1. San na a moro prenspari fasi di Gado abi, èn fa disi e meki yu firi?

BIJBEL e taigi wi taki „Gado na lobi” (1 Yoh. 4:8). San disi wani taki? A no wani taki nomo dati lobi na wan fu den moi fasi di Gado abi, ma taki dati na a moro prenspari fasi fu en. Gado no abi lobi nomo, ma ensrefi na lobi. Na ini ala san a e du yu e si a lobi fu en. A moi fu sabi taki a Mekiman fu hemel nanga grontapu èn fu ala sani di de na libi na wan Gado fu lobi!

2. Fu san wi de seiker fu di wi sabi taki Gado lobi wi? (Luku a prenki na a bigin fu na artikel.)

² Yehovah abi switifasi èn a lobi ala den sani di a meki. A lobi di a abi gi wi e meki taki wi de seiker taki a o du san a abi na prakseri gi libisma. A o du disi na a moro bun fasi èn den wan di e gi yesi na en o de koloku trutru. Fu eksempre, fu di Yehovah lobi wi a „poti wan dei pe a o gi wan man a wroko fu krutu ala sma na grontapu na wan reti fasi”. A man di a poti  na Yesus Krestes (Tori 17:31). Wi kan de seiker dati a dei disi o kon. A bakapisi o de dati den reti-ati sma di e gi yesi na Gado o kisi furu blesi èn den o libi fu têgo.

3. Fa a libi ben o de efu Gado no ben lobi wi?

³ Fa sani ben o waka gi libisma efu Gado no ben lobi wi? Libisma ben o tiri trawan go doro èn grontapu ben o tan na ondro a makti fu Satan, di de wan ogri-ati gado di no lobi libisma (2 Kor. 4:4; 1 Yoh. 5:19; leisi Openbaring 12:9, 12). A libi no ben o moi gi wi kwetikweti efu Yehovah no ben lobi wi!

4. San Yehovah du di Satan opo ensrefi teige en?

⁴ Di Satan Didibri opo ensrefi teige Yehovah, dan a meki a fosi man nanga uma du dati tu. Satan ben taki dati Gado no abi a reti fu tiri hemel nanga grontapu èn taki en a no wan bun tiriman. Satan ben taki tu dati en na wan moro bun tiriman leki Gado (Gen. 3:1-5). Fu di Yehovah koni meki a gi Satan nofo ten fu buweisi efu a abi leti. Ma now a de krin taki Satan a no wan bun tiriman èn taki libisma no man de bun tiriman tu.

5. San kon na krin na ini ala den yari di pasa?

⁵ Na ini den wán hondro yari di pasa, milyunmilyun sma dede na ini feti. Now sani e kon moro ogri dei fu dei. Gado Wortu ben taki na fesi san ben o pasa „na ini den lasti dei” fu na ogri grontapu disi. A e taki: „Ogri sma nanga bedrigiman o kon ogri moro nanga moro” (2 Tim. 3:1, 13). A fasi fa sani waka na ini ala den dusundusun yari di pasa, e sori taki san Bijbel e leri wi tru: „Yehovah, mi sabi heri bun taki a no de na wan libisma fu taki sortu pasi a o teki. A no de na wan libisma di e waka fu taki srefi pe a o poti en futu” (Yer. 10:23). Yehovah no meki libisma fu tiri densrefi èn den no abi a reti tu fu du dati sondro a yepi fu en.

6. Fu san ede Gado gi pasi taki ogri de fu wan pisi ten?

⁶ A gi di Yehovah gi pasi taki ogri de fu wan pisi ten, no e sori nomo taki libisma no man tiri densrefi, ma a e sori tu taki en na a moro bun tiriman. Na ini a ten di e kon, Gado o puru ala ogri èn a o puru den sma tu di e du ogri. Efu oiti wan sma ben o feni bakaten taki Gado no e tiri na wan lobi-ati fasi, dan a o kiri a sma dati wantewante. A abi a reti fu du disi? Iya, fu di na ini den hondrohondro yari di pasa Yehovah si taki te libisma e tiri a e tyari furu pina kon. Dati meki noiti moro a o gi pasi taki ogri de.

7, 8. San na wan tu fu den fasi fa Yehovah sori a lobi fu en?

⁷ Yehovah sori a bigi lobi fu en na furu difrenti fasi. Fu eksempre, prakseri a kefalek fasi fa a meki hemel nanga ala sani na ini a loktu lontu wi. A meki milyardmilyard bigi starigrupu. Ibriwan fu den abi milyardmilyard stari nanga furu planeiti na ini. A son na wan fu den stari disi di de na ini a bigi starigrupu di sma e kari a Melkwegstelsel. Efu a son no ben de, dan libi no ben o man de na grontapu tu. Ala den sani disi e sori taki Yehovah na Gado trutru. Den e sori tu taki a abi makti, koni, nanga lobi. Iya, „sensi grontapu meki, sma man si krin sortu fasi Gado abi, aladi den no man si en. Te den e luku den sani di a meki, den kan frustan taki a abi têgo krakti èn taki en na Gado trutru”.—Rom. 1:20.

⁸ Yehovah meki grontapu na so wan fasi  taki libi man de na en tapu. Ala den sani di a meki, bun gi den meti èn gi libisma. Gado ben meki wan moi dyari pe sma ben kan libi na ini èn a frustan nanga a skin di a gi den ben bun dorodoro so taki den ben o man libi fu têgo. (Leisi Openbaring 4:11.) Boiti dati, Bijbel e taki dati ’en na a sma di e gi ala libisani nyanyan. En bun-ati de fu têgo’.—Ps. 136:25.

9. Yehovah na wan Gado fu lobi. Ma san a no lobi kwetikweti?

⁹ Aladi Yehovah na wan Gado fu lobi, toku a no lobi ogridu kwetikweti. Fu eksempre, luku san Psalm 5:4-6 e taki fu Yehovah: „Yu a no wan Gado di lobi ogridu. . . . Yu no lobi nowan sma di e du hati sani nanga trawan.” A e taki tu: „Yehovah no lobi den wan di e kiri sma èn di e bedrigi trawan.”

10, 11. (a) San Yehovah o du nanga den ogrisma? (b) Fa Yehovah o blesi den sma di e gi yesi na en?

¹⁰ Yehovah na wan Gado fu lobi di no lobi ogridu kwetikweti. Dati meki te a ten doro a o puru ogridu na ala sei. Bijbel e pramisi: „Gado o kiri den ogri sma, ma den sma di e howpu na tapu Yehovah, na den o kisi grontapu. Ete wan syatu pisi ten èn den ogriwan no sa de moro. . . . Den feanti fu Yehovah o drei gowe leki moi weigron. Den o kon na wan kaba. Na ini smoko den o kon na wan kaba.”—Ps. 37:9, 10, 20.

¹¹ Na a tra sei Gado Wortu e pramisi tu: „Na den reti-ati sma o kisi grontapu èn fu têgo den o tan libi drape” (Ps. 37:29). Den reti-ati sma disi „o prisiri srefisrefi, fu di freide o de pasa marki” (Ps. 37:11). Wi de seiker taki disi o pasa, fu di Gado di lobi wi e du ala ten san bun gi den sma di e gi yesi na en. Bijbel e taki: „A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba” (Openb. 21:4). Wan tumusi moi ten e wakti wi alamala di e warderi a lobi fu Yehovah èn di e gi yesi na en leki Tiriman!

12. Suma na ’den sma di e du bun’?

¹² A Wortu fu Yehovah e taki: „Hori den sma na ai di e du bun èn luku san den krin-ati sma e du, bika na ini a ten di e kon, sani o waka bun gi den sma dati. Ma den sma di e du sondu, o kisi pori. Te fu kaba den ogriwan o kisi pori” (Ps. 37:37, 38). ’Den sma di e du bun’ e leri sabi Yehovah nanga en Manpikin èn den de klariklari fu du a wani fu Gado. (Leisi Yohanes 17:3.) Den sma disi e si a boskopu di skrifi na 1 Yohanes 2:17 leki wan seryusu sani. Drape skrifi: „Grontapu e pasa gowe nanga den lostu fu en, ma a sma di e du a wani fu Gado o tan fu têgo.” Now di a kaba fu grontapu e kon krosibei a de tranga fanowdu taki wi „howpu na tapu Yehovah èn tan waka a pasi fu en”.—Ps. 37:34.

13. San na a moro prenspari fasi fa Yehovah sori lobi gi wi, aladi wi na sondari?

¹³ Awinsi wi na sondusma, toku wi kan ’tan waka a pasi fu Yehovah’. Boiti dati, wi kan de bun mati fu en, fu di a gi Yesus Krestes leki lusu-paiman. Dati na a moro prenspari fasi fa Gado sori taki a lobi wi. Na a fasi dati a opo a pasi gi sma di e gi yesi na en fu kon fri fu sondu nanga dede. (Leisi Romesma 5:12; 6:23.) Yehovah ben de seiker taki en wan-enkri Manpikin di ben gi yesi na en hondrohondro yari langa  na ini hemel, ben o tan du dati te a ben de na grontapu. Fu di Yehovah na wan Papa di lobi en pikin meki a no de fu taki dati a hati en di a si fa sma ben e pina Yesus na grontapu. Ma Yesus tan sori taki a e si Yehovah leki a Moro Hei Gado èn a sori krin taki wan sma di no abi sondu kan tan du san Gado taki, awinsi sortu tesi e miti en.

14, 15. Sortu wini a dede fu Yesus tyari kon gi libisma?

¹⁴ Di Yesus kisi hebi tesi a tan gi yesi na en Tata srefi te na dede. Wi musu breiti tu taki Yesus pai a lusu-paiman gi libisma èn taki a opo a pasi gi wi fu kisi têgo libi na ini a nyun grontapu di Gado pramisi. Soleki fa na apostel Paulus taki, dan disi e sori taki Yehovah nanga Yesus lobi wi. Dati meki a taki: „Fu tru, di wi no ben man yepi wisrefi, Krestes dede gi sondari na a reti ten. A no makriki fu feni wan sma di ben o dede gi wan sma di e du san reti. Ma kande wan sma ben o wani dede gi wan bun sma ete. Toku Gado sori wi taki a lobi wi fu di a meki Krestes dede gi wi, aladi wi ben de sondari ete” (Rom. 5:6-8). Na apostel Yohanes ben skrifi: „Disi na a fasi fa Gado sori taki a lobi wi: Gado ben  seni en wan-enkri Manpikin kon na grontapu, so taki a kan yepi wi fu kisi libi. A lobi disi no wani taki dati na wi ben lobi Gado, ma taki en ben lobi wi èn a seni en Manpikin kon leki wan ofrandi di e tapu den sondu fu wi èn di e meki wi kon bun baka nanga Gado.”—1 Yoh. 4:9, 10.

¹⁵ Luku san Yesus ben taki fu a lobi di Gado abi gi libisma: „Gado ben lobi grontapu [dati na den sma di kan kisi frulusu] so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). A ben hebi gi Yehovah, ma toku a gi en Manpikin leki wan lusu-paiman. Disi e sori o furu a lobi wi èn a lobi dati o tan fu têgo. Paulus ben skrifi: „Mi de seiker taki noti no sa man prati wi fu a lobi fu Gado. Dede no sa man du dati èn libi no sa man du dati. Nowan engel, nowan tirimakti, nowan sani fu a ten disi noso fu a ten di e kon, nowan krakti, nowan sani di hei, nowan sani di dipi, èn nowan enkri tra sani di Gado meki, sa man prati wi fu a lobi fu Gado, di wi Masra Krestes Yesus abi tu.”—Rom. 8:38, 39.

16. San na a Mesias Kownukondre, èn suma Yehovah poti leki tiriman fu a Kownukondre dati?

¹⁶ Wan tra sani di e sori krin taki Gado lobi wi, na a Mesias Kownukondre di a seti. Yehovah poti en Manpikin Yesus Krestes kaba leki tiriman fu a tirimakti disi. Fu di Yesus lobi libisma meki en na a moro bun sma gi a wroko (Odo 8:31). Gado teki 144.000 libisma tu fu tiri makandra nanga Krestes na ini hemel. Te den sma disi kisi wan opobaka den o gebroiki na ondrofeni di den ben abi leki libisma na grontapu fu tyari wini kon gi wi alamala (Openb. 14:1). Di Yesus ben de na grontapu a Kownukondre ben de a moro prenspari tori di a ben e leri sma. Dati meki a ben leri den bakaman fu en fu begi: „Wi Tata na hemel, meki yu nen de santa. Meki yu Kownukondre kon. Meki yu wani pasa na grontapu soleki fa a e pasa na hemel” (Mat. 6:9, 10). Den sma di e gi yesi na Gado o kisi furu blesi te a begi disi kon tru!

17. Fruteri san na a difrenti na mindri a tiri fu Yesus nanga a tiri fu sondu libisma.

¹⁷ Wan bigi difrenti de na mindri a tiri fu Yesus di lobi libisma, nanga a tiri fu libisma di tyari milyunmilyun sma go dede na ini feti. Yesus e broko en ede trutru nanga den sma di a musu tiri èn a e sori den srefi fasi di Gado e sori, spesrutu lobi (Openb. 7:10, 16, 17). Yesus e taki: „Un alamala di musu wroko hebi èn di musu tyari hebi lai, un kon na mi èn mi o gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi èn unu o kisi krakti baka. Bika a tyatyari fu mi switi fu tyari èn mi lai lekti” (Mat. 11:28-30). Disi na wan tumusi moi pramisi di e sori taki Yesus lobi wi!

18. (a) San Gado Kownukondre du sensi di a bigin tiri? (b) San wi o luku na ini a tra artikel?

¹⁸ Bijbel profeititori e sori taki Gado Kownukondre bigin tiri na hemel na ini 1914. Sensi a ten dati Gado e tyari sma kon na wan. Wán grupu di a tyari kon na wan, na den wan di tan abra fu den 144.000 sma di o tiri makandra nanga Yesus. A tra grupu na „wan bigi ipi sma” di o tan na libi te na ogri grontapu disi kisi pori. Den sma disi o libi na ini a nyun grontapu (Openb. 7:9, 13, 14). Omeni sma de na ini a bigi ipi now? San Gado e aksi fu den sma di de na ini a grupu disi? Na artikel di e kon o taki fu den aksi disi.