1. 1) Gunáʼ nga guenda jma risaca stiʼ Dios. 2) Ximodo runi sentirnu ora gánnanu Dios peʼ nga guendarannaxhii.

BIBLIA na: «De Dios nga reeda enda ranaxhii» (1 Juan 4:8). Ca diidxaʼ riʼ cusihuínnicani ti cosa: guenda ni jma risaca napa Dios nga guendarannaxhii. Qué runi sentírsibe guendarannaxhii, sínuque laabe nga guendarannaxhii. Guiráʼ ni rúnibe la? rúnibe ni pur guendarannaxhii. Guenda riʼ nga rucaa laabe gúnibe guiráʼ cosa. Galán nga gánnanu napa Dios ni bizáʼ guibáʼ ne Guidxilayú guendarannaxhii.

2. Xi nanna dxíchinu zuni Jiobá pur nadxii laanu. (Biiyaʼ dibuju zeeda ra ruzulú tema riʼ.)

² Nánnanu nadxii Jiobá guiráʼ ni bizáʼ. Nga runi, nanna dxíchinu zúnibe guiráʼ ni maʼ guniʼbe. Guzéʼtenu ti ejemplu. Cumu nadxiibe laanu la? «ma gudixhe be ti dxi cuidxi be cuenta» binni pur Xiiñibe, Jesucristu (Hechos 17:31). Nuunu seguru jneza modo guni juzgar Jesús laanu. Óraca maʼ zanda guibani guiráʼ binni guzuubaʼ diidxaʼ  nayecheʼ ne qué ziuu dxi gusaana de gápacaʼ ndaayaʼ stiʼ Dios.

3. Xi ñaca xa de laanu pa qué ñannaxhii Jiobá laanu.

³ Xi ñaca xa de laanu pa qué ñannaxhii Jiobá laanu yaʼ. Qué ñuu dxi nusaana de ñuni mandar binni laca laa ne qué ñuu dxi nireecaʼ ndaaniʼ náʼ Binidxabaʼ, dios malu sticaʼ (2 Corintios 4:4; 1 Juan 5:19; biindaʼ Apocalipsis 12:9, 12). ¡Aque triste pa nizaaca nga xa!

4. Xiñee bidii Jiobá lugar gucaalú Binidxabaʼ laa.

⁴ Dxi bicaalú Binidxabaʼ Jiobá la? laaca bicaabe Adán ne Eva gúnicaʼ zaqueca. Beeda gácani casi ora niniʼbe qué gapa Dios derechu para guni gobernar laanu. Ne laaca guníʼ Binidxabaʼ jma jneza modo runi mandar que Dios (Génesis 3:1-5). Cumu Jiobá nga ti Dios nuu xpiaaniʼ la? bidiibe lugar tiidiʼ tiempu para guihuinni pa dxandíʼ napa Binidxabaʼ razón. Peru maʼ bihuinni qué ganna diʼ Binidxabaʼ nin binni guidxilayú guni mandar jneza.

5. Xi maʼ bisihuinni tiempu ni maʼ gudiʼdiʼ hasta nagasi.

⁵ Ca dxi riʼ, jma nagana modo nabani binni. Lu ti gayuaa iza ni maʼ gudiʼdiʼ hasta nagasi, maʼ guti jma de ti gayuaa millón binni lu guerra. Biblia na jma malu zaca binni «ora mayaca izaa xhi guidxilayú», o lu ca últimu dxi (2 Timoteo 3:1, 13). Laaca caniʼni «cadi lu náʼ diʼ binni nuu neza stiʼ. Cadi lu náʼ diʼ binni nuu guni mandar ra guzuhuaa ñee» (Jeremías 10:23). Dxandíʼ ni na textu riʼ. Guiráʼ ni maʼ guca lu Guidxilayú riʼ rusihuínnicani qué nuzáʼ diʼ Jiobá laanu para gaca mandarnu stúbisinu, sínuque caquiiñeʼ gacané Dios laanu.

6. Xiñee cudiiruʼ Jiobá lugar chuʼ binni malu.

⁶ Yanna, xiñee cudiiruʼ Jiobá lugar chuʼ binni malu yaʼ. Purtiʼ zacá maʼ bihuinni ti cosa: gobiernu si stiʼ Dios nga ni jma jneza modo runi mandar. Maʼ cadi candaa diʼ para gunitilú Dios guiráʼ binni malu. Gaca si nga, pa gacalaʼdxiʼ tuuxa gusihuinni qué gapa Dios derechu para guni mandar la? nagueendaca zunitilube laa. Zanda iquiiñeʼ Dios guiráʼ ni maʼ guca lu Guidxilayú riʼ para gusihuinni naquiiñeʼ guinitilú cani qué ruzuubaʼ diidxaʼ. Qué ziuuruʼ dxi gudiibe lugar chuʼ binni malu sti biaje.

7, 8. Ximodo rusihuinni Jiobá nadxii laanu.

⁷ Rusihuinni Jiobá nadxii laanu de stale modo. Guzéʼtenu ti ejemplu. Guníʼ ique pabiáʼ naroʼbaʼ ne sicarú universu. Nuu mil de millón de planeta ne beleguí lu espaciu. Tobi de ca beleguí riʼ nga Gubidxa. Pa qué ñuu Gubidxa la? qué ñuu guendanabani lu Guidxilayú. Casi na Romanos 1:20, guiráʼ ca cosa riʼ rusihuínnicani Jiobá nga bizáʼ laanu, nápabe stale poder, nuu xpiaanibe ne nadxiibe laanu.

⁸ Bizáʼ Jiobá Guidxilayú riʼ maca para guibani binni nayecheʼ luni ne guluube ca primé binni bizaʼbe ndaaniʼ ti jardín sicarú. Laaca bidiibe laacaʼ ti guendabiaaniʼ ne ti cuerpu ni zanda guibani sin gatiʼ (biindaʼ Apocalipsis 4:11). Ne Salmo 136:25 na Jiobá nga rusibani guiráʼ  ni nuu lu Guidxilayú, purtiʼ qué rirá guendarannaxhii stiʼ.

9. Neca naca Jiobá ti Dios ni nadxii binni, xii nga ca cosa ni nanaláʼdxibe.

⁹ Neca Jiobá nga Dios ni rannaxhii, nanaláʼdxibe guiráʼ cosa malu. Nga runi na Salmo 5:4-6 qué riuulaʼdxiʼ Jiobá cosa malu ne nanaláʼdxibe ca binni qué iquiiñeʼ, cani ridinde ne cani rusiguii.

10, 11. 1) Xi chiguni Jiobá né ca binni qué iquiiñeʼ. 2) Xi premiu chigudii Jiobá ca binni ruzuubaʼ diidxaʼ.

¹⁰ Maʼ bidúʼyanu Jiobá nga ti Dios ni rannaxhii, peru nanaláʼdxibe guiráʼ cosa malu. Nga runi, ora gacaláʼdxibe la? zabeebe guiráʼ cosa malu nuu lu universu. Biblia na zanitilú guiráʼ binni malu, «peru cani cabeza gulá Jiobá laacaʼ zacaacaʼ guidxilayú». Ne laaca maʼ guníʼ Biblia maʼ cadi candaa diʼ para guinitilú ca enemigu stiʼ Jiobá (Salmo 37:9, 10, 20).

¹¹ Xi premiu chigudii Jiobá ca binni ruzuubaʼ diidxaʼ ni rusisaca guendarannaxhii stibe yaʼ. Biblia na: «Cani runi jneza zudii Dios laacaʼ guidxilayú» ne zabánicaʼ sin gáticaʼ luni (Salmo 37:29). Laaca caníʼ Biblia: «Cani nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale guendariuudxi» (Salmo 37:11). Xiñee chiguni Dios ndiʼ yaʼ. Purtiʼ nadxiibe ca xpínnibe ni ruzuubaʼ diidxaʼ. Biblia na: «Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ». Zaree guiráʼ cosa malu. ¡Aque sicarú guiráʼ ni chiguni Dios pur laanu! (Apocalipsis 21:4.)

12. Xi naquiiñeʼ gúninu pa racaláʼdxinu guʼyaʼ Jiobá laanu casi binni qué gapa donda.

¹² Salmo 37:37, 38 cayabi laanu: guiráʼ cani guʼyaʼ Dios «qué gapa donda» la? zabánicaʼ ne zápacaʼ stale guendanayecheʼ. Laaca ruzeeteʼ textu riʼ zunitilú Dios guiráʼ binni malu ne cani qué ruzuubaʼ diidxaʼ. Pa racaláʼdxinu guʼyaʼ Jiobá laanu casi binni ni qué gapa donda la? naquiiñeʼ gunibiaʼnu laabe ne gunibiaʼnu Xiiñibe, ne gúninu guiráʼ ni rinabaʼ Jiobá laanu (biindaʼ Juan 17:3). Naquiiñeʼ chuʼnu seguru dxandíʼ zanitilú guidxilayú riʼ, «peru qué ziuu dxi initilú ni guni ni na Dios» (1 Juan 2:17). Cumu mayaca guinitilú guidxilayú malu riʼ la? naquiiñeʼ chinándanu conseju riʼ nagueendaca: «Guleza gacané Jiobá lii ne cadi guiree cueʼluʼ de ca neza stibe» (Salmo 37:34).

13. Pora nga jma bisihuinni Jiobá nadxii laanu.

¹³ Neca binni ruchee laanu, zanda guzúʼbanu stiidxaʼ Dios. Laaca zanda gaca xhamígunu laabe purtiʼ guti Jesús para guixiá donda stinu. Racá nga jma bihuinni pabiáʼ nadxii Dios laanu. Biseendabe Xiiñibe ti ganda guilá ca binni ruzuubaʼ diidxaʼ de pecadu ne guendaguti (biindaʼ Romanos 5:12 ne 6:23). Nanna dxichi Jiobá qué zuchee Jesús ora guibani lu Guidxilayú, purtiʼ maca bisihuinni Jesús zaqué laa biaʼ tiempu guyuuné Jiobá guibáʼ. Guizáʼ biuubaʼ ladxidóʼ Jiobá ora biʼyaʼ modo bininácabe Xiiñiʼ ni nadxii. Peru qué nusaana Jesús de niníʼ napa Jiobá derechu para guni mandar laanu. Ne bisihuínnibe zanda guzuubaʼ ti binni  ni qué gapa donda stiidxaʼ Dios neca tiidiʼ ra jma nagana.

14, 15. Xi ribeendú guiráʼ binni pur guendaguti stiʼ Jesús.

¹⁴ Nabé gucaná Jesús, peru qué nuchee dede ora gutiʼ ne bisihuinni napa Bixhoze derechu para guni mandar laanu. Xi ribeendú guiráʼ binni pur guendaguti stiʼ Jesús yaʼ. Pur nga zanda guibáninu sin gátinu ndaaniʼ ti paraísu. Apóstol Pablu bisiene rusihuinni sacrificiu riʼ pabiáʼ nadxii Jiobá ne Jesús laanu. Pablu guníʼ casi guirutiʼ nudii xquendanabani pur ti «hombre runi jneza», peru zándaca chuʼ ti binni gudii xquendanabani pur ti «hombre chaʼhuiʼ». Peru guniʼbe bisihuinni Dios pabiáʼ nadxii laanu ora biseendaʼ Xiiñiʼ beeda gati pur laanu «neca cuchéʼ né nu laa» (Romanos 5:6-8). Ne sicaríʼ bicaa apóstol Juan: Dios «biluíʼ laanu pabiáʼ nadxii laanu ra biseenda tobi lucha Xiiñi ndaani guidxilayú, beda udii laanu enda nabani ni qué zaluxe. Ne sicarí rihuinni xi pe nga enda ranaxhii: cadi laanu gunaxhii nu laabe, sínuque laabe gunaxhii be laanu ne biseenda be Xiiñi be» para gatiʼ pur ca pecadu stinu (1 Juan 4:9, 10).

¹⁵ Laaca guníʼ Jesús nabé nadxii Dios binni guidxilayú, ngue runi bidii xquendanabani Xiiñiʼ «ti irá tu guni  cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Neca naná gúcani para Jiobá, bidii lugar guuticabe Xiiñiʼ pur laanu. Raríʼ ridúʼyanu guizáʼ nadxiibe laanu, ne qué ziuu dxi guchaabe modo laabe. Nga runi bicaa Pablu: «Nanna dxiʼche gasti zanda uxhele laanu de Dios ni nadxii laanu: nin enda guti, nin enda nabani, nin ángel, nin binidxabaʼ, nin ni riduʼya nu yanna riʼ, nin ni gueeda ruʼ, nin ni nuu ibáʼ, nin ni nuu xagueteʼ, nin gasti ru de irá ni bizáʼ Dios qué zanda uxhele laanu de Dios ni nadxii laanu, purti bisihuinni be pabiáʼ nadxii be laanu pur ni biʼni Jesucristu Señor stinu» (Romanos 8:38, 39).

16. 1) Xii nga Reinu stiʼ Dios. 2) Tu laa maʼ gulí Dios para guni mandar lu Reinu riʼ.

¹⁶ Sti cosa ni rusihuinni nadxii Jiobá laanu nga Reinu stiʼ Dios. Reinu riʼ nga ti gobiernu ni napa Dios guibáʼ, ne maʼ gulibe ti binni para guni mandar lu Reinu riʼ, laa nadxii laanu ne nanna guni mandar jneza (Proverbios 8:31). Laabe nga Jesucristu, Mesías que. Ne laaca maʼ gulí Dios 144,000 binni para guni mandarné Cristu guibáʼ. Guiráʼ ni gudíʼdicabe dxi bibánicabe lu Guidxilayú zacaneni laacabe guiácabe binni (Apocalipsis 14:1). De Reinu stiʼ Dios nga ni jma bisiidiʼ Jesús dxi bibani lu Guidxilayú. Bisiidibe ca discípulo stibe guni orarcaʼ sicaríʼ: «Bixhózedu ni nuu guibáʼ, guisácapeʼ laluʼ. Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mateo 6:9, 10, TNM). Guizáʼ maʼ cabézanu guidxiña dxi gaca ni zeeda lu oración ca ne guedané Reinu stiʼ Dios ndaayaʼ para guiráʼ binni guidxilayú.

17. Xiñee maʼ gadxé modo runi mandar Jesús ne maʼ gadxé modo runi mandar binni.

¹⁷ Maʼ gadxé modo runi mandar Jesús ne maʼ gadxé modo runi mandar ca gobiernu nuu lu Guidxilayú. Nabé huayati millón binni lu ca guerra runi binni. Peru Jesús nadxii laanu ne napa ca guenda sicarú ni napa Jiobá, tobi de laacani nga guendarannaxhii (Apocalipsis 7:10, 16, 17). Jesús guníʼ: «Latáʼ ra nuaa irá ni ma bidxaga de cuyubi modo guia ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mateo 11:28-30). ¡Guizáʼ nadxii Jesús laanu!

18. 1) Xi cayaca dede 1914. 2) Xi zadúʼyanu lu sti tema ca.

¹⁸ Biblia rusiidiʼ laanu bizulú cayuni mandar Reinu stiʼ Dios guibáʼ lu iza 1914. Dede dxiqué maʼ cadopa ca últimu binni ni cayaadxaʼ para guizaa 144,000 binni chiguni mandarné Cristu guibáʼ. Laaca maʼ cadopa ti grupu de binni ni zalá ora guinitilú guidxilayú para guibánicaʼ ndaaniʼ ti paraísu. Runibiáʼcabe grupu riʼ casi «jma binni», o gran muchedumbre (Apocalipsis 7:9, 13, 14). Panda binni nuu lu grupu riʼ yaʼ. Xi caquiiñeʼ gúnicabe para guilácabe yaʼ. Zadúʼyanu ni lu sti tema ca.