse, wall pãn-soaadba, wall bũmb sẽn be moasã, wall bũmb sẽn wata, wall pãense, wall yĩngr nebã, wall tẽngr nebã, wall bõn-naandg a to baa a yembr kõn n welg tõnd ne Wẽnnaam nonglem sẽn be tõnd Zu-soab a Zeezi Kiris pʋgẽ wã ye.”—Rom. 8:38, 39.

16. Wẽnnaam Rĩungã yaa bõe, la ãnda la Wẽnnaam yãk t’a yaa Rĩungã rĩma?

¹⁶ Wẽnnaam a Zeova Rĩungã sẽn yaa goosneema a sẽn luglã me yaa bũmb sẽn wilgd t’a nonga ninsaalbã. A rɩka goosneema-kãng n ning a Bi-riblã nugẽ. A Bi-riblã nonga ninsaalbã, la a mi neb zãab me. (Yel. 8:31) Sẽn paase, a Zeova yãka neb 144 000 tɩ b na n naag a Zeezi n dɩ naam. Nin-kãens sã n wa ki n vʋʋg n kẽng saasẽ, b sẽn yɩ ninsaalbã kɩtame tɩ b tõe n ges nebã yell sõma. (Vẽn. 14:1) A Zeezi sẽn wa n be tẽng zugã, Rĩungã yell la a ra gomd n yɩɩda. A sẽn wa n na n zãms a karen-biisã pʋʋsgã, a yeelame tɩ b pʋʋs woto: “Tõnd ba sẽn be arzãna [“saasẽ,” MN] bɩ yãmb yʋʋrã paam waoogre, tɩ yãmb soolmã wa, tɩ yãmb daab maan tẽng zug wa sẽn maand arzãnã [“saasẽ,” MN].” (Mat. 6:9, 10) D gũuda wakat ning Wẽnnaam sẽn na n leok pʋʋs-kãnga wã ne d sũur fãa. Wakat kãnga, Wẽnnaam Rĩungã na n kɩtame tɩ wẽn-sakdbã paam bark buud toor-toore.

17. Bõe n kɩt t’a Zeezi naamã yaa toor fasɩ ne ninsaalbã naam?

¹⁷ A Zeezi naamã yaa toor fasɩ ne ninsaalbã naam. Ninsaalbã naam yɩɩ sabab tɩ neb milyõ kobs ki zab pʋsẽ. La a Zeezi geta a poorẽ dãmbã yell sõma. Sẽn paase, a rɩka Wẽnnaam togs-n-taare, sẽn yɩɩd fãa, nonglmã wɛɛngẽ. (Vẽn. 7:10, 16, 17) A yeela woto: “Bɩ y wa mam nengẽ yãmb-dãmb fãa sẽn yɛ, la sẽn tʋk zɩɩb sẽn yaa zɩsgo, la mam na n kõo yãmb vʋʋsgo. Rɩk-y mam yubl-balgr n pidi, la y sak mam zãmsgã. Bala mam yaa nin-bʋgsgo, la m yaa sũ-mar soaba, la yãmb na paam vʋʋsgo. Bala, yubl-balgr ning mam sẽn pit yãmbã yaa faoogo, la zɩɩb ning mam sẽn tʋkd yãmbã yaa faasga.” (Mat. 11:28-30) Gom-kãensã pa kengd raood sɩda?

18. a) Yʋʋmd 1914 tɛka, bõe la Wẽnnaam Rĩungã maanda? b) Bõe yell la d na n gom sõsg ning sẽn pʋgdã pʋgẽ?

¹⁸ Biiblã bãngr-goam wilgdame tɩ Wẽnnaam Rĩungã naam sɩnga saasẽ, yʋʋmd 1914. Rẽ tɛka, b tigimda yaoolem dãmb nins sẽn na n tɩ rɩ naam ne a Zeezi saasẽ wã, la b tigimd kʋʋn-kãseng me. Nin-kãens na n põsa dũni-kãngã sãoong sasa, n kẽ dũni-paalgã pʋgẽ. (Vẽn. 7:9, 13, 14) Kʋʋn-kãsengã neb sõor yaa wãn rũndã-rũndã? Bõe la Wẽnnaam dat tɩ nin-kãens maane? Sõsg ning sẽn pʋgdã na n leoka sogs-kãense.