1. 1) ¿Diospa mayqen kʼacha kaynintaj astawan ñaupajpi kashan? 2) ¿Imaynataj sientekunchej Dios munakuymin kasqanta yachaspa?

BIBLIA nin: “Diosqa munakuymin”, nispa (1 Juan 4:8). Kayqa niyta munan Jehovaj waj kʼacha kaykunasninmanta munakuynin astawan ñaupajpi kashasqanta. Payqa mana munakuyta rikuchillanchu, manaqa paypuni munakuy. Tukuy imatataj munakuyninrayku ruwan. Chayrayku Jehovaman may agradecesqa kashanchej munakuyninrayku janaj pachata, kay pachata, tukuy kausajkunatawan ruwasqanmanta.

2. Jehová munakuwasqanchejta yachaspa, ¿imamantataj mana iskayrayanchejchu? (Patapi kaj dibujota qhawariy.)

² Jehovaqa tukuy ima ruwasqanta munakun, chaytataj sutʼita yachanchej. Chayrayku imatachus niwasqanchejta juntʼananmantapuni mana iskayrayanchejchu. Sutʼincharinapaj, Payqa munakuwasqanchejrayku “uj pʼunchayta wakichinña, mayqempichus cheqa kayninman jina tukuy kay pachapi runasta [Jesucristonejta] juzganqa” (Hech. 17:31). Manataj iskayrayanchejchu Jesús cheqan kajman jina juzganawanchejmanta. Chantá kasukoj runasqa wiñaypaj allin kausaypi kusisqas kausakuyta atenqanku.

3. Jehová runasman munakuyninta mana rikuchinmanchu karqa chayqa, ¿imaynataj kausayninchej aswan qhepaman kanman karqa?

³ Diosninchej runasman munakuyninta mana rikuchinmanchu karqa chayqa, imaynachus kausay aswan qhepaman kananpi tʼukuriy. Runasqa Kuraj Supaypa atiyninpi purajmanta kamachinakullankumanpuni karqa (2 Cor. 4:3, 4; 1 Juan 5:19; Apocalipsis 12:9, 12 leey). Chaytaj noqanchejpaj may llakiy kanman karqa.

4. ¿Imaraykutaj Jehová saqerqa Satanás contranpi oqharikunanta?

⁴ Satanasqa Jehovaj contranpi oqharikushaspa, Adantawan, Evatawan Jehovaj contranpi oqharikunankupaj tanqarqa. Jehovalla kamachej kasqanta iskaychacherqa. Chantapis Satanasqa pay aswan sumaj kamachej kasqanta nerqa (Gén. 3:1-5). Jehovataj may yachayniyoj Dios kasqanrayku, Satanaspa nisqan cheqachus manachus kasqanta rikuchinanpaj uj tiempo pasananta saqerqa. Chaywanpis Satanaspa kamachiynin, runaspa kamachiyninku ima mana allinchu kasqanta sutʼita rikunchej.

5. ¿Imatataj runaj kausaynin rikuchiwanchej?

⁵ Kay sajra pachaqa astawan sajrayashan. Kay pasaj 100 watasllapi, 100 millonesmanta astawan runas guerraspi wañorqanku. Biblia niwanchej kay ‘qhepa’ pʼunchaykunapi runas manchay sajraman tukunankuta (2 Tim. 3:1, 13). Chantapis nillantaj “runaqa kawsayninmanta mana dueñochu kasqanta, nitaj kawsaynimpi imatachus ruwananta niyta atisqanta” ima (Jer. 10:23). Kayqa cheqapuni. Runaj kausaynenqa sutʼita rikuchiwanchej, mana runapura kamachinakunanchejpajchu Jehová ruwawasqanchejta.

6. ¿Imaraykutaj Jehová saqen sajra runas kausanallankutapuni?

⁶ ¿Imaraykutaj Jehová saqen sajra runas kausanallankutapuni? Paypa kamachiynillan may sumaj kasqanta rikuchinanpaj. Aswan qhepamantaj tukuy sajra runasta chinkachenqa. Chantá pillapis Jehovalla kamachej kasqanta watejmanta iskaychachejtin usqhayllata chay runata chinkarparichenqa. ¿Imaraykú? Imaraykuchus Pay yachan runaj kamachiynin ñakʼariyllata apamusqanta. Chayrayku manaña watejmanta saqenqachu runas kamachinakunankuta.

7, 8. ¿Imaynasmantá Jehová munakuwasqanchejta rikuchiwanchej?

⁷ Jehovaqa tukuy imaymanamanta jatun munakuyninta rikuchiwanchej. Sutʼincharinapaj, janaj pacha may jatun kasqanpi, kʼachitutaj kasqanpi tʼukurina. Janaj pachapeqa may chhika planetas, chʼaskas ima tiyan. Chay chʼaskasmanta ujnintaj Inti. Manachus Inti kanman chayqa, Jallpʼapi mana kausay kanmanchu. Tukuy kaytaj Romanos 1:20 versículo nisqanman jina, Jehová Ruwawajninchej, atiyniyoj, yachayniyoj, munakuyniyoj ima kasqanta rikuchiwanchej.

⁸ Jehovaqa Jallpʼata may kʼachituta ruwarqa plantas, animales, runas ima kanankupaj. Chantá uj kʼachitu huertaman runasta tiyakunankupaj churarqa. Paykunataqa may sumaj yuyayniyojta, wiñaypaj kausakuyta atinankupaj jina cuerpoyojta ima ruwarqa (Apocalipsis 4:11 leey). Chantapis Jehovaqa munakuynin wiñaypaj kasqanrayku “runasman, uywasmampis” mikhuchin (Sal. 136:25).

9. ¿Imatataj Jehová chejnikun?

⁹ Jehová Diosqa munakuyniyoj kaspapis,  tukuy sajra kajta chejnikun. Sutʼincharinapaj, Salmo 5:4-6 versículos Jehovamanta kayta niwanchej: “Qanqa mana sajra kajwan kusikoj Dioschu kanki [...]; qanqa chejnikunki sajrata tukuy ruwajkunata”, nispa. Chantapis nillantaj: “Runa wañuchi wasanchajkunata qanqa millachikunki”, nispa.

10, 11. 1) ¿Imataj tumpamantawan sajra runaswan kanqa? 2) ¿Imatataj Jehová qonqa payta kasukojkunaman?

¹⁰ Rikunchej jina Jehovaqa munakuyniyoj kaspapis, tukuy ima sajra ruwaykunata chejnikun. Chayrayku maykʼajchus munanqa chaypacha, kay pachamanta sajra ruwaykunata chinkachenqa. Biblia nin: “Sajra runasqa kay jallpʼamanta chinkachisqa kanqanku. Tata Diospi suyakojkunarí kay pachata herenciapaj japʼenqanku”, nispa. Chantapis Bibliaqa nillantaj tumpamantawan Jehovaj enemigosnin chinkachisqa kanankuta (Sal. 37:9, 10, 20).

¹¹ ¿Imatataj Jehová qonqa, payta kasukojkunaman, munakuyninmanta agradecekojkunaman ima? Uj sumaj kausayta. Biblia nin: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa (Sal. 37:29). Jehovaman cheqa sonqo kajkunaqa allin kausayta japʼenqanku, kusisqataj tiyakonqanku (Sal. 37:11). ¿Imaraykú? Imaraykuchus munakuyniyoj Diosninchej Jehovaqa cheqa sonqo kamachisninpaj allin kajtapuni ruwan. Biblia nillantaj: “Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu”, nispa. Arí, tukuy ima sajra kajqa chinkanqa (Apo. 21:4).

12. Jehová llimphu kausayniyoj runata jina qhawanawanchejta munanchej chay, ¿imatá ruwananchej tiyan?

¹² Biblia nin: “Cheqan runata, llimphu kawsayniyoj runatawan reparay; paypajqa allin kawsay kanqa. Mana kasukoj runasrí pampachasqa kanqanku, juchasapastaj tukuchisqa kanqanku”, nispa (Sal. 37:37, 38). Jehová llimphu kausayniyoj runata jina qhawanawanchejta munanchej chayqa, tukuy ima nisqanta kasukunanchej tiyan, chantá Payta, Jesusta ima rejsinanchej tiyan (Juan 17:3 leey). Kay sajra pacha tumpamantawan chinkachisqa kananmanta mana iskayrayananchejchu tiyan, imaraykuchus “Diospa munayninta ruwaj[lla], wiñaypaj kawsanqa” (1 Juan 2:17). Kay pachaj tukukuynin qayllitapiña kasqanrayku, Diosta kasukunanchej, paypitaj suyakunanchej may sumaj (Sal. 37:34).

13. ¿Imata ruwaspataj Jehová jatun munakuyninta rikuchiwanchej?

¹³ Juchasapa runas kaspapis Jehovata kasukuyta atinchej. Chantapis amigosnin kayta atinchej, jatun munakuyninta rikuchiwasqanchejrayku. Payqa wawanta wañunanta saqerqa noqanchejta wañuymanta, juchamanta ima kacharichinawanchejpaj (Romanos 5:12; 6:23 leey). Jehovaqa yacharqa Jesús Jallpʼaman jamuspa payman cheqa sonqo kananta, imaraykuchus may chhika unayta janaj pachapi kashaspa payman cheqa sonqo karqa. Jehovaj sonqonqa mayta nanarqa munasqa Wawanta runas imaynatachus ñakʼarichishasqankuta rikuspa. Jesustaj Jehovalla kamachiyta atiwasqanchejta sutʼita rikucherqa. Chantapis uj juntʼa runa mayta ñakʼarispapis Jehovaman cheqa sonqo kayta atisqanta rikuchillarqataj.

14, 15. ¿Imaynatá Jesuspa wañuynin yanapawanchej?

 ¹⁴ Jesusqa Jehovalla kamachiyta atiwasqanchejta sonqo kʼajaywan rikucherqa, ñakʼarispapis wañupunankama cheqa sonqollapuni karqa. ¿Imaynatá Jesuspa wañuynin yanapawanchej? Paraisopi wiñaypaj kausakunanchejpaj yanapawanchej. Apóstol Pabloqa, Jesuswan Jehovawan noqanchejrayku imatachus ruwasqanku mayta munakuwasqanchejta rikuchisqanta sutʼincharqa. Pablo nerqa: “Ni imaynamanta salvakuyta atishajtinchej, maychus tiempompi Cristo wañorqa juchasapasrayku. Cheqamanta mana pipis wañullanmanchu uj cheqan runarayku; ichapis atinman wañuyta uj kʼacha runarayku. Chay tukuywampis Dios munakuyninta rikuchiwanchej; juchasapasllaraj kashajtinchej, Cristo wañorqa noqanchejrayku”, nispa (Rom. 5:6-8). Apóstol Juan nillarqataj: “Kay jinamanta Diosqa munakuyninta rikuchiwarqanchej: Payqa uj kʼata Churinta kay pachaman kachamorqa, paynejta kawsayniyoj kananchejpaj. Chay munakoyqa kay jinapi rikukun: Mana noqanchej Diosta munakusqanchejpichu, manachayqa Dios munakuwasqanchejpi, Churinta kachamusqampitaj juchasninchejmanta Diospa phiñakuyninta wañuyninwan thasnunampaj”, nispa (1 Juan 4:9, 10).

¹⁵ Chantá Jesús nillarqataj: “Diosqa chay jinatapuni kay pachapi kaj [runasta] munakusqanrayku, uj kʼata Churinta qorqa.  Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa”, nispa (Juan 3:16). Jehová Diosqa noqanchejrayku Wawan wañunanta saqerqa sonqon mayta nanajtinpis. Chaytaj mayta munakuwasqanchejta rikuchin, munakuynintaj mana tukukonqachu. Chayrayku Pablo nerqa: “Mana pipis Diospa munakuyninmanta tʼaqawasunmanchu: Ni wañuy, ni kausaypis; ni ángeles, ni kurajkuna, nitaj atiyniyojkunapis; ni kaypi kaj, ni jamoj kajpis; ni patamanta kaj, ni ukhu pachamanta kajpis nitaj ima waj ruwasqa kajpis tʼaqayta atiwasunmanchu Diospa munakuyninmanta, mayqenchus Cristo Jesús Señorninchejpi kashan, chaymanta”, nispa (Rom. 8:38, 39).

16. 1) ¿Imataj Diospa Reinon? 2) ¿Pitataj Jehová Reinonpi kamachinanpaj churarqa?

¹⁶ Chantapis Jehová Diosqa, munakuyninta rikuchillawanchejtaj Reinonnejta. Chay Reinoqa uj gobierno, mayqentachus Jehová rikhuricherqa, chaypi kamachinanpaj uj reyta churarqa, pichus runasta mayta munakun, kamachinanpajtaj sumaj wakichisqa kashan (Pro. 8:31). Chay kamachejqa Jesucristo. Chantapis Jehovaqa Cristowan khuska janaj pachamanta kamachimunankupaj 144.000 runasta ajllallantaj. Chay runasqa noqanchej jinallataj pantaj runas kanku, chayraykutaj kamachimushajtinku yanapayta atiwasunchej (Apo. 14:1). Jesús kay Jallpʼapi kashaspa, Diospa Reinonmanta astawan willarqa. Payqa “janaj pachapi kashaj Tatayku, sutiyki jatunchasqa kachun. Reinoyki jamuchun, munayniykitaj ruwasqa kachun, imaynachus janaj pachapi, ajinallatataj kay pachapipis” nispa mañakunankuta yachachisqasninman yachacherqa (Mat. 6:9, 10). Kay mañakuyman jina ruwakunanta, Diospa Reinon bendicionesta runaspaj apamunanta ima mayta suyakushanchej.

17. Jesuspa kamachiyninwan, runaspa kamachiyninkuwan, ¿imapitaj mana kikinchu kanku?

¹⁷ Jesuspa kamachiyninwan, runaspa kamachiyninwan mana kikinchu. Runaspa kamachiyninkupeqa guerraslla tiyan, ashkha runastaj wañunku. Chaywanpis Jesusqa mayta munakuwanchej, Jehová jinataj kʼacha kaykunasniyoj, ujnin kʼacha kaynenqa munakuy (Apo. 7:10, 16, 17). Jesús nerqa: “Noqaman jamuychej, tukuy saykʼusqa kajkuna, llasa qʼepiyojkuna ima, noqataj samarichisqaykichej. Yugoyman churakuychej, yachaqakuychejtaj noqamanta. Noqaqa kʼacha, llampʼu sonqotaj kani, almasniykichejpajtaj samakuyta tarinkichej, imaraykuchus yugoyqa llampʼulla, qʼepiypis chhallalla”, nispa (Mat. 11:28-30). Jesús mayta munakuwanchej, ¿icharí?

18. 1) ¿Imatataj 1914 watamantapacha ruwakushan? 2) ¿Imamantataj qhepan yachaqanapi yachakusunchej?

¹⁸ Bibliaqa Diospa Reinon 1914 watamantapacha, janaj pachapi kamachiyta qallarisqanta niwanchej. Chaymanta pisi tiemponmantaj Jallpʼapiraj kaj ajllasqa cristianosta tantakuyta qallarikorqa Cristowan khuska janaj pachamanta kamachimunankupaj. Chantapis “may chhika” runasta tantakushallantaj, chay runasqa kay sajra pacha chinkachisqa kashajtin mana wañonqankuchu paraisopitaj wiñaypaj kausakonqanku (Apo. 7:9, 13, 14). Chay may chhika runas, ¿mashkhapunitaj kanku? ¿Imatá ruwanankutataj Jehová munan? Chayta qhepan yachaqanapi yachakusunchej.