1. Ana ndamo jekulungwa ja Mlungu jili cici, soni ana kumanyilila yeleyi kukusakwaya catuli mwakusam’wonela Mlungujo?

MALOŴE ga Yehofa, Baibulo, gakusatusalila kuti “Mlungu ali cinonyelo.” Baibulo jikusasala yeleyi ngaŵaga ligongo lyakuti cinonyeloco cili jimo mwa ndamo syambone sya Mlungu nambo ligongo lyakuti “Mlungu ali cinonyelo.” (1 Yoh. 4:8) Cinonyelo cili ndamo jekulungwa ja Mlungu. Yehofa nganagamba kola cinonyelo nambo jwalakwejo ali cinonyeloco. Yili yakusangalasya kwabasi kumanyilila kuti Mkupanganya jwa yindu yosope ali Mlungu jwacinonyelo. Yosope yakusatenda akusayitenda ligongo lyacinonyelo.

2. Ana cinonyelo ca Mlungu cikusatusimicisya ya cici? (Alole ciwulili cacili penanici.)

² Cinonyelo cakwete Mlungu pa yakupanganyikwa yakwe cikusatusimicisya kuti yakulinga yakwe yosope yakwayana ni ŵandu yicikwanilicikwa soni yicakamucisya mnope wosope ŵacaciŵa pasi pa ulamusi wakwe. Mwambone, ligongo lya cinonyelo Yehofa “atamilikasisye lisiku lyakusaka kuti calamule mwacilungamo cilambo capasi  kulikose kwakuli ŵandu, kupitila mwa mundu jwamsagwile,” jwali Yesu Klistu. (Mase. 17:31) Mpaka tuŵe ŵakusimicisya kuti yeleyi yicitendekwa. Ŵandu ŵakulungama soni ŵakusampikanila cacipocela majali gangamala.

3. Ana umi ukaŵele watuli yikaŵe kuti Mlungu ngakusanonyela ŵandu?

³ Ana akuganisya kuti umi ukaŵele watuli yikaŵe kuti Mlungu ngakusiŵanonyela ŵandu? Tukusosekwa kulola yayiŵele mkutendekwa pacilambopa mkati mwa maulamusi ga ŵandu gakulongoleledwa ni mlungu jwangali cinonyelo soni jwangalwe, Satana. (2 Akoli. 4:4; 1 Yoh. 5:19; aŵalanje Ciunukuko 12:9, 12.) Yayiŵele mkutendekwa pasi pa maulamusiga yikulosya mwaukaŵelele umi yikaŵe kuti Mlungu ngakusatunonyela.

4. Ligongo cici Yehofa ŵakundile kuti ŵandu ajimucile ulamusi wakwe?

⁴ Satana ŵajimucile Ulamusi wa Yehofa ni ŵalitendekasisye liŵasa lyandanda kutendasoni yakulandanayo. Jwalakwe ŵasisisye kuti Mlungu ngaŵa mkuŵa Jwakulamulila Jwacilambo cosope. Pakutenda yeleyo, jwalakwe ŵalosisye kuti ulamusi wakwe ni wampaka uŵe wambone kupunda wa Mlungu. (Gen. 3:1-5) Kwakandaŵi kamnono, Yehofa ŵamkundile Satana kuti alosye naga yaŵasalaga yili yisyene. Yakuyicisya yakwe yilosisye kuti Satanajo kapena mundu ngaŵa mkuŵa jwakulamulila jwambone.

5. Ana yayiŵele mkwatendecela ŵandu yikulosya cici?

⁵ M’yaka 100 yipiteyi, ŵandu ŵakupunda 100 miliyoni awile ligongo lya ngondo. Moŵa agano yindu yikusakalilasakalilape. Yeleyi ni yajasasile Baibulo kuti yicitendekwa “m’moŵa gambesi” ga cilamboci pandaŵi jele “ŵandu ŵakusakala soni ŵacinyengo cacisakalilasakalilape.” (2 Tim. 3:1, 13) Yayiŵele mkutendekwa pacilambopa yikulosya kuti yajasasile Baibulo yakuti, “Une ngumanyilila cenene, wawo Yehofa, kuti mundu ngakombola kusamala matala gakwe. Mundu jikape ngakomboleka kulondesya kajende kakwe,” yili yisyene. (Yer. 10:23) Yehofa nganiŵapanganya ŵandu m’litala lyakuti alilamulileje jika kapena kutenda yindu mwangamjegamila jwalakwejo.

6. Ligongo cici Mlungu akundile yakusakala kuti yitendekweje?

⁶ Pakunda kuti yakusakala yijendelecele kwakandaŵi, Yehofa alosisye kuti ulamusi wakwe ni wampaka wakamucisye mnope ŵandu. Yehofa pacacijonanga ŵandu ŵakusakala, ngasakunda kuti mundu jwalijose ajimucilesoni ulamusi wakwe. Jwalakwe cacatyosya mwacitema ŵandu ŵakwimucilawo pakulola yayiŵele yili mkutendekwa pacilambopa soni ngasakunda kuti kusakala kutandilesoni.

7, 8. Ana Yehofa alosisye cinonyelo cakwe m’matala gapi?

⁷ Yehofa alosisye kuti akusatunonyela m’matala gejinji. Mwambone, agambe ganisya mwayiŵelele yam’cipago. Pana makuga ga ndondwa gakwana mabiliyoni, soni likuga lililyose likwete ndondwa syejinji mnope. Jimo mwa ndondwa jajikusasimanikwa mulikuga lya ndondwa lya Milky Way, jili lyuŵa. Yikaŵe kuti kwangali lyuŵa pacilambopa ngamkanipasimanikwa caumi cilicose. Yakupanganyikwa yosopeyi yili umboni wakulosya kuti Yehofa ni jwali jwakuŵajilwa kulamulila, soni yikulosya ndamo syakwe mpela macili, lunda soni cinonyelo. Kusala yisyene, “Cipanganyile cilambo capasi kwawula msogolo, ndamo sya Mlungu jwangawoneka ni meso sikuwonecela cenene. Ndamo sya Mlungu syelesi, atamose macili gakwe gangamala  soni Umlungu wakwe, yikuwonecela m’yindu yaŵapanganyisye.”—Alo. 1:20.

⁸ Yehofa ŵacipanganyisye cilamboci m’litala lyakuti paŵeje yaumi. Ŵapanganyicisye ŵandu mgunda wakusalala wa paladaiso soni ŵapele nganisyo soni yilu yamlama yayikakombolece kutama mpaka kalakala. (Aŵalanje Ciunukuko 4:11.) Konjecesya pelepa, jwalakwe “akusapeleka cakulya kwa yaumi yosope. Pakuŵa umbone mtima wakwe wangamala uciŵapo mpaka kalakala.”—Sal. 136:25.

9. Ana Yehofa akusaŵengana ni cici soni ligongo cici?

⁹ Atamose kuti Yehofa ali Mlungu jwacinonyelo, nambo jwalakwe akusaŵengana ni yakusakala. Mwambone, lilemba lya Salimo 5:4-6 likusati, “Pakuŵa wawojo nganaŵa Mlungu jwakusasangalala ni yakusakala . . . Akusaŵengana ni wosope ŵakutenda yakusakala.” Lilembali likusatisoni, “Mundu jwakuwulasya ŵane soni jwacinyengo, Yehofa akusaŵengana najo.”

10, 11. (a) Ana ŵandu ŵakusakala cicatendecela cici? (b) Ana ŵandu ŵakulungama cacipocela majali gapi?

¹⁰ Pakuŵa Mlungu ali jwacinonyelo soni akusaŵengana ni yakusakala, alinganyisye yakumasya yakusakala yosope pacilambo capasi. Maloŵe ga Mlungu gakusasala kuti, “Ŵakutenda yakusakala cacawulaga, nambo ŵakwembeceya Yehofa cacipocela cilambo capasi. Kasigele kandaŵi panondi, ŵakutenda yakusakala cacimala . . . Acimmagongo ŵa Yehofa cacimala mpela mopo wakusalala mnope. Cacimala mpela mwalikusamalila lyosi.”—Sal. 37:9, 10, 20.

¹¹ Nambope, Maloŵe ga Mlungu gakusasalasoni kuti, “Ŵakulungama cacipocela cilambo capasi. Ni cacitamaga mwelemo kwandaŵi josope.” (Sal. 37:29) Ŵakulungamaŵa “cacisangalala ni mtendele wejinji.” (Sal. 37:11) Yeleyi yicikwanilicikwa ligongo ndaŵi syosope Mlungu jwetu jwacinonyelo akusiŵatendela yindu yambone ŵakutumicila ŵakwe ŵakulupicika. Baibulo jikusatusalilasoni kuti, “Jwalakwe cacipukuta misosi josope m’meso mwawo, nipo ciwa ngasicipagwasoni. Ngasipapagwasoni kulila, kuwuwula kapena kupikana kupweteka. Yindu yakala yiciŵa yili yimasile.” (Ciu. 21:4) Wosopewe ŵatukusayamicila cinonyelo ca Yehofa soni kumpikanila mpela jwakulamula jwetu tukwembeceya msogolo mwambone mnope.

12. Ana ‘ŵandu ŵangalemwa’ ali ŵani?

¹² Baibulo jikusatusalila kuti, “Mlole mundu jwangalemwa soni mlolecesye mundu jwakulungama. Pakuŵa sogolo ja mundu jweleju jili mtendele. Nambo ŵandu wosope ŵakusakala cacijonanjikwa. Msogolo, ŵandu ŵakusakala caciwulajikwa.” (Sal. 37:37, 38) “Mundu jwangalemwa” ni jwakusammanyilila Yehofa ni Mwanagwe soni akusatenda lisosa lya Mlungu. (Aŵalanje Yohane 17:3.) Mundu jweleju akusagawona maloŵe ga pa 1 Yohane 2:17 kuŵa gakusosekwa mnope. Maloŵego gakusati, “Cilambo cikwawula yimpepe ni yakumbila yakwe, nambo jwakutenda lisosa lya Mlungu cacitama kwangamala.” Mbesi pajikuŵandicila mnope, tukusosekwa “kumjembeceya Yehofa ni kuya matala gakwe.”—Sal. 37:34.

13. Ana litala lyekulungwa lyalosisye Yehofa kuti akusiŵanonyela ŵandu lili lyapi?

¹³ Atamose kuti tuli ŵangali umlama mpaka ‘tukuye matala ga Yehofa.’ Mpaka tuŵesoni paunasi wambone ni jwalakwe ligongo lya mbopesi jaciwombolo ja Yesu, jajili litala lyekulungwa lyakulosya kuti Mlungu akusatunonyela. Jwalakwe ŵapelece ciwomboloci pakusaka kwagopola ŵandu ŵakupikanila ku  ulemwa soni ciwa yaŵapelele Adamu. (Aŵalanje Aloma 5:12; 6:23.) Yesu paŵaliji kwinani ŵaliji jwakulupicika mnope kwa Mlungu. M’yoyo Yehofa ŵakulupililagasoni kuti Mwanagwejo cacijendelecela kuŵa jwakulupicika pacilambo capasi. Mpela Mtati jwacinonyelo, Mlungu yampwetece mnope paŵawonaga ŵandu ali mkumtendela Yesu yindu yangali cilungamo. Nambope, Yesu ŵajendelecele kuŵa kumbali ja ulamusi wa Mlungu. Pakutenda yeleyo, jwalakwe ŵalosisye kuti mundu jwamlama mpaka ajendelecele kuŵa jwagoloka kwa Yehofa atamose pasimene ni yakusawusya yatuli.

14, 15. Ana ciwa ca Yesu cakamucisye catuli ŵandu?

¹⁴ Yesu ŵajendelecele kuŵa jwagoloka soni kuŵa kumbali ja ulamusi wa Yehofa atamose kuti ŵasimene ni yakulingwa yejinji soni ŵawile ali jwakulupicika kwa Atati ŵakwe. Tukusosekwa kuŵa ŵakusangalala ligongo lyakuti ciwa ca Yesu cakamucisye kuti ŵawombole ŵandu soni kwawugulila litala lyakuti akapocele umi wangamala mu cilambo casambano. Ndumetume Paulo ŵalosisye kuti ciwomboloci cikusalosya kuti Yehofa soni Yesu akusatunonyela. Jwalakwe ŵatite, “Pakuŵa patwaliji ŵakulopotoka, Klistu ŵawilile ŵandu ŵangalambila Mlungu pandaŵi jakuŵajilwa. Pakuŵa yili yakusawusya kuti mundu jwine am’wilile mundu jwakulungama. Yili yisyene kuti mundu jwine mpaka alimbe mtima ni kum’wila mundu jwambone. Nambo Mlungu akulosya cinonyelo  cakwe kwetuwe, mwati patwaliji ŵakulemwa, Klistu ŵatuwilile.” (Alo. 5:6-8) Ndumetume Yohane ŵalembilesoni kuti, “Mlungu ŵalosisye cinonyelo cakwe kwetuwe pakuŵa ŵamtumisye Mwanace jwakwe jwakupagwa jika pacilambo capasi kuti tupate umi kupitila mwa jwalakwejo. Cinonyelo celeci cikulosya kuti m’weji nganitumnonyela Mlungu, nambo jwalakwe ni jwaŵatunonyele ni kutumisya Mwanace jwakwe mpela mbopesi jakusiŵa ulemwa wetu.”—1 Yoh. 4:9, 10.

¹⁵ Pakwamba ya cinonyelo ca Mlungu kwa ŵandu, Yesu ŵatite, “Mlungu ŵacinonyele mnope cilambo mwati ŵapelece Mwanace jwakwe jwakupagwa jika, kuti jwalijose jwakumkulupilila jwalakwe akajonasika, nambo aŵe ni umi wangamala.” (Yoh. 3:16) Mlungu akusiŵanonyela mnope ŵandu mwati ŵakundile kutenda cindu cakupweteka mnope cacili kupeleka Mwanace jwakwe mpela mbopesi. Cinonyelo cakwe cili cangamala. Ndumetume Paulo ŵalembile kuti, “Simicisye mumtima mwangu kuti ciwa, umi, malayika, maboma, yindu yayipali, yindu yayikwisa m’songolo, macili, msingu, kusokoka, kapena cakupanganyikwa cine cilicose, ngasicitulekanganya ni cinonyelo ca Mlungu cacili mwa Klistu Yesu Ambuje ŵetu.”—Alo. 8:38, 39

16. Ana Ucimwene wa Mesiya uli cici, soni ana Yehofa asagwile ŵani kuŵa Mwenye jwa Ucimwenewo?

¹⁶ Mlungu ŵalosisyesoni kuti akusatunonyela paŵatamilikasisye Ucimwene wa Mesiya. Yehofa apelece kala Ucimwenewu kwa Mwanagwe, jwakusiŵanonyelasoni ŵandu soni ali jwakuŵajilwa kulamulila. (Miy. 8:31) Mlungu asagwile ŵandu ŵakwana 144,000 kuti calamulile ni Klistu kwinani. Jemanjaji pajimwice kuŵawe akusamanyililape mwaŵelele ŵandu. (Ciu. 14:1) Ngani jekulungwa jaŵajiganyaga Yesu jaliji jakwamba Ucimwene, soni ŵajiganyisye ŵakumkuya ŵakwe kupopela kuti, “Atati ŵetu ŵakwinani, lina lyawo liswejesyedwe. Ucimwene wawo uyice. Lisosa lyawo litendekwe pacilambo capasi, mpela kwinani.” (Mat. 6:9, 10) Tukwembeceya mwalung’wanu pandaŵi jele lipopelo lyeleli licikwanilicikwa. Pandaŵijo Ucimwene wa Mlunguwu uciyikasya majali gangaŵalanjika.

17. Ana ulamusi wa Yesu ni wa ŵandu ŵakulemwa ukulekangana catuli?

¹⁷ Ulamusi wa Yesuwu uli wakulekangana mnope ni maulamusi ga ŵandu gagatendekasisye kuti ŵandu ŵajinji awe pangondo. Yesu akusiŵanonyela mnope ŵandu soni akusasyasya ndamo syambone sya Mlungu mnopemnope cinonyelo cakwe. (Ciu. 7:10, 16, 17) Yesu ŵatite, “Ayice kwa une wosope ŵakamula masengo gakusitopesya ni ŵakusitopelwa nipo cinjapumusya. Atwicile likongwa lyangu ni alijiganye kwa une, ligongo ndili jwakufasa ni jwakulinandiya mtima, ni tacipata cipumulisi ca umi wawo. Pakuŵa likongwa lyangu lili lyakuŵeŵa soni ndundu syangu sili syangasitopa.” (Mat. 11:28-30) Yeleyi yikulosya kuti Yesu akusatunonyela mnope.

18. (a) Ana Ucimwene wa Mlungu uŵele uli mkutenda cici kutandila paŵawutamilikasisye? (b) Ana tucitagulilana cici mungani jakuyicisya?

¹⁸ Yakulocesya ya m’Baibulo yikusalosya kuti Ucimwene wa Mlungu wakwinani wawutamilikasisye mu 1914 pandaŵi jakuŵapo kwa Klistu. Kutandila pandaŵijo, Mlungu aŵele ali mkusonganganya ŵandu ŵacacilamulila yimpepe ni Yesu kwinani, soni “likuga lyekulungwa lya ŵandu” ŵacacikulupuka mbesi jacilamboci ni kwinjila m’cilambo casambano. (Ciu. 7:9, 13, 14) Ana likuga lyekulungwali likusile catuli moŵa agano? Ana ŵandu ŵali m’likugali akusosekwa kutenda cici? Ngani jakuyicisya jicijanga yiwusyo yeleyi.