1. Wanem nao main fasin bilong God, and wanem nao tingting bilong iu abaotem datwan?

BIBLE hem sei: “God hem love.” (1 John 4:8) Bat wanem nao diswan hem minim? Nomata Jehovah garem staka naesfala wei, love nao hem main fasin bilong hem. Bible no sei God hem garem love, bat hem sei God hem love. Evri samting wea hem duim showimaot love. Iumi hapi tumas love nao mekem Jehovah for wakem full universe and evri samting wea laef!

2. From God lovem iumi, wanem nao iumi barava sure long hem? (Lukim piksa long start bilong study.)

² Jehovah hem lovem olketa man. Datwan mekem iumi barava sure plan bilong hem for olketa man bae kamap tru. Pipol wea obeyim hem bae barava hapi. Olsem example, from Jehovah lovem iumi, “hem markem wanfala day for judgem olketa man evriwea long world. Hem bae judgem olketa long stretfala wei and hem bae iusim wanfala man wea hem markem for duim diswan,” wea hem nao Jesus Christ. (Acts 17:31) Iumi barava  sure samting wea datfala scripture talem bae kamap tru. Pipol wea obeyim God bae kasem barava gud samting long future, and gud samting hia bae gohed for olowe.

3. Wanem nao bae happen long future sapos God no lovem olketa man?

³ Tingim samting wea savve happen long future sapos God no lovem iumi olketa man. Olketa gavman bilong man bae gohed for rul, and Satan, wea no showimaot love and duim olketa nogud samting bae gohed for kontrolem olketa man. (2 Cor. 4:4; 1 John 5:19; readim Revelation 12:9, 12.) Olketa barava nogud samting bae happen long future sapos love hem no main fasin bilong God!

4. Why nao Jehovah letem Satan for againstim rul bilong hem?

⁴ Taem Satan againstim rul bilong God, hem switim tu Adam and Eve for duim sem samting. Satan kwestinim raet bilong God for rulim full universe. Hem olsem Satan sei rul bilong hem bae gud winim rul bilong God. (Gen. 3:1-5) From Jehovah garem wisdom, hem letem Satan for trae pruvim sapos samting wea hem talem hem tru. Olketa samting wea happen long history showimaot man and Satan no fit for rulim pipol.

5. Wanem nao olketa samting wea happen long history hem showimaot?

⁵ Distaem olketa samting long world gohed for kamap barava nogud. Insaed 100 year wea go pas finis, winim 100 million pipol dae long olketa war. Bible sei olsem abaotem olketa last day: “Wei bilong olketa nogud man and olketa man for laea bae worse moa.” (2 Tim. 3:1, 13) Bible sei tu: “Jehovah, mi luksavve man no fit for kontrolem laef bilong hemseleva. Hem no fitim man seleva for kontrolem gogo bilong hem.” (Jer. 10:23) Olketa samting wea happen long history showimaot datfala scripture talem tru samting. Jehovah no wakem olketa man for rulim olketa seleva and olketa no garem raet for duim datwan. Olketa man needim God for leadim olketa.

6. Why nao God letem olketa nogud samting for gohed kam kasem distaem?

⁶ From God letem olketa nogud samting for gohed kam kasem distaem, datwan showimaot rul bilong Jehovah nomoa bae mekem olketa man for kasem gud samting. Long future, God bae finisim evri nogud pipol. Bihaen datwan, no eniwan bae fit for kwestinim moa raet bilong God for rul, or for duim nogud samting. Sapos eniwan duim olsem, God bae stretawe finisim hem. Olketa samting wea happen long history pruvim hem no stret for eniwan kwestinim raet bilong God for rul.

7, 8. Wanem nao samfala wei wea Jehovah showimaot love?

⁷ Jehovah showimaot love long staka difren wei. Olsem example, tingim wei wea universe hem big tumas and hem barava luk naes. Staka billion galaxy stap long universe, and evri galaxy garem staka billion star and planet. Long galaxy bilong iumi, wea olketa kolem long Milky Way, wanfala star hem sun. No eni samting savve laef long earth sapos iumi no garem sun. Evri samting hia mekhae long Jehovah, and olketa showimaot tu olketa wei bilong God, olsem paoa, wisdom, and love bilong hem. Tru nao, “nomata olketa man no savve lukim God, olketa wei bilong hem showaot klia start long taem wea hem wakem world kam kasem distaem. Olketa fit for luksavve hem  God and for luksavve long paoa bilong hem wea stap for olowe.”—Rome 1:20.

⁸ Jehovah wakem earth for olketa animal and man savve stap laef long hem and kasem gud samting. God wakem datfala garden long Eden for olketa man stap long hem, olketa perfect, and olketa savve laef olowe. (Readim Revelation 4:11.) And tu, “hem givim kaikai long evri samting wea laef, bikos love bilong hem no savve finis.”—Ps. 136:25.

9. Nomata Jehovah hem God wea showimaot love, wanem nao hem heitim?

⁹ Nomata main fasin bilong Jehovah hem love, hem sei tu, hem heitim olketa nogud samting. Olsem example, Psalm 5:4-6 sei olsem abaotem Jehovah: “Iu God wea no laekem olketa nogud samting. . . . Iu heitim olketa wea duim nogud samting.” Jehovah heitim tu “pipol wea raf and wea laea.”

10, 11. (a) Wanem nao bae happen long nogud pipol? (b) Wanem gud samting nao Jehovah bae givim long olketa wea obeyim hem?

¹⁰ Long taem wea Jehovah markem, hem bae finisim evriwan wea duim nogud samting, bikos hem God wea showimaot love and hem heitim olketa nogud samting. Bible sei: “Olketa wea duim nogud samting bae finis, bat Jehovah bae givim earth long olketa wea trustim hem. And klosap nao man wea duim rabis samting bae finis.” Olketa enemy bilong Jehovah bae “olsem smoke wea man no lukim moa.”—Ps. 37:9, 10, 20.

¹¹ Bible sei tu: “Olketa wea raeteous bae stap long earth, and olketa bae stap for olowe.” (Ps. 37:29) Pipol wea faithful long God “bae hapi fogud bikos evriwan bae garem peace.” (Ps. 37:11) Olketa samting hia bae happen bikos God evritaem duim gud samting for olketa wea faithful long hem. Bible sei: “Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.” (Rev. 21:4) Olketa wea tinghae long love wea God showimaot and obeyim hem bae kasem nambawan future!

12. Hu nao “man wea no garem blame”?

¹² Bible sei: “Tingim man wea no garem blame, and tingim man wea raeteous, bikos long future datfala man bae garem peace. Bat evriwan wea no obey bae finis. Pipol wea duim nogud samting bae finis.” (Ps. 37:37, 38) “Man wea no garem blame” hem lane abaotem Jehovah and Son bilong hem, and hem duim wanem God laekem. (Readim John 17:3.) Hem barava sure “world bae finis and evri samting wea pipol long world laekem bae finis tu, bat man wea duim wanem God hem laekem bae stap for olowe.” (1 John 2:17) From end bilong world hem klosap, hem barava important for iumi “hope long Jehovah and followim wei bilong hem.”—Ps. 37:34.

13. Wanem nao nambawan wei wea God showimaot love?

¹³ Nomata iumi no perfect, iumi savve obeyim God. Iumi savve fren gud tu witim Jehovah bikos long ransom sakrifaes bilong Jesus, wea datwan nao hem nambawan wei wea God showimaot love. Jehovah sendem Jesus Christ for sakrifaesim laef bilong hem mekem pipol wea obey savve kamap free from sin and dae. (Readim Rome 5:12; 6:23.) From Jesus faithful long God taem hem stap long heven, Jehovah savve Son bilong hem bae gohed for faithful taem hem stap long earth. From  Jehovah lovem Son bilong hem, hem barava sorre taem pipol duim nogud samting long Jesus. Nomata nogud samting kasem Jesus, hem gohed for sapotim rul bilong God and hem showimaot man wea perfect savve faithful long God nomata long taem wea barava no isi.

14, 15. Wanem nao olketa man savve kasem from dae bilong Jesus?

¹⁴ Nomata Jesus kasem olketa bigfala test, hem gohed faithful long God and sapotim rul bilong Jehovah. Iumi shud barava tinghae long ransom sakrifaes bilong Jesus bikos datwan mekem iumi savve laef olowe insaed long niu world bilong God! Aposol Paul storyim wei wea ransom showimaot love bilong Jehovah and Jesus. Hem sei: “Long taem wea God markem, Christ hem dae for olketa man wea sin. Hem duim diswan taem iumi no strong yet. No staka man bae dae for wanfala man wea raeteous. Maet samwan willing for dae for wanfala gud man. Bat Christ hem dae for iumi taem iumi sin yet, wea diswan showimaot God hem lovem iumi.” (Rome 5:6-8) Aposol John sei: “Love wea God garem for iumi hem showaot taem hem sendem kam spesol Son bilong hem long world mekem iumi savve kasem laef bikos long hem. God sendem kam Son bilong hem olsem wanfala sakrifaes for olketa sin bilong iumi mekem iumi savve fren bak witim hem. Hem  duim diswan bikos hem lovem iumi no bikos iumi lovem hem.”—1 John 4:9, 10.

¹⁵ Jesus sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) Jehovah sendem Son bilong hem for givim laef bilong hem olsem wanfala ransom, nomata datwan mekem Jehovah barava sorre. Datwan showimaot Jehovah barava lovem olketa man. And love bilong hem no savve finis. Paul sei: “Mi bilivim God and Lord bilong iumi Christ Jesus tufala barava lovem iumi. Nomata iumi dae or iumi laef, or nomata long eni samting wea angel or gavman duim, or nomata tu long eni samting wea stap distaem or wea bae kamap bihaen or eni paoa, or eni samting antap or long daon or eni nara samting wea God wakem, no eni samting hia savve stopem iumi for no kasem love bilong tufala.”—Rome 8:38, 39.

16. Wanem nao datfala Messiah Kingdom, and hu nao Jehovah markem for rul long Kingdom?

¹⁶ Nara samting wea pruvim Jehovah lovem olketa man, hem datfala Messiah Kingdom, wea hem gavman bilong God. Jehovah markem Jesus Christ for rul long datfala Kingdom, and Jesus lovem olketa man and hem barava fit for rul. (Prov. 8:31) And tu, God chusim 144,000 anointed Christian for rul witim Christ long heven. From olketa stap long earth bifor, taem olketa go long heven olketa bae minim tingting and feeling bilong olketa man. (Rev. 14:1) Taem Jesus stap long earth, Kingdom nao hem main samting wea hem story abaotem, and hem teachim olketa disaepol for prea olsem: “Dadi bilong mifala long heven, mifala laekem nem bilong iu for holy. Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.” (Matt. 6:9, 10) Iumi luk forward long taem wea olketa toktok long datfala scripture bae kamap tru, and Kingdom bilong God bae mekem olketa man kasem staka blessing!

17. Storyim wei wea rul bilong Jesus hem barava difren from rul bilong olketa man.

¹⁷ Rul bilong Jesus hem barava difren from rul bilong olketa man. Rul bilong olketa man mekem olketa war kamap wea killim dae staka pipol. Bat Jesus barava lovem iumi and taem hem rul hem followim olketa nambawan wei bilong God, wea main wan nao hem love. (Rev. 7:10, 16, 17) Jesus sei: “Kam long mi, iufala wea waka hard and wea karem hevi samting, mekem mi savve strongim iufala. Iufala waka witim mi and lane from mi, bikos mi no savve raf and mi hambol. Wei for duim olsem bae strongim iufala. Bae hem no hard for iufala waka witim mi, and iufala savve karem samting wea mi askem iufala for karem.” (Matt. 11:28-30) Datfala toktok barava encouragem iumi!

18. (a) Wanem nao God hem duim start kam long 1914? (b) Wanem nao bae iumi storyim long nextfala study?

¹⁸ Olketa profesi long Bible showimaot Kingdom bilong God start for rul long heven long 1914. Start kam long datfala year, God hipimap olketa last wan wea bae rul witim Jesus long heven, and hem hipimap tu “wanfala big crowd,” wea hem nao pipol wea bae no dae taem disfala world hem finis and olketa bae go insaed long niu world bilong God. (Rev. 7:9, 13, 14) Haomas pipol nao insaed long datfala big crowd distaem? Wanem nao God laekem olketa for duim? Nextfala study bae ansarem olketa kwestin hia.