1. Kotea te kalitate tafitō ʼo te ʼAtua, pea kotea ʼae ʼe ke logoʼi ʼo ʼuhiga mo ia?

ʼE UI fenei ʼi te Tohi-Tapu: “E ofa te Atua.” (1 Soane 4:8) Kotea tona fakaʼuhiga moʼoni? Ko te ʼofa ko te kalitate tafitō ʼaia ʼo Sehova ʼi ʼona kalitate ʼae. ʼE mole ina maʼu pe te kalitate ʼaia, koteʼuhi ʼe ko ia totonu te ʼofa. Pea ko te ʼofa ʼe ina takitaki ʼana fakatuʼutuʼu fuli. Koia, ʼe tou fakafetaʼi kia Sehova ʼi tana fakatupu te ʼatulaulau mo te ʼu meʼa maʼuli fuli!

2. Kotea ʼe tou tui papau ki ai ʼaki te ʼofa ʼo te ʼAtua kia tatou? (Vakaʼi te ʼuluaki pāki.)

² Ko Sehova ʼe ʼofa ki tana fakatupu katoa. Koia, ʼi tona ʼofa kia tatou ʼe tou tui papau ai ko tana fakatuʼutuʼu ki te tagata ʼe ina fakahoko lelei anai. Pea ʼe fiafia lahi ai anai ia natou ʼae ʼe fakalogo kia te ia. Ohage la, ʼuhi ko tona ʼofa, ko Sehova “kua ina fakatuutuu he aho . . . e ina fakamaaui anai te malamanei i te faitotonu,” ʼaki he tagata kua ina filifili, ko Sesu Kilisito. (Gaue 17:31) Koia, ʼe tou tui papau ai ko te fakamau ʼaia ʼe hoko anai. Pea ko te hahaʼi fakalogo, ʼe natou maʼu anai te ka haʼu taulekaleka heʼe gata.

3. ʼE feafeaʼi anai te maʼuli mo ka na pau la neʼe mole ʼofa te ʼAtua ki te tagata?

³ ʼE feafeaʼi anai te ka haʼu ʼo te tagata mo ka na pau la neʼe mole ʼofa te ʼAtua kia tatou? Ko Satana te ʼatua ʼae ʼe mole ʼofa, ʼe ina fakahalaʼi pe anai te tagata, pea ʼe pule pe anai te tagata ki te tagata ki tona malaʼia. (2 Kolinito 4:4; 1 Soane 5:19; lau ia Apokalipisi 12:9, 12.) Pea lagi ʼe fakamataku anai totatou ka haʼu!

4. He koʼe neʼe fakafealagia e Sehova ke fakafihiʼi tona ʼuhiga Tuʼi ʼAliki ʼo te ʼatulaulau?

⁴ ʼI te talagataʼa ʼa Satana ki te takitaki ʼa te ʼAtua, neʼe ina toe fakaneke ʼatatou ʼuluaki matuʼā ke nā talagataʼa. Neʼe ina fakafihiʼi ai te ʼuhiga Tuʼi ʼo te ʼAtulaulau ʼo te ʼAtua. Neʼe ui e Satana ko tana takitaki ʼae ʼe lelei age ʼi te takitaki ʼa te ʼAtua. (Senesi 3:1-5) ʼAki tona poto, neʼe tuku e Sehova kia Satana he kiʼi temi ke ina fakaha ai pe ʼe moʼoni te aluʼaga ʼaia. Kaʼe ʼe ha mai ʼe mole he tagata maʼia mo Satana ʼe mole ko he ʼu takitaki lelei.

5. Kotea ʼae ʼe ha lelei ʼi te hisitolia ʼo te tagata?

⁵ Ia ʼaho nei, kua ʼaʼasili kovi age te malama. Ko te toko 100 miliona tupu hahaʼi neʼe mamate ʼi te ʼu tau ʼae neʼe hoko ʼi te ʼu taʼu ʼe 100 kua hili. ʼE ui fenei ʼi te Tohi-Tapu ʼo ʼuhiga mo “te u aho fakamuli”: “Ko te u tagata agakovi mo kaka e natou asilisili kovi anai.” (2 Timoteo 3: 1, 13) Pea ʼe toe ui fenei ʼi te Tohi-Tapu: “E au iloi, oi [Sehova]! E mole pule te tagata ki tona ala; e mole ko te tagata ae e ina taki ona lakaaga moka haele.” (Selemia 10:23) ʼE ha lelei ʼi te hisitolia ʼo te tagata te moʼoni ʼo te ʼu palalau ʼaia. Neʼe mole fakatupu e Sehova te tagata mo te fealagia ʼae ke ina takitaki ia ia totonu pe.

6. He koʼe neʼe fakagafua e te ʼAtua te agakovi?

⁶ ʼI tana fakagafua ke hoko fakatemi te agakovi, ʼe toe fakamoʼoni ai e Sehova ʼe ko tana pule pe ʼe fua lelei anai. Ko te ʼAtua ʼe ina tauteaʼi anai te agakovi ʼi te ka haʼu. Pea kapau ʼe fakafihiʼi e he tahi te takitaki ʼofa ʼa te ʼAtua, ʼe ina pulihi atu aipe. Koia, ʼi te hisitolia ʼo te tagata, ʼe feala anai ke ina fakamoʼoni ko te kau talagataʼa ʼe tonu ke pulihi atu aipe ke gata te agakovi.

7, 8. Neʼe fakaha feafeaʼi e Sehova tona ʼofa?

⁷ Neʼe fakaha e Sehova tona ʼofa lahi ʼi he ʼu aluʼaga kehekehe. Fakafuafua age muʼa te lahi mo te taulekaleka ʼo te ʼatulaulau. Neʼe faʼufaʼu te ʼatulaulau ʼaki te ʼu lauʼi miliale fakapupuga fetu’u. ʼE maʼu ʼi te fakapupuga fetuʼu ʼe tahi te ʼu lauʼi miliale fetuʼu mo te ʼu kele. ʼI tatatou fakapupuga fetuʼu ʼae ko te Voie Lactée, ʼe maʼu ai te fetuʼu ʼae ko te laʼa. Ka na pau la neʼe mole fakatupu te laʼa, ʼe mole feala ke maʼuli he meʼa ʼi te kele. ʼAki te ʼu fakatupu ʼaia ʼe ha ai ko Sehova ʼe ko totatou Tupuʼaga, pea ʼe ha lelei ai ʼona kalitate ohage ko tona malohi, tona poto, pea mo tona ʼofa. Koia, ko te ’u “kalitate fakapulipuli [ʼo te ʼAtua] ʼe iloga lelei talu mai te fakatupu ʼo te malamanei, koteʼuhi ʼe ha ʼi te ’u meʼa ʼae kua faʼu, ʼio, tona  malohi heʼe gata mo tona ʼuhiga ʼAtua.”—Loma 1:20, MN.

⁸ Neʼe fakatupu tafitō totatou kele ki te maʼuli. Ko te ʼu meʼa fuli ʼe tou maʼu ʼi te kele ʼe fua lelei ki te ʼu manu mo te tagata. Koia, neʼe fakatupu e te ʼAtua he nofoʼaga taulekaleka maʼa te tagata mo he sino mo he ʼatamai haohaoa ke feala hana maʼuli ʼo talu ai. (Lau ia Apokalipisi 4:11.) Pea tahi, ʼe ina foaki te meʼa kai ki te ʼu “kakano [fuli], koteuhi e heegata tona manavaofa.”—Pesalemo 136:25.

9. Logo la ko Sehova ko te ʼAtua ʼofa, kaʼe kotea ʼe fehiʼa ki ai?

⁹ Ko Sehova ko te ʼAtua ʼofa, kaʼe ʼe fehiʼa ki te meʼa ʼae ʼe kovi. Ohage la, ʼe ui fenei ia Pesalemo 5:5-7 ʼo ʼuhiga mo Sehova: “E mole ko he Atua ia koe e mau tona fiafia i te kovi . . . E ke fehia kia natou fuli ae e natou fai te agakovi.” Pea ʼe toe fehiʼa ki “te kau fakapo mo te kau kaihaa.”

10, 11. (1) Kotea ka hoko anai ki te hahaʼi agakovi? (2) ʼE fakapale feafeaʼi anai e Sehova te hahaʼi fakalogo?

¹⁰ ʼI tona temi totonu, ʼe pulihi anai e Sehova te agakovi ʼi te ʼatulaulau katoa. Koteʼuhi ko ia ko te ʼAtua ʼofa pea ʼe fehiʼa ki te ʼu meʼa ʼae ʼe kovi. ʼE fakapapauʼi fenei mai ʼi te Folafola ʼa Te ʼAtua: “E motuhi anai te kau agakovi; kae ko natou ae e amanaki lelei [kia Sehova] e natou mau anai te fenua. Kei toe pe he kii temi siisii pea e puli anai te tagata agakovi.” Ko te ʼu fili ʼo Sehova “e natou pupuli anai o hage ko te kohu.”—Pesalemo 37:9, 10, 20.

¹¹ ʼE toe fakapapauʼi fenei mai ʼi te Folafola ʼa Te ʼAtua: “E mau anai e te kau agatonu te fenua, pea e natou nonofo anai i ai o heegata.” (Pesalemo 37:29) Ko te hahaʼi agatonu “e natou fiafia lahi i te tokalelei.” (Pesalemo 37:11) Kotea tona tupuʼaga? Koteʼuhi ko totatou ʼAtua ʼofa ʼe ina fai tuʼumaʼu pe te meʼa ʼae ʼe lelei ki ʼana kaugana agatonu. ʼE ui fenei ʼi te Tohi-Tapu: “E ina holoholoi anai te u loimata fuli mai onatou mata, pea e mole toe mau anai te mate: E mole toe mau anai he tagi, mo he lauga, mo he mamahi, koteuhi kua puli leva te u uluaki mea.” (Apokalipisi 21:4) Ko he ka haʼu taulekaleka ʼae ka maʼu anai e te hahaʼi agatonu ʼae ʼe fakafetaʼi ki te ʼofa ʼo te ʼAtua!

12. Ko ai koa te tagata “haohaoa”?

¹² ʼE ui fenei ʼi te Tohi-Tapu: “Ke ke sio ki te tagata ae e haohaoa. Pea ke ke tokaga ki te tagata ae e agatonu; koteuhi e i ai he hakoga ki te tagata o te tokalelei. Kae e maumaui fuli te kau agatuu, pea e motuhi te hakoga o te kau agakovi.” (Pesalemo 37:37, 38) Ko “te tagata ae e haohaoa” pe ʼe agatonu ʼe ko ʼae ʼe ina ako ke ina iloʼi ia Sehova mo tona ʼAlo pea ʼe ina fai te finegalo ʼo te ʼAtua. (Lau ia Soane 17:3.) Pea ʼe tui papau “e puli te malamanei, mo ona holi foki; kae e nofo o heegata ae e ina fai te finegalo o te Atua.” (1 Soane 2:17) Koia, ʼe maʼuhiga ke tou falala kia Sehova pea ke tou mulimuli ʼi tona ala koteʼuhi kua ovi mai te fakaʼosi ʼo te malamanei.—Pesalemo 37:34.

13. Kotea te meʼa ʼofa lahi ʼo te ʼAtua kia tatou?

¹³ Logo la ʼe tou agahala, kaʼe ʼe feala pe ke tou fakalogo ki te ʼAtua. ʼAki te sakilifisio ʼo Sesu, te meʼa ʼofa lahi ʼo te ʼAtua kia tatou, ʼe feala ai ke tou maʼu he ʼu felogoʼi lelei mo Sehova. Pea ʼe feala ai ki te hahaʼi agatonu ke natou maʼu te ʼateaina mai te agahala mo te mate ʼaki te sakilifisio ʼaia. (Lau ia Loma 5:12; 6:23.) ʼI te ʼu temi loaloaga ʼi tana kei maʼuli ʼi selo, neʼe nofo agatonu ia Sesu ki te ʼAtua. Koia, neʼe tui papau ai ia Sehova, ʼe nofo agatonu anai tona ʼAlo ʼi te kele. ʼI tona ʼuhiga Tamai ʼofa, neʼe mamahi ʼaupito ia Sehova ʼi tana sio ki te gaohi koviʼi e te hahaʼi ia tona ʼAlo. Kaʼe, neʼe lagolago agatonu ia Sesu ki te ʼuhiga pule ʼo te ʼAtua. Pea neʼe ina fakaha ai ʼe feala ki he tagata haohaoa ke nofo agatonu ki te ʼAtua ʼi te ʼu faigataʼaia ʼaupito.

14, 15. Kotea te ʼu fua lelei ʼe maʼu e te tagata ʼi te mate ʼo Sesu?

¹⁴ Logo la te ʼu ʼahiʼahi fakamataku, kaʼe neʼe nofo agatonu ia Sesu pea neʼe lagolago ki te pule faʼitaliha ʼa Sehova. ʼE tonu ke tou lotofakafetaʼi koteʼuhi ʼaki tana sakilifisioʼi tona maʼuli, neʼe fakafealagia ai e Sesu ki te tagata ke maʼuli ʼo talu ai ʼi te malama foʼou ʼo te ʼAtua! Neʼe talanoa te apositolo ko Paulo ki te ʼofa ʼo Sehova pea mo Sesu ʼaki te sakilifisio faitotogi. Neʼe ina ui fenei: “ ʼE moʼoni, ʼi te temi ʼae neʼe kei tou vaivai ai, ko Kilisito, ʼi te temi ʼae kua fakakatofa, neʼe mate ki te kau agahala. ʼE faigataʼa anai ki he tahi hana mate maʼa he tagata ʼe faitotonu, kaʼe ʼe lagi mate moʼoni anai he tahi maʼa te tagata agalelei. Kaʼe ko te ʼAtua ʼe ina fakaha totonu mai kia tatou tona ʼofa ʼi te faʼahi ʼaia, ʼi te temi ʼae neʼe kei tou agahala ai, neʼe mate ia Kilisito maʼa tatou.” (Loma 5:6-8, MN) Pea neʼe ui fenei e te apositolo ko Soane: “Nee fakaha te ofa o te Atua kia tatou i tana fekaui mai tona Alo ulutokotahi ki te malamanei, o uhi ke tou mauli ia ia. Pea koeni te ofa aena: E mole ko tatou ae nee oofa ki te Atua, kae ko te Atua ae nee ofa kia tatou pea nee ina  fekaui mai tona Alo o hage ko he vikitima ke totogi ai atatou agahala.”—1 Soane 4:9, 10.

¹⁵ Neʼe ui fenei e Sesu: “Nee ofa lahi . . . te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia ke aua naa mate ia, kae ke ina mau te mauli heegata.” (Soane 3:16) Logope te lotomamahi ʼaupito ʼo Sehova, kaʼe neʼe ina foaki tona ʼAlo ko he totogi. ʼO ha mai ai tona ʼofa moʼoni ʼae ki te tagata. Pea ko te ʼofa ʼaia ʼe heʼe gata. ʼE ui fenei e Paulo: “E au iloi papau e mole ko te mate, pe ko te mauli, pe ko te kau aselo, pe ko te kau tominasio, pe ko te u mea o te sekulo aeni, pe ko te u mea o te sekulo ka hau, pe ko te u mafimafi, pe ko te maoluga, pe ko te loloto, pe ko he tahi age mea nee fakatupu e feala anai tana fakamavae tatou mai te ofa o te Atua nee fakaha ia Sesu-Kilisito totatou Aliki.”—Loma 8:38, 39.

16. Kotea te Puleʼaga Fakamesia, pea ko ai ʼae neʼe filifili e Sehova ke ina takitaki?

¹⁶ Ko te Puleʼaga ʼo te ʼAtua peʼe ko te Puleʼaga Fakamesia, ko he tahi fakamoʼoni ʼaia ʼo te ʼofa ʼo Sehova ki te tagata. Neʼe kua hinoʼi e Sehova ia Sesu Kilisito ko te Takitaki ʼo te Puleʼaga ʼaia, he ʼe tuha mo ia pea ʼe ʼofa ki te hahaʼi. (Taaga Lea 8:31). Neʼe filifili e te ʼAtua te toko 144 000 hahaʼi ke kaugā ʼafio mo Kilisito ʼi selo. Pea ʼi tonatou fakatuʼuake, ʼe natou ʼave anai mo natou tanatou mahino ki te ʼu aluʼaga ʼo te maʼuli ʼo te tagata. (Apokalipisi 14:1) ʼI te kei maʼuli ʼa Sesu ʼi te kele, ko te Puleʼaga neʼe ko te kupu tafitō ʼaia ʼo tana faiakonaki. Pea neʼe ina akoʼi ʼana tisipulo ke natou faikole fenei: “Tamatou Tamai ae e nofo i te atu lagi! Ke tapuha tou huafa; ke aumai tau pule; ke fai tou finegalo i te kele o hage ko selo.” (Mateo 6:9, 10) ʼE tou fakaʼamu ke fakahoko la te faikole ʼaia, pea ke tou maʼu tapuakina ʼi te Puleʼaga ʼo te ʼAtua.

17. Kotea te kehekehe ʼa te takitaki ʼa Sesu mo te tagata?

¹⁷ ʼE kehekehe te takitaki ʼofa ʼa Sesu mo te takitaki ʼa te tagata. Ko te pule ʼa te tagata neʼe iku ki te ʼu tau ʼo mamate ai te toko lauʼi miliona hahaʼi. Kaʼe ko totatou Takitaki ko Sesu, ʼe ʼofa moʼoni ia kia tatou pea ʼe ina faʼifaʼitakiʼi lelei te ʼu kalitate ʼo te ʼAtua, tafitō ia tona ʼofa. (Apokalipisi 7:10, 16, 17) Neʼe ui fenei e Sesu: “Kotou omai kia au, koutou fuli ae e vaivai mo mafasia, pea e au foaki atu anai kia koutou he malolo. Kotou too kia koutou taku amo taki, pea kotou tali aku akonaki, koteuhi e au agamalu mo agavaivai; pea e kotou mau anai te malolo ki okotou laumalie. Koteuhi e malu taku amo taki, pea e maamaa taku kavega.” (Mateo 11:28-30) ʼE ko he fakapapau ʼofa!

18. (1) Kotea neʼe hoko talu mai te taʼu 1914? (2) Kotea anai ka tou vakaʼi ʼi te alatike ʼae ka hoa mai?

¹⁸ ʼE fakaha ʼi te Tohi-Tapu ko te Puleʼaga ʼo te ʼAtua neʼe kamata ʼafio ʼi selo ʼi te taʼu 1914. Talu mai ai, neʼe fakatahitahiʼi te toega ʼo te kau fakanofo ʼae ka ʼafio anai mo Sesu ʼi Selo, mo te toe hahaʼi tokolahi ʼae ka hao anai ʼi te fakaʼosi ʼo te malama ʼaeni, pea ʼe natou ulu anai ki te malama foʼou. (Apokalipisi 7:9, 13, 14) ʼE feafeaʼi te tuputupu ʼo te toe hahaʼi tokolahi ia ʼaho nei? Kotea ʼe fakamaʼua e te ʼAtua kia natou ʼaia? ʼE tou vakaʼi anai te ʼu fehuʼi ʼaia ʼi te alatike ʼae ka hoa mai.