1. ¿Máakalmáak le modos maas ku yeʼesik Diosoʼ, yéetel bix k-uʼuyikba yoʼolal le baʼaxoʼob u beetmoʼ?

LE Bibliaoʼ ku yaʼalikeʼ «Dioseʼ yaabilaj» (1 Juan 4:8). ¿Baʼax jach tu jaajil u kʼáat u yaʼal lelaʼ? Le yaabilajoʼ chéen junpʼéel tiʼ u jatsʼuts modos Jéeoba yéetel letiʼe modos maas ku yeʼesikoʼ. Letiʼeʼ yaabilaj, maʼ chéen yaan u yaabilajiʼ. Ku nuʼuktik cada juntúul tiʼ toʼon yéetel yaabilaj. Jach kiʼimak k-óol úuchik u beetik Jéeoba tuláakal baʼax yaan yoʼolal u yaabilaj.

2. Le yaabilaj ku yeʼesik Diosoʼ, ¿baʼax tiʼ ku yáantkoʼon confiar? (Ilawil le dibujo yaan tu káajbal le xookaʼ.)

² Jéeobaeʼ jach u yaabiltmaj tuláakal baʼax u beetmaj. Le yaabilaj ku yuʼubik t-oʼolaloʼ ku beetik k-confiar de ke yaan u láaj béeychajal le baʼax u tukultmaj u beetik tu yoʼolal wíinikoʼ yéetel k-ojel jach maʼalob bix ken u beetil. Ken úuchkeʼ, jach yaan u taasik kiʼimak óolal tiʼ le máaxoʼob uʼuyik u tʼaanoʼ. Yoʼolal u yaabilajeʼ, Jéeobaeʼ «tsʼoʼok u yéeyik junpʼéel kʼiin utiaʼal u juzgartik u kajnáaliloʼob Luʼum yéetel justicia tu kʼab juntúul xiib u yéeymaj», lelaʼ Jesucristo (Bax. 17:31). Toʼoneʼ jach k-ojel yaan u taasik kiʼimak óolal le juicio kun beetbilaʼ. Jach  jatsʼuts le baʼax ken u beet Dios yoʼolal le máaxoʼob uʼuyik u tʼaanoʼ tumen yaan u yantal kiʼimak óolal tiʼob mantatsʼ.

3. ¿Bix ta tʼaan kun bin kaʼach tiʼ wíinik wa maʼ u yeʼesik Jéeoba u yaabilaj?

³ ¿Bix ta tʼaan kun kuxtal máak wa maʼ u yeʼesik kaʼach Jéeoba u yaabilaj? Maʼ xaaneʼ yaan u seguer u gobernartikubaʼob yéetel yaan u nuʼuktaʼaloʼob tumen Satanás, juntúul dios minaʼan u yaabilaj (2 Cor. 4:4; 1 Juan 5:19; xok Apocalipsis 12:9, 12). Jach jeʼel u bin kʼaasil tiʼ wíinik wa maʼ u yeʼesik kaʼach Jéeoba u yaabilajeʼ.

4. ¿Baʼaxten maʼ jáan xuʼulsaʼab Satanás le ka tu tsʼáajuba tu contra u gobernación Diosoʼ?

⁴ Satanaseʼ le ka tu tsʼáajuba tu contra u gobernación Dioseʼ, tu beetaj xan u tsʼáaikuba k-yáax taataʼob tu contra Dios. Letiʼeʼ tu yaʼalaj maʼ maʼalob bix u gobernar Jéeobaiʼ. Tu yaʼaleʼ maas maʼalob jeʼel u gobernar letiʼeʼ (Gén. 3:1-5). Tumen yaan u naʼat Jéeobaeʼ maʼ tu jáan xuʼulsaj Satanasiʼ, beyoʼ béeychaj u yeʼesik maʼ jaaj le baʼax tu yaʼaloʼ. Bejlaʼeʼ jach tsʼoʼok u yilaʼaleʼ mix juntúul wíinik jeʼel u páajtal u gobernar maʼalobeʼ, mix Satanás.

5. ¿Baʼax tsʼoʼok u yeʼesik le baʼaxoʼob ku yúuchul bejlaʼoʼ?

⁵ Bejlaʼeʼ le yóokʼol kaabaʼ tu bin u maas kʼastal. Maas tiʼ 100 millones máakoʼob tsʼoʼok u kíimloʼob yoʼolal le guerraʼob tsʼoʼok u yantal ichil le 100 años tsʼoʼok u máanoʼoboʼ. Le Bibliaoʼ ku yaʼalik tu yoʼolal le u tsʼook kʼiinoʼoboʼ: «Le kʼasaʼan máakoʼob[oʼ] yaan u bin u maas kʼastaloʼob» (2 Tim. 3:1, 13). Ku yaʼalik xan: «Yuumtsil, teneʼ in wojeleʼ xiibeʼ maʼ u yuumil u kuxtaliʼ, minaʼan u páajtalil u yéeyik bix ku bin xuʼulul» (Jer. 10:23). Le baʼaxoʼob táan u yúuchloʼoboʼ ku yeʼesikeʼ jach jaaj le baʼaxoʼob ku yaʼalik le Bibliaoʼ. Jéeobaeʼ maʼ tu beetaj wíinik utiaʼal u nuʼuktikuba tu juunaliʼ.

6. Jéeobaeʼ, ¿baʼaxten tu chaʼaj u yantal kʼasaʼanil?

⁶ Jéeobaeʼ úuchik u chaʼik u yantal kʼasaʼanil ichil junpʼíit tiempoeʼ, tsʼoʼok u yeʼesik chéen letiʼ jeʼel u gobernar maʼalobeʼ. Maʼ kun xáantaleʼ Dioseʼ yaan u xuʼulsik tiʼ le kʼasaʼan máakoʼoboʼ. Ken tsʼoʼokkeʼ wa yaan máax ku tsʼáaikuba tu contra le bix u gobernar Diosoʼ, letiʼeʼ tu séebaʼanil ken u luʼse. Letiʼeʼ jeʼel u páajtal u yeʼesik tiʼ le máaxoʼob maʼ tu yuʼubikoʼob tʼaan bix binik tiʼ wíinik úuchik u tsʼáaikubaʼob tu contraoʼ yéetel jeʼel u séeb xuʼulsaʼaltiʼob utiaʼal maʼ u seguer u yantal kʼasaʼanileʼ.

7, 8. ¿Bix tsʼoʼok u yeʼesik Jéeoba u yaabilaj?

⁷ Jéeobaeʼ jejeláas bix tsʼoʼok u yeʼesik yaabilaj. Chéen tuukulnakoʼon tiʼ bukaʼaj nojchil yéetel bix jatsʼutsil le kaʼan u beetmoʼ. Yaan u millonesil galaxiaʼobiʼ yéetel tiʼ cada galaxiaeʼ yaan u millonesil estrellaʼob bey xan planetaʼobiʼ. Teʼ galaxia tuʼux kajaʼanoʼonaʼ (vía láctea), le estrella maas nojoch yanoʼ letiʼe Kʼiinoʼ. Wa maʼ yoʼolal le Kʼiinoʼ bejlaʼa maʼ tu páajtal u yantal kuxtal way Luʼumeʼ. Tuláakal le baʼaloʼob yanoʼ ku yeʼesik Jéeoba beetmiloʼob, ku chíikbesik u modos, u poder, u naʼat yéetel u yaabilaj. Le Bibliaoʼ ku yaʼalik: «Le u jatsʼuts modos Dios maʼ tu páajtal u yilaʼaloʼ, chíikaʼan u yilaʼal desde ka beetaʼab yóokʼol kaab, tumen yoʼolal le baʼaxoʼob u beetmoʼ jeʼel u páajtal u tsʼaʼabal cuentaeʼ, le páajtalil yaantiʼoʼ minaʼan u xuul, tsʼoʼoleʼ le baʼaloʼobaʼ ku yeʼeskoʼob letiʼ u jaajil Dios» (Rom. 1:20).

⁸ Jéeobaeʼ tu beetaj le Luʼum utiaʼal ka yanak kuxtaloʼ. Tuláakal le baʼaxoʼob yaan  way Luʼumaʼ ku tsʼáaikoʼob kuxtal tiʼ wíinik yéetel tiʼ baʼalcheʼob. Ka tu beetaj Dios le yáax wíinikoʼoboʼ tu tsʼáajoʼob tiʼ junpʼéel jatsʼuts jardín, tu tsʼáajtiʼob junpʼéel maʼalob tuukul yéetel junpʼéel wíinklil jeʼel u páajtal u kuxtal utiaʼal mantatsʼeʼ (xok Apocalipsis 4:11). Tsʼoʼoleʼ «ku tsʼáaik baʼal u jaant le máakoʼob, tak le baʼalcheʼoboʼ, tumen u yaakunajeʼ minaʼan u xuul» (Sal. 136:25).

9. Kex ku yeʼesik yaabilaj Jéeobaeʼ, ¿bix u yilik le baʼaxoʼob kʼaastak ku beetaʼaloʼ?

⁹ Jéeobaeʼ u Diosil yaabilaj yéetel jach u pʼekmaj baʼax kʼaas. Teʼ Salmo 5:4 tak 6, ku yaʼalik yoʼolal Jéeoba: «Techeʼ maʼ juntúulech [Dios] uts tu yóol baʼax kʼaasiʼ. [...] Techeʼ a pʼektmaj le loolob máakoʼoboʼ. [...] Maʼ xan ta kʼamik le j-kaʼapʼéel ichoʼob yéetel le j-kíimsaj wíinikoʼoboʼ».

10, 11. 1) ¿Baʼax kun úuchul tiʼ le kʼasaʼan máakoʼoboʼ? 2) ¿Baʼax bendicioniloʼob ken u kʼam le máaxoʼob utsoʼoboʼ?

¹⁰ Jéeobaeʼ u tsʼaamaj u kʼiinil u xuʼulsik baʼax kʼaas way Luʼumeʼ, tumen letiʼeʼ u Diosil yaabilaj yéetel u pʼekmaj baʼax kʼaas. Le Bibliaoʼ ku yaʼalik: «Le loolob máakoʼoboʼ bíin tojolchʼintaʼakoʼob, baʼaleʼ le máaxoʼob ku kʼub óolaloʼob tiʼ Yuumtsileʼ bíin u tiaʼalintoʼob le luʼumaʼ. Ichil junpʼíit kʼiineʼ yaan u minaʼantal loolob máakoʼob». U enemigoʼob Jéeobaeʼ yaan u saʼatloʼob «jeʼel bix u yúuchul tiʼ le buutsʼoʼ» (Sal. 37:9, 10, 20).

¹¹ Le Bibliaoʼ ku yaʼalik xan: «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]» (Sal. 37:29). Le máaxoʼob kun chúukpajal u yóoloʼob tiʼ Diosoʼ «bíin u tiaʼalintoʼob le luʼumaʼ, bíin kuxlakoʼob ichil nojoch jeetsʼel óolal» (Sal. 37:11). ¿Baʼaxten? Tumen yoʼolal u yaabilajeʼ, Dioseʼ ku tsʼáaik u maas maʼalobil tiʼ le máaxoʼob ku chúukpajal u yóoloʼob tiʼoʼ. «Letiʼeʼ yaan xan u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil.» (Apo. 21:4.) ¡Jach yaʼab bendicionoʼob ken u kʼam le máaxoʼob maʼatech u tuʼubskoʼob le yaabilaj ku yeʼesik Diosoʼ!

12. ¿Bix le máaxoʼob utsoʼoboʼ?

¹² Le Bibliaoʼ ku yaʼalik: «Pakt le utsil máak minaʼan u siʼipiloʼ: jeetsʼel bíin yanak tiʼ u kuxtal le máakoʼ. Baʼaleʼ le j-maʼ uʼuyaj tʼaanoʼoboʼ bíin xuʼulsaʼakoʼob junpuliʼ; u kuxtal le loolob máakoʼ ku bisik tiʼ xuʼulsajil» (Sal. 37:37, 38). Le máaxoʼob utsoʼoboʼ ku kʼaj óoltikoʼob Jéeoba yéetel Jesús, tsʼoʼoleʼ ku beetkoʼob baʼax uts tu tʼaan (xok Juan 17:3). Letiʼobeʼ jach ku creertikoʼobeʼ «le yóokʼol kaabaʼ táan u bin u xuʼulultiʼ bey xan tiʼ u tsʼíibolaloʼob, baʼaleʼ le máax ku beetik baʼax u kʼáat Dioseʼ yaan u pʼáatal utiaʼal mantatsʼ» (1 Juan 2:17). Tumen jach taʼaytak u xuʼulsaʼal le yóokʼol kaabaʼ, maases unaj ‹k-kʼubik k-óol tiʼ Jéeoba› (Sal. 37:34).

13. ¿Bix úuchik u yeʼesik u nojoch yaabilaj Dios?

¹³ Kex j-kʼebanoʼoneʼ jeʼel u páajtal k-beetik baʼax u kʼáat Dioseʼ. Jéeobaeʼ tu tsʼáaj u Hijo utiaʼal ka u kʼub u kuxtal t-oʼolal, le oʼolal jeʼel u páajtal k-maas bisikba tu yéeteleʼ, bey úuchik u yeʼesik Dios u nojoch yaabilajoʼ. Yoʼolal le baʼax tu beetaj Jéeobaaʼ, le máaxoʼob uʼuyik u tʼaanoʼ yaan u luʼsaʼal u kʼebanoʼob yéetel maʼ kun kíimloʼob (xok Romailoʼob 5:12; 6:23). Tumen chúukpaj u yóol Jesús teʼ kaʼanoʼ, Jéeobaeʼ u yojel yaniliʼ u chúukpajal u yóol way Luʼumeʼ. Jéeobaeʼ u yaabiltmaj u Hijo, le oʼolal ka tu yilaj bix u  tratartaʼal tumen le kʼasaʼan máakoʼoboʼ jach yaachaj u yóol. Úuchik u chúukpajal u yóoleʼ, Jesuseʼ tu yeʼeseʼ chéen Jéeoba yaan u derechoil u gobernar, tsʼoʼoleʼ tu yeʼeseʼ juntúul máak minaʼan u kʼebaneʼ jeʼel u chúukpajal u yóol tiʼ Jéeoba kex jach yaj baʼax ku aktáantikeʼ.

14, 15. Úuchik u kʼubik u kuxtal Jesuseʼ, ¿baʼax utsil ku kʼamik wíinik?

¹⁴ Kex jach yaj baʼax tu aktáantaj Jesuseʼ, chúukpaj u yóol yéetel tu yeʼesaj chéen Jéeoba yaan u derechoil u gobernar. Úuchik u kʼubik u kuxtaleʼ ku béeytal u yantaltoʼon kuxtal minaʼan u xuul teʼ túumben luʼumoʼ. ¿Máasaʼ jach kiʼimak k-óol yoʼolal leloʼ? Apóstol Pabloeʼ tu tsolaj bix le yaabilaj tu yeʼesaj Jéeoba yéetel Jesusoʼ. Letiʼeʼ tu yaʼalaj: «Kex j-kʼeban máakoʼon kaʼacheʼ, Cristoeʼ kíim tu yoʼolal le kʼasaʼan máakoʼob le ka tu chukaj u kʼiiniloʼ. Tumen u suukileʼ mix máak ku tsʼáaik u kuxtal yoʼolal juntúul máak toj u kuxtal; baʼaleʼ yoʼolal le máak utsoʼ, maʼ xaaneʼ yaan máax jeʼel u yóotik u tsʼáa u kuxtal tu yoʼolaleʼ. Dioseʼ tu yeʼesajtoʼon u yaabilaj, tumen kex j-kʼeban máakoʼon kaʼacheʼ, Cristoeʼ kíim t-oʼolal» (Rom. 5:6-8). Apóstol Juaneʼ tu yaʼalaj: «Tu yoʼolal lelaʼ eʼesaʼabtoʼon u yaabilaj Dios, tumen Dioseʼ tu túuxtaj u juntúuliliʼ Paal teʼ yóokʼol kaabaʼ, utiaʼal beyoʼ ka yanaktoʼon kuxtal tu yoʼolal letiʼ. Lelaʼ letiʼe baʼax u kʼáat u yaʼal le yaabilajoʼ,  maʼ tumen wa toʼon yaabilt Diosiʼ, baʼaxeʼ letiʼ yaabiltoʼon úuchik u túuxtik u Paal kíimil t-oʼolal utiaʼal u tsʼáaik tuʼux u perdonartaʼal k-kʼebanoʼob» (1 Juan 4:9, 10).

¹⁵ Jesuseʼ tu yaʼalaj: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:16). Kex jach yaachaj u yóol Jéeobaeʼ, tu túuxtaj u Hijo utiaʼal u kʼub u kuxtal t-oʼolal. Le baʼax tu beetaʼ tu yeʼesaj bukaʼaj u yaabiltmil wíinik yéetel mix bikʼin kun xuʼulul u yaabiltik. Pabloeʼ tu tsʼíibtaj: «In wojleʼ mix kíimil, mix kuxtal, mix angeloʼob, mix gobiernoʼob, mix le baʼaloʼob yanoʼob bejlaʼeʼ, mix le baʼaloʼob ku taal u kʼiiniloʼ, mix páajtaliloʼob, mix kaʼanlil, mix taamil, mix junpʼéel tiʼ le baʼaloʼob beetaʼanoʼob jeʼel u náachkuntkoʼon tiʼ u yaakunaj Dios ku yeʼesaʼal tumen Cristo Jesús, k-Yuumtsiloʼ» (Rom. 8:38, 39).

16. 1) ¿Baʼax u Reino Dios? 2) ¿Máax u yéeymaj Jéeoba utiaʼal u nuʼuktik le Reinoaʼ?

¹⁶ U Reino Dioseʼ junpʼéel gobierno u tsʼaamaj teʼ kaʼanoʼ, lelaʼ yaan u nuʼuktaʼal tumen Jesucristo. Le Reinoaʼ ku yeʼesik le yaabilaj ku yuʼubik Jéeoba yoʼolal wíinikoʼ. Lelaʼ u kʼáat u yaʼaleʼ Jéeobaeʼ tsʼoʼok u yéeyik juntúul Rey u yaabiltmaj wíinik yéetel jach maʼalob bix u gobernar, le Reyaʼ Jesucristo (Pro. 8:31, Traducción del Nuevo Mundo). Dioseʼ tsʼoʼok u yéeyik 144,000 máakoʼob utiaʼal u gobernaroʼob yéetel Cristo teʼ kaʼanoʼ. Ken gobernarnakoʼobeʼ yaan u naʼatkoʼob bix u yuʼubikuba wíinik, tumen letiʼobeʼ kuxlajoʼob way Luʼumeʼ (Apo. 14:1). Le ka taal way Luʼumeʼ, Jesuseʼ maases tʼaanaj tiʼ u Reino Dios ka kʼaʼaytajnaji. Letiʼeʼ tu kaʼansaj tiʼ u disipuloʼob ka u kʼáatoʼob ich oración: «K-Taata yanech teʼ kaʼanoʼ, kiliʼichkúuntaʼak a kʼaabaʼ. Taalak a Reino, beetaʼak baʼax a kʼáat teʼ kaʼanoʼ bey xan way Luʼumeʼ» (Mat. 6:9, 10). Toʼoneʼ táan k-tsʼíiboltik u béeytal le baʼax k-kʼáatik ich oracionaʼ. Le ken béeyakeʼ yaʼab bendicionoʼob ken k-kʼame.

17. ¿Baʼaxten jelaʼan u gobernar Jesús tiʼ wíinik?

¹⁷ Le bix u gobernar Jesusoʼ maʼ igual tiʼ bix u gobernar wíinikiʼ. U gobierno wíinikeʼ tsʼoʼok u beetik u yantal guerraʼob tuʼux tsʼoʼok u kíimsaʼal u millonesil máakoʼob. Pero Jesuseʼ jach u yaabiltmoʼon yéetel ku yeʼesik u jatsʼuts modosoʼob Dios, maases le yaabilajoʼ (Apo. 7:10, 16, 17). Jesuseʼ tu yaʼalaj: «Koʼoteneʼex tin wiknal, tuláakleʼex máaxeʼex yaʼab a meyajeʼex yéetel aal a kuucheʼex, teen ken in beet a jeʼelsikabaʼex. Biseʼex ta wóokʼoleʼex u cheʼil in kuuch yéetel kaanbalneneʼex tiʼ teen, tumen teneʼ maʼ séeb in kʼuuxiliʼ yéetel kabal u yóol in puksiʼikʼal, beyoʼ jeʼel a kaxtikeʼex jeʼelel a tiaʼaleʼexeʼ. Tumen u cheʼil in kuucheʼ maʼ talam u bisaʼaliʼ, yéetel in kuucheʼ jach sáal» (Mat. 11:28-30). ¿Máasaʼ jach jatsʼuts le promesa tu beetaj Jesusaʼ?

18. 1) ¿Baʼax tsʼoʼok u yúuchul desde tu añoil 1914? 2) ¿Baʼax ken k-il teʼ xook ku segueroʼ?

¹⁸ Le Bibliaoʼ ku yeʼesikeʼ u Reino Dioseʼ káaj u gobernar teʼ kaʼan tu añoil 1914. Desde teʼ año jeʼeloʼ káaj u yéeyaʼal u yalab le máaxoʼob kun gobernar yéetel Jesús teʼ kaʼanoʼ yéetel káaj xan u muchʼkíintaʼal le «yaʼabkach máakoʼob» ken u salvartubaʼob ken xuʼulsaʼak le kʼasaʼan yóokʼol kaabaʼ (Apo. 7:9, 13, 14). Teʼ kʼiinoʼobaʼ, ¿tsʼoʼok wa u yaʼabtal le «yaʼabkach máakoʼob» kun muchʼkíintbiloʼ? ¿Baʼax u kʼáat Dios ka u beetoʼob? Le kʼáatchiʼobaʼ yaan u núukaʼal teʼ xook ku segueroʼ.