1. a) Taita Diospa cualidadcunamandaca ¿maijanda ashtahuan yali can? b) Jehová Dios juyaj Dios cashcata yachashpaca ¿imashinata sintirinchi?

BIBLIAPICA ninmi: “Taita Diosca, ninandapacha juyajmi” can nishpa (1 Juan 4:8). Jehovapa tucui cualidadcunamandaca juyaimi ashtahuan yali can. Cai Alpapipash, cielopipash tucui ima tiashcataca juyaimandami Taita Diosca rurashca. Chaita yachashpaca ninandami cushijunchi.

2. ¿Imamandata ninchi, Jehová Diosca ñucanchita juyanmi nishpa? (Callari dibujota ricupangui.)

² Gentecunata ninanda juyaimandami, imata rurasha nishcatapash Jehová Diosca tucuita pactachinga. Por ejemplo, Jehová Diosca ‘cai pachapi causajcuna imata rurashcata ricuchishpami [alita] ruranga. Chashna ricuchingapami, tucuicuna yachachun pai agllashca runata’ o Jesusta churashca. Chaita pactachingapaca “ñami shuj punllata agllashca” (Hech. 17:31). Jesús mandajujpi cazujcuna, Taita Diospa ñaupajpi ali ricurijcunaca shamuj punllacunapica cushilla, para siempremi causanga.

3. Jehová ñucanchita na juyajpica ¿imashinashi shamuj punllacunapica causanchiman?

³ Jehová ñucanchita na juyajpica ¿imashinashi shamuj punllacunaca causanchiman? Jehová Dios na juyajpica, gentecuna Diablopa munaita rurashpa paicunapura mandashpa catijpimi, llaquinaita causanchiman (2 Cor. 4:4; 1 Juan 5:19; Apocalipsis 12:9, 12, liingui). Cushilla causaitaca nunca na ushanchimanllu.

4. Jehová Diosca ¿imamandata Diablopash, gentecunapash paicunallata mandachun saquirca?

⁴ Diabloca na cazungapaj munashpami Jehovapa contra tucurca. Adanbash, Evapash ama cazuchunmi umachirca. Diabloca llullashpami nirca, Diosca gentecunata mandana derechotaca na charinllu nishpa. Diabloca pai mandajpi gentecuna cushilla causanata crichunmi munarca (Gén. 3:1-5). Chaimandami Jehová Diosca asha tiempota saquirca, Diablopa nishcacuna cierto cashcata o na cierto cashcata ricuchichun. Shinami Jehová Diosca ricuchirca, ni maijan gobierno Jehová Diosta yali ali mandajca na tiashcata. Imashinami ricunchi, Diablopash gentecunapash ali mandaitaca na ushashcachu.

5. Cai tucui huatacunapica ¿imatata cuenta japishcanchi?

⁵ Cai último 100 huatacunapillami 100 millón yali gentecuna guerracunapi huañushca. Mundo enteropimi llaquicunaca ashtahuan mirashpa catijun. Bibliapica ñami villarca, “tucurimui punllacunapica” nali gentecuna, llullashpa juchachijcunaca ashtahuan ashtahuanmi mirashpa catinga nishpa (2 Tim. 3:1, 13). Imashinami ña ricunchi, Bibliapi nishca shinaca, “runapaj causaica na paipajchu. Pipash quiquin causaitaca, na mandai ushanllu” (Jer. 10:23). Jehová Diosca gentecunataca paicunallata mandashpa, paicunapa munai imatapash rurashpa causachunga na rurarcachu.

6. Diabloman asha tiempota saquinaca ¿imamandata ali cashca?

⁶ Jehová Diosca ¿imashpata nali gentecuna causashpa catichun saquishca? Shina saquishpami Jehová Diosca pailla mandana derechota charishcata, gentecuna na mandai ushashcata ricuchishca. Shamuj punllacunapica, Jehová Diosca tucuilla nali gentecunatami tucuchinga. Chai jipaca, pipash Taita Diosca nali mandanllu nishpa llullajpica, chai cierto cashcata o na cierto cashcata ricuchichunga ñana cutin tiempota cungachu. ¿Imamandata shina ninchi? Gentecunallata mandashpa, nalicunata rurashcamandami Jehová Diosca gentecuna cutin mandachunga ñana saquinga. Chaimandami pipash na cazungapaj munajpica chai rato tucuchinga.

7, 8. a) Jehová Diosca ¿imashinata gentecunata juyashcataca cutin cutin ricuchishca?

⁷ Jehová Diosca cutin cutinmi ñucanchicunata juyashcata ricuchishca. Pensaripai. Cai Alpapi, Alpa jahuapi ima tiashcacunapash jatun, juyaillami can. Chaipica ashtaca ashtaca millón planetacuna, estrellacunami tian. Ashtahuan jatun estrellaca Indimi can. Indi illajpica, cai Alpapica causaica na tianmanllu. Caicunata ricushpami, Jehová Dioslla Tucuita Ruraj Dios cashcata intindinchi. Bibliapica ninmi: Jehová Dios ‘ninan ushaita charij cajta, Diospacha cajtaca, cai pachata pai rurashcamandapachami ricuchijun. Chaitaca tucui imatalla rurashcacunata ricuchishpami intindinchi’ nishpa (Rom. 1:20).

⁸ Ashtahuanbash, Tucuita Ruraj Jehová Diosca cai Alpataca plantacuna, animalcuna, gentecuna causangapaj imatalla minishtishcahuanmi rurashca. Adanda rurashpaca shuj juyailla Alpa pushtugupimi churarca. Shinallata ali yuyaihuan, jucha illaj cuerpohuanmi rurarca. Ashtahuanbash para siempre causachunmi  rurarca (Apocalipsis 4:11, liingui). Bibliapica ninmi: “Paimi, causaita charijcunamambash, tucuillaman micunata caran. Pai llaquinaca, causaita causaicamanmi” can nishpa (Sal. 136:25).

9. ¿Imatata Jehová Diosca na ricunayachin?

⁹ Jehová Diosca ninandapacha juyaj Dios cashpapash, nali ruraicunataca na ricunayachinllu. Bibliapica ninmi: ‘Canga nalicunahuan cushijuj Taita Diosca na canguichu. Nalita rurajcunataca tucuicunatami na ricunayachingui’ nishpa. Ashtahuanbash ninmi: ‘Huañuchishpa, umachishpa causajcunatapash Mandaj Diosca na ricunayachinllu’ nishpa (Sal. 5:4-6).

10, 11. a) Nali gentecunahuanga ¿imata pasanga? b) Cutin ali gentecunahuanga ¿imata pasanga?

¹⁰ Imashinami yachajushcanchi, Jehová Diosca ninandapacha juyaj Diosmi can. Nali ruraicunataca na ricunayachinllu. Chaimandami tucui nalicunata tucuchinga. Bibliapica ninmi: “Nalicunaca tucuchi tucungami. Ashtahuangarin Mandaj Diosta shuyajcunami, llactataca japinga. Cunanmanda asha punlla jipaca, nali runaca illangami. Pai tiajushca pushtuta can ricujpica, chaipica illangami” nishpa. Ashtahuanbash, Jehová Diospa contracunaca pambacunapi sisacuna ñapash chaquirinshna, cushni chingarinshnami tucuringa (Sal. 37:9, 10, 20).

¹¹ Bibliapica ninbashmi: “Imatapash [alita] rurajcunami, llactataca japinga. Chai llactapica, causaitami causanajunga” nishpa (Sal. 37:29). Paicunaca “casilla ali causaihuanmi, ninanda cushijunajunga” (Sal. 37:11). Jehová Diosca paita sirvijcunata juyaimanda, paicuna ali causachun munaimandami chai shimicunataca pactachinga. Apocalipsis 21:4​pica ninmi: “Taita Diosmi, paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami” nishpa. Jehová Diosta cazujcuna, pailla mandana derechota charishcata chasquijcunaca shamuj punllacunapica cushillami causanajunga.

12. ‘Ima nalitapash na rurajcunaca’ ¿picunata can?

¹² Bibliapica ninmi: “Ima nalitapash na rurajtaca yaripairi. Imatapash [alita] rurajtaca ricupairi. Casilla aliguta causaj runapaca, jipaman cushijunami tianga. Ashtahuangarin na cazujcunaca tandachishpami, tucuilla tucuchi tucunga. Diosta na manllajcunapaj miraicunaca tucuringami” nishpa (Sal. 37:37, 38). ‘Ima nalitapash na rurajcunaca’ Jehová Diosta, Jesusta rijsishpa Bibliapi mandashcacunata cazujcunami can (Juan 17:3, liingui). Chai gentecunaca, 1 Juan 2:17​pi shimicunatami tucui shunguhuan crin. Chaipica ninmi: “Cai pachaca, tucui imapash nali munaicunandimi tucurijun. Ashtahuangarin Taita Dios munashcata rurajcunaca, causaitami causanga” nishpa. Tucuri punllaca ñallapachami chayamunga. Chaimandami Jehová Diospi confiashpa, pai mandashcacunata cazushpa causana canchi (Sal. 37:34).

13. Gentecunata juyaimandaca ¿imatata Jehová Diosca ashtahuan rurarca?

¹³ Ñucanchicunaca juchayucuna cashpapash, Jehovapa mandashcacunata cazushpa causaita ushanchimi. Ashtahuanbash, ninanda juyaimandami Jehová Diosca ñucanchicunata juchamanda, huañuimanda salvangapaj paipa Churita huañuchun cachamurca. Chaimandami Jehovapa amigo caita ushanchi (Romanos 5:12; 6:23, liingui). Jesusca ashtaca ashtaca huatacunatami jahua cielopi paipa Taita Jehová Diosta cazushpa causarca. Chaimandami Jehová Diosca ali yacharca, Jesusta Alpaman cachamujpipash siempre cazunata. Jehová Diosca paipa Churitaca ninandami juyan. Chaimandami, gentecuna Jesusta nali  tratajta ricushpaca ninanda llaquirirca. Jesusca Jehová Dioslla mandana derechota charishcatami siempre ricuchin carca. Paica jucha illaj cashpapash, ima llaquicunata charishpapash Jehovata cazui ushashcatami ricuchirca.

14, 15. ¿Imashinata Jesús huañushcamandaca beneficiarinchi?

¹⁴ Imashinami yachajushcanchi, Jesusca Jehová Dioslla mandana derechota charishcatami tucui shunguhuan ricuchirca. Shinallata, huañungacamanmi Jehová Diosta cazurca. Chaimandami, shamuj punllacunapica paraíso Alpagupi causana oportunidadta charinchi. Tucui chaicunamandaca ninandami agradicinchi. Apóstol Pabloca Jehová Diospash, Jesuspash ñucanchicunata juyashcataca alimi yacharca. Chaimandami nirca: “Ñucanchi imata na rurai ushajcuna cajpipash Cristoca, pai huañuna punllapimi, Diosta na manllajcunamandaca huañurca. Imatapash [alita ruraj] runamandaca, pipash na huañunmanllu. Ashtahuan alipacha runamandaca, ñuca huañushallami nishpa, maijambash huañunmanllari. Ashtahuangarin Taita Diosca, paipaj juyaitami ñucanchiman ricuchimujun. Ñucanchi juchayu cajpipash, Cristomi ñucanchimanda huañurca” nishpa (Rom. 5:6-8). Apóstol Juanbash nircami: “Causaita causagrinata ñucanchi japigrichunmi Taita Diosca, paipaj shujlla Churita cai pachaman cachamushpa, ñucanchita juyajushcata ricuchirca. Ñucanchica, Taita Diosta na juyashpami causarcanchi. Ashtahuangarin pairami ñucanchita juyarca. Paillatami, paipaj Churita ñucanchi  juchacunata anchuchingapaj huañuchun cachamurca. Shina cachamushpami, ñucanchita juyajushcataca ricuchijun” nishpa (1 Juan 4:9, 10).

¹⁵ Jesuspash nircami: “Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa” nishpa (Juan 3:16). Jehová Diosca ñucanchita ninanda juyaimandami paipa juyashca Churita huañuchun cachamurca. Jehová Diosca ñucanchicunataca siempremi juyashpa catinga. Chaimandami apóstol Pabloca nirca: ‘Caitaca aligutapachami yachani: Huañuipash, causaipash, angelcunapash, ninan ushaita charishpa mandajcunapash, cunan punllacunapash, shamui punllacunapash, jahua pachapi ima tiajcunapash, Dios rurashca imacunapash ñucanchi Apunchi Cristo Jesusmanda Taita Dios juyajujtaca, ñucanchimandaca napacha anchuchi ushangachu’ nishpa (Rom. 8:38, 39).

16. a) Diospa Reinoca ¿imata can? b) Jehová Diosca paipa Reinopi mandachunga ¿pitata agllashca?

¹⁶ Jehová Diosca ñucanchicunata juyaimandami shuj Reinota churashca. Chai Reinoca jahua pachamanda mandana gobiernomi can. Chai Reinopi Rey cachunga paipa Churi Jesustami agllashca. Jesusca gentecunataca ninandami juyan. Chaimandami paica shuj ali Rey can (Prov. 8:31). Jesushuanga 144 mil gentecunami jahua pachamanda cai Alpata mandanga. Paicunaca cai Alpapi causashcamandami juyaihuan, ñucanchicuna imashina cashcata ali intindishpa mandanga (Apoc. 14:1). Jesús cai Alpapi cashpaca, Diospa Reinomandami gentecunamanga siempre parlan carca. Chaimandami, paipa catijcunataca cashnami mañana canguichi nirca: “Jahua pachapi tiajuj ñucanchi Taitalla, cambaj jucha illaj shutiguca, alicachi tucushca cachun. Can mandanaca [“reino”, NM], ucha chayamuchunmi munanchi. Imashnami jahua pachapica can munashcashna ruranajun, chashnallata cai pachapipash, can munashcashna ruranajushpami ali canman” nishpa (Mat. 6:9, 10). Cai mañai pactarijpica, Jehová Diosta sirvijcunaca ninandami cushijunga.

17. ¿Diospa Reinoca cai Alpapi gobiernocunashnachu can?

¹⁷ Diospa Reinoca cai Alpapi gobiernocunashnaca na canllu. Cai Alpapi gobiernocuna mandajuimandami ashtaca ashtaca gentecuna guerracunapi huañushca. Cutin Jesusca, paipa Taita Jehová Dios shinami gentecunataca ninanda juyan (Apoc. 7:10, 16, 17). Jesusca nircami: ‘Imatapash rurashpa shaijushcashna, aparishcashna causajcuna ñucapaman shamuichi. Ñucami cangunataca samachisha. Ñuca yachachishcataca yugota aparinshna yachajuichi. Ñucallami na ñapash fiñarij, jariyanata na yarij shunguta charini. Ñucamandami cangunapa almaca samanata taringa. Ñucapa yugoca fangallami, aparijpipash na llashangachu’ nishpa (Mat. 11:28-30). ¿Nachu cai shimicunata uyashpaca ninanda cushijunchi?

18. a) Diospa Reino tiai callarishcamandaca ¿imata pasashca? b) Chaishuj temapica ¿imatata yachajupashun?

¹⁸ Bibliapa profeciacunata ricushpami, Diospa Reinoca 1914 huatapi mandai callarishcata yachanchi. Chai huatamandami Jesusca jahua pachamanda mandai callarishca. Shinallata, chai huatamandami jahua cielopi Jesushuan mandangapaj 144 mil ungidocunata completangapaj tandachijushca. Shinallata, ‘ashtaca gentecuna’ nishcacunatapashmi tandachijushca. Paicunaca cai mundopi tucui nali ruraicuna tucurishca jipami paraíso Alpagupi causanga (Apoc. 7:9, 13, 14). ‘Ashtaca gente’ nishcacunapurapica ¿mashnacunata cunangamanga tian? Salvaringapaca ¿imatata paicunaca rurana can? Chaishuj temapimi caitaca yachajushun.