Jehovah e Ir e Got ko T’ufeg
Jehovah e Ir e Got ko T’ufeg
“Got e t’ufeg.”—1 JOHN 4:16.
TANG: 18, 51
RAYOG NIM FULWEG?
Uw rogon nra yib angin e t’ufeg rok Got ngak e piin ni yad ra par ni yad ba yul’yul’?
Uw rogon ni ke dag Jehovah nib t’uf e girdi’ rok ni yugu aram rogon ni yad bogi tadenen?
Mang boch ban’en ni ke rin’ Gil’ilungun fare Messiah ni kab kafram i yib ni be micheg ngom nriyul’ nib t’uf e girdi’ rok Got?
1. Mang e bin th’abi lingagil i fel’ngin Got? Faan ga ra nang e re n’ey, ma ra uw rogon Got u wan’um?
THIN rok Jehovah ni kan thagthagnag u Bible e be yog ni “Got e t’ufeg.” Gathi kemus ni be yog ni t’ufeg e aram reb ko pi fel’ngin Got nrib manigil, ya ri be yog ni “Got e t’ufeg.” (1 John 4:16) Aram e re fel’ngin nth’abi lingagil nge th’abi ga’ fan. Gathi kemus ni bay e t’ufeg rok Jehovah, ya ir e t’ufeg. Ere, rib manigil ni kad nanged ni En ni Ke Sunmiy e palpalth’ib nge urngin ban’en nib fas e ir reb e Got ko t’ufeg, ma ma rin’ urngin ban’en u fithik’ e t’ufeg!
2. Bochan ni gad ba t’uf rok Got, ma mang e be micheg e re n’ey ngodad? (Mu guy e sasing ni bay u tabolngin e re article ney.)
2 Re t’ufeg nem ni bay rok Got ngak e pi n’en ni ke sunmiy e be micheg ngodad nra lebguy urngin ban’en nib m’agan’ ngay ni fan ko girdi’ u reb e kanawo’ nrib manigil, maku ra yib angin ngak e piin ni yad ra par u tan e gagiyeg rok. Bod ni, “ke turguy reb e rran ni ir e nge pufthinnag riy e fayleng ni polo’ nrogon nib mat’aw, ni nge rin’ u daken be’ nib moon ni ir e ke dugliy,” ni aram Jesus Kristus. (Acts 17:31) Rayog ni nge pagan’dad nra buch e re n’ey. Ya piin ni yad ra fol e ra yag e yafas ni manemus ngorad boch nga m’on.
N’EN NI KE M’UG NI KAB KAKROM I YIB
3. Ga be lemnag, ma uw rogon e par ko girdi’ e chiney ni faan gomanga de t’uf e girdi’ rok Got?
3 Am lemnag rarogon e par ko girdi’ ni faan gomanga dar t’ufgad rok Got. Ra i par e girdi’ ni yad e yad be gagiyegniged yad u tan gelngin fare got ko re fayleng ney ndariy e t’ufeg rok mab damumuw, ni aram Satan ni Moonyan’. (2 Kor. 4:4; 1 John 5:19; mu beeg e Revelation 12:9, 12.) Ere, be dag e re n’ey ni faanra nge maruwel gubin ban’en ndariy e t’ufeg rok Got riy ma rra gafgow urngin ban’en u palpalth’ib boch nga m’on.
4. Mang fan ni pag Jehovah ni ngan togopuluw ko gagiyeg rok nib mat’aw?
4 Nap’an ni togopuluw Moonyan’ nga rogon ni be gagiyeg Jehovah, ma aram miki waliy e gal nsom’on e girdi’ ni ngkur togopuluwgow. I togopuluw nga mat’awun Got ni nge gagiyeg, ngemu’ miki togopuluw nga rogon feni mat’aw e gagiyeg ni be tay Got. Aram fan ni yog ni kab fel’ rogon e gagiyeg nra tay ko gagiyeg ni be tay e En ni Ke Sunmiy urngin ban’en. (Gen. 3:1-5) Yugu aram rogon ni pag Jehovah Satan ni nge rin’ e n’en ni ke yog nrayog rok ni nge rin’, machane ke pag ni nge buch nib ngoch nap’an. Bochan nrib gonop Jehovah, ma aram fan ni ke pag ba ngiyal’ ni nge yan ya nge yag ni gagiyel ndariy be’ nrayog rok ni nge gagiyegnag e re palpalth’ib ney nib fel’ rogon ni bod ir. Pi n’en ni ke buch ko gagiyeg ni be tay e girdi’ ni kab kakrom i yib e be dag ndabiyog ko girdi’ ara Satan ni ngar gagiyegniged gadad nib fel’ rogon.
5. Mang e be dag e pi n’en ni ke buch ni kab kakrom i yib?
5 Nap’an fa 100 i duw ni ke yan, mab pag 100 e milyon e girdi’ ni kar m’ad u nap’an e pi mahl ni be tay e pi nam u fayleng. Chiney e be gel e kireb u fayleng i yan. Ireray e n’en ni yiiynag e Thin rok Got nra buch u nap’an e “tin tomren e rran” ko re m’ag ney, ya “girdi’ nib kireb nge piin ni yad be dake girdien Kristus e bayi gel farad kireb.” (2 Tim. 3:1, 13) Pi n’en ni ke buch ni kab kakrom i yib e be micheg nriyul’ fapi thin ni be yog e Bible ni be gaar: “Somol, gu manang ni dariy bagamad ni ir e ga’ ko gin nge sor e yafos rok ngay; dariy be’ ni bay gafan e yafos rok u pa’.” (Jer. 10:23, BT) Arrogon, de sunmiy Jehovah e girdi’ ni yad e ngar gagiyegniged yad, maku de pi’ mat’awrad ni yad e ngar guyed e n’en ni ngar rin’ed.
6. Mang fan ni ke pag Got e kireb?
6 Bochan ni ke pag Jehovah ni nge par e kireb u lan ba ngiyal’ nde n’uw nap’an, ma ke yag ni nge micheg ni kemus ni yigoo gagiyeg rok e rayog ni nge yib angin ko girdi’ nge pi n’en ni ke sunmiy. Tomuren nra thang Jehovah e piin ni yad ba kireb nge kireb ni yad be rin’, ma faanra ki guy be’ rogon ni nge togopuluw nga rogon e gagiyeg ni be tay Jehovah, ma daki t’uf ni nge pag e kireb ni nge par, ya ra chuweg ni ka ngiyal’ nem. Rayog ni nge fanay e n’en ni i buch rok boch e girdi’ kafram ni nge dag ni bay fan ni nge chuweg e piin ni yad ra togopuluw ni ka ngiyal’ nem.
KE DAG JEHOVAH NI GAD BA T’UF ROK
7, 8. Mang boch e kanawo’ ni ke dag Jehovah riy ni gad ba t’uf rok?
7 Boor e kanawo’ ni ke dag Jehovah riy ni gad ba t’uf rok. Am lemnag rogon feni ga’ nge feni manigil e palpalth’ib rodad. Bokum bilyon boch ban’en ni ka nog e galaxy ngay ni bay ko palpalth’ib rodad, ma ra reb e pi galaxy nem ma bay bokum bilyon e t’uf riy nge boch ban’en ni ka nog e planet ngay. Fayleng rodad e bay u lan fare galaxy ni ka nog e Milky Way ngay. Ma re galaxy ney e bay reb e t’uf riy ni ir e gad ma yog e yal’ ngay. Faanra dariy e yal’ ma boor mit ban’en u fayleng ndabiyog ni nge par nib fas. Gubin e pi n’ey ni kan sunmiy e be m’ug rarogon Jehovah riy ni ir e Got, maku be m’ug rarogon pi fel’ngin riy ni bod rogon gelngin, nge gonop rok, nge t’ufeg rok. Arrogon, “nap’an ni sunmiy Got e fayleng, ma fel’ngin ndabiyog ni ngan guy, ni aram gelngin ndabi m’ay biid nge rarogon ni ir Got, e kan guy nrib tamilang. Girdi’ e rayog ni nge nang fan e pi n’ey u fithik’ e pi n’en ni ke m’ay i sunumeg rok Got.”—Rom. 1:20.
8 I sunmiy Jehovah e fayleng nrayog ni nge par boch ban’en riy nib fas. Gubin ban’en ni bay u fayleng nra yib angin ko gamanman nge girdi’. I sunmiy reb e milay’ nrib fel’ yaan ni fan ko girdi’, miki sunmiy e girdi’ ni yad ba flont maku rayog ni ngar pared ni manemus. (Mu beeg e Revelation 4:11.) Maku reb e, ke “pi’ e ggan ko urngin e yafos; [ma] t’ufeg rok e ba manemus.”—Ps. 136:25, BT.
9. Uw rogon ni ma lem Jehovah yu ngiyal’, ma mang fan?
9 Yugu aram rogon ni Jehovah e ir e Got ko t’ufeg, machane ma fanenikay e tin nib kireb ban’en. Be weliy e Psalm 5:4-6, BT murung’agen Jehovah ni gaar: “Gathi ga ba Got ni ma felan’um ko ngongol ni kireb . . . Ga ba fanenikay urngin e piin kireb.” Miki ulul ngay ni gaar: “Dabum e piin ta cham, nge girdi’ ni sasalap.”
DABKI N’UW NAP’AN ME CHUW E KIREB
10, 11. (a) Mang e ra rin’ Jehovah ngak e piin ni yad ba kireb? (b) Uw rogon nra tow’athnag Jehovah e piin ni yad ma fol rok?
10 Bochan ni Jehovah e ir e Got ko t’ufeg maku ma fanenikay e tin nib kireb ban’en, ma aram fan ni ke dugliy ba ngiyal’ nra taw ngay me chuweg e kireb u ga’ngin e palpalth’ib ni kub muun e fayleng ngay. Be micheg e Thin rok ni gaar: “Piin nib pagan’rad ngak Somol e bay ur pired u daken e nam u fithik’ e gapas, machane piin ni yad ba kireb e bay ni tulufrad ngar chuwgad u daken e nam. Dab ki n’uw nap’an me yan e piin nib kireb nga bayang . . . Piin ni toogor rok Somol e bay ra chuwgad ni bod rogon e floras ni ma puf u fithik’ e pan; bay ra chuwgad ni bod e ath ni chuw.”—Ps. 37:9, 10, 20.
11 Maku reb e, ku be micheg e Thin rok Got ni: “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Ps. 37:29) Pi girdi’ ney ni yad ba mat’aw e bay ur “pired u fithik’ e gapas ni yad ba felfelan’.” (Ps. 37:11) Rib mudugil nra buch e re n’ey ya Got rodad ni ir e Got ko t’ufeg e gubin ngiyal’ ni ma rin’ e pi n’en nra yib angin ngak e pi tapigpig rok ni yad ba yul’yul’. Be gaar e Bible: “Bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” (Rev. 21:4) Rib manigil e pi n’en ni kan micheg ni fan ngak e piin nib ga’ fan e t’ufeg rok Jehovah u wan’rad, ma yad ma fol rok ni ir e Pilung rorad!
12. Mini’ e en nrayog ni nga nog e “en nib fel’” ngak?
12 Be gaar e Thin rok Jehovah: “Mup’ owchem ngak e en nib fel’, mu um yaliy e tin ni be rin’ e en nib mat’aw; be’ ni ba adag e gapas e bay pi fak ni aram e piin ni owchen; machane piin ni tadenen e bay nthang owcherad, ma piin ni owcherad e bay ni thangrad.” (Ps. 37:37, 38) “En nib fel’” e ra nang Jehovah nge Fak me rin’ e tin nib m’agan’ Got ngay. (Mu beeg e John 17:3.) Be’ ni aray rogon e rib mich u wan’ fapi thin ni bay ko 1 John 2:17 ni faan be gaar: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.” Chiney nri be’ chugur nga tungun e re m’ag ney e rib ga’ fan ni ngad ‘pared ni Somol e ke l’agan’dad ngak mu ud folgad ko tin ni ke yog.’—Ps. 37:34.
BIN TH’ABI FEL’ E KANAWO’ NI KE DAG GOT E T’UFEG ROK RIY
13. Yugu aram rogon ni gad bogi tadenen, ma mang e ke rin’ Jehovah ni fan ngodad ni be m’ug riy gelngin nrib t’uf e girdi’ rok?
13 Yugu aram rogon ndawor da flontgad, ma rayog ni ngad ‘folgad ko tin ni ke yog’ Jehovah. Ku rayog ni ngari chugur e tha’ u thildad ni bochan e n’en ni ke rin’ ni fan ngodad ni be m’ug riy gelngin nri gad ba t’uf rok. I pi’ fare biyul u daken Jesus Kristus, ma aram e n’en ni ke bing e kanawo’ ngak e piin ni yad ba yul’yul’ nrayog ni ngar chuwgad u tan gelngin e denen nge yam’ ni ke af rok Adam ngodad. (Mu beeg e Roma 5:12; 6:23.) Rib pagan’ Jehovah ngak Fak ni kari maagirag rok ni bochan e ba n’uw nap’an ni i par u tharmiy nib yul’yul’ ngak. Bochan nrib t’uf Jesus rok Jehovah, ma dariy e maruwar riy nrib gel e kireban’ ni i tay u nap’an ni i guy gelngin e gafgow ni un tay ngak Jesus u nap’an ni immoy u fayleng. Machane, i par Jesus nib yul’yul’ ngak Jehovah me tayfan mat’awun e gagiyeg rok me dag ni mus ngak be’ nib flont nrayog ni nge par nib yul’yul’ ngak Jehovah ndemtrug gelngin e magawon nra mada’nag.
14, 15. Mang angin e yam’ ni ke tay Jesus?
14 Yugu aram rogon gelngin e skeng ni yib ngak Jesus, ma i tayfan mat’awun e gagiyeg rok Jehovah me par nib yul’yul’ ngak nge mada’ ko ngiyal’ ni yim’ riy. Ere, thingar da felfelan’gad ni ke yag ni nge biyuliydad Jesus u daken e yam’ ni tay, ma ke yag ni nge mab e kanawo’ ngodad bayay ni ngki yag e yafas ndariy n’umngin nap’an ngodad u lan e bin nib beech e fayleng ni ke micheg Got! I tamilangnag apostal Paul rogon ni ke m’ug nri gad ba t’uf rok Jehovah nge Jesus u nap’an ni yog ni gaar: “Ngiyal’ ni baaram ni ka gadad be par ndabiyog ni ngad ayuweged gadad, me yim’ Kristus ni fan ngak e girdi’ nib tagan ko ngiyal’ ni turguy Got. Rib mo’maw’ ni nge pi’ be’ e pogofan rok nge yim’ ni fan ngak be’ nib mat’aw. Sana rayog ni nge pi’ be’ e pogofan rok nge yim’ ni fan ngak be’ nib fel’. Machane Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad!” (Rom. 5:6-8) Ki yoloy apostal John ni gaar: “Baaray rogon ni dag Got ni gadad ba t’uf rok: i l’og Fak ni kari maagirag rok ngaray nga fayleng ni fan e nge yog e yafos ngodad u daken. Baaray rogon ni gadad ba t’uf rok Got: gathi ud pired nib t’uf Got rodad, ya ud pired ni gadad ba t’uf rok me l’og Fak nge yib, nu daken Fak e nge n’ag Got fan e denen rodad riy.”—1 John 4:9, 10.
15 I weliy Jesus murung’agen e t’ufeg rok Got ko girdi’ ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Bochan nrib t’uf e girdi’ rok Got ma aram fan nde tel Fak ko girdi’ ni yugu aram rogon nrib tolang puluwon e n’en ni ke pi’ ni fan ngodad. T’ufeg rok e dabi mus. Gad manang ni gubin ngiyal’ nra ud pared ni gad ba t’uf rok. I yoloy Paul ni gaar: “Rogon ni gadad ba t’uf rok e mmudugil u wun’ug ndariy ban’en nrayog ni nge daregdad riy, ndemtrug ko yam’ ara yafos; ara pi engel ara yugu boch e kan ni be gagiyeg u tharmiy ara gelngin e kan; ara tin ni bay e chiney ara tin ni bay yib; ara bin nu lang e tamilang ara bin nu ar e tamilang—dariy ban’en u fithik’ urngin e tin ni ke sunumiy Got nrayog rok ni nge daregdad u rogon ni gadad ba t’uf rok Got ni ke yog ngodad u daken Kristus Jesus ni ir e Somol rodad.”—Rom. 8:38, 39.
BE GAGIYEG GIL’ILUNGUN GOT E CHINEY
16. Mang Gil’ilungun fare Messiah, ma mini’ e ke pi’ Jehovah mat’awun ni nge gagiyegnag e re Am nem?
16 Gil’ilungun fare Messiah ni ke sunmiy Got e ku aram reb e kanawo’ ni be m’ug riy nri gad ba t’uf rok. Ke pag Jehovah fan e re am ney ngak Fak ni bochan e ba t’uf e girdi’ rok Fak maku ir e rayog rok ni nge gagiyegnag e re am ney. (Prov. 8:31) Ku bay 144,000 e girdi’ ni ke mel’eg Got ni ngar uned ngak Jesus ko gagiyeg u tharmiy. Ere, nap’an ni yad ra yim’ min fasegrad ko yam’ nga ranod nga tharmiy, ma yad ra yan ngaram ni boor ban’en u rarogon e par ko girdi’ ni yad manang. (Rev. 14:1) Gil’ilungun Got e aram kenggin e machib ni i tay Jesus, me fil ngak pi gachalpen ni ngar meybilgad ni nge lungurad: “Chitamangimad ni ga bay u tharmiy: Ngan tay fan fithingam nib thothup, ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matt. 6:9, 10) Dariy e maruwar riy nnap’an nra lebug e re meybil ney ma ri boor e tow’ath nra yag ngak e piin ni yad ra fol!
17. Mu weliy rogon nib thil e gagiyeg nra tay Jesus ko gagiyeg ni be tay e girdi’ ni tadenen.
17 Rib gel e thil ko gagiyeg nra tay Jesus u tharmiy nge gagiyeg ni be tay e girdi’. Ya Jesus e ra gagiyegnag e girdi’ u fithik’ e t’ufeg, ma piin ni yad be gagiyeg e chiney e yad be tay boch e mahl ni bokum milyon e girdi’ ni yad be yim’ riy! Rib t’uf e girdi’ rok Jesus, maku ma m’ug pi fel’ngin Got rok, nrib ga’ ni t’ufeg. (Rev. 7:10, 16, 17) I yog Jesus ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matt. 11:28-30) Biney e thin ni ke micheg Jesus ngodad e be m’ug riy nri gad ba t’uf rok!
18. (a) Mang e be rin’ Gil’ilungun Got ni ka nap’an e duw ni 1914? (b) Mang e gad ra weliy ko bin migid e article?
18 Be tamilangnag e pi yiiy u Bible ni tabab Gil’ilungun Got ko gagiyeg u tharmiy u nap’an e duw ni 1914. Ka aram nap’an i yib ni be kunuy Got e piin ni yad ra un ngak Jesus ko gagiyeg ni ka yad bay u fayleng nge fapi girdi’ nib “pire’ ni pire’” ni yad ra magey ni yad ba fas u tungun e re m’ag nib kireb ney mar thapgad nga lan e bin nib beech e fayleng. (Rev. 7:9, 13, 14) Ke uw urngin e piin ni yad ba muun ko re ulung ney nib pire’ girdien e chiney? Mang e thingari rin’ e piin ni yad ba muun ko re ulung ney? Ireray e n’en ni gad ra weliy ko bin migid e article.
[Deer ni ngan pi’ e fulweg riy]
