1. Anto so manunan kualidad na Dios, tan antoy naliliknam lapud satan?

IBABAGA na Salita nen Jehova, say Biblia, a “say Dios et aro.” (1 Juan 4:8) Say panangaro et aliwa labat ya sakey ed saray dakel ya balibalin kualidad to. Atan so manuna tan sankaimportantian ya kualidad to. Si Jehova et aglabat walaan na aro noagta sikaton mismo so aro. Talagan misalsalamat itayo ta say Amalsa na interon uniberso tan na amin a mabilay a bengatla et maar-aron Dios! Amin ya gagawaen to et lapud panangaro.

2. Antoy seguradon nagawa lapud panangaro na Dios? (Nengnengen so litratod gapo na artikulo.)

² Inar-aro nen Jehova iray pinalsa to kanian seguradon sumpalen toy gagala to parad totoo diad sankaabigan ya paraan tan minabang so amin ya manpasakop ed uley to. Singa bilang, lapud panangaro et “inggeter to so sakey ya agew pian ukomen toy mundo unong ed inkatunong diad panamegley na sakey a toon tinuro to,” si Jesu-Kristo. (Gawa 17:31) Matalek tayo ya nagawa itan ya panangukom. Lapud satan, saray matulok tan walaan na dugan kipapasen na puso et nawalaan na balibalin arapen tan nabendisyonan ed andi-anggaan.

3. Anto la kasi nagawad arapen no ag-inaro na Dios so totoo?

³ Isipen pa labat so nagawad arapen no ag-inaro na Dios so totoo. Mantultuloy so makapasinagem ya resulta na uley na gobiernoy too ya kokontrolen na mauge-uges tan andiay panangaron dios, si Satanas a Diablo. (2 Cor. 4:4; 1 Juan 5:19; basaen so Apocalipsis 12:9, 12.) No ag-itayo inaro na Dios, talagan pakaskasi tayo la tan anggapon balot so ilalo tayod arapen.

4. Akin ya inabuloyan nen Jehova ya wala ray rebelde ed uley to?

⁴ Nen nanrebelde so Diablo ed uley nen Jehova, inimpluensyaan toy unonan sanasawa ya ontan met so gawaen da. Kinuestion toy kanepegan na Dios bilang soberano na uniberso. Papapawayen nen Satanas ya mas maong so pananguley to nen say Amalsa. (Gen. 3:1-5) Inabuloyan nen Jehova si Satanas ya paneknekan no kasin tua so ibabaga to, balet temporaryo labat. Lapud karunongan nen Jehova, inabuloyan ton onlabas so panaon pian malinlinew a napaneknekan ya anggapo lay mas makanepegan ya manuley nen say sikato. Nanengneng ed saray makapasinagem ya agawgawad apalabas ya agbalot sarag ya iter na too odino nen Satanas so maong ya pananguley.

5. Antoy malinew ya papaneknekan na saray agawad apalabas?

⁵ Dia labat ed apalabas ya 100 a taon, masulok ya 100 milyon a totoo so inatey ed saray guerra. Natan et lalon onloloor so kipapasen ed mundo. Ontan so impasakbay na Salita na Dios ya nagawad “kaunoran iran agew” na sistema na mundo, ya “saray mauges a totoo tan saray mankuankuanan et magmaliw a lalon mauges.” (2 Tim. 3:1, 13) Ipapanengneng na saray agawad apalabas ya talagan tua iyan ibabaga na Biblia: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jer. 10:23) On, ag-itayo pinalsa nen Jehova ya walaan na abilidad o kanepegan ya uleyan so sarili tayo tan agmanpaigiya ed sikato.

6. Antoy sakey nin gagala na temporaryon impangiyabuloy na Dios ed kaugsan?

⁶ Walay sakey nin gagala no akin ya inyabuloy nen Jehova ya onlabas so panaon tan temporaryon mantultuloy so kaugsan. Atan so magmaliw ya permanentin paneknek ya say uley to labat so sankaabigan. Diad arapen et deralen nen Jehova so amin a mauges. Kayari to ’tan, no wala bilang so mankuestion ed maaron uley to, agla kaukolan ya palabasen ni lamet so panaon. Saray agawgawad apalabas so usaren to bilang makatunongan a basiyan pian tampol ya deralen so siopaman a manrebelde tan agto lan balot iyabuloy so kaugsan.

7, 8. Anto ray pigara ed saray dakel ya paraan ya impanengneng nen Jehova so baleg ya panangaro to?

⁷ Nanengneng tayoy baleg a panangaro nen Jehova diad dakel a paraan. Singa bilang, isipen pa so kabaleg tan karakep na uniberso. Binilyon so galaxy, tan kada galaxy et walaan na binilyon ya bitewen tan planeta. Diad Milky Way galaxy ya kawalaan na planeta tayo, sakey ed saray bitewen et say agew, ya no anggapo itan et anggapon balot so nabilay diad dalin. Amin irayan pinalsa et mamapaneknek ed inka-Dios nen Jehova tan nanengneng ed saratan iray kualidad to, a singa say pakapanyari, karunongan, tan aro. On, “saray agnanengneng a kualidad to et sankanengneng manlapud impamalsa ed mundo a manpatuloy,  lapud natebek iratan ed panamegley na saray pinalsa, anggan say andi-anggaan a pakapanyari tan inka-Dios to.”—Roma 1:20.

⁸ Pinalsa na Dios so amin ya wadiad dalin diad paraan ya nagunggonaan iray palsa to. Nanggaway marakdakep ya paraison hardin parad totoo tan inikdan to ra na perpekton isip tan laman ya denisinyon manbilay diad andi-anggaan. (Basaen so Apocalipsis 4:11.) Sakey ni, “iikdan toy naakan so amin a mabilay a bengatla, ta say matoor a panangaro to et mansiansia ya anggad angga.”—Sal. 136:25, NW.

9. Likud ed panangaro, antoy nalilikna nen Jehova no maminsan, tan akin?

⁹ Tua, si Jehova et Dios na aro, balet kabusol to so kaugsan. Singa bilang, oniay ibabaga na Salmo 5:4-6, NW: “Sakey kan Dios ya agmanliliket ed kaugsan . . . Kabusol mo so amin a manggagaway mauges.” Tan nabasa tayo ni: “Jehova, kabkabusol mo so totoon maruksa tan managpalikdo.”

10, 11. (a) Antoy gawaen nen Jehova ed saray mauges ya totoo? (b) Panon ya bendisyonan nen Jehova iray matunong ya totoo?

¹⁰ Lapud si Jehova et Dios na aro tan kabusol toy kaugsan, gagala to ya ekalen so kaugsan diad dalin tan ed interon uniberso sano sigpot lan apaneknekan no siopan talagay makanepegan ya manuley. Isisipan na Salita na Dios: “Saray mauges a totoo et naandi, balet saramay maniilalo ed si Jehova et tawiren day dalin. Agmanbayag et anggapo lay mauges . . . Saray kabusol nen Jehova et naandi a singa saray balibalin panagpastolan; naandi ran singa asewek.”—Sal. 37:9, 10, 20, NW.

¹¹ Balet onia met so isisipan na Salita na Dios: “Say matunong tawiren to so dalin tan manayam diman lawas.” (Sal. 37:29) Sarayan matunong et ‘panliketan day inkadaakan na kareenan.’ (Sal. 37:11) Segurado tayon nagawa itan lapud amin ya gagawaen na maaron Dios tayo et parad pankaabigan na saray matoor a lingkor to. Ibabaga na Biblia: “Punasen to so amin a lua ed kamataan da, tan anggapo lay ipapatey, tan anggapo met lay panermen tan pannangis tan ot-ot. Saray datin bengatla et linmabas la.” (Apo. 21:4) Talagan balibalin arapen so itatarya nen Jehova ed saramay mangaapresya ed panangaro to tan ontutulok ed sikato bilang Manuley!

12. Siopa ray ipapasen ya “andiay pakabalawan”?

¹² Ibabagad sikatayo na Salita nen Jehova: “Imanom pa so toon andiay pakabalawan, tan agmo aalisan na mata so maptek, ta say pansumpalan na satan a too et kareenan. Balet amin a makasalanan et naderal; say pansumpalan na mauges a totoo et kadederal.” (Sal. 37:37, 38, NW) Say “toon andiay pakabalawan” et kakabaten toy Jehova tan say Anak To tan gagawaen toy linawa na Dios. (Basaen so Juan 17:3.) Say ontan ya klase na too et seseryosoen to imay nabasad 1 Juan 2:17: “Say mundo tan say pilalek na satan et agmansiansia, balet samay manggagawa na linawa na Dios et mansiansia ed andi-anggaan.” Legan ya manasingger so anggaan na sayan mundo, kakkaukolan ya ‘manilalo tayod si Jehova tan tumboken tayoy dalan to.’—Sal. 37:34, NW.

13. Anto so sankabalgan ya panangaro na Dios?

¹³ Anggano ag-itayo perpekto, sarag tayon ‘tumboken so dalan nen Jehova.’ Sarag tayo met so nawalaan na maapit a relasyon ed si Jehova lapud dondon bagat nen Jesu-Kristo—atan so sankabalgan ya panangaro na Dios ed sikatayo. Lapud satan, posible lan nibulos so totoo ed kasalanan tan ipapatey  ya atawir tayod si Adan. (Basaen so Roma 5:12; 6:23.) Matalek si Jehova ya mansiansian matoor so bogbogtong ya Anak to diad dalin ta apaneknekan to lan matoor si Jesus diad abayag ya impaniba dad tawen. Bilang maaron Ama, seguradon asakitan a maong so Dios ed mauge-uges ya impantratod si Jesus diad dalin. Anggaman ontan, matoor ya sinuportaan nen Jesus so soberanya na Dios tan impanengneng to ya sarag na perpekton too so manmatoor ed si Jehova anggano diad mair-irap ya situasyon.

14, 15. Antoy nagmaliw ya posible lapud impatey nen Jesus?

¹⁴ On, apansiansia nen Jesus so katooran to tan sinuportaan toy soberanya nen Jehova diad sankairapan iran subok, tan inatey ya matoor ed Ama to. Misalsalamat tayo ta lapud impatey nen Jesus et abayaran met so bili na dondon ya kaukolan pian nadondon so totoo, tan posible lan nawalaan itayoy bilay ya andi-anggaan diad insipan na Dios ya balon mundo! Indanet nen apostol Pablo so panangaro nen Jehova tan Jesus nen imbaga ton: “Diad tua, anggano maletey itayo ni, si Kristo et inatey parad agmaridios a totoo diad aturon panaon. Ta parad sakey a matunong a too et anggapoy malabay ya ompatey; balet parad sakey a maong a too et nayarin walay makpel ya ompatey. Balet ipapatnag na Dios so panangaro to ed sikatayo, ta anggano makasalanan itayo ni et inatey si Kristo parad sikatayo.” (Roma 5:6-8) Insulat nen apostol Juan: “Lapud  saya et nipatnag so aro na Dios ed sikatayo, ta imbaki na Dios so bogbogtong ya Anak to diad mundo pian nagamoran tayo so bilay diad panamegley to. Sayan panangaro et aliwan lapud inaro tayo so Dios, noagta lapud inaro to itayo tan imbaki toy Anak to bilang bagat a manakbong ed saray kasalanan tayo.”—1 Juan 4:9, 10.

¹⁵ Oniay imbaga nen Jesus nipaakar ed panangaro na Dios ed totoo: “Ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Talagan inar-aro itayo na Dios ta agto insiblet so mismon Anak to, anggano ansakisakit itan ed sikato. Say panangaro to et agmangangga. Makapanmatalek tayon lanang ed satan. “Manisia ak,” kuan nen Pablo, “ya anggan say ipapatey odino say bilay odino saray anghel odino saray gobierno odino saray bengatlan wala natan odino saray bengatlan onsabi odino saray pakayari odino say kaatagey odino say kaaralem odino anggan dinan nin pinalsa so agbalot makapangisian ed sikatayo ed aro na Dios a walad si Kristo Jesus a Katawan tayo.”—Roma 8:38, 39.

16. Anto so Mesianikon Panarian, tan siopay angimatalekan nen Jehova ed panuley ed satan a Panarian?

¹⁶ Say Mesianikon Panarian, say gobierno na Dios, et paneknek met ya inar-aro nen Jehova so totoo. Inmatalek la nen Jehova iyan gobierno ed Anak to, ya mangaaro met ed sikatayo tan talagan kualipikado ya manuley. (Uli. 8:31) Amili so Dios na 144,000 a totoo ya magmaliw a manuley a kaiba nen Kristo. Diad kioli da ed tawen, nausar dad panuley da iray eksperiensya ra bilang too nen wala ni rad dalin. (Apo. 14:1) Say Panarian so manunan tema ya impulong nen Jesus, tan imbangat to ray disipulo to ya ipikasi dan: “Ama mi a walad tawen, napasanto komon so ngaran mo. Onsabi komon so panarian mo. Nagawa komon so linawam, a singa ed tawen, ontan met diad dalin.” (Mat. 6:9, 10) Talagan dakel ya bendisyon so awaten na matulok iran totoo sano naebatan la iratan ya pikakasi!

17. Antoy pandumaan na uley nen Jesus ed uley na totoo?

¹⁷ Talagan midumaan ya maong so maaron uley nen Jesus ed uley na totoo ya sengegay impatey na minilyon lapud guerra! Inar-aro nen Jesus iray sakop to tan aaligen to ray balibalin kualidad na Dios, lalo lay aro. (Apo. 7:10, 16, 17) “Dago kayo ed siak, amin yon mansasagpot tan nabebelatan, tan pampainawaen ta kayo,” so kuan nen Jesus. “Sakbat yo so pakok tan manaral kayo ed siak, ta mauyamo ak tan mapaabeba ak, pian nainawaan iray kamarerwa yo. Ta mainomay a sakbaten so pakok tan anlemew so awit ko.” (Mat. 11:28-30) Talagan maar-aro itan ya panamaseguro!

18. (a) Anto lay gagawaen na Panarian na Dios manlapu la nen inletneg itan? (b) Antoy aralen tayod onsublay ya artikulo?

¹⁸ Ipapanengneng na saray propesiya ed Biblia ya niletneg so Panarian na Dios sanen ginmapo so kiwawala nen Kristo nen 1914. Manlapu lad saman, titiponen la iray nakekeran miuley ed si Jesus diad tawen, tan titiponen met la so “baleg ya ulop” ya makaliktar ed anggaan na sayan sistema tan makaloob ed balon mundo. (Apo. 7:9, 13, 14) Panon la karakel so baleg ya ulop natan? Antoy labay na Dios ya gawaen da? Aralen tayo iratan diad onsublay ya artikulo.